Read Abun Matius 6 Bible Online

Matius 6 - Abun bible

Matius 6

¹“Nin ben suk gato ndo tepsu Yefun Allah mit mo yé mwa gwem subere yé mwa me, ete bes nin gum kok mone, bere siri ré. Nin ben suk bor mo yé mwa gwem subere ye bes nin gum kok it yo, bere nin bi Ai mo gu yo syo suk yo nai nin nde.

²Sane, nin syo suk nai ye gato yewa suk yo, nin ki sukdu sye subot suk gato nin ben subere yé mwa jam mone, bere siri ré. Ye gato kidar do, an onyar kem mo Yefun, sarewo an mit tara ré anato ki subot sukndo gato án ben ne bor subere yé mwa jam. Sane nin ben suk tepsu ye ga sane nde. Yé ne ki bor mo ye Yahudi bi nu ari e, mo os de neya. Yé ne ki subot sukndo gato án ben bor sane subere yé mwa bes án gum kok. Suk gato Ji ki re suksangge anare, yetu bes án gum kok sor ré, bere Yefun yo syo suk yo nai án o nde.

³Sarewo nin ós ye gato yewa suk it yo, nin ós, nin gurik suk gato nin syo nai ye ne subere bor wa ye yi me nde, ge dik yo jam dom nde.

⁴Nin syo suk nai ye gato yewa suk yo, nin ben subere yo bor wa ye yi jam nde. Sane bere nin bi Ai mo gu sor ete jam suk gato nin ben ne, ete bere An syo suk gato ndo nai nin mone.”

⁵“Nin ki suk su Yefun Allah yo, nin ben saga ye gato kidar do, an onyar kem mo Yefun, sarewo an mit tara ne nde. Yé ne iwa án ti, ete án ki suk su Yefun mo ye Yahudi bi nu ari e, mo os de e neya, subere yetu me suk gato án ben ne. Suk gato Ji ki re suksangge anare, yetu bes án gum kok sor ré, wo bere Yefun yo syo suk yo nai án o nde.

⁶Nin ben saga án ben ne nde, wo nin benadi yo, nin sok mo nin bi gumwak, nin syimwa nusyo, ete nin ki suk su nin bi Ai mo gu, gato nin yo me su nin gro nde. Sane bere nin bi Ai mo gu sor ete jam suk gato nin ki ne, ete bere An syo sukndo nai nin mone.

⁷Nin do ki suk su Yefun yo, nin ki sukdu mwa daret nde saga ye gato jam nde Yefun ne. Yé ne nut do, suk gato án ndek mo Yefun, bere Yefun syo nai án mo gato án ki sukdu ne syu ré.

⁸Nin ben saga án ben ne nde. Nin ki suk su Yefun nde tó, nin bi Ai jam suk gato nin yewa nyim wé ré.

⁹Sane nin ki suk su Yefun Allah yo, nin ki sare do, ‘Men bi Ai mo gu: Yé bes Nan gum kok sye wai ete ndo.

¹⁰Nan ma tepsu Yekwesu wa jowa men yetu ete ndo, Men yetu sino mo bur re, men ben suk tepsu Nan mit saga yé ben mo gu nim ne ete ndo.

¹¹Nan syo sugit tep wa men git su kam re et.

¹²Nan maskwa men mo sukibit gato men ben mu nai Nan o nde, Nan nutbot o nde, tepsu men yo maskwa ye yi mo sukibit gato ye ne ben ma nai men ne nde, ete men nutbot o nde.

¹³Nan mewa men subere suk yo tik men mit ete ben men ges mo os ibit mone nde, wo Nan kak os wa men subere biris bi yekwesu yo ku os wa gwat men sok mo os ibit mone nde. [Nan sor anato Yekwesu gato nggi wai, Nan sor anato Yekwesu gato gum kok wai to kapyo mato kapyo. Sangge.]’

¹⁴Nin maskwa ye yi mo sukibit gato an ben ma nai nin o nde, ete nin yo nutbot o nde yo, bere nin bi Ai mo gu waii nutbot sukibit gato nin ben ne o nde.

¹⁵Wo nin napawa sukibit gato ye yi ben nai nin yo, bere nin bi Ai mo gu napawa sukibit gato nin ben ne, ete An maskwa nin mone tó.”

¹⁶“Nin mewa nin nggwa kadit nin git sugit yei yo, nin ben nin gwem ibit saga ye gato kidar do, an onyar kem mo Yefun, sarewo an mit tara ne nde. Ye ne misyar an kaim subere yé mwa jam do, an mewa an nggwa kadit sugit yei wa an ki suk su Yefun. Suk gato Ji ki re suksangge anare, yetu bes ye ne gum kok mone sor ré wo bere Yefun yo syo suk yo nai an o nde.

¹⁷Nin ben saga an ne nde, wo nin mewa nin nggwa kadit nin git sugit yei it yo, nin mus nin gwem e, nin syur nin sugo,

¹⁸subere yé yi jam nde nin mewa nin nggwa kadit nin git sugit yei wa nin ki suk su Yefun. Nin ben sane subere nin bi Ai mo gu sor ete jam. Nin bi Ai ne, nin yo me su nin gro nde, wo nin bi Ai sor ete jam suk gato nin ben ne yo, bere An syo sukndo nai nin mone.”

¹⁹“Nin sum suk mwa wa nin dakai mo bur re nde, we mo bur re, kundun si on bere git nin bi suk ne ibit or ré. Sane dom bere ye sok mo nin bi nu mit, ete gitsi nin bi suk napyo or ré.

²⁰Sane nin sum suk mwa mo bur re nde, wo nin sum suk mwa mo gu, we mo gu nim ne kundun yo ku os wa ben suk ne ibit nde. Sane o ye yo ku os wa sok mo gu, ete gitsi nin bi suk dom nde.

²¹Nin sum suk mwa mo gu sane, we pe gato nin bi suk mwa kem mone yo, bere nin bi sukjimnut sye mone dom.”

²²“Ni gro tepsu sukru wa nin kaim. Nin gro ndo tepsu nin bi sukjimnut kak yo, bere rer ku nin kaim sino,

²³wo nin gro ibit tepsu nin bi sukjimnut yo kak ri nde tó yo, nin kaim kem mo ndendu. Sane dom, nin bi sukru ne te, bere nin kaim kem mo ndendu yut sor.”

²⁴“Yetu ge dik yo, yo nggiwa ben suk wa yenggras ge we nde. Bere ye ne bariket yenggras ge we dik yo, ete an jimnotku yenggras ge we dik yo o. Bere ye ne jammo yenggras ge we dik yo, ete an misyar yenggras ge we dik yo o ré. Sane dom, nin yo nggiwa jammo Yefun sisu sugum sino nde.

²⁵Sane, Ji ki sare do, sugit wa nin git si syur wa nin da, suk gato nin mitmo subere nin kem mo bur re, nin nutbot teker eta nde. Sane dom, san wa nin it mo nin kaim, nin nutbot teker eta nde, we sare, men kem mo bur re anato ndo wai kadit sugit. Sane dom, men kaim anato ndo wai kadit san.

²⁶Men me mo ndam. Ndam yo jan suk nde, ndam yo do suk nde, ndam yo sum sugit mo bi bat nde, wo men bi Ai, Yefun Allah mewa ndam ne ré. Yefun bi sukjimnut sye wai mo men yetu, sane bere An mewa nin sisu ndo wai kadit ndam ne o ré.

²⁷San nin nutbot suk mwa teker eta ne te, bere ós nin kem wikgan yo o mo bur re bado? Mo nde!

²⁸Nin nutbot nin bi san gato nin it ne teker eta wa suma ne? Nin me es u gato dakai kom. Es ne yo werwa fro án bi san wa án it nde.

²⁹Yeraja Salomo da it san gato ndo yé, sarewo Ji ki sare do, Salomo yo it san gato ndo wai kadit es u ne nde.

³⁰Yefun Allah syo es u tepsu san wa es gato dakai kom ne. Es ne kom su kam re, sarewo bere ik es ne te, ete yé syo bot git wé ré. Yefun Allah bi sukjimnut sye wai mo men yetu, sane bere An mewa nin su san gato ndo wai kadit ne o ré. Sane nin yo onyar kem ri mo Yefun nde tó wa suma ne? Bere Yefun Allah syo suk gato nin mitmo ne.

³¹Sane nin nutbot suk mwa ne teker eta nde. Nin nutbot suk teker bere nin ki do, ‘Bere ji ku sugit mo u ne? Bere ji da suma ne? Bere ji ku san mo u ne?’

³²Ye gato jam nde Yefun bi sukjimnut sye mo suk mwa ne petok sor, wo nin bi Ai mo gu jam do nin mitmo suk ne.

³³Sane, nin bi sukjimnut sye mo suk mwa ne nde, wo nin werwa subere nin bi sukjimnut sye wa nin jammo Yefun Allah tepsu nin bi Yekwesu, ete nin ben sukndo tepsu Yefun mit sor. Sane bere Yefun syo suk mwa gato nin mitmo ne nai nin dom ré.

³⁴Sane, bere ik, ete nin ku suk ne yo, nin ku nde yo, nin nutbot teker eta su kam re nde. Ik, ete nin nutbot ik bi suk-i. Su kam re nin bi sukye bok yo mó, sane nin nutbot ik bi suk-i tó nde.”