Read Abun Matius 10 Bible Online

Matius 10 - Abun bible

Matius 10

¹Yefun Yesus kendo An bi pakon ge musyu dik sop we ne ma, ete An syo suktinggi nai An bi pakon ne subere pakon ne nggiwa syun semda ete ben yé mwa ne sino gato i ne ge ré.

²Ye gato Yefun Yesus bes tepsu An bi yerasul gum do, ketke Simon (gato ye kendo do Petrus) sisu an bi nji Andreas, Yakobus sisu bi nji Yohanes gato yenggras Zebedeus bi gan we ne;

³Filipus, Bartolomeus, Tomas, Matius gato nai sugum kadit nje wa pemerintah; Yakobus gato Alfeus bi pa, Tadeus;

⁴Simon gato sok mo yekweke, si Yudas Iskariot gato ri ma meret os wa gwat yeko ma wa but Yefun Yesus.

⁵Yefun Yesus bi pakon ge musyu dik sop we re, Yefun Yesus syogat mu ben suk, An ki nai pakon ne do, “Nin mubot yewis yi neya bi bur-i nde. Nin mubot kota mo bur Samaria dom nde,

⁶wo nin mubot ye Israel. Ye Israel anato tepsu domba gato muri.

⁷Nin mu yo, nin kibot Ji bi sukdu do, ‘Yefun Allah ma jowa men tepsu men bi Yekwesu it anare!’

⁸Nin ben ye gato i ne ge. Nin sun ye gato kwop ne mbau satu. Nin ben ye gato suki borbuk git ne ge satu. Nin syun semda wé kadit ye gato semda ben ne. Ji syo suktinggi nai nin wa nin ben suk bok gare, nin yo bi sugum nai Ji wa nde, sane nin ós nje it yo, nin ndek sugum wa dom nde.

⁹Nin gwat sugum bot os nde,

¹⁰nin gwat nin bi yu nde, nin gwat san sun dik yo o nde, nin gwat sandal nde, nin gwat kwepu wa nin kan bot os dom nde. Nin ben suk ós nje, sane suk gato nin mitmo, bere yé bi nai nin tepsu nin bi kamba mone.

¹¹Nin kom mo kota e, nin kem mo kampung e ne yo, nin meret yetu ge dik yo mone gato ben sukndo ete kak an mit wa nin si an kem mo bi nu. Nin si an kem mone sino sane wade nin mu kadit nat ne.

¹²Nin sok mo nu mit ne yo, nin ki nai nje mone do, ‘Yefun ete ben sukndo su nin sino.’

¹³Yé gato kem mo nu ne do iwa nin si án kem mone yo, nin bi sukdu kwop mone, wo yé gato kem mo nu ne do bariwa nin si án kem mone yo, nin ki do, ‘Bere Yefun yo ben sukndo su nin more o nde.’

¹⁴Nin mu kadit pe gato yé bariwa nin si nin bi sukdu-i ne yo, nin tet nin gwes tak su bofuf ne ges kadit nin gwes satu subere yé gato kem mone jam do, án ben sukibit ket nin.

¹⁵Suk gato Ji ki re suksangge anare, su kam gato bere Yefun Allah ma ndobot yetu mo bur re sino, yé mo kota ne ku sukye wai kadit yé mo kota Sodom si Gomora gato Yefun Allah syo bot git wé mo sukibit gato yé mone ben ne.”

¹⁶“Nin jammo suk gato Ji ki re et, Ji syogat nin mu, nin tepsu jot gan gato yo nggi nde mu mo ndar krok miten. Sane nin kem fra tepsu kwis bam, nin ben suk-i njep tepsu ndabu.

¹⁷Nin mewa nin nggwa, kadit bere yé meret os wa but nin, or yé gwat nin mu mo yepasye wa ndobot nin, ete ben sukye nai nin. Or o bere yé kwam nin mo ye Yahudi bi nu ari.

¹⁸Nin benbot suk gato Ji ki ne, sane bere ye gwat nin mu mo yepasye gwem. Bere ye gwat nin mu mo yekwesu gato ye kendo do yeraja ne gwem. Mone bere nin ki sukdu subot os be gato Ji kak wa yetu sok mo Yefun Allah bi rus-i. Nin ki sukdu gato ndo ne nai yepasye ne si yewis yi neya sino.

¹⁹Ye gwat nin mu mo yepasye wa ndobot nin yo, nin nutbot suk gato bere nin ki ne teker eta nde. Nin nutbot do, ‘Men ki sukdu sa u ne?’ teker dom nde, we tepsu bi kam bere Yefun Allah Gen kadum suk gato ndo wa nin ki ne.

²⁰Sukdu gato bere nin ki ne yo ma kadit nin nde, wo sukdu ne bere ma kadit nin bi Ai, Yefun Allah mo gu ne, An Gen bere kadum sukdu gato ndo wa nin ki mone.

²¹Bere yé mo peyo-peyo syo bi nji mo yepasye syim wa gu kwop wé. Sane dom, pa bi ai bere syo bi pa mo yepasye syim wa gu kwop wé. Sane o, pa bere syo bi yenggras mo yepasye syim wa gu kwop wé.

²²Nin ben Ji bi suk-i, sane bere yé mwa ne sino bariket nin, wo ye gato onyar kem pe mo Ji sor kom mo pe gato or mó, bere ye ne kem ndo to kapyo mato kapyo.

²³Yé ben sukye nai nin mo kota dik yo it yo, nin titi kadit kota ne mu mo kota yi yo o. Suk gato Ji ki re suksangge anare, nin mubot ye Israel bi kota mwa ne sino, nin kibot Ji bi sukdu yo or nde tó yo, bere Yetu bi Pa ma nyim wé ré.

²⁴Ye gato farkor ne yo gum sye wai kadit an bi yeguru nde. Sane dom, pakwerut yo gum sye wai kadit an bi yenggras nde.

²⁵Sane ye gato farkor sor wade an gum sye tepsu an bi yeguru yo, wai mó ré. Sane dom, pakwerut gato ku gum tepsu an bi yenggras yo, wai mó ré. Rus dik yo bi yesu gato gum do Beelzebul ben sukibit, sane yo, bere yé mwa mo an bi rus-i ne sino ku gum ibit wai kadit an o ré.”

²⁶“Sane nin nyuwa yetu nde. Yefun Allah jam suk mwa ne sino, sane suk gato yé gurik su re, ri ma bere bor wa yé mwa jam. Suk gato ye dumik wa yu waré, bere yé mwa jam or ré.

²⁷Suk gato Ji ki nai nin mo pe gato ndendu, nin waii ki nai yé mwa su nombrak. Suk gato Yefun Allah tom mo nin dabe, nin waii ki sye wa yé mwa jam.

²⁸Nin nyuwa ye gato nggiwa gu nin da kridek kwop ne nde, wo nin nyuwa Yefun Allah gato nggiwa gu nin da kridek si nin da gesyos ne sino, ete bare mo bot gesyos.

²⁹Yé so ndam syik ge we su sugum wokgan det dik yo sor ré, wo men bi Ai mo gu mewa ndam ne, wade ge dik yo ges gwa mo bur daret nde.

³⁰Mo nin dakai dom, nin sugo mwa ne sino, Yefun Allah newa ré.

³¹Sane nin nyuwa suk daret nde. Yefun Allah bi sukjimnut sye kas subot men yetu ndo nde, sane Yefun mewa nin wai kadit ndam mwa ne o ré.”

³²“Ye gato ki mo yé mwa gwem do, an si Ji tepsu dik, bere Ji waii ki sane nai Ji bi Ai mo gu.

³³Sarewo ye to da jam Ji gum, sarewo an bambrai wa ki Ji gum mo yé mwa gwem, sane bere Ji waii bambrai wa Ji ki ye ne gum mo Ji bi Ai gwem mo gu dom.”

³⁴“Te, nin nut do Ji ma mo bur re wa Ji ben yetu kem ndo su yu bado? Sane nde. Ji ma wa Ji ós yetu kem ndo su yu nde, wo Ji ma wa Ji ben yetu maskwa yu ete wat yu.

³⁵Ji ma wa Ji ben pa yebris maskwa ket bi ai, pa donggon maskwa ket bi im, nggonkra maskwa ket bi om.

³⁶Bere ye ku sukmaskwa mo ye ne dakai bi rus wai kadit ye yi neya.

³⁷Ye to bi sukjimnut sye mo bi ai si bi im wai kadit Ji it yo, Ji bariwa ye ne simo Ji tepsu Ji bi pakon ré. Sane dom, ye to bi sukjimnut sye mo bi pa yebris si bi pa donggon ne wai kadit Ji it yo, Ji bariwa ye ne simo Ji tepsu Ji bi pakon ré.

³⁸Ye gato bariwa ku sukye tepsu ye sam bi kwesukwin, ete bariwa sibot suk gato Ji ben ne yo, Ji bariwa ye ne simo Ji tepsu Ji bi pakon ré.

³⁹Ye to werwa an dakai mewa an nggwa, bergan an kwop ré, wo ye to bi nggwa mo Ji wa an ben Ji bi suk-i yo, bere an kem ndo to kapyo mato kapyo.”

⁴⁰“Ye to kak an mit wa nin ma ku an, tepsu an kak an mit wa Ji ma ku an. Sane dom, ye to kak an mit wa ma ku Ji, tepsu an kak an mit wa ma ku Yefun Allah gato syogat Ji ma.

⁴¹Ye to kak an mit wa yenabi ma ku an, we yenabi gwat Yefun Allah bi suktaru, bere an sisu yenabi ne ku suk gato ndo sino. Sane dom, ye to kak an mit wa ye gato ben sukndo tepsu Yefun mit ne ma ku an, we ye ne ban sukndo, bere an sisu ye ne ku suk gato ndo ne sino.

⁴²Sane dom, bere ye to syo syur dek nai Ji bi pakon wa pa da, kapre pa ne tepsu ye gato onyar kem mo Ji sim, Ji ki sare do, sangge sor, bere Yefun Allah syo suk gato ndo nai an mo suk gato an ben ne.”