Read Abun Matius 12 Bible Online

Matius 12 - Abun bible

Matius 12

¹Kam Sabat dik yo, ye Yahudi bi kam sye, Yefun Yesus muket os mo nggwe gandum mit. An do muket nggwe ne sa, An bi pakon on de ete do gandum bo, orete pakon git.

²Ye Farisi me suk gato Yefun Yesus bi pakon ben ne sa, án ki nai Yefun Yesus do, “Nan me suk gato Nan bi pakon ben ne et. Án ben suk su kam sye kam Sabat gato siri kadit men bi sukduno-i ne.”

³Yefun Yesus ki do, “Suk gato yeraja Daud si ye gato sisu Daud ben sugato án sino on de ne te, nin baca mó bado, nde e?

⁴Daud sok mo Yefun Allah bi nu, ete an si ye gato sisu an git roti gato yé grem kwop wa som Yefun Allah mone. Daud git roti ne, sarewo suk gato an ben ne siri kadit men ye Yahudi bi sukduno-i, we men bi sukduno ki do, yesu gato ben suk mo Yefun Allah bi nu ne sor ete git roti ne. {Sarewo Yefun Allah yo maskwa Daud mo suk gato an ben ne nde.}

⁵Sane dom kam sye kam Sabat bok ne sino, yesu mo Yefun Allah bi nu ben suk mo nu ne, sarewo je u anato ki do án ben suk siri kadit sukduno subot kam sye ne? Yo mo nde. Nin baca subot sukduno ne mo Musa bi sukdu mo nde bado?

⁶Wo Ji ki sare do, su re Ji dakai, gato gum kok sye wai kadit Yefun Allah bi nu sisu nin kem more ré.

⁷Yefun Allah bi sukdu ki do, ‘Ji iwa nin dakai jimnotku ye yi neya ete ós an mone, Ji bariwa nin gre suge mo bot wa som Ji su.’ Nin do jam sukdu ne, bere nin yo ki pakon gane gum ibit nde, pa yo ben suk siri mo nde,

⁸we sare, Yetu bi Pa to Ji re gum Yekwesu wa kam Sabat, sane suk gato Ji ki do, ndo wa yetu ben su kam sye, kam Sabat ne, kwop mone it.”

⁹Yefun Yesus mu kadit nat ne, ete An mu sok mo ye Yahudi bi nu ari.

¹⁰Mo nu ari ne yetu ge dik yo syim deyo út sok mone dom. Ye Farisi ge bok yo mone iwa syeret os wa ki Yefun Yesus gum ibit mo suk gato An ben ne, sane ye Farisi ne ki do, “Men ben ye gato i ne ge su kam Sabat, gato ye Yahudi bi kam sye ne anato tepsu men bi sukduno-i, bado, siri kadit e?”

¹¹Yefun Yesus ki nai án do, “Men ge dik yo bi suksi ges mo bur wak su kam sye ne te, bere men bes kadit bur wak ne bado, nde, e?

¹²Men ós suksi, sarewo yetu anato ndo wai kadit suksi, sane men ós yetu su kam sye ne anato tepsu men bi sukduno ré.”

¹³Orete Yefun Yesus ki nai ye gato syim deyo út ne do, “Nan ron nan syim et!” Ye ne ron an syim sa, an syim gato út ne ndo satu, tepsu an syim deyo ne.

¹⁴Wo ye Farisi maskwa, án mu kadit nat ne, ete án ku yu, án fro os wa gu Yefun Yesus kwop wé.

¹⁵Yefun Yesus jam sukdu subot suk gato ye Farisi fro ne sa, An mu kadit nat ne. Yé mwa boribot An, An ben yé mwa ne sino gato i ne ge ré.

¹⁶An syogat yé mwa ne do, “Nin ki sukdu subot Ji nai ye yi jam nde.”

¹⁷Sane suk gato Yefun Allah tarubot yenabi Yesaya ne bor mone ré. Yesaya krom do,

¹⁸“Ji bi pakwerut gato Ji bes anare. Ji Jimnotku An, Ji mit iwa An Ji Gen bere bok nggwa mo An, bere An ki sukdu subot os ndo gato Ji fro ne nai yewis mwa ne mo bur re sino jam.

¹⁹Bere An yo duwer nje nde, An yo saiye ret nde, Bere An yo ki sye mo pe gato yé mwa ti nde.

²⁰Bere An ben An bi suk-i njep su ye gato yo nggi nde, An yo syat es mis gato tu nde. Sukru gato yo ru nggi nde, An yo te nde. An ben sukndo sane sor wade os ri-roi gato An kak ne fro ré,

²¹ete bere yewis mwa ne mo bur re sino bi sukjimnut kem pe mo An.”

²²Ye gwat yetu ge dik yo ma mo Yefun Yesus. Ye ne gro ndu, an mbut, an yo ki suk ndo nde, we semda bok nggwa mo an ré. Sane Yefun Yesus ben ye ne ge, an gro ndo satu, an ki suk ndo dom ré.

²³Yé mwa mone yeket suk gato Yefun Yesus ben ne. Yé mwa ne ndo mo yu do, “Ye gato bi amui mo yeraja Daud, gato Yefun tom do, An syogat ma wa ós men ne te, anato ma it re, bado?”

²⁴Sarewo ye Farisi jam sukdu gato yé mwa ki ne sa, ye Farisi ki do, “Beelzebul gen pet mo Ye re anato An nggiwa syun semda wé kadit nje. Beelzebul gato biris bi yekwesu ne anato syo suktinggi nai An.”

²⁵Yefun Yesus jam ye Farisi bi sukjimnut ne sa, An ki nai ye Farisi ne do, “Yé gato kem mo bur dik yo, maskwa ket yu, ete gu yu yo, bere án yo kem ndo su yu o nde, bere án ibit or ré. Sane dom, yetu mo kota dik yo si yé mo rus dik yo do maskwa ket yu, ete duwer yu yo, bere yé mo kota si rus ne yo kem ndo su yu o nde, bere án ibit or ré.

²⁶Sane dom, mo biris bi yekwesu bi rus-i, semda e, aboksye e, yerom e ne duwer yu ete deyo syun deyo, bere biris bi yekwesu si an bi rus-i yo kem ndo su yu o nde, wo bere án sino ibit mo koirut or ré.

²⁷Nin ki do, Ji syun semda su Beelzebul bi suktinggi, sarewo ye gato simo nin syun semda su suktinggi kadit u ne? Men me suk gato ye gato simo nin ben ne, anato men jam do, sukdu gato nin ki ne, siri ré.

²⁸Ji syun semda su Beelzebul bi suktinggi nde, wo Yefun Allah Gen anato ben Ji nggiwa Ji syun semda, sane anato nin jam do, Yefun Allah bi suktinggi tepsu Yekwesu gato nggi wai bor it anare. Yefun Allah ma jowa yetu mo bur re it.”

²⁹Sane Yefun Yesus gwat sukamno do, “Men ku os wa men sok mo ye gato kaim nggi ne bi nu, ete syimsi an bi suk sa u ne? Men but an, ete men rai an krat su jamtu nyim wé yo, bere men ku os wa men syimsi an bi suk mwa mone.

³⁰Ye gato mit dik su Ji nde anato tepsu ye gato bariket Ji ré. Ye gato yo si Ji ben Yefun Allah bi suk-i nde anato tepsu ye gato ben suk gato Ji ben ne ibit or ré.

³¹Sane Ji ki sare do, sukibit gato men ben si sukibit gato men kiket Yefun Allah gum ne bere Yefun Allah yo maskwa men mo suk ne o nde, Yefun yo nutbot o nde, wo sukibit gato ye kiket Yefun Allah Gen, bere Yefun Allah yo misyar nde, wo Yefun Allah maskwa ket ye ne pe sor.

³²Ye gato ki sukdu kwa yo ibit ket Yetu bi Pa yo, bere Yefun Allah misyar sukibit ne, An yo nutbot o nde, wo ye gato ki sukdu kwa yo ibit ket Yefun Allah Gen yo, bere Yefun Allah yo misyar nde, wo An napawa pe sor su kapre mato kapyo.”

³³Yefun Yesus ki nai ye Farisi bok ne o sare do, “Men me kwe gato i-bo ne ndo yo, men jam do, kwe ne ke dom ndo. Sane dom, men me kwe gato i-bo ibit yo, men jam do, kwe ne ke dom ibit. Sane men jam kweke ne kadit i-bo gato men do ne.

³⁴Nin anato kidar suk tepsu kwis jan, nin mit si nin onyar ibit, sane bere nin ki suk gato ndo sa u ne? Suk gato men ki ne bere syesyar kadit men mit si men onyar fe!

³⁵Ye gato mit si onyar kwo ndo ne, kadit sukndo mwa gato an sum mo an mit ne, suk gato an ki ne ndo dom, wo ye gato mit si onyar ibit ne, kadit sukibit mwa gato an sum mo an mit ne, suk gato an ki ne ibit dom ré.

³⁶Ji ki sare do, su kam gato Yefun Allah ndobot yetu mwa ne sino, bere Yefun Allah ndo men subot sukdu kwayo-kwayo gato men ki daret ne sino ré.

³⁷We sare, bere Yefun Allah watbot sukdu mwa gato men ki ne. Sukdu gato men ki ne ndo yo, bere An iwa men mo sukdu ne, wo sukdu gato men ki ne ibit yo, bere men ku sukye mo sukdu ne.”

³⁸Yeguru ge bok yo si ye Farisi bok ne ki nai Yefun Yesus do, “Yeguru, men iwa Nan ben suk gato ben Yefun Allah bi suktinggi ne bor wa men me et.”

³⁹Yefun Yesus ki do, “Mban! Nin yé gato ben nin bi suk-i ibit wai, gato kem mo bur su re te, nin werwa Ji ben suk yo wa ben Yefun Allah bi suktinggi bor e? Ji yo ben suk sane mo nin gwem nde. Sarewo tepsu Yefun Allah ben An bi suktinggi bor wa yenabi Yunus, bere An waii ben sane o wa nin me et.

⁴⁰Tepsu Yunus kem mo boge sye on mit kom mo noru gri yo, kam gri yo, bere Yetu bi Pa waii kem mo bur re desnak kom mo noru gri yo, kam gri yo. {Sane bere nin me Yefun Allah bi suktinggi bor mone.}

⁴¹Su kam gato bere Yefun Allah ndobot yetu mwa ne sino, bere ye Niniwe si nin sun sino ete ki nin gum ibit, we án jam Yunus bi sukdu-i sa, án brek kadit os ibit ete án jammo Yefun ré. Ji gum-i kok sye wai kadit Yunus gum-i ne, sarewo nin yo jammo Ji bi sukdu nde.

⁴²Su kam gato bere Yefun Allah ndobot yetu mwa ne sino, nggon pasye kadit bur nden si nin sun sino. Bere nggon ne ki nin gum ibit sare do, ‘Ji ma kadit os syu mu ku yeraja Salomo subere ji jam Salomo bi sukdu-i gato kru. Sarewo Ye gato jam suk mwa wai kadit Salomo si nin kem sino, ete nin misyar An ré.’ ”

⁴³“Ye do syun semda titi wé kadit yetu ge dik yo it yo, semda ne mu meret nat wa an kem mó. Semda ne mubot pe gato syur yo mo nde, semda meret nat yo ndo wa an sem mó. An yo ku nat yo tep nde yo,

⁴⁴an nut mo an syidem do, ‘Ji satu mu mo ye gato tomga u ye syun ji kadit ne et.’ Semda do mu kom mone sa, an me ye ne tepsu nu gato ye fre kwo, ete ye fro suk mwa mone sisu ndo it.

⁴⁵Sane semda ne kendo semda ge mufit yo o gato mise wai kadit an sisu an mu kem mone dom. Semda bok ne ma, án sino bok nggwa mo yetu ne. Sane kom mo rut sa, yetu ne ibit wai kadit ketke ne o ré. Sane dom, nin yé gato ben sukibit bu gato kem mo bur su re, kam sari ne ma bere nin ibit wai kadit ketke ne o ré.”

⁴⁶Yefun Yesus si nje mone nuk sukdu saresa, Yefun Yesus bi im si bi nji ne ma. Yefun bi im si bi nji ti mo nu de nden, án iwa nukbot sukdu su Yefun Yesus.

⁴⁷Sane yé mwa mone, ge dik yo ki nai Yefun do, “Nan bi im si Nan bi nji ti mo nden, án iwa nuk sukdu su Nan.”

⁴⁸Yefun Yesus ki do, “Je u anato tepsu Ji bi im ne? Je u anato tepsu Ji bi nje ne?”

⁴⁹Sane Yefun Yesus kadum An syim bot bi pakon mone, ete An ki do, “Ji bi im anare. Ji bi nji anare.

⁵⁰Ye to ben an bi suk-i tepsu Ji bi Ai mo gu mit anato tepsu Ji bi nji e, Ji bi nyanggon e, Ji bi im e ne.”