Read Abun Matius 28 Bible Online

Matius 28 - Abun bible

Matius 28

¹Ye Yahudi bi kam sye ne or, kam Ari, bundugan, Maria Magdalena si Maria yi ne, an we mu me makwe ne.

²Nggon we ne kom mone sa, nggon we gensu sui juwai bur ndo nde, ete Yefun Allah bi malaikat dik yo is ma kadit gu. Orete malaikat wop jok gato kewa jokwak syo ne wé kadit jokwak ne, ete malaikat ne kem mo jok ne yu.

³Malaikat ne de gwem rup-rek sato nowarek, an bi san ne kwo ru ges.

⁴Yesukmise gato mewa makwe ne sokme malaikat ne sa, án nyu ndo nde, sane wade án tetet, orete án kaim rere, án tepsu ye gato kwop ré.

⁵Malaikat ne ki nai nggon we ne do, “Nin nyu nde. Ji jam do, nin meret Yefun Yesus gato ye mban mo kwesukwin ne, sarewo

⁶An yo more nde, An mbau ré, An sun ré, saga nyim neya An dakai ki nai nin jam. Nin ka we dakai ma me nat gato ye grem An mukri mone.

⁷Su re, nin ka we mu kekro. Nin ka we ki nai Yefun bi pakon ne do, ‘Yefun Yesus sun ré. An mu nyim mo bur Galilea. Nin sino mu sakanwa An motu.’ Nin ka we napawa suk gato ji ki re sisu ndo et.”

⁸Sane nggon we ne mu kekro kadit makwe ne. Nggon we ne nyu ndo nde, sarewo nggon we mit iwa suk gato nggon we me ne, ete nggon we kas mu ki napyo nai Yefun Yesus bi pakon ne jam.

⁹Nggon we ne kas mu sa, nggon we ne gensu Yefun Yesus ma ku nggon we, ete Yefun Yesus ki do, “Ndo mo nin ka we.” Nggon we ne ma karowa Yefun Yesus ete syimtok An gwes tak, orete nggon we un An.

¹⁰Yefun Yesus ki do, “Nin nyu nde. Nin mu ki nai Ji bi pakon ne do, pakon ne mu sakanwa Ji mo bur Galilea. Bere án ku Ji motu.” Sane nggon we ne mu.

¹¹Nggon we ne do mu saresa, yesukmise gato mewa makwe ne ge bok yo mu mo kota Yerusalem ré. Yesukmise bok ne kibot suk mwa gato án me bor mo makwe ne nai yekwesú mo Yefun Allah bi nu jam.

¹²Yekwesú mo Yefun Allah bi nu ne si ye Yahudi bi yepasye sum wa kibot sukdu ne sa, án fro sukdu su yesukmise ete syo sugum mwa nai yesukmise ne.

¹³Orete án ki nai yesukmise do, “Nin ki sare do, ‘Noru miten ne, men sem mit saresa, Yesus bi pakon ma syimsi An mukri ete gwat mu ré.’

¹⁴Bere men frot koita nai yekwesu gato gum gubernur. Men bidek an subere nin yo ku sukye mone nde.”

¹⁵Sane yesukmise gwat sugum ne, ete ki bi sukdu-i tepsu suk gato yepasye ne ki ne. Sukdu gato ye ki do, Yefun Yesus bi pakon mu syimsi An mukri ne, yé ki frekbot ye Yahudi bi nat-i mwa ne sino kom mo kam re ré

¹⁶Yefun Yesus bi pakon ge musyu dik sop dik mu mo bur Galilea. Án mu mo bobuk mo pe gato Yefun Yesus syogat án mu mone.

¹⁷Án ku Yefun Yesus mone sa, án un Yefun Yesus, sarewo án ge bok yo mit we, ge bok ne nutbot do, sangge, Yefun Yesus dakai anare bado?

¹⁸Orete Yefun Yesus ma karowa pakon ne, ete An ki do, “Yefun Allah bes ji gum tepsu Yekwesu mo gu nim si bur re sino.

¹⁹Sane nin mu mo yewis mwa ne sino mo bur re iwedewe, ete nin duno nje subere yé ne tepsu Ji bi pakon, ete nin ras nje ne mo syur sisu men bi Ai, Yefun Allah gum, sisu Yefun Allah bi Gan gum sisu Yefun Allah Gen gum ne sino et.

²⁰Nin duno nje ne subere yé ne benbot suk mwa ne sino gato Ji syogat nin ben ne. Nin jammo suk gato Ji ki re et, nin mu duno nje yo, bere Ji sisu nin petok sor kom mo kapyo mato kapyo.”