Read Abun Matius 3 Bible Online

Matius 3 - Abun bible

Matius 3

¹Orete Yohanes gato ras nje mo syur ne mu mo pe gato kwe yo kom mo nde mo bur Yudea. Yohanes duno nje mone.

²An ki do, “Yefun Allah ma jowa nin tepsu nin bi Yeksewu it anare! Sane nin kwet kadit sukibit gato nin ben ne, nin jammo Yefun Allah et.”

³Yenabi gato gum do Yesaya anato krom sukdu subot Yohanes re. Yesaya krom do, “Mo pe gato kwe yo kom mo nde, ye yo saiye do, ‘Men fro os gato ndo wa Yefun, men bi Yekwesu ne se! Men duk os wa An muket se!’ ”

⁴Yohanes it san gato ye jom kadit unta go. An far an jakuke su suge da det yo. Yohanes bi sugit-i gato an git kamdik-kamdik anato yoi si for rom.

⁵Ye Yerusalem si yé mo bur Yudea sisu yé mo pe gato karowa Syur Yordan ne sino ma wa syaretwa sukdu gato Yohanes ki ne.

⁶Yé gato rek sukibit gato án ben ne nai Yohanes sa, Yohanes ras yé ne mo Syur Yordan.

⁷Ye Farisi si ye Saduki mwa ma mo Yohanes wa Yohanes ras án mo syur, sarewo Yohanes me án ma sa, Yohanes ki do, “Nin yé gato kidar suk nggi tepsu kwis jan, nin nut do, nin ma wa ji ras nin mo syur, bere ós nin titi fro kadit Yefun Allah bi sukmaskwa mo sukibit gato nin ben na bado? Sane nde, nin kwet kadit sukibit gato nin ben ni dom et.

⁸Nin ben suk gato ndo sor, subere ye jam do, sangge, nin kwet kadit sukibit gato nin ben ne it.

⁹Nin nut do, nin bi amui mo Abraham {anato Yefun Alah iwa nin, sane bere Yefun Allah nai nin kadit sukye, bado? Sane nde. Nin nut sane bere siri ré.} Ji ki sare do, Yefun Allah nggiwa ben jok bok re tepsu Abraham bi dat-i. Sane nin dom tepsu Abraham bi dat-i, bere yo ós nin nde.

¹⁰Wo nin re tepsu kwe gato yo bo ndo nde. Su re yo, Yefun Allah fro bi mbam wa gwa kwe gato sane wé, Yefun Allah gwa kom mo i-brot sor. Yefun Allah fro wa syo sukye nai ye gato yo kwet nde, tepsu ye gwa kwe gato yo bo nde ne, orete ye syo bot git wé ré.

¹¹Ji anato ras nje mo syur tepsu bi sukjimnut do, ye ne kwet kadit os ibit it. Wo bere Ye yo gato gum kok sye wai kadit ji waii ma bori. Ji gum yo tep wa ji jom An bi sepatu nde. Ji gum wok teker mu bur ware. Ye gato gum kok sye wai kadit ji ne, bere An syogat Yefun Allah Gen bok nggwa mo nin, ben sato An ras nin mo Yefun Allah Gen, tepsu An ras nin mo bot.

¹²An fro nggwa wa An wa yé gato ben sukndo kadit yé gato ben sukibit, tepsu ye gato ben nggwe wat sugit dor kadit sukkwik. Sugit ne An grem mo pe gato ndo, wo sukkwik ne An syo bot git wé, mo bot gato yo te mo nde.”

¹³Orete Yefun Yesus ma kadit bur Galilea mu mo Syur Yordan. Mone Yefun Yesus ma ku Yohanes, ete kiwa Yohanes ras An mo syur.

¹⁴Sarewo Yohanes duyawa Yefun Yesus. Yohanes ki do, “Mban! Nan ana ras ji mo syur sa. Wo Nan ma wa ji ras Nan mo syur wa suma ne?”

¹⁵Sarewo Yefun Yesus ki do, “Nan ras Ji sor. Nan ras Ji, we Yefun Allah mit iwa nan ben sane.” Sane Yohanes ras Yefun Yesus mo syur.

¹⁶Yohanes ras Yefun Yesus mo syur, orete Yefun Yesus mu nden kadit syur. Yefun Yesus mu nden sa, gu ben sato det, ete An me Yefun Allah Gen is ma su kaim sato ndabu ete tom mo An.

¹⁷Orete yé mwa ne jam Yefun Allah ki sukdu kadit gu nim ne sare do, “Ji dakai bi Gan anare. Ji bi sukjimnut sye kas subot An. Ji mit iwa An ndo nde.”