Read Abun Matius 26 Bible Online

Matius 26 - Abun bible

Matius 26

¹Yefun Yesus duno nje su suk mwa ne or sa, An ki nai An bi pakon do,

²“Kam we ete kam sye gato gum do Kam Sye Waiket, nin dakai jam ré. {Yé napawa kam gato malaikat waiket ye Israel bi pa futmo mo bur Mesir suga nyim tuya.} Su kam ne, bere yé syo Yetu bi Pa to Ji re mo yé syim wa yé mban Ji mo kwesukwin.”

³Sugane yekwesú mo Yefun Allah bi nu si ye Yahudi bi yepasye sum mo Kaiafas bi nu sye. Kaiafas anato yekwesu gato gum kok wai mo Yefun Allah bi nu.

⁴Án sino sum wa fro os yo wa án but Yefun Yesus wa gu apre, subere yé mwa jam nde.

⁵Án ki nai yu do, “Men but An, sarewo men but An su kam sye re nde, sawe yé mwa more maskwa e, saiye daret, ete am men su jok.”

⁶Yefun Yesus kem mo Simon bi nu mo kampung Betania. Simon ne, su nyim neya suki borbuk git an da. Yefun Yesus kem mo nu ne saresa,

⁷nggon ge dik yo ma ku An. Nggon ne gwat manik gato grik ndo su sukbo pualam ma. Manik ne bi sugum sye. Yefun Yesus kem ga wa git sugit sa, nggon ne syé manik ne mo Yefun Yesus su.

⁸Yefun Yesus bi pakon me suk gato nggon ne ben sa, án maskwa, án ki do, “Bei! Nggon re kamo su manik ne wa suma ne?

⁹Ndo sa, men gwat manik ne, men win su sugum orete yo, men syo sugum nai yé gato yewa suk et.”

¹⁰Yefun Yesus jam án bi sukjimnut, ete Yefun ki do, “Ben sa u anato nin maskwa ket nggon re ne? Mom ben suk gato ndo wa un Ji.

¹¹Yé gato yewa suk kem su nin sino mo bur re petok sor, wo Ji yo kem pe su nin nde.

¹²Nggon re syé manik mo Ji kaim re subere mom fro Ji kaim nyim, subere Ji kwop yo, yé bi Ji mo makwe.

¹³Suk gato Ji ki re suksangge anare, bere yé mu mo pe mwa ne sino mo bur re, yé ki subot os ndo gato Yefun Allah fro wa yetu ne, bere yé ki subot suk gato nggon re ben ne dom. Bere yé napawa suk gato nggon re ben ne.”

¹⁴Orete Yefun Yesus bi pakon ge musyu dik sop we, ge dik yo gato gum do Yudas Iskariot mu ku yekwesú mo Yefun Allah bi nu.

¹⁵Judas ki nai yé ne do, “Nin syo suma is ji subere ji fro os wa nin but Yefun Yesus ne?” Yekwesú mo Yefun Allah bi nu ne ki do, “Men syo sugum perak det musyu gri nai nan.” Sane yekwesú ne newa sugum ne, ete án bi nai Yudas. {Sugum ne sye tepsu mbre toba syos dik.}

¹⁶Kadit kam gane Yudas meret os tepsu yeketut gato gwat os wa yeko ma wa but Yefun Yesus.

¹⁷Su ye Yahudi bi kam sye gato ye kendo gum do Waiket ne, bi kam futmo, su kam ne yé kon roti su bibit roti nde, yé git roti gane, roti gato yo it nde. Sane su kam ne Yefun Yesus bi pakon ma ku An, ete pa ndo mo An do, “Nan iwa men fro suk wa Nan git su kam sye re mo u ne?”

¹⁸Yefun Yesus ki do, “Nin mu mo kota, bere nin ku yetu ge dik yo, nin ki nai an do, ‘Yeguru ki do, karowa kam gato Yefun Allah fro wa Ji kwop it anare, sane bere Ji si Ji bi pakon konwa Kam Sye Waiket mo nan bi nu.’ ”

¹⁹Sane Yefun Yesus bi pakon ne mu benbot suk gato Yefun ki ne. Án mu fro sugit wa án si Yefun Yesus git su Kam Sye Waiket ne.

²⁰Kam sye ne bi noru, Yefun Yesus si bi pakon ge musyu dik sop we ne kem ga wa án guit sugit sino.

²¹Án git sino saresa, Yefun Yesus ki nai án do, “Suk gato Ji ki re suksangge anare, kadit nin re, bere nin ge dik yo meret os wa gwat yeko ma wa but Ji.”

²²Án sino jam sukdu ne or sa, án kwabom dek ku Yefun, án jimnotbot sukdu ne ndo nde, or án kadik-kadik ndo mo Yefun Yesus do, “Yenggras bi sukdu-i ne te, ji bado nde e?”

²³Yefun Yesus ki do, “Ye gato si Ji ras roti mo sukrom mo mbem re sino, ye ne anato bere meret os wa gwat yeko ma wa but Ji.

²⁴Sangge, Yetu bi Pa to Ji re bere kwop sagato yenabi krom mo Yefun Allah bi sukdu ne. Sarewo ye gato meret os wa gwat yeko ma wa but Ji bere ku sukye. Ndo sa, ye ne bi im yo pe an mo nde.”

²⁵Orete Yudas, yeketut gato bere meret os wa gwat yeko ma wa but Yefun Yesus ne ki do, “Yeguru, sangge, ji bado?” Yefun Yesus ki do, “Nan dakai duwe it.”

²⁶Yefun Yesus si An bi pakon git sugit saresa, Yefun Yesus nai roti, ete An ki do, “Ndo mo Nan, Yefun Allah wa roti gato Nan syo nai men re.” Or o An syat roti ne, An syo nai An bi pakon. An syo nai An bi pakon saresa, An ki do, “Nin nai nin git sor. Ji ku anare.”

²⁷Or o An nai mok su nau anggur, ete An ki do, “Ndo mo Nan, Yefun Allah wa nau gato Nan syo nai men re.” Or o An syo nai An bi pakon ne da saresa, An ki do, “Nin sino da et,

²⁸Ji dé anare, bere Ji dé sye wa yé mwa subere kak os be wa Yefun Allah nai yé mwa sok mo An bi rus-i sagato An tom ne. Ji dé re tepsu suktot gato Yefun Allah tom ne. Ji dé re anato sye wa kak os subere Yefun Allah yo maskwa nin mo sukibit mwa gato nin yetu ben ne o nde, An yo nutbot o nde, tepsu An rus sukibit ne wé it.

²⁹Ji ki sare do, Ji yo da nau re o nde yei, kom mo kam gato Yefun Allah jowa An bi rus-i mo Ji bi Ai bi nat be ne tepsu Yekwesu ne yo, bere Ji da o mone.”

³⁰Án git, án da nau ne, orete án kos sukos dik yo wa un Yefun Allah, or o án mu kadit pe ne mu mo nden mo bobuk Zaitun.

³¹Orete Yefun Yesus ki nai An bi pakon ne do, “Su noru re, bere nin sino titi kadit Ji, bere nin misyar Ji sagato ye krom sukamno dik yo mo Yefun Allah bi sukdu do, ‘Bere Ji gu ye gato mewa suksi, ete an bi suksi ne titi kadit an.’

³²Sarewo Yefun Allah sun Ji kadit sukkwop satu yo, bere Ji mu nyim mo bur Galilea kem kret nin motu.”

³³Petrus ki nai Yefun Yesus do, “Kapre pa ge bok re misyar Nan, ji re yo misyar Nan nde, wokgan yo dom nde.”

³⁴Yefun Yesus ki nai Petrus do, “Suk gato Ji ki re suksangge anare, ber noru re, ndam kokor yo ba nde tó, nan anato rewa Ji wam gri ré.”

³⁵Petrus ki do, “Kapre ji kwop o, ji mbau o, ji yo rewa Nan nde.” Sugane pakon bok ne ki sukdu tepsu Petrus dom.

³⁶Orete Yefun Yesus si An bi pakon bok ne mu mo nat dik yo gato gum do Getsemani. Mone Yefun Yesus ki nai pakon ne do, “Nin kem more yei, Ji mu mo neya, Ji ki suk su Yefun Allah et.”

³⁷An ki nai Petrus si Zebedeus bi pa we ne, subere an ka gri si An mu sino. Kom mo pe ne Yefun Yesus nderku nggwa, An kwabom dek subot sukye gato bere An ku ne, An nutbot wade An kaim rere su.

³⁸Yefun Yesus ki nai An bi pakon ka gri ne do, “Ji nderku Ji nggwa ndo nde. Ji kaim rere bot suk gato bere bor mo Ji ne, karowa Ji kwop rok it anare. Nin ka gri kem more yei, nin ka gri si Ji, men sino mewa yu et.”

³⁹Yefun Yesus mu ko gan kadit pakon ka gri ne, ete An sem An gwem mu bur wa An ki suk su Yefun Allah. An ki nai Yefun Allah do, “Ji bi Ai o, os yo mó yo, Nan nai Ji wé kadit sukye gato bere Ji ku re et. Sarewo Nan jammo suk gato Ji iwa ne nde, wo Nan dakai fro pe ne tepsu Nan dakai imo, bere Ji simo.”

⁴⁰Orge Yefun Yesus satu ma ku An bi pakon ka gri ne sa, pakon ne sem ré. An ndo mo Petrus do, “Jam dik sor, nin ka gri gare yo nggiwa si Ji mewa yu kom mo jam dik nde, bado?

⁴¹Nin mewa nin nggwa, nin ndekwa Yefun Allah mewa nin subere suk yo tik nin mit ete ben nin misyar Ji nde. Nin da bi sukjimnut dik wa nin jammo Ji, sarewo nin dakai yo nggiwa benbot nde.”

⁴²Yefun Yesus mu ki suk su Yefun Allah wam dik yo o, An ki do, “Ji bi Ai o, os yo wa Nan nai Ji wé kadit sukye re mo nde yo, Ji simo pe gato Nan dakai imo ne sor.”

⁴³Orete An satu ma o, An ku An bi pakon ka gri ne sem o ré. Pa ne gro rup ndo nde.

⁴⁴Sane Yefun Yesus misyar pa ka gri ne kem, ete An mu ki suk su Yefun Allah wam dogri o. An ki sukdu gado ne o.

⁴⁵Or o An satu ma ku An bi pakon ka gri ne, An ki nai do, “Nin ka gri kem not mo nat ne sor ré bado, nin ka gri sem tó are, e? Tep it! Nin sem o nde, nin sun se! Nin me re, yeko ma wa but Ji it anare. Yeketut gato meret os wa gwat yeko ma wa but Yetu bi Pa ma it anare.

⁴⁶Nin ka gri sun se! Men mu se! Yeketut gwat yeko ma wa but Ji it anare!”

⁴⁷Yefun Yesus do ki sukdu ne saresa, An bi pakon dik yo kadit pakon musyu dik sop we ne gato gum do Yudas bor mone. Yé mwa gato gwat nyom si kwekoi ne simo Yudas ma dom. Yekwesú mo Yefun Allah bi nu si ye Yahudi bi yepasye anato syogat yeko ne ma wa but Yefun Yesus.

⁴⁸Kom mo nat ne nde tó, Yudas, yeketut ne, an ki nai yeko ne do, “Nin me ye gato ji baput mó yo, An anane it, nin but An sor.”

⁴⁹Kom mo nat gato Yefun Yesus ti mone sa, Yudas mu ku Yefun Yesus. Sugane it, Yudas ki do, “Yeguru, ndo mo Nan,” orete an baput mo Yefun Yesus.

⁵⁰Yefun Yesus ki do, “Pa nji a, nan ma more wa suma ne?” Orete yeko gato si Yudas ma ne muya ete but Yefun Yesus.

⁵¹Sugane Yefun Yesus bi pakon dik yo nai bi nyom, ete sap pakwerut dik yo dabe toko wé ré. Pakwerut ne ben suk wa yekwesu gato gum kok wai mo Yefun Allah bi nu.

⁵²Yefun Yesus ki nai pakon ne do, “Nan bok nan bi nyom ne satu mo bi fat. Ye gato gu nje su nyom yo, bere ye yi waii gu an kwop su nyom o ré. Sane nan misyar sor.

⁵³Ji nggiwa Ji kendo Ji bi Ai bi yesukmise malaikat pasukan musyu dik sop we ma su re it. Nan jam nde bado?

⁵⁴Sarewo Ji do kendo malaikat mwa ne ma it yo, bere sukdu gato yenabi krom mo Yefun Allah bi sukdu ne, bere yo bor nde.”

⁵⁵Orete Yefun Yesus ki nai yeko ga mone do, “Te nin nut do Ji re, yekwesu wa yeko gato futma wa gu nin, anato nin gwat nyom si kwekoi ma wa but Ji su ne bado? Kamdik-kamdik Ji da duno nje mo Yefun Allah bi nu ne mó ré, sarewo nin yo but Ji mone nde.

⁵⁶Sarewo suk mwa gare bor, subere tepsu sukdu gato yenabi krom mo Yefun Allah bi sukdu ne.” Yefun Yesus ki sane, orete An bi pakon mwa ne sino titi kadit An ré.

⁵⁷Yeko gato but Yefun Yesus ne gwat An mu mo yekwesu gato gum kok wai mo Yefun Allah bi nu gato gum do, Kaiafas bi nu. Yeguru agama si ye Yahudi bi yepasye sum sino mone.

⁵⁸Petrus ndar boribot Yefun Yesus ko gan sane sor kom mo yekwesu gato gum kok wai mo Yefun Allah bi nu ne bi nu de. Orete Petrus si yesukmise gato mewa Yefun Yesus ne sok ket ros syo ete kem karowa mo nu de ne o. An iwa jam subot suk gato bere yé ben nai Yefun Yesus mone.

⁵⁹Yekwesú mo Yefun Allah bi nu si ye Yahudi bi yepasye si yekwesu gato sum sino wa kibot sukdu, án sino meret yé gato ma wa ndak Yefun Yesus su sukkidar, subere án ku os wa án syokom ye gu Yefun Yesus kwop wé.

⁶⁰Kapre yé mwa ma wa ndak Yefun Yesus su sukkidar, án yo ku os yo mo nde. Kom mo rut sa, yetu ge we yo ma ti mo yepasye ne gwem wa ki sukdu.

⁶¹Ye we ne ki do, “Ye re ki do, ‘Ji tarak Yefun Allah bi nu, orete kam gri rek Ji nggo nu ne satu or ré.’ ”

⁶²Orete yekwesu gato gum kok wai mo Yefun Allah bi nu ne ti, an ndo mo Yefun Yesus do, “Nan ki suma subot suk gato ye we re ndak Nan su ne? Nan yo du nde wa suma ne?”

⁶³Sarewo Yefun Yesus not sor. Yekwesu ne ki nai Yefun Yesus o do, “Ji syogat Nan ki suk gato sangge tepsu Nan ki mo Yefun Allah gato gesyos ne gwem. Nan ki rer nai men jam et, Nan anato Yekwesu gato Yefun Allah syogat ma mo bur re wa nai men yetu kadit sukye ete jowa men, bado? Te nan anato Yefun Allah bi Gan ne bado?”

⁶⁴Yefun Yesus ki do, “Sangge, suk gato nan ki ne sangge. Sane sor nde, wo Ji ki nai nin sare do, bere nin me Yetu bi Pa to Ji re kem tak Yefun Allah gato nggi wai ne de syim ge, ete bere Ji satu is ma mo bur re su nyotem kadit gu.”

⁶⁵Sugane yekwesu gato gum kok wai mo Yefun Allah bi nu ne maskwa ndo nde anato yekwesu ne syik an dakai bi san, ete an ki do, “Ye re dakai bes An nggwa kok tepsu Yefun Allah, ete An ki suk tepsu Yefun Allah ko re go! Men yo mitwa ye yi yo ma ki sukdu subot An o nde. Men sino dakai jam An kiket Yefun Allah gum ibit it.

⁶⁶Su re te, nin nutbot sa u ne?” Yé mwa mone bi sukdu dik do, “An ki Yefun Allah gum ibit ré, sane men syokom ye gu An kwop wé sor.”

⁶⁷Orete yekwesú si yepasye ne sino sukut tom Yefun Yesus gwem, án tut Yefun Yesus su án syim. Yekwesu deyo gwa su syim tak dom,

⁶⁸ete án ki do, “Nan anato Kristus gato jam suk rer yo, Nan ki ye gato gwa Nan re gum et.”

⁶⁹Petrus kem mo yekwesu gato gum kok wai mo Yefun Allah bi nu ne bi nu de saresa, nggon kwerut dik yo ma ki nai an do, “Nan dom simo Yesus, ye Galilea ne fe!”

⁷⁰Sarewo Petrus rewa sukdu ne mo yé bok ne sino gwem, an ki do, “Ji jam nde suk gato nan ki ne.”

⁷¹Orete Petrus mu syesyar ket ros syo. Or o nggon kwerut dik yo o ma me an. Nggon ne ki nai yé mone do, “Ye re sisu Yefun Yesus gato ma kadit kota Nazaret ne.”

⁷²Petrus rewa sukdu ne o, ete an dufo do, “Sangge, bur anare, gu ana nim ne, ji jam nde Ye ne, sangge ré.”

⁷³Bergan yo o, yé bok yo gato ti mone ma ku Petrus ete ki nai an do, “Sangge, nan dom simo Ye ne, we men jam kadit nan bi a-i gato nan ki ne.”

⁷⁴Orete Petrus syo syim, an dufo mo yé ne gwem do, “Bur anare, gu ana nim ne, ji jam nde Ye ne sangge kai!” Sugane, ndam kokor ba it.

⁷⁵Petrus napakom sukdu gato Yefun Yesus ki nai an ne do, “Ndam kokor yo ba nde tó, nan rewa Ji wam gri ré.” Orete Petrus syesyar mu nden, ete an wo ndo nde.