Read Abun Matius 24 Bible Online

Matius 24 - Abun bible

Matius 24

¹Yefun Yesus mu kadit Yefun Allah bi nu saresa, An bi pakon ma ku An ete ki do, “Nan sokbot Yefun Allah bi nu re et.”

²Yefun Yesus ki do, “Nin dom sokbot nu ne et. Suk gato Ji ki re suksangge anare, ri ma jok mwa gato yé nggo nu su ne, bere yé ma krut jok mwa ne or ré, dik yo ut mo dik yo o nde.”

³Yefun Yesus mu kem mo banbo gato gum do Zaitun sa, An bi pakon ma ku An wadigan mone, ete pakon ndo mo An do, “Kam u ete bere suk gato Nan ki ne bor ne? Suk sato suma anato bere bor nyim wa ós men jam do, bergan it, Nan satu ma mo bur re, ete bur re kru ne?”

⁴Yefun Yesus ki do, “Nin mewa nin nggwa sawe yé yo ma kidar nin.

⁵Bere yé mwa ma ki do, ‘Ji anato Kristus gato Yefun Allah syogat ma mo bur re,’ ete án kidar yé bok ne sino jammo án ré.

⁶Bere nin jam sukdu subot yé ben sukndi karowa nin, bere nin jam sukdu subot yé gato gu yu mo peyo-peyo, sarewo nin nyu nde. Bur re yo kru nde tó, bere yé ben sukndi ete gu yu nyim wé et.

⁷Bere negara deyo futma gu negara deyo o. Bere yewis deyo futma gu yewis deyo o mone tó. Bere sui sye juwai bur re ram mo peyo-peyo. Bere sukonde sye bor mo peyo-peyo.

⁸Nin me suk bok gane bor it yo, karowa bur re kru it anane, tepsu nggon gato nukwe i su pa, bere nggon ne kem su bi pa.

⁹Su kam gane ma, yé mwa mo bur re iwedewe bere bariket nin yé gato onyar kem mo Ji. Sane bere yé but nin e, yé ben sukye nai nin, ete yé gu nin kwop.

¹⁰Sugane, yé mwa gato onyar kem mo Ji, bere misyar Ji or ré. Bere yé meret os wa yu, bere yé bariket yu.

¹¹Bere ye gato kidar do, án tepsu yenabi gato gwat suktaru kadit Yefun Allah ne bor ete kidar yé mwa.

¹²Sugane yé ben sukibit mwa wai anato yé yo jimnotku yu saga nyim ne o nde.

¹³Wo ye gato onyar kem pe mo Ji sor kom mo pe gato or mó yo, bere an kem ndo to kapyo mato kapyo.

¹⁴Bere ye ki sukdu subot os ndo gato Yefun Allah fro wa men yetu subere Yefun Allah nai men gum sok mo An bi rus-i, ete An tepsu men bi Yekwesu mone. Sukdu gato ndo ne, bere yé ki frek subot yewis mwa mo bur re or sino, eteyo bere bur re kru it anane.”

¹⁵Yefun Yesus ki o do, “Bere su kam sari ne ma nin me yetu ge dik yo ma mo Yefun Allah bi nu, ete an sok mo Yefun Allah bi gumwak fo mo Yefun bi nu mit. Ye ne, an mise teker, ete an gwat suk yo ma mone gato ben gumwak fo ne ibit, bere Yefun Allah bariwa gumwak ne or ré. (Nin yé mwa ne sino gato baca sukdu gare, nin nutbot bi sukjimnut sisu ndo et.) Yenabi Daniel anato krom sukdu subot suk ne.

¹⁶Nin do me ye ne ma ben Yefun Allah bi nu mit ibit it yo, nin yé gato kem mo bur Yudea titi mu mo banbo et.

¹⁷Nin dogato ti mo bi nu yu is mo nu mit wa nai suk yo mone nde, wo nin titi sor!

¹⁸Nin dogato ben suk mo nggwe satu mu mo nu wa nai bi san nit nde. Nin titi sor!

¹⁹Su kam ne nggon gato syimfar si nggon gato pe bi pabom er tó ne, bere ku sukye ndo nde.

²⁰Nin ki suk su Yefun Allah subere sukye gato ben nin ye Yudea ne yo bor su aina gato nyot dek nde. Nin ki suk su Yefun Allah subere nin titi su kam sye kam Sabat dom nde,

²¹we su kam gane yé ku sukye ndo nde. Kadit kam gato Yefun Allah ut bur re sor kom mo kam gato bur re kru, yé yo ku sukye gato yé teker sato sukye re yo mo nde, sukye gato yé ku su kam ne bere yé wai o ré.

²²Bere kam gato yé ku sukye su ne Yefun Allah tot napyo wé, ondeyo yé mwa ne kwop or. Yefun Allah jimnotbot yé gato Yefun fro suga nyim wa An nai sok mo An bi rus-i, sane bere An tot kam gato yé ku sukye su ne napyo wé ré.

²³Sane su kam gane, ete ye yo do ma ki do, ‘Nin me ye re et! Kristus gato Yefun Allah syogat ma wa jowa men anato ma it! Nin me ye motu et! Kristus anatu it!’ yo, nin jambot nde.

²⁴Ye gato ben kidar do, an dakai anato Kristus gato Yefun Allah syogat ma mo bur re wa nai men yetu kadit sukye ete jowa men ne bere mó. Sane dom yenabi gato ma wa kidar nin bere mó. Yé bok ne bere kadum bi suktinggi, ete ben suk gato ben nje yeket ndo nde. Yé bok ne ben bi suk-i, bergan án ben kidar nje gato Yefun fro suga nyim wa Yefun nai sok mo Yefun bi rus-i, sarewo án yo ku os mone nde.

²⁵Sane, nin jammo suk gato Ji ki re, sukdu bok ne, yo bor nde tó, Ji ki napyo nai nin jam nyim wé ré.

²⁶Sane ye yo do ma ki nai nin do, ‘Yetu bi Pa ma kem mo pe gato kwe yo kom mo nde,’ yo, nin mu me mone nde. Sane dom, ye yo do ma ki do, ‘Yetu bi Pa gurik nggwa mo nu mit mone ya,’ yo, nin jambot nde.

²⁷We sare, Yetu bi Pa ma it yo, bere yé mwa me An ma tepsu nowarek rer bot gu kadit nobu nim kom mo nobu ket.

²⁸Yetu bi Pa ma yo, bere nin jam An ma ré, tepsu nin jam suge dik yo kwop, we ndam syap mwa sum wairi wa suge mukri ne.”

²⁹“Sukye gato yé mwa ne ku su kam bok neya orete yo, kam su mo gu, bere Yefun Allah te ré. Aina bere ru rer o nde. Bí mwa ne ges kadit gu or. Suk mwa mo gu nim ne yo kas ri o nde.

³⁰Su kam gane Yetu bi Pa to Ji re bere bor mo gu. Bere Ji is ma sisu nyotem, Ji kaim rer-rik su Ji bi suktinggi gato bor mone. Sane yé mwa ne sino mo bur re iwedewe bere nyu ete wo.

³¹Malaikat dik yo fuf trompet ba sye yo, bere Ji syogat Ji bi malaikat mubot bur re iwedewe nai yé gato Yefun Allah fro suga nyim wa An nai sok mo An bi rus-i ne. Malaikat ne bere nai yé ne kadit nobu nim, kadit nobu ket, kadit nobu sem, kadit nobu nden. Malaikat nai yé mwa ne sor kadit bur ke kom mo bur naprut ne.”

³²“Men nutbot kwe ara, subere men jam sukduno kwa yo o et. Kwekwa ne kur ete i-nat kup be bor sim yo, men jam do, bergan no kro it anane.

³³Sane dom, nin me suk mwa gato Ji kibot gare bor it yo, bere nin jam do, yo nam nde ge, Ji ma tepsu yetu bi Yekwesu it anane.

³⁴Suk gato Ji ki re suksangge anare, yé gato kem mo bur su re, án sino yo kwop nde tó, suk gato Ji ki ne bor sino ré.

³⁵Gu nim ne si bur re bere kru ré, wo Ji bi sukdu ne kem sor to kapyo mato kapyo.”

³⁶“Kam gato Yetu bi Pa to Ji re satu ma su ne, yetu ge dik yo jam kam ne nde. Malaikat mo gu dom jam nde ré. Ye yo jam bi kam-i nde. Ye yo jam bi jam-i dom nde. Ji dakai, gato Yefun Allah bi Gan jam nde dom ré, wo Yefun Allah wadigan sor ete jam.

³⁷Kam gato Ji ma su ne tepsu kam gato Nowak kem mo bur re.

³⁸Su kam gato syur syé nde tó, yé git sugit e, yé da yur e, yé kra yu e ne. Yé ben suk gato sagana yé ben ne sane sor kom mo kam gato Nowak sok mo bi kwem mit ne.

³⁹Wo yé yo bi sukjimnut kom mo suk gato bere bor mone nde, sane wade syur syé ma gwat án or wé ré. Sane dom, Ji satu ma mo bur re yo, bere yé yo bi sukjimnut kom mo suk gato bere bor mone dom nde.

⁴⁰Su kam ne yetu ge we yo ben suk mo nggwe yo, bere Ji ma nai ge dik yo, wo ge dik yo Ji misyar kem.

⁴¹Nggon ge we yo krut bi gandum mo pe yo, bere Ji nai ge dik yo, wo ge dik yo Ji misyar kem.

⁴²Sane nin frawa nin nggwa, we nin jam nde kam gato bere nin bi Yekwesu ma su ne.

⁴³Ye gato bi nu jam do, ye gato syimsi suk ma su noru ne yo, bere an eswa yesyimsi ne, ete yesyimsi ne yo ku os wa sok mo nu ne nde.

⁴⁴Sane dom, nin fro nin nggwa petok sor, we bere Yetu bi Pa ma su jam gato nin jam ri nde.”

⁴⁵Yefun Yesus ki o do, “Pakwerut gato jam suk mwa, ete ben bi suk-i ri-roi tepsu bi yenggras mit ne te, men jam pa ne sa u ne? Pa ne ben bi suk-i sa u ne? Pa ne anato tepsu pa gato yenggras bes tepsu yesu wa yenggras bi pakwerut sino. Pa ne mewa pakwerut bok neya sisu ndo, pa syo sugit tep wa pakwerut git ne sino.

⁴⁶Pakwerut ne bi yenggras do ma ku pa ne yo, pa gato benbot suk gato bi yenggras syogat pa ben ne bere ku sukndo mone.

⁴⁷Suk gato Ji ki re suksangge anare, bere yenggras ne bes pa ne wa pa mewa yenggras ne bi suk mwa ne sino.

⁴⁸Wo pakwerut ne ben sukibit, ete pa nut mo pa dakai do, ‘Ji bi yenggras, nam ete bere ma,’

⁴⁹ete pa ne kwam pakwerut yi ne daret e, pa git e, pa da nau si yenau e ne.

⁵⁰Orete pa bi yenggras satu ma su mit, sisu kam gato pa jam ri nde, si jam gato pa jam ri nde.

⁵¹Sane bere pa bi yenggras sap pa kaim wip ndo nde. Orete yenggras syun pa ne mu ngga mo pe gato yé. Mo pe ne pa si ye gato kidar do, an mit iwa an ben an bi yenggras bi suk-i, sarewo an mit tara ré. Pa ne si yé ne ku sukye mone sino, án wo ndo nde, án sino nderku án dakai mone.”