Read Abun Matius 14 Bible Online

Matius 14 - Abun bible

Matius 14

¹Yefun Yesus kem mo kota Nazaret sa, Herodes gato jowa nje mo bur Galilea ne, an jam sukdu subot Yefun Yesus.

²Herodes ki nai yé gato ben suk su an do, “Ye ne anato Yohanes gato ras nje mo syur, ete re ne an sun kadit sukkwop. Yohanes frus an nggwa tepsu Ye ne sane anato Ye ne ku suktinggi wa ben suk gato ben men yeket ne.”

³Suga nyim Herodes syogat an bi yesukmise mu but Yohanes, ete ye rai an, orete ye grem Yohanes mo sel. Herodes bi nggon, gato gum do Herodias maskwa ket Yohanes anato Herodes but Yohanes. Su ketke Herodes bi nji gato Filipus kra Herodias, orete Herodes waii kra Herodias kadit Filipus, an bi nji ne.

⁴Sane Yohanes ndantom Herodes wam bok yo mó ré do, “Nan kra su Herodias, gato nan bi nji bi nggon ne nde. Nan kra su nan bi nji bi nggon anato siri kadit men ye Yahudi bi sukduno-i ré.”

⁵Sane Herodes da iwa gu Yohanes kwop mone, sarewo an nyuwa ye Yahudi, we ye Yahudi bes Yohanes gum yenabi.

⁶Su Herodes bi kam sye tepsu bi kam gato bi im kem su an ne, Herodias gato an bi nggon ne bi mam sara mo yé mwa gwem. Herodes mit iwa ndo nde

⁷anato an tom su Herodias bi mam ne do, “Suk gato nan mitmo bere ji syo nai nan.”

⁸Sane pa bi im wergat pa subere pa ki do, “Nan syogat yé gu Yohanes gato ras nje mo syur ne, or yé tot an su wé, ete yé grem mo mbem ete gwat ma syo nai ji more wa ji me et!”

⁹Yeraja Herodes jam suk gato pa kiwa ne sa, an kwabom dek. Wo Herodes tomfo mo yé mwa gwem, sane anato an syogat ye mu benbot suk gato pa kiwa ne sor.

¹⁰Sane an syogat ye mu tot Yohanes su toko wé mo sel mit.

¹¹Orete ye gwat Yohanes su mo mbem ma, ete ye syo nai pa donggon ne, ete pa ne waii gwat Yohanes su mu syo nai pa bi im.

¹²Orete Yohanes bi pakon ma nai Yohanes mukri ete bi mo makwe, ete pakon ne mu frot napyo nai Yefun Yesus jam.

¹³Yefun Yesus jam sukdu subot Yohanes sa, An it mo kwem ete mu kadit nat ne. An mu mo pe gato yé yo mo nde. An wadigan mu mone. Yé mwa mo kota bok neya jam An mu saresa, yé mwa ne sino muket gwes boribot An.

¹⁴Yefun Yesus mu kom motu ete is kadit kwem sa, yé mwa sum mone. An dakai jimnotku yé mwa ne, ete An ben ye gato i ne ge ré.

¹⁵Karowa kam bok sa, Yefun Yesus bi pakon ma ki nai An do, “Karowa kam bok it anare. Ye yo kem mo nat re nde. Sane Nan syogat yé mwa re mu, subere án mu mo kampung bok neya ete so sugit wa án git et.”

¹⁶Yefun Yesus ki do, “Án mu nde, wo nin anato syo sugit is án git sor.”

¹⁷Yefun Yesus bi pakon ki do, “Men bi roti koi mumek si boge ge we sor ré.”

¹⁸Yefun Yesus ki do, “Nin gwat ma mo Ji et.”

¹⁹Orete Yefun Yesus syogat yé mwa ne kem mo es mo bur, ete An nai roti koi mumek si boge ge we ne. An nai, An sok mu nim mo gu, ete An ki do, “Ndo mo Nan, Yefun Allah wa sugit gato Nan syo nai men re.” Orete An syat sugit ne ete syo nai An bi pakon. Pakon ne waii syo nai yé mwa mone git.

²⁰Yé mwa ne sino git wade án on ge, orete pakon ne mu sum sugit napta, ete pa bok mo yu. Sugit napta ne án sum sino kom mo yu musyu dik sop we ses.

²¹Ye gato git sugit mone, ye ne yebris kom mo yetu ge ribu mumek, wo nggon si pa wok ne ye yo newa nde.

²²Yé mwa ne git sugit, or Yefun Yesus syaugat An bi pakon it mo kwem ete mu nyim mo em deta. Yefun Yesus bi pakon mu-i, Yefun Yesus syogat yé mwa ne mu-i ré.

²³An syogat yé mwa ne mu, or An wadigan it mo bobuk wa An ki suk su Yefun Allah. Kom mo noru Yefun Yesus wadigan mone tó,

²⁴wo kwem si An bi pakon ne kom mo em mit ne it. Nofuf kadit kwem su ben em nap ma pet mo kwem ne.

²⁵Bundugan, ete Yefun Yesus muket gwes bot em rom deyu, mu ku An bi pakon mo kwem ne.

²⁶An bi pakon me An ma ket gwes bot em rom deyu sa, pakon bok ne kwabom kro ndo nde. Pa nyu ete saiye do, “Yekwop gen ko re go!”

²⁷Wo sugane Yefun Yesus ki nai án do, “Nin nyu nde. Ji re anato Yesus. Nin nokwa Ji nde.”

²⁸Orete Petrus ki do, “Yenggras o, sangge, Nan anane yo, Nan syogat ji is kadit kwem, ete ji muket gwes bot em deyu re ba ku Nan et.”

²⁹Yefun Yesus ki do, “Nan ma sor!” Sane Petrus is kadit kwem ete muket gwes bot em rom deyu, mu ku Yefun Yesus.

³⁰Wo Petrus me nofuf kas nggi sa, an nyu, ete an ngga mo em mit, bergan an rap mone, sane an saiye do, “Yenggras o, Nan nai ji se!”

³¹Sugane it, Yefun Yesus syimtok an, ete ki do, “Nan gare, nan yo onyar kem ri mo Ji nde tó. Nan bi sukjimnut we subot suk gato Ji ki nai nan ne wa suma ne?”

³²Yefun Yesus si Petrus it mo kwem sa, nofuf not ré.

³³Sane Yefun Yesus bi pakon mo kwem ne un Yefun Yesus, án ki do, “Sangge, Nan anato Yefun Allah bi Gan.”

³⁴Yefun Yesus si bi pakon kom mo em deta sa, án sino is mo bur Genesaret.

³⁵Yé mone jam do, Yefun Yesus ma, sane yé mu ki frekbot bur ne subere yé mone gwat ye gato i ne ma,

³⁶ete yé ndek mo Yefun Yesus subere An misyar ye gato i ne dakai rot An bi san. Yé mwa ne sino gato rot Yefun Yesus bi san ne, án ge ré, án jam nde án bi suki ne o ré.