Read Abun Matius 11 Bible Online

Matius 11 - Abun bible

Matius 11

¹Yefun Yesus ki sukdu bok ne nai bi pakon ge musyu dik sop we, orete An mu kadit nat ne, An mu duno nje ete gwat Yefun Allah bi suktaru ki nai nje gato kem mo kota bok neya mo bur Galilea karowa mone.

²Yohanes gato ras nje mo syur ne, yeraja Herodes bok mo sel ré. Mone Yohanes jam sukdu subot suk gato Yesus Kristus ben ne sa, an syogat an bi pakon ge bok yo mu me Yefun Yesus. Yohanes bi pakon ndobot Yefun Yesus do,

³“Nan anato Yekwesu gato Yefun Allah syogat ma mo bur re wa nai men yetu kadit sukye ete jowa men bado, men eswa ye yi yo o ma e?”

⁴Yefun Yesus ki do, “Nin satu mu ku Yohanes, ete nin ki subot suk gato nin dakai jam, nin ki subot suk gato nin me su nin gro sato re:

⁵ye gato gro ndu, gro ndo satu; ye gato gwes út, mu ndo satu; ye gato i su suki borbuk, ge, án kaim ndo satu; ye gato dabe mbut, án dabe rer satu; ye gato kwop, mbau satu; ye gato yewa suk, án jam sukdu subot os ndo gato Yefun Allah fro wa yetu ne.

⁶Ye gato yo misyar Ji mo suk gato Ji ben ne nde, wo an onyar kem pe mo Ji it yo, bere ye ne mit at wa, we bere Ji ben sukndo su an.”

⁷Yohanes bi pakon mu kadit Yefun Yesus sa, Yefun Yesus ki subot Yohanes nai yé mwa gato sum mone do, “Nin mu me suma mo pe gato kwe yo kom mo nde ne? Nin mu me es gato nofuf ti mo, bado?

⁸Sane nde. Nin mu me suma motu ne? Nin mu me yetu ge dik yo gato it san gato ndo, bado? Nde ré, ye gato it san gato ndo kem mo nu sye gato ndo.

⁹Sane, nin mu me suma motu ne? Yenabi ge dik yo, bado? Sangge, Ji ki sare do, nin mu me yenabi sor nde, wo nin mu me Yohanes gato gum kok sye wai kadit ne o ré.

¹⁰Yohanes anato ye gato ye krombot mo Yefun Allah bi sukdu sare do, ‘Yefun Allah ki do, ye gato Ji syokom gwat Ji bi suktaru anare. Ji syokom an mu nyim mo Nan gwem, subere an fro os wa Nan.’

¹¹Suk gato Ji ki re suksangge anare, Yohanes gato ras nje mo syur ne ku gum sye wai kadit yetu mwa gato nggon pe mo bur re sino kom mo kam re. Sarewo kadit ne o, ye gato tepsu pa wokgan mo Yefun Allah bi rus-i, bere an ku gum sye wai kadit Yohanes o ré.

¹²Kadit kam gato Yohanes duno nje kom mo kam re, Ji duno nje subere án onyar kem mo Ji ete sok mo Yefun Allah bi rus-i. Yetu mwa o jammo Ji bi sukduno-i, sarewo yé bok yo ma ben sukye nai ye gato brek ete jammo Ji bi sukduno-i ne. Ye Farisi si yeguru gato duno nje su Musa bi sukduno-i ne abato wergat nje subere án misyar Ji bi sukduno-i ne or ré.

¹³Kadit ketke yenabi bok ne sino si Musa ki sukdu subot suk gato bere bor sor kom mo bi kam gato Yohanes kem mo bur re.

¹⁴Nin onyar kem mo sukdu ne yo, bere nin nut do, sangge, kwa yo gato bor su re anato Yohanes tepsu yenabi Elia gato nin eswa ne.

¹⁵Nin brek nin dabe muya-muma kadit nde, wo nin jammo sukdu ne et!

¹⁶Yetu gato kem mo bur re su re ne te, tepsu suma ne? Sare, án tepsu pa wokgan gato kem mo pasar. Ge bok yo saiye nai ge bok yo o do,

¹⁷‘Men ba syek nin mo suksara, sarewo nin yo sara su men nde, nin bariwa ré. Men wo men jimnot, sarewo nin yo wo su men nde, nin bariwa ré.’

¹⁸Ye gato ma ete ben sato ba syek nin ne anato Yohanes si Yetu bi Pa ne sino. Yohanes ma sa, an git sugit nde, an da nau nde, ete yé ki an do, ‘Semda ben an ré.’

¹⁹Yetu bi Pa to Ji re ma sa, Ji git e, Ji da nau ete yé ki Ji do, ‘Ye re git sugit mwa ndo nde, An rim An syokwa kwo, An yenau, An bi yesyim mo yé gato ben sukibit sato yé gato nai sugum kadit nje wa pemerintah e neya.’ Yé ki sane, sarewo ye gato kem mo bur re su kam re jam nde suk. Yefun gato jam suk mwa ne sino fro os gato ndo ne, ete bere yé me os ne bor ré, ete yé ki do, sangge, os ne sa, os ndo.”

²⁰Orete Yefun Yesus kiket nje mo kota gato An ben suk mwa gato ben nje yeket mone, sarewo yé ne yo kwet kadit sukibit gato yé ben ne nde, án yo jammo Yefun nde.

²¹Yefun Yesus kiket án do, “Ji ben ye gato i mo kota Korazim si kota Betsaida ne ge ré, Ji syun semda titi wé kadit nje mone dom, sarewo yé yo kwet kadit sukibit gato yé ben ne nde. Sane bere Yefun Allah ben sukye nai nje mo kota we ne, we Ji do ben suk mwa gato ben yé yeket mo kota Tirus si kota Sidon yo, bergan sor, ete yé mone kwet kadit sukibit gato yé ben ne kekro, orete án it san gato te, ete án krer bofuf mo án su subere yé jam do, án kwet kadit sukibit ne it.

²²Sarewo Ji ki sare do, su kam gato bere Yefun Allah ma ndobot yetu mo bur re sino, nin yé gato kem mo kota Korazim si kota Betsaida, bere nin ku sukye wai kadit yé mo kota Tirus si Sidon o ré.

²³Sane dom, nin yé gato kem mo kota Kapernaum, bere yé bes nin gum kok wai kadit nje mo kota yi neya bado? Sane nde, bere Yefun Allah bare nin mo bot gesyos. Suk mwa gato Ji ben nje yeket mo kota Kapernaum ne, Ji do ben suga nyim mo kota Sodom ne yo, yé mo kota Sodom kwet kadit sukibit gato án ben ne, ete su re kota ne mó tó.

²⁴Sarewo Ji ki sare do, su kam gato bere Yefun Allah ma ndobot yetu mo bur re sino, nin ku sukye wai kadit yé mo kota Sodom ne o ré.”

²⁵Yefun Yesus ki sukdu ne or sa, An ki o do, “Ji bi Ai, Nan anato Yekwesu mo gu nim ne si bur re, Ji ki ndo mo Nan, we Nan gurik sukdu gato Ji ki ne bi sukjimnut-i kadit yepasye gato jam suk mwa, ete Nan kadum sukjimnut ne nai ye gato ben nggwa sato pa wokgan.

²⁶Ji bi Ai, Nan ben suk tepsu Nan it anato Ji ki ndo mo Nan ne.”

²⁷Orete Yefun Yesus ki do, “Ji bi Ai mo gu syo suk mwa ne sino gato Ji mitmo nai Ji subere Ji tepsu Yekwesu mo Yefun Allah bi rus-i. Yefun Allah sor anato jam An bi Gan to Ji re, yetu jam nde. Ji dakai sor anato jam Yefun Allah, Ji bi Ai, kom mo mit, yetu jam nde. Sarewo ye gato Ji iwa Ji kadum Ji bi Ai nai ne, bere ye ne jam Ji bi Ai dom.

²⁸Nin yé gato syim syu ete sam sukde, nin ma mo Ji, ete Ji ós nin kem not.

²⁹Ji ben Ji bi suk-i njep, Ji yo bes Ji nggwa kok nde, sane nin bi nin nggwa mo Ji tepsu nin bi Yekwesu, nin jammo Ji bi sukduno, sane bere Ji ós nin kem not.

³⁰We sare, suk gato Ji duno nin su ne ndo, nin benbot ndaf ré. Sukduno ne yo tepsu sukde wa nin sam nde.”