Read Abun Matius 5 Bible Online

Matius 5 - Abun bible

Matius 5

¹Yefun Yesus me yé mwa ne sum sa, An it mo banbo, ete An kem mone. An bi pakon ma ku An mone,

³“Ye gato jam do, an yo nggi mo Yefun Allah bi de-i nde, sarewo an jom Yefun si bi sukdu-i tó yo, ye ne mit at wa, we Yefun Allah anato an bi Yekwesu gato mewa an.

⁴Ye gato nderku an nggwa mo sukibit gato an ben ne, ye ne mit at wa, we bere Yefun bes an kadit sukye gato an ku mone.

⁵Ye gato is an nggwa tepsu pa wokgan, ye ne mit at wa, we bere kam sari ne ma Yefun bes an gum kok sye wa an jom suk mwa mo bur re.

⁶Ye gato bi sukjimnut sye wa ben suk tepsu Yefun Allah mit, ye ne mit at wa, we bere Yefun kadum suk mwa ne sino gato Yefun iwa ye ne ben ne.

⁷Ye gato dakai jimnotku ye yi ete ós an mone, ye ne mit at wa, we bere Yefun Allah dakai jimnotku ye ne ete ós an.

⁸Ye gato bariwa bi sukjimnut-i kem mo sukibit, wo an iwa an bi sukjimnut-i sye mo Yefun sor, ye ne mit at wa, we bere an jam Yefun Allah sisu ndo ré.

⁹Ye gato tepsu yegweswai, ye ne mit at wa, we bere Yefun Allah kendo an gum tepsu Yefun bi pa.

¹⁰Ye gato ku sukye mo sukndo gato an ben tepsu Yefun Allah mit ne, ye ne mit at wa, we Yefun Allah anato an bi Yekwesu gato mewa an.

¹¹Nin yé gato simo Ji, ete yé kabor nin e, yé ben sukye nai nin, ete yé ki nin gum ibit ket kwayo-kwayo mone yo, nin mit at wa.

¹²Suga nyim tuya yenabi ku sukye saga nin ku ré. Wo nin wi, nin ambre, we Yefun fro suk gato ndo wa nin mo gu nim ré.”

¹³“Nin anato tepsu bók wa yé mwa ne sino gato kem mo bur re. Wo bók ne yo wik o nde yo, bere ye ben suma subere bók ne wik satu o ne? Bók gato yo ndo o nde, ye yo mitmo o nde, ye bare wé, ete bere yé yakos o ré.

¹⁴Nin anato tepsu sukru wa yé mwa mo bur re sino. Bere yé mwa me nin tepsu yé mwa me kota gato yé nggo mo bobuk.

¹⁵Sane o, ye yo dum kak it yo, men gurik mo bokor desnak nde, wo ye grem sukru ne mo pe gato kok subere sukru rer ku nje mo nu mit.

¹⁶Sane dom, nin tepsu sukru rer gato ku nje et, subere yé me sukndo gato nin ben ne, ete yé un men bi Ai mo gu o ré.”

¹⁷“Nin nut do, Ji ma wa Ji rus Musa si yenabi bi sukduno-i ne wé, bado? Sane nde, Ji ma wa Ji rus sukduno ne wé nde, wo Ji ma subere Ji kibot sukdu ne rer wa nin jam kom mo mit et.

¹⁸Suk gato Ji ki re suksangge anare, bur re si gu nim ne kem tó yo, sukdu kwa dik yo ges kadit sukduno ne yo mo nde, wokgan yo dom nde, wo suk mwa ne sino bor mone or wé, eteyo bur re kru ré.

¹⁹Sane ye to ben sukibit wai mo sukduno ne, kapre kwa yo gato wok, ete duno nje misyar sukduno ne yo, bere ye ne ku gum wok wai mo Yefun bi rus-i. Sarewo ye to benbot sukduno ne, ete duno nje subere án waii benbot dom yo, bere ye ne ku gum kok mo Yefun bi rus-i ré.

²⁰Sane Ji ki sare do, nin yo ben suk gato ndo tepsu Yefun mit mwa wai kadit ye Farisi si yeguru agama nde yo, bere nin yo ku is wa nin gum sok mo Yefun Allah bi rus-i nde.”

²¹“Nin jam sukdu gato Yefun ki nai men bi amui suga nyim neya do, ‘Nin gu ye yi kwop daret nde. Ye to gu nje kwop ne yo, bere Yefun syo sukye nai ye ne.’

²²Sarewo Ji ki sare do, ye to maskwa ket an bi nji, bere Yefun syo sukye nai. Sane o, ye to kendo an bi nji do, ‘Nan yeibit,’ bere ye gwat mu mo ye Yahudi bi yepasye si yekwesu gato sum sino wa kibot sukdu ibit gato an ki ne. Sane o ye to kendo an bi nji do, ‘Nan jimgon,’ bergan Yefun am ye ne mo bot gesyos.

²³Sane nin gwat suksom ma wa nin grem mo meja wa nin som Yefun su mo Yefun Allah bi nu mit, ete nin napakom nin bi nji mo Yefun bi rus-i ge dik yo grem sukmaskwa wa nin it yo,

²⁴nin misyar suk ne kem mone yei, wade nin mu ku ye ne, ete nin si an kibot suk ne or wé kadit nin et. Or o nin si an jom syim. Nin si an kem not orete yo, nin mu o, nin gwat suksom ne syo nai Yefun wa nin som Yefun su.

²⁵Ye yo maskwa nin subot suk yo ete werwa nin bi denda kit an yo, san ndo sa nin si an mu kom mo pe gato yepasye kibot sukmaskwa ne nde tó, nin si an dakai kibot or wé et. Wo nin si an kibot nde yo, bere yenggras gato kibot sukmaskwa ne syo nin mo yesukmise syim, orete yesukmise bok nin mo sel.

²⁶Suk gato Ji ki re suksangge anare, bere nin kem mo sel mit sane sor, nin bi denda kit ye ne or wé, ete nin syesyar.”

²⁷“Nin jam sukdu gato Yefun ki nai men bi amui sare do, ‘Nin ben siri daret nde.’

²⁸Sarewo Ji ki sare do, ye gato sokme nggon, ete mit iwa ben siri su nggon ne yo, tepsu ye ne ben siri su nggon ne mo an mit it.

²⁹Sane nin gro do ben nin ben sukibit it yo, nin tik buk mu nden, ete nin am wé. Kwa dik yo mo nin kaim ibit anato ndo wai kadit Yefun am nin kaim sino mo bot gesyos.

³⁰Sane dom, nin syim ge do ben nin ben sukibit it yo, nin tot nin syim ne, ete nin am wé. Kwa dik yo mo nin kaim ibit anato ndo wai kadit Yefun am nin kaim sino mo bot gesyos. {Sane nin werwa nin tot suk gato gwat nin sok mo os ibit ne wé kadit nin et.}”

³¹“Nin jam sukdu gato Yefun ki nai men bi amui sare do, ‘Ye to sombok an bi nggon wé yo, bere an krom sukdu ne mo surat, ete syo nai an bi nggon ne et.’

³²Sarewo su re Ji ki sare do, ye to sombok an bi nggon yo, nggon ne ben siri ses an sa, wo nggon ne yo ben siri nde, ete bi ye sombok nggon ne yo, ye ne ben sukibit, we nggon ne do kra o yo, tepsu an ben nggon ne ben siri, ete ye gato kra nggon ne dom ben siri mone.”

³³“Sane dom, nin jam sukdu gato ye ki nai men bi amui suga nyim neya do, ‘Suk gato nin tomgun su Yefun, nin misyar nde, wo nin benbot sor.’

³⁴Sarewo su re, Ji ki sare do, nin tomgun suk yo, nin syo nin syim do, gu ana nim ne nde, we gu anato pe gato Yefun kem mo tepsu Yekwesu wa men mone.

³⁵Nin tomgun suk yo, nin syo nin syim do, bur anane dom nde, we bur re anato tepsu pe gato Yefun ak An gwes kok mo. Nin syo nin syim do, Yerusalem anane dom nde, we Yekwesu gato gum kok wai bi kota anane.

³⁶Nin syo nin syim do, nin su anane dom nde, we nin yo nggiwa ben nin sugo te nde, nin yo nggiwa ben nin sugo syi dom nde.

³⁷Wo sare, nin bi sukjimnut do, bere nin ben suk ne yo, nin ki do, ‘bere ji ben ré,’ wo nin bi sukjimnut do, bere nin ben nde yo, nin ki do, ‘bere ji yo be nde.’ Nin tom suk ri-roi sor, nin ki kwa bok yo o su nde, we kwa bok yo o daret ne ma kadit biris bi yekwesu sor.”

³⁸“Nin jam sukdu gato Yefun ki nai men bi amui sare do, ye yo ben nin gro ibit it yo, nin waii ben ye ne gro ibit satu. Ye yo gwa nin anato nin syos dik yo buk it yo, nin waii gwa ye ne wade ye ne syos dik yo buk satu dom.

³⁹Sarewo su re, Ji ki sare do, ye gato ben sukibit nai nin it yo, nin waii ben sukibit nai an o nde. Ye yo gwa nim kwanke tak de syim ge yo, nin misyar an dakai gwa nin kwanke tak de syim jam o sor.

⁴⁰Sane dom, ye yo ki nin mo yepasye gwem subere nin bi denda nai an tepsu san sun gato sugum wok it yo, nin syo san gato sugum sye nai an dom et.

⁴¹Sane o, yesukmise syaugat nin sam an bi suk mu kom mo kilometer dik it yo, nin sam an bi suk mu kom mo kilometer we et.

⁴²Ye yo ndek suk mo nin it yo, nin syo nai an sor. Ye yo ndekwa nin bi suk yo nai an yei, ete an tom do, bere an syo satu nai nin o yo, nin syo nai an sor.”

⁴³“Nin jam sukdu gato Yefun ki nai men bi amui sare do, nin ben sukndo su nin bi yesyim, wo nin bariket ye gato ben sukibit su nin et.

⁴⁴Sarewo su re, Ji ki sare do, nin ben sukndo su ye gato ben sukibit su nin, ete nin ki suk su Yefun subere Yefun ós ye gato ben sukye nai nin et,

⁴⁵subere nin ben suk tepsu nin bi Ai gato mo gu ne bi pa-i. We sare, Yefun ben sukndo su ye gato ben sukibit si ye gato ben sukndo ne sino. Yefun syo kam it mo gu si nogi is ma bur wa ye gato ben suksiri kadit An mit si ye gato ben sukndo tepsu An mit ne sino.

⁴⁶Sane nin ben sukndo su ye gato ben sukndo su nin sor ré, bere Yefun syo sukndo nai nin wa suma ne? Ye gato nai sugum kadit nje wa pemerintah da ben sukndo su ye gato ben sukndo su an, sarewo an ben sukibit su yé mwa.

⁴⁷Sane dom, nin mu ki ndo mo nin bi yesyim sor ré, nin ben suk sato suma anato ndo mone ne? Ye gato jam nde Yefun ben suk sane dom.

⁴⁸Sane nin werwa nin ben sukndo su yetu mwa ne sino, saga nin bi Ai mo gu nim ne ben et.”