Read Abun Matius 22 Bible Online

Matius 22 - Abun bible

Matius 22

¹Yefun Yesus ki suk su yé mwa mone, An gwat sukamno yo o, sare do,

²“Yefun Allah nai yetu sok mo An bi rus-i ne yo, bere tepsu yeraja gato konwa sukra wa an bi gan.

³Yeraja ne syogat an bi pakwerut ge bok yo mubot nje wa kendo yé mwa ne ma, sarewo yé mwa ne bariwa ré.

⁴Sane yeraja syogat pakwerut ge bok yo o mu, an ki nai pakwerut bok ne do, ‘Nin mu ki nai yé gato ji kendo ma mo sukra gato ji konwa re do, sugit ne fro it. Ji gu ji bi suge, ji go, ete ji kon jon it. Suk mwa ne fro wa men konwa sukra ré, nin ma se!’

⁵Pakwerut bok ne kom mo ye gato yeraja kendo ma ne, sarewo yé mwa ne misyar pakwerut bi sukdu ne ré. Yé deyo dakai mu ben bi suk-i kadit, deyo o mu mo nggwe kadit, deyo o mu ben suk mo bi kantor kadit sukra ne.

⁶Deyo o but pakwerut ne ete kwam pa ne, ete gu pa bok ne kwop or ré.

⁷Sane yeraja ne maskwa ndo nde, ete an syogat an bi yesukmise mu gu ye gato ben sukibit ne kwop wé ete syo bot git yé mwa ne bi kota ne or ré.

⁸Orete yeraja kendo an bi pakwerut ne, ete an ki do, ‘Men fro suk mwa wa men konwa sukra re it, sarewo yé gato ji kendo ma ne yo tep wa si men more nde.

⁹Sane nin mubot os sye, nin kar yé gato nin ku mone.’

¹⁰Sane pakwerut bok ne mu kar ye gato án ku mo os sye ne ma, yé gato ben sukndo si yé gato ben sukibit ne sino pa kar ma sane sor, nu gato yé konwa sukra mone ses ré.

¹¹Wo yeraja ma ku yé mwa gato ma ne sa, an ku yetu ge dik yo gato it san yo tepsu wa ye ne simo sukra nde.

¹²An ndo mo ye ne do, ‘Yesyim, nan it san yo tepsu wa nan simo sukra re nde, nan ku os wa nan sok more sa u ne?’ Ye ne not sor, ye ne yo ki suk wokgan yo dom nde.

¹³Sane yeraja ki nai bi pakwerut ge bok ne do, ‘Nin bu ye re, nin rai an gwes si an syim ne krat, orete nin am an mo nden, mo pe gato ndendu. Mone yé wo ndo nde, mone yé dakai nderku nggwa.’ ”

¹⁴Kom mone sa, Yefun Yesus ki do, “Yefun Allah kendo yé mwa neya sok mo An bi rus-i, sarewo ge bok yo sor ré, ete Yefun nai sok mo An bi rus-i ne.”

¹⁵Ye Farisi bok yo gato sum mone mu ete fro sukdu wa án ndobot Yefun Yesus subere án meret os wa Yefun Yesus mo suk gato Yefun ki ne.

¹⁶Ye Farisi syogat án bi pakon ge bok yo si ye gato simo Herodes ge bok yo mu ku Yefun Yesus, ete án ndo mo Yefun Yesus do, “Yeguru, men jam do, Nan sa, Nan anato ye gato ben bi suk-i ri-roi sor. Men jam do, Nan kibot Yefun Allah bi sukdu ne yo, kapre yepasye ke, ye gato gum wok ke, Nan duno men su Yefun Allah bi sukdu-i ne rer sor. Nan duno yé mwa ne sino tepsu yu. Nan yo brek nden we mo sukdu gato Nan ki ne nde.

¹⁷Sane, men iwa men jam Nan bi sukjimnut subot sukdu re et, sare do, pemerintah bi yekwesu gato gum do Kaisar syogat men bi sugum pajak nai an, sane men ye Yahudi bi sukduno-i ki suma ne? Men bi sugum pajak anato ndo tepsu sukduno ne bado, siri kadit e?”

¹⁸Yefun Yesus jam yé bok ne meret os wa An, subere yé maskwa An mo sukdu gato An ki satu ne. {Sato Yefun Yesus ki do, men bi pajak nde, bere Kaisar maskwa An.} Wo An ki do, men bi pajak yo, bere ye Yahudi mwa ne maskwa An. Sane An ki do, “Nin yé gato kidar do, nin onyar kem mo Yefun, sarewo nin mit tara ne te, suma ben anato nin meret os wa Ji ne?

¹⁹Nin gwat sugum gato nin bi pajak su ne det dik yo ma wa Ji me et.” Yé gwat ye Roma bi sugum det dik yo ma,

²⁰Orete An ndo mo yé ne do, “Yé krom je u ana kaim mo sugum det re ne? Yé krom je u ana gum mo sugum det re ne?”

²¹Yé ki do, “Yé krom Kaisar kaim mone si yé krom Kaisar gum mone.” Sane Yefun Yesus ki nai án do, “Sane, Kaisar bi suk-i yo, men syo nai Kaisar, wo Yefun Allah bi suk-i yo, men syo nai Yefun sor.”

²²Yé jam suk gato Yefun Yesus ki ne sa, yé yeket sukdu ne. Yé Farisi bok ne yo ku os nde, sane yé misyar, ete yé mu kadit An ré.

²³Su kam ne dom, ye Saduki ge bok yo ma ku Yefun Yesus. Ye Saduki bi sukduno-i kwa yo do, ye gato kwop bere yo sun o nde. Ye Saduki re ma ndo mo Yefun Yesus do,

²⁴“Yeguru, Musa ki do, ye gato yo ku pa nde do kwop it yo, bere an bi nji waii kra su nggonna ne subere ku pa win an bi nji gato kwop ne.

²⁵Sane pa yedik ge mufit kem more mó ré. Pa dofutmo kra su nggon dik yo, orete an kwop, an yo ku pa nde. Sane pa kedowe waii kra su nggonna ne o.

²⁶Pa kedowe saga pa dofutmo ne dom, pa ne kwop, yo ku pa nde. Sane pa kedogri waii kra su nggonna ne o, orete pa ne kwop, yo ku pa nde, sane sane sor pá bok ne sino kom mo kedomufit kra su nggonna ne ware, pá bok ne sino yo ku pa nde, wo pá bok ne sino kwop or.

²⁷Kom mo rut sa, nggonna ne waii kwop wari.

²⁸Sane yo, su kam gato yekwop sun kadit sukkwop it yo, nggon gato kra su pa ge mufit ne te, bere nggon re tepsu pa u bi nggon ne?”

²⁹Yefun Yesus ki nai ye Saduki ne do, “Nin jam nde Yefun Allah bi sukdu, nin jam nde Yefun Allah bi suktinggi, sane anato nin bi sukjimnut siri.

³⁰We sare, ye gato kem mo bur re sa, án kra su yu, sarewo su kam gato yekwop sun it yo, yé mwa ne sino bere yo kra su yu o nde, wo yé mwa ne tepsu malaikat mo gu sor ré, yé yo kwop o nde.

³¹Nin watbot sukdu gato Yefun Allah ki subot yé gato sun kadit sukkwop ne mó bado? Yefun Allah ki do,

³²‘Ji anato Yefun Allah gato jom Abraham, Isak si Yakub.’ Yenggras ka gri ne da kwop su nyim neya, sarewo án mbau satu. Sane Yefun Allah yo jom ye gato kwop nde, wo Yefun jom ye gato mbau sor.” {Sane Yefun Yesus ki rer do, bere yekwop sun ré.}

³³Yé mwa gato sum mone jam sukdu ne sa, án yeket sukdu gato Yefun Yesus duno án su ne.

³⁴Ye Farisi jam do, Yefun Yesus ki bi sukdu gato ben ye Saduki not sa, án sum, orete án mu ku Yefun Yesus.

³⁵Ye Farisi ge dik yo gato owa duno nje su Yefun bi sukdu ne meret os wa Yefun Yesus. An ndo Yefun Yesus subot sukduno kwa yo.

³⁶Ye ne ndo do, “Yeguru, kadit sukdu mwa gato Yefun Allah duno men su ne, sukduno u anato sye wai kadit sukduno yi neya ne?”

³⁷Yefun Yesus ki do, “Men bi sukjimnut sye kas subot Yefun Allah Ye gato gesyos gato jom men ne et. Men bi men nggwa wa men ben An bi suk-i sisu men mit dik, men onyar dik, men bi sukjimnut dik et.

³⁸Sukduno gato sye wai, gato men jammo nyim kadit sukduno yi ne anane.

³⁹Sukduno kwa dowe bergan bi sukjimnut tepsu yu, sare do, ‘Men bi sukjimnut sye kas subot ye yi tepsu men bi sukjimnut sye kas subot men dakai et.’

⁴⁰Sukduno kwa we re anato tepsu i-ke wa sukduno mwa ne mo Musa bi sukduno-i sisu yenabi bi sukduno-i ne sino.”

⁴¹Ye Farisi sum mone tó, Yefun Yesus ndo mo án do,

⁴²“Nin nutbot Yekwesu gato Yefun Allah syogat ma mo bur re wa ós yetu ne sa u ne? Ye ne tepsu je u bi dat ne?” Ye Farisi ki do, “An anato Daud bi Dat.”

⁴³Yefun Yesus ki nai án do, “Sane, suma ben anato Yefun Allah Gen pet mo Daud, ete Daud kendo An do, ‘Ji bi Yekwesu’ ne? We sare, Daud krom do,

⁴⁴‘Yefun Allah, Ye gato gesyos ki nai ji bi Yekwesu do, Nan kem tak Ji de syim ge. Nan si Ji tepsu Yekwesu sino mone sane sor Ji syo yeko gato iwa gu Nan mo Nan syim, subere án jammo Nan et.’

⁴⁵Sane mo Mazmur ne, Daud kendo Kristus tepsu an bi Yekwesu. Sane men kendo Kristus do, ‘Daud bi Dat’ sor nde, wo An tepsu ‘Daud bi Yekwesu’ dom.”

⁴⁶Yetu ge dik yo mone yo nggiwa ki suk satu nai Yefun Yesus nde. Sane kadit kam ne, ye yo ma ndobot Yefun Yesus wa mere os wa An o nde.