Read Abun Matius 16 Bible Online

Matius 16 - Abun bible

Matius 16

¹Ye Farisi si ye Saduki ge bok yo ma ku Yefun Yesus. Án werwa meret os wa Yefun Yesus, sane án ki nai Yefun Yesus do, “Nan ben suk yo gato ben men yeket et, subere Nan kadum Yefun Allah bi suktinggi ne bor wa men me et.”

²Sarewo Yefun Yesus ki do, [“Kam bok, gu er yo, nin ki do, ‘Bere nogu nde.’

³Wo su nyotkwo sim nin ki do, ‘Gu er ete ndu, sane bere nogi.’ Nin watbot gu nim ne, ete nin jam suk gato bere bor, sarewo suma ben anato nin watbot suk gato Ji ben re, ete nin jam nde suk gato bere bor ne?”]

⁴“Mban! Nin yé gato ben nin bi suk-i ibit wai, gato kem mo bur su re te, nin werwa Ji ben suk yo wa ben Yefun Allah bi suktinggi bor e? Ji yo ben suk sane mo nin gwem nde. Sarewo tepsu Yefun Allah ben An bi suktinggi bor wa yenabi Yunus, bere An waii ben sane o wa nin me et.” Sane Yefun Yesus mu kadit án ré.

⁵Yefun Yesus si bi pakon mu mo em deta sa, án mbrinket án gwat roti.

⁶Yefun Yesus ki nai án do, “Nin mewa nin nggwa kadit ye Farisi si ye Saduki bi bibit roti-i.”

⁷Pakon ne nutbot suk gato Yefun Yesus ki ne, ete pakon ne ki nai yu do, “Yefun Yesus ki sukdu subot ye Farisi si ye Saduki bi bibit roti-i, we men yo gwat roti nde bayok.”

⁸Yefun Yesus jam suk gato An bi pakon kibot ne, sane An ndobot pa ne do, “Nin kibot roti gato nin yo gwat nde wa suma ne? Nin yo onyar kem ri mo Ji nde tó bado?

⁹Nin jam nde tó, bado? Nin napawa sugato Ji syat roti koi mumek, ete nin syo nai yebris ge ribu mumek ne git bado? Sugane nin sum roti napta tepsu yu ot ses ne?

¹⁰Sane dom, sugato Ji syat roti koi mufit, ete nin syo nai yebris ge ribu at ne te, nin sum roti napta kom mo yu ot ses ne?

¹¹Ji yo ki sukdu subot roti nde. Nin jam nde wa suma ne? Wo Ji bi sukdu do, nin mewa nin nggwa kadit ye Farisi si ye Saduki bi bibit roti ne et.”

¹²Sugane pakon ne jam do, Yefun Yesus yo kibot bibit roti gato ye kon roti su ne nde, wo An syogat bi pakon mewa án nggwa kadit ye Farisi si ye Saduki bi sukduno-i.

¹³Yefun Yesus ma kom mo bur gato karowa kota Kaisarea Filipi sa, An ndobot An bi pakon do, “Yé mwa neya kibot Yetu bi Pa to Ji re te, yé kibot Ji sa u ne?”

¹⁴Pakon ki do, “Yé bok yo ki do, Nan anato Yohanes gato ras nje mo syur. {Ye ne nut do, Yohanes ne frus an nggwa tepsu Nan.} Yé bok yo o ki do, Nan anato yenabi nyim gato gum do Elia. Yé bok yo o ki do, Nan anato yenabi Yermia, ondeyo yenabi ge dik yo o e ne.”

¹⁵Sane Yefun Yesus ndo mo An bi pakon do, “Wo nin dakai, nin nutbot Ji sa u ne?”

¹⁶Simon Petrus ki do, “Nan anato Yekwesu gato Yefun Allah bes gum Kristus, gato Yefun Allah syogat ma mo bur re wa nai men yetu kadit sukye ete jowa men. Nan anato Yefun Allah gato gesyos ne bi Gan.”

¹⁷Yefun Yesus ki do, “Simon, gato Yona bi gan, yetu yo kadum sukjimnut ne nai nan jam nde, wo Ji bi Ai mo gu ben sukndo su nan anato An kadum sukjimnut ne nai nan jam ré.

¹⁸Sane, Ji ki sare do, nan gum do Petrus, gato bi sukjimnut do, jok gato nggi. Sane saga yé nggo nu mo jok gato ye kendo do fondasi, bere Ji nggo Ji bi nu wa Ji bi rus-i kem mone mo nan si nan bi sukdu-i. Yé mwa ku os wa sok mo Ji bi rus-i mo sukdu gato nan ki subot Ji ne. Ji bi rus-i mo nu ne, bere nggi wai kadit os sukkwop o ré.

¹⁹Bere Ji bes nan tepsu yekwesu mo Ji bi rus-i sagato yeraja syo bi kunci mwa ne nai an bi yekwesu wa kak suk mwa mo bi nat-i ne. Sane suk gato nan duyawa yé ben mo bur re, Yefun Allah mo gu duyawa dom. Sane o, suk gato nan iwa yé ben mo bur re, bere Yefun Allah mo gu iwa yé ben dom.”

²⁰Sane pakon ne jam do, Yefun Yesus anato Yekwesu gato Yefun Allah syogat ma mo bur re wa nai men yetu kadit sukye ete jowa men ne sa, Yefun Yesus duyawa An bi Pakon frot nai yé yi jam.

²¹Kadit kam ne Yefun Yesus ki rer nai bi pakon ne do, “Ji mu mo kota Yerusalem et. Mone ye Yahudi bi yepasye e, yekwesú mo Yefun Allah bi nu si ye Yahudi bi yeguru agama bere ben sukye nai Ji ket kwayo-kwayo. Bere yé gu Ji kwop, sarewo kom mo kam we rek, bere Yefun Allah sun Ji kadit sukkwop o ré.”

²²Petrus syimtok Yefun Yesus wadigan mu mo nden, ete Petrus ndantom An sare do, “Yenggras o, bere Yefun Allah yo misyar yé ben sukye nai Nan nde. Mara! Bere yé yo ben suk sane nai Nan nde.”

²³Yefun Yesus brek ete ki nai Petrus do, “Nan ki sukdu yawa os wa Ji nde, biris bi yekwesu bi sukjimnut-i ko ne! Nan bi sukjimnut-i ne ben sukye wa os wa Ji. Nan gwat sukjimnut ne mu ko kadit Ji se! Nan bi sukjimnut-i yo ma kadit Yefun Allah nde, wo nan bi sukjimnut-i ma kadit yetu sor ré.”

²⁴Orete Yefun Yesus ki nai bi pakon ne do, “Ye to iwa simo Ji it yo, ye ne yo iwa ben suk ket an mit-i ne o nde, wo an ben Ji bi suk-i sor, an tepsu ye gato sam an bi kwesukwin, kapre an ku sukye mone, an kwop o, an mbau o, an simo Ji pe sor.

²⁵We sare, ye to bi sukjimnut sye wa an dakai kem ndo mo bur re yo, bergan an kwop ré, wo ye to bi nggwa mo Ji wa an ben Ji bi suk-i yo, bere ye ne kem ndo to kapyo mato kapyo.

²⁶Nin ben suk ket nin mit-i subere nin ku suk mwa mo bur re, ete nin ges mo os ibit mone, suk mwa gato nin ku ne sato sugum e, san e, nu e ne te, bere ós nin gum sok mo Yefun Allah bi rus-i sa u ne? Yo os nin nde. Bere suk mwa gato nin ku ne, nin syo nai Yefun Allah, ete bere An nai nin gum sok mo An bi rus-i bado? Mo nde, {wo nin sibot os gato Ji kak ne sor.}

²⁷We sare, Ji, gato Yetu bi Pa, bere Ji si Ji bi malaikat si Ji bi Ai bi suktinggi ne ma, ete syo suk gato ndo nai nje tepsu sukndo gato án ben ne.

²⁸Suk gato Ji ki re suksangge anare, yetu ge bok yo gato ti more yo kwop nde tó, bere án kem mo bur re sane sor án me Yetu bi Pa ma, ete Ji bi suktinggi tepsu Yekwesu gato nggi wai bor mone.”