Read Abun Matius 2 Bible Online

Matius 2 - Abun bible

Matius 2

¹Yenggras Herodes gum yeraja mo bur Yudea sa, Maria kem su Yefun Yesus mo kota Betlehem mo bur Yudea ne. Maria kem su Pa, orete yepasye ge bok yo gato watbot bí ma kadit nobu nim ma mo kota Yerusalem.

²Yepasye ne ma ndobot do, “Pa gato ye pe tepsu yeraja wa ye Yahudi ana u ne? Men me bí be bor mo gu nim ne anato men jam do, ye pe yeraja be dik yo ma mo bur re ré, sane men ma wa men som Pa ne et.”

³Yeraja Herodes jam sukdu ne sa, an kwabom dek ndo nde. Yeraja si yé mwa ne mo kota Yerusalem kwabom dek sino.

⁴Sane Herodes kendo yekwesú mo Yefun Allah bi nu si yeguru agama mwa ne sino sum, ete Herodes ndobot yé ne do, “Kristus gato Yefun Allah tom do, bere An syogat ma mo bur re wa nai men yetu kadit sukye ete jowa men ne te, bere bi im kem su Pa mo u ne?”

⁵Yé ne ki do, “Kristus ne bi im bere kem su Pa ne mo kota Betlehem mo bur Yudea, we yenabi dik yo krombot suktaru gato Yefun Allah ki, sare do,

⁶‘Kota Betlehem mo bur Yudea, yepasye mo bur Yudea jam do, nan sa, kota gato yé bes gum kok; we bere Yekwesu dik yo ma kadit nan. Yekwesu ne bere mewa Ji bi nje-i, gato sok mo yewis ye Israel ne tepsu ye mewa domba sisu ndo.’ ”

⁷Sane Herodes kendo yepasye gato ma kadit nobu nim ne dakai ma ku an wadigan, ye yi jam nde. Herodes ndobot yepasye ne do, “Bí ne ketke bor su kam ot ne?” Yepasye ne ki sukdu ne nai Herodes jam ré.

⁸Orete Herodes syogat yepasye ne mu mo Betlehem, an ki do, “Nin mu watbot pe ne wade nin ku Pa ne et. Nin do ku Pa ne it yo, nin ma ki napyo nai ji jam subere ji waii mu mone, ete ji som Pa ne dom.”

⁹Yeraja ki sukdu ne, orete yepasye ne mu. Yepasye ne me bí gato án me it kadit nobu nim suga nyim neya kok mone. Bí ne mu nyim mo án gwem, ete bí ne kem ti ri tepsu nu gato Pa kem mone.

¹⁰Án me bí mone sa, án mit iwa wai o ré.

¹¹Án sok mo nu mit sa, án ku Pa ne si Pa bi im gato Maria. Án ku Pa ne, or án tu án umsu, orete án som pa ne. Sane án nai suk gato bi sugum sye sato emas e, kemenyan sisu mur ete syo wa Pa.

¹²Án som Pa su suk ne, orete án satu mu mo án bi bur-i, án yo mu ku Herodes o nde, we án semda ku Yefun Allah, ete Yefun Allah duyawa án mu ku Herodes. Sane án muket os yi yo tara ré.

¹³Yepasye gato watbot bí ne mu wé, orete Yusuf semda ku Yefun bi malaikat dik yo. Malaikat ne ki do, “Bere Herodes meret Pa wa an gu Pa ne kwop wé, sane nan sun, nan gwat Pa si bi im titi mu mo bur Mesir kadit. Nin sino ke mone sane wade ji ki sukdu nai nan o et.”

¹⁴Sane Yusuf sun, an gwat Pa si bi im mu, án we si Pa titi mu mo bur Mesir su noru miten.

¹⁵Án we si Pa kem mone wade Herodes kwop. Sane suktaru gato Yefun Allah tarubot yenabi ne bor ré. Suktaru gato bor, ye krom sare do, “Ji kendo Ji bi Pa mu kadit bur Mesir.”

¹⁶Herodes jam do, yepasye ne ben kidar an sa, an maskwa ndo nde. An syogat an bi yesukmise mu gu pa yebris gato kaim sa kom mo tahun we mu bur mo kota Betlehem si nat wairi wa kota ne sino kwop wé. Herodes jam sukdu subot bi kam gato bí dik yo it mone kadit yepasye bok ne, sane Herodes gu pa yebris mwa ne wé ré.

¹⁷Sane mone, sukdu gato yenabi Yermia ki ne bor ré. Yermia bi sukdu subot Rahel bi dat gato ye gu kwop mo Betlehem re do,

¹⁸“Ye jam yé yo wo mo kota Rama. Mone yé wo, yé nderku yé bi pan do nde. Rahel wo wa bi pa. Rahel bariwa yé ben mom mit dek ré, we mom bi pa kwop or ré.”

¹⁹Herodes kwop, orete mo bur Mesir Yusuf semda ku Yefun bi malaikat dik yo.

²⁰Malaikat ne ki do, “Yé gato werwa gu nan bi Pa kwop wé ne, án dakai kwop ré, sane nan sun, nan gwat Pa si bi im satu mu mo bur Israel.”

²¹Sane Yusuf sun, an gwat Pa si bi im satu mu mo bur Israel.

²²Sarewo Yusuf jam sukdu do, Herodes bi pa gato gum do Arkelaus, ye bes tepsu yeraja mo bur Yudea win an bi ai sa, Yusuf nyuwa mu mone. An semda ku malaikat dik yo o, ete malaikat ne ki nai an do, “Nan mu mo bur Yudea nde,” sane an mu mo bur Galilea kadit.

²³Yusuf si an bi rus kem mo kota gato gum do Nazaret. Sane sukdu gato yenabi ki subot Pa ne bor mone. Yenabi ki do, “Bere ye kendo An do, An ye Nazaret.”