Read Abun Matius 20 Bible Online

Matius 20 - Abun bible

Matius 20

¹“Yefun Allah nai yetu sok mo An bi rus-i ne yo, bere tepsu sukamno re. Su nyotkwo gan, yetu ge dik yo gato bi nggwe anggur mu kendo yé bok yo ma wa ben suk mo an bi nggwe ne.

²An tom su do, bere an bi sugum kom mo perak det dik, tepsu gaji wa kam no dik, orete an syogat yé bok ne mu ben suk mo nggwe ne.

³Kam kok, an mu mo pasar ete me yé bok yo o mone gato yo ben suk nde.

⁴Sane an ki nai do, ‘Nin mu ben suk mo ji bi nggwe, ete bere ji bi sugum nai nin tepsu nin bi kamba mone.’

⁵Sane yé bok ne mu. Or o, kam ti ri, ye gato bi nggwe mu ku yé bok yo o gato dakai ti not mo pasar. Sane an kendo yé bok ne ma ben suk mo bi nggwe ne o. Or o, kam dek an ben sane o.

⁶Karowa kam bok dom, an mu mo pasar ete ku yé bok yo o dakai ti mone. An ndo mo do, ‘Suma ben anato nin dakai ti not more kadit nyotkwo sor kom mo kre re ne?’

⁷Yé bok ne ki do, ‘Ye yo ma kendo men wa ben suk yo mo nde.’ An ki do, ‘Sane, nin mu ben suk mo ji bi nggwe et.’

⁸Kom mo noru, ye gato bi nggwe ne ki nai an bi pa gato tepsu yesu wa yé mwa gato ben suk mone do, ‘Nan kendo yé gato ma ben suk ma sum, ete nan syo sugum nai án mo án bi kamba et. Nan syo bi gaji nai yé gato ma ben suk kadit kre ne nyim, orete nan syo nai ye gato ma ben suk kadit nyotkwo wari.’

⁹An syo sugum perak det dik nai gedik-gedik gato ben suk kadit kre ne.

¹⁰Sane yé bok gato ben suk kadit nyotkwo ne ma wa nai bi gaji sa, yé bok ne nut do, bere án ku sugum wai kadit ne o ré, sarewo yesu ne syo sugum perak dik nai án gedik-gedik ne sor ré.

¹¹Án ku sugum ne sa, án maskwa, án kabor ye gato bi nggwe ne.

¹²Án ki do, ‘Yé gato ma ben suk kadit kre, ben suk kom mo jam dik sor ré, wo men yé gato ben suk kadit nyotkwo, men kamba, kam gat men, wo nan bi sugum nai yé bok neya si men tepsu yu sino, sane siri ré.’

¹³Ye gato bi nggwe ki nai yé bok gato kabor an sare do, ‘Pa, ji yo ben sukibit are nde. Nin si ji tom su yu do, nin ben suk kadit nyotkwo kom mo kre, ete ji bi sugum perak det dik is nin ne, sangge bado?

¹⁴Sangge fe! Sane nin nai nin bi sugum, ete nin mu sor. Ji dakai iwa ji syo sugum det dik nai yé gato ben suk kadit kre ne dom.

¹⁵Ji dakai bi sugum, sane ji ben suk ket ji i su sugum ne anato siri bado? Ji ben sukndo, ji syo sugum mwa nai ye yi ne anato nin maskwa ji mone bado?’ ”

¹⁶Sane Yefun Yesus ki do, “Ye gato Yefun Allah kendo ma wa ben An bi suk-i, bere ye gato ben Yefun bi suk-i nam nde, bere an ku suk nyim, ete ye gato ben Yefun bi suk-i ne nam, bere an ku suk wari.”

¹⁷Yefun Yesus mu mo kota Yerusalem saresa, An kendo An bi pakon si An mu dor kadit yé yi, ete An ki nai do,

¹⁸“Men mu mo Yerusalem it anare. Mone ye meret os wa gwat yeko ma wa but Yetu bi Pa to Ji re, ete yé syo Ji mo yekwesú mo Yefun Allah bi nu si yeguru agama syim. Bere án syokom yé gu Ji kwop,

¹⁹ete án syo Ji mo yewis yi syim-i. Yewis yi ne bere ki Ji ket kwayo-kwayo, bere yé kwam Ji su bus, yé mban Ji mo kwesukwin, ete bere Ji kwop mone, wo kom mo kam we rek, bere Ji sun kadit sukkwop o ré.”

²⁰Orete Zebedeus bi nggon si bi pa ge we ma ku Yefun Yesus. Án tu án umsu mo Yefun Yesus gwem, orete án ndekwa Yefun Yesus ós án su suk yo.

²¹Yefun Yesus ndo mo án do, “Ji ós nin su suma ne?” Nggon ne ki do, “Nan tom su ji do, bere mo pe gato Nan jowa Nan bi rus-i ne yo, Nan bes ji bi pa ge we gum pasye si Nan sino, pa dik yo kem tak Nan de syim ge, pa dik yo o kem tak Nan de syim jam.”

²²Yefun Yesus ki nai pa we do, “Nin ka we jam nde suk gato nin ka we ndekwa ne. Nin ka we fro nggwa wa nin ka we ku sukye tepsu sukye gato bere Ji ku ne, bado?” Pa we ne ki do, “Men fro men nggwa wa ré.”

²³Yefun Yesus ki nai pa we ne do, “Sangge, bere nin ka we ku sukye tepsu Ji, sarewo Ji yo bi os wa Ji syo nat yo wa nin ka we kem mone nde, wo Yefun Allah sor ete fro ye gato bere kem tak Ji de syim ge si ye gato kem tak Ji de syim jam ne.”

²⁴Pakon ge musyu dik doyi neya jam sukdu gato pakon ge we re ki ne sa, án maskwa ket pa we ne.

²⁵Sane Yefun Yesus kendo pakon ge musyu dik sop we sum sino, ete An ki nai do, “Nin jam do, yé gato gum yekwesu mo bur re gato jam nde Yefun, bere yekwesu ne ben án bi suk-i su án bi rus-i ne krat wai o ré. Sane dom yekwesu gato gum yepasye bere syaugat án bi rus-I ben suk tepsu yepasye ne bi sukdu-i ne sor. Án bi rus-i tepsu án bi pakwerut-i gato benbot suk gato án imo sor.

²⁶Sarewo nin jom nin bi rus-i sane nde, wo sare, ye gato iwa yé bes an nggwa tepsu yepasye it yo, an ben nggwa tepsu pa wokgan gato iwa ós yé mwa neya et.

²⁷Ye gato iwa an gum yekwesu it yo, an ben nggwa tepsu nin bi pakwerut et,

²⁸we Yetu bi Pa to Ji re ma mo bur re wa yé ben suk wa Ji nde, wo Ji ma wa Ji ós nje, ete Ji bi nggwa tepsu suktot mo sukibit gato yé mwa ben ne.”

²⁹Yefun Yesus si bi pakon mu kadit kota Yerikho sa, yé mwa boribot Yefun Yesus.

³⁰Ye we gato gro ndu kem mo os de mone. Ye we jam Yefun Yesus mu wai ket an we sa, an we saiye. An we saiye do, “Yeraja Daud bi Dat o, Nan jimnotku men ka we et!”

³¹Yé mwa mone maskwa ket ye we ne, ete yé ndantom ye we ne do, “Nin ka we not se!” Yé da ndantom ye we, sarewo ye we ne saiye gat nggi wai o ré. An we saiye nggi o do, “Yenggras o, yeraja Daud bi Dat o, Nan jimnotku men ka we et!”

³²Yefun Yesus ti not ete kendo ye we ne do, “Nin ka we iwa Ji ós nin ka we su suma ne?”

³³Ye we ne ki do, “Yenggras, Nan ós ben men ka we gro ndo et.”

³⁴Yefun Yesus dakai jimnotku ye we ne. An ak syim mo ye we ne gro, or ye we ne gro ndo satu it anane. Orete ye we ne simo Yefun Yesus.