Read Abun Matius 17 Bible Online

Matius 17 - Abun bible

Matius 17

¹Kam mumat rek o, Yefun Yesus kendo Petrus, Yakobus si bi nji Yohanes sisu An it mo banbo sye. Yefun Yesus si an ka gri re sor ré anato it mo banbo ne.

²An ka gri ne sokme sa, Yefun Yesus kaim tara o ré. An gwem ru tepsu kam su, An bi san kwo rer-rik.

³Sugane an ka gri ne me ye we gato gum do Musa si Elia si Yefun Yesus nuk subot sukdu sino.

⁴Sane Petrus ki nai Yefun Yesus do, “Yenggras o, men ka gri si Nan ma more anato ndo. Nan imo yo, ji nggo nu ti ke gri et, dik yo wa Nan, dik yo wa Musa si dik yo wa Elia.”

⁵Petrus ki suk saresa, duk gato rer-rik is ma kewa án sino, ete án jam Yefun Allah ki sukdu kadit duk mit ne do, “Ji bi Gan gato Ji jimnotku anare. Suk gato An ben ne Ji mit iwa. Nin jammo An ne sor.”

⁶Yefun Yesus bi pakon ka gri ne jam sukdu ne sa, án ka gri nyu ndo nde, án ka gri bare nggwa mo bur, án sem án gwem mu bur.

⁷Sane Yefun Yesus ma syimtok án ka gri ne, ete Yefun ki do, “Nin sun et! Nin nyu nde!”

⁸Án ka gri ne brek án gwem sa, án ka gri sok meret pe ne kekro ware, án yo me ye yo mone o nde, Yefun Yesus wadigan anato ti mone sor ré.

⁹An ka gri si Yefun Yesus is kadit banbo ne saresa, Yefun Yesus dumik wa an ka gri ne do, “Nin kibot suk gato nin ka gri me ne nai ye yi jam nde, wo Yetu bi Pa sun kadit sukkwop orete yo, nin ka gri ki nai yé yi jam.”

¹⁰Sane pakon ka gri ne ndo mo Yefun Yesus do, “Suma ben anato ye Yahudi bi yeguru agama ki do, Elia ma nyim mo Yetu bi Pa gwem mo bur re ne?”

¹¹Yefun Yesus ki do, “Sukdu gato yeguru ki ne sangge do, Elia ma nyim, ete fro os wa Ji ré.

¹²Wo Ji ki sare do, Elia da ma ré, sarewo yé yo jam an nde. Yé ben sukye nai an ket kwayo-kwayo. Sane bere yé ben sukye nai Yetu bi Pa to Ji re ket kwayo-kwayo dom.”

¹³Sugane Yefun Yesus bi pakon ka gri ne jam do, Elia gato Yefun Yesus kibot ne anato Yohanes gato ras nje mo syur ne.

¹⁴Yefun Yesus si bi pakon ka gri ne satu ma ku yé mwa sa, yebris ge dik yo ma ku Yefun Yesus, ete an tu an umsu mo Yefun Yesus gwem,

¹⁵orete an ki do, “Yenggras, Nan jimnotku ji bi pa et! Semda ben pa ndo nde wade pa tetet e, pa ges mo bot e, pa ges mo syur e ne.

¹⁶Ji gwat pa ne ma mo Nan bi pakon ware, án yo nggiwa syun semda ne wé kadit pa ne nde.”

¹⁷Yefun Yesus ki do, “Mban! Nin gare, nin yo onyar kem ri mo Yefun nde, nin su krat teker ware go! Ji bambrai wa Ji ben Ji bi suk-i njep si nin o it! Kam ot, ete bere Yefun Allah nai Ji wé kadit nin ne? Nin gwat pa ne ma mo Ji et.”

¹⁸Yefun Yesus ndantom se da ne sombok wé kadit pa ne. Sugane pa ge ré.

¹⁹Orete Yefun Yesus bi pakon ma ku An wadigan ete ndobot do, “Men yo nggiwa syun semda ne wé nde wa suma ne?”

²⁰Yefun Yesus ki do, “Nin yo onyar kem mo Yefun krat tep wa ben pa ne ge nde. Suk gato Ji ki re suksangge anare, nin onyar kem mo Yefun wokgan sor ré, saga sawi gro wokgan ne, bere nin ku suktinggi tep wa nin syogat bobuk re do, ‘Nan mu kem motu et!’ orete bobuk ne mu ré. Bere nin nggiwa ben suk mwa ne sino. [

²¹Wo men ki suk su Yefun Allah, ete men mewa men nggwa kadit sugit yei, sane sa, bere men nggiwa syun semda ga sane wé.]”

²²Pakon bok ne sino sum mo bur Galilea sa, Yefun Yesus ki nai án do, “Bere yeko ma wa but Yetu bi Pa to Ji re, ete

²³yé gu Ji kwop wé. Yé gu Ji kwop, sarewo kom mo kam we rek bere Yefun Allah sun Ji kadit sukkwop o ré.” Pakon jam sukdu ne sa, án kwabom dek subot ne sukdu ndo nde.

²⁴Yefun Yesus si bi pakon ma kom mo kota Kapernaum, orete yé gato sum sugum pajak wa Yefun Allah bi nu ma ku Petrus ete ndo do, “Nan bi yeguru, bere bi sugum mo Yefun Allah bi nu bi pajak bado, nde e?”

²⁵Petrus ki do, “Bere yenggras ne bi.” Petrus sok mo nu mit sa, Yefun Yesus ki nai an nyim do, “Simon, nan bi sukjimnut sa u subot Ji bi sukdu re ne? Yepasye mo bur re nai suk tepsu pajak kadit an dakai bi nje-i, bado, an nai kadit yedamok bok yo gato ma kem mo pe ne, e?”

²⁶Petrus ki do, “Bere yepasye nai kadit yedamok gato ma kem mone.” Orete Yefun Yesus ki do, “Sane yepasye dakai bi nje-i ne yo bi nde.

²⁷Wo kapre men yé gato Yefun bi nje-i yo bi nde, sa ndo sa, men bi pajak ne sor, subere án yo maskwa men daret nde. Sane nan mu paper em et. Nan do tik boge dofutmo, ete nan kak boge ne syokwet yo, bere nan ku sugum det dik yo mone. Sugum ne bere tep wa Ji si nan bi pajak ne sino, sane nan gwat sugum ne, ete nan biwa men ka we bi pajak et.”