Read Abun Matius 13 Bible Online

Matius 13 - Abun bible

Matius 13

¹Su kam ne, Yefun Yesus mu kadit nu ne, ete An mu mo em de. Kom mone sa, An kem ga.

²Mo em de ne, yé mwa teker sum wairi wa Yefun Yesus anato An it mu kem mo kwem dik yo gato nor mo em de. Yefun Yesus kem mo kwem mit ne saresa, yé mwa ne ti mo em de.

³An duno nje mone su sukamno bok yo. An ki do, “Wam dik yo, yetu ge dik yo mu am mbet gro mo bi nggwe.

⁴An do am mbet gro mo nggwe sa, deyo ges mo os, ete ndam ma git or ré.

⁵An do am mbet gro sa, mbet gro deyo o ges mo bur ka gato jok mwa ya tak bur, wo bur ka ne nifret. Mbet ne nggwar bor kekro, we bur ne nifret.

⁶Sarewo kam it, orete kam gat mbet nggwar ne ndo nde. I-brot ne yo kom kru nde, sane bergan mbet nggwar ne te ré.

⁷An am mbet gro deyo ges mo jak miten sa, jak si mbet ne kom sino, orge jak ne ben mbet yo kom ndo nde.

⁸Sarewo an am mbet gro ne o sa, mbet gro deyo ges mo bur ka gato ndo, sane mbet ne kom sisu ndo, ete ri ma mbet bo mwa wai o ré, deyo bo kom mo bo wotin dik, deyo bo kom mo bo musyu mumat, deyo bo kom mo bo musyu gri.”

⁹Yefun Yesus gwat sukamno ne or sa, Yefun Yesus ki do, “Sane nin brek nin dabe muya-muma kadit nde, wo nin jammo sukdu ne et!”

¹⁰Orete Yefun Yesus bi pakon ma ku An, ete ndo mo An do, “Suma ben anato Nan duno nje su sukamno petok sare ne?”

¹¹Yefun Yesus ki do, “Sukdu gato Yefun Allah gurik suga nyim subot os ndo gato bere Yefun Allah fro wa yetu sok mo An bi rus-i ne, Yefun Allah tarubot Ji, subere Ji ki rer wa nin dakai jam kom mo mit, sarewo ye yi neya yo jam sukdu ne rer kom mo mit nde tó.

¹²Ye to bi sukjimnut kak, bere jam Yefun Allah bi sukdu mwa wai o ré, sane bere an jam sukdu ne kom mo mit ré. Sarewo ye to da jam sukdu ne wokgan, ete an misyar, sukwokgan gato an jam ne bere ges or kadit an ré.

¹³Sane Ji duno nje su sukamno subere án da me, sarewo án yo me rer kom mo koirut nde; án da jam, sarewo án yo jam sukdu ne rer kom mo mit nde.

¹⁴Sane men me suk bor mo án tepsu suk gato yenabi Yesaya ki ne, ‘Yefun Allah ki do, Nin da syaretwa sukdu petok sor, sarewo nin jam nde bi sukjimnut ne ware; nin da sokwa suk ne petok sor, sarewo nin jam nde suk gato bor ne ware.

¹⁵Yewis ye Yahudi gare jam nde suk, we án su krat ware, án dabe mbut it, ondesor sa, án jam suk; án gro ndu it, ondesor sa, án me suk sisu ndo; án bi sukjimnut yo nggi o nde it, ondesor yo, án jam sukdu ne kom mo mit ete bere án brek ma mo Ji, orete yo, Ji ben án kem ndo it.’

¹⁶Wo nin sa, nin ku suk gato ndo, nin dakai me su nin gro, nin dakai jam su nin dabe, ete nin jam kom mo mit ré.

¹⁷Suk gato Ji ki re suksangge anare, yenabi bok ne sino e, yé mwa gato ben suk ri tepsu Yefun Allah mit suga nyim neya mit iwa me suk gato nin me su re, sarewo án yo me nde; án mit iwa jam suk gato nin jam su re, sarewo án jam nde ware.”

¹⁸“Sukamno subot ye gato am mbet gro ne bi sukjimnut mó, nin jam et.

¹⁹Mbet gro gato ges mo os mit ne anato tepsu ye gato jam sukdu subot os ndo gato Yefun Allah fro wa An tepsu men bi Yekwesu, sarewo án yo but nde, wo biris bi yekwesu ma ete nai sukdu ne wé kadit án mit or ré.

²⁰Mbet gro gato ges mo bur ka ga jok mwa ya tak bur ne anato tepsu ye gato nai sukdu ne mo án mit. Diksim án iwa,

²¹sarewo sukdu ne yo kem pe mo án mit nde, tepsu mbet gro ne i-brot yo kom mo jok nde, bergan sor, ete án misyar or ré. Diksim án jammo sukdu ne, sarewo án do ku sukye mo sukdu ne yo, ye kiket án mone yo, bergan sor, ete án misyar sukdu ne kekro ré.

²²Mbet gro gato ges mo jak mit anato tepsu ye gato but sukdu ne, sarewo án jimnotbot suk mwa gato men yetu yémo sato sugit e, san e, sugum e ne. Án bi sukjimnut kasbot suk mwa ne anato sukdu ne yo kom ndo mo án mit o nde, án yo ben suk tepsu sukdu ne nde. Sane án tepsu mbet gro mo jak mit ne, án yo kom ndo nde, i-bo yo mo nde.

²³Mbet gro gato ges mo bur ka gato ndo anato tepsu ye gato but sukdu ne ete jammo. Yé ne jamwa sukdu ne pe sane wade án ben suk gato ndo ne, deyo ben sukndo mwa, deyo ben sukndo mwa gan, deyo ben sukndo natgan, sato mbet gro gato syesyar i-bo, deyo kom mo wotin dik e, deyo kom mo musyu mumat e, deyo kom mo musyu gri e ne.”

²⁴Yefun Yesus gwat sukamno dik yo o do, “Yefun Allah nai yetu sok mo An bi rus-i ne yo, bere Yefun ben suk tepsu yenggras dik yo gato am mbet gro gato ndo mo bi nggwe.

²⁵Su noru dik yo, yé mwa ne sino sem sa, ye gato bariket yenggras ne ma ete am es bo mo mbet gro miten mo nggwe ne, orete ye ne mu kadit ré.

²⁶Mbet kom, bo sim, ete es ne kom bor it.

²⁷Ye gato bi nggwe ne bi pakwerut bok yo ma ku bi yenggras ete ki do, ‘Yenggras, nan jan mbet gro gato ndo mo nggwe, sarewo es mwa mone ma kadit u ne?’

²⁸Yenggras ne ki do, ‘Ye gato bariket men anato ben suk ne.’ Yenggras bi pakwerut bok ne ndo mo an do, ‘Nan iwa men mu tik es ne wé, bado?’

²⁹Yenggras ne ki do, ‘Nde ré. Men do tik es ne wé yo, bere mbet ne ke buk dom bayok.

³⁰Sane men misyar es ne si mbet kom sino sane wade tepsu kam gato men fro wa men do mbet ne et. Su kam ne bere ji syogat yé gato do mbet ne do, ketke án tik es, án but, ete án far, orete án syo bot git wé. Or o án sum mbet ete grem mo ji bi nu.’ ”

³¹Yefun Yesus gwat sukamno dik yo o do, “Yefun Allah jowa men yetu tepsu men bi Yekwesu yo, bere tepsu sukamno re: Yetu ge dik yo nai sawi gro dik yo ete jan mo bi nggwe.

³²Su ketke gro ne wok wai kadit gro yi neya, wo ri ma gro ne kom sor gro ne kom tepsu kweke sye wai kadit kweke yi neya. Kweke ne sye wade ndam ma tom mo i-guk.” {Sane dom Yefun Allah jowa men yetu tepsu men bi Yekwesu, diksim yetu gato sok mo An bi rus-i yo mwa nde ré, kom mo rut yetu gato sok mo An ne, yé mwa wai o ré.}

³³Yefun Yesus gwat sukamno dik yo o, An ki nai yé mwa mone do, “Yefun Allah jowa men yetu tepsu men bi Yekwesu yo, bere tepsu sukamno re, nggon ge dik yo nai bibit roti wokgan ete karwet su tepung sak dik sane sor, tepung mwa ne it sino.”

³⁴Yefun Yesus duno yé mwa ne su sukamno. An duno nje yo, An gwat sukamno mwa su sor.

³⁵Yefun Yesus gwat sukamno subere yenabi bi sukdu ne bor. Yenabi ki do, “Ji duno nje su sukamno; Ji ki rer subot sukdu gato ye gurik kadit kam gato Yefun Allah ut bur re ré.”

³⁶Yefun Yesus mu kadit yé mwa mone, ete An sok mo nu mit sa, An bi pakon ma ki nai An do, “Nan ki subot sukamno subot es gato ye am mo nggwe mbet ne, men jam rer et.”

³⁷Yefun Yesus ki do, “Ye gato am mbet gro gato ndo ne anato tepsu Ji dakai, gato ye kendo gum do Yetu bi Pa;

³⁸nggwe ne anato tepsu bur re; mbet gro gato kom ndo anato tepsu yé gato sok mo Yefun Allah bi rus-i; es ne anato tepsu yé gato sok mo biris bi yekwesu bi rus-i.

³⁹Ye gato bariket Ji ete am es bo mone anato biris bi yekwesu. Kam gato yé do mbet gro anato tepsu kam gato bur re kru. Yé gato do mbet gro anato malaikat.

⁴⁰Tepsu kam ne dom, malaikat tik es ne, ete yé syo bot git wé.

⁴¹Bere Yetu bi Pa syogat An bi malaikat mubot Yefun Allah bi rus-i subere malaikat ne nai yé mwa gato ben ye yi ges mo os ibit si yé mwa ne sino gato ben bi suk-i ibit.

⁴²Orete bere malaikat bare yé mwa ne mo bot gesyos. Mone yé mwa ne wo ndo nde, án nderku nggwa.

⁴³Orete yé gato ben suk tepsu Yefun Allah mit, bere yé ne kaim ru mo bur be mo Yefun Allah bi de-i tepsu kam ru nggi mo gu ne. Sane nin brek nin dabe muya-muma kadit nde, wo nin jammo sukdu ne et!”

⁴⁴“Men werwa Yefun Allah nai men sok mo An bi rus-i it yo, men misyar suk bok neya wé kadit men tepsu sukjimnut mo sukamno re: Yetu ge dik yo ku sukrok gato ye gurik mo nggwe dik yo. Ye ne mit iwa nai suk ne, sane an gurik sukrok ne satu o, orete an mu so an bi suk mwa wa an ku sugum, orete an mu so nggwe ne su.”

⁴⁵“Sane dom, Yefun Allah nai men yetu sok mo An bi rus-i ne yo, bere tepsu sukamno re: Yetu ge dik yo gato so suk nai ye yi neya mu meret mutiara,

⁴⁶wade, an ku gro dik yo gato ndo wai o ré, ete an mu so an bi suk mwa wa an ku sugum wade an bi suk mwa ne or kadit an. Orete an mu so mutiara ne su sugum gato an ku ne.”

⁴⁷“Sane dom, Yefun Allah nai yetu sok mo An bi rus-i ne yo, bere tepsu sukamno re: Yé bok yo gato sok boge bare án bi mwi mo em, ete án but boge wis mwa su mwi.

⁴⁸Mwi ne ses su boge, orete án tik ma nden. Án tik ma nden, orete án wat boge ne, dogato ndo án bok mo ember mit, wo dogato ibit án bare wé.

⁴⁹Su kam gato bur re kru bere malaikat ben sane. Bere malaikat mubot bur re ete nai yé gato ben bi suk-i ibit kadit yé gato ben sukndo tepsu Yefun Allah mit,

⁵⁰orete án bare yé gato ben bi suk-i ibit mo bot gesyos. Mone yé mwa ne wo ndo nde, án nderku án nggwa.”

⁵¹Yefun Yesus ndobot do, “Nin jam suk gato Ji ki re bado?” Yefun Yesus bi pakon ki do, “Men jam ré.”

⁵²Sane Yefun Yesus ki nai án do, “Sane yeguru agama mwa ne sino gato gum sok mo Yefun Allah bi rus-i ne anato jam Musa bi sukduno-i si sukduno be gato Ji gwat ma ne, ete yeguru duno nje su, tepsu yenggras mo nu dik yo gwat sukrok si sukbe kadit an bi gudang ma nden.”

⁵³Yefun Yesus gwat sukamno bok re, orete An mu kadit pe ne.

⁵⁴Yefun Yesus kom mo An dakai bi nat-i, nat gato An sye mone sa, An duno nje mo ye Yahudi bi nu ari. Yé mone yeket Yefun Yesus, án ndo do, “Ye re ku suktinggi wa jam suk mwa ete ben suk gato ben men yeket re kadit u ne?

⁵⁵Ye re anato bi ai ye gato jam ben suk su kwe sato meja e, kursi e ne bado? An bi im gum do Maria, bado? An bi nji gum do Yakobus e, Yusuf e, Simon si Yudas bado?

⁵⁶An bi nyanggon si men kem more sino, bado? Sane An ku suktinggi wa jam sukduno mwa ete ben suk gato ben men yeket kadit u ne? Ye re, An nut do An bes An nggwa tepsu yepasye, ete An ma more, ete An duno men bado a?”

⁵⁷Sane yé mwa mone bariket Yefun Yesus ré. Orete Yefun Yesus ki nai nje mone do, “Mo pe mwa ne sino yé bes yenabi gum kok, sarewo mo yenabi ne dakai bi nat-i yo, yenabi nje-i si bi rus-i ne bariwa jammo an ré.”

⁵⁸Yé mone yo onyar kem mo An nde, sane An ben suk gato ben nje yeket mone yo mwa nde.