Read Abun Matius 8 Bible Online

Matius 8 - Abun bible

Matius 8

¹Yefun Yesus is kadit bobuk sa, yé mwa boribot An.

²Yetu ge dik yo gato suki borbuk git ne ma mo Yefun Yesus. An tu an umsu mo Yefun Yesus gwem, orete an ki do, “Yenggras, Nan imo yo, Nan nggiwa Nan ben ji ge kadit suki re, subere ji yo fowa ku yetu o nde.”

³Yefun Yesus bes An syim, ete syimtok ye ne sa, Yefun Yesus ki do, “Ji iwa, nan ge tom!” Yefun Yesus do ki or-i, ye ne ge-i, an kaim ndo satu ré.

⁴Orete Yefun Yesus ki nai ye ne do, “Nan jammo suk gato Ji ki re et. Nan mu nan nuk sukdu subot suk gato Ji ben ne nai ye yi daret nde, wo nan mu kadum nan nggwa nai yesu gato ben suk mo Yefun Allah bi nu subere an watbot nan. An watbot nan, ete yesu ne ki do, sangge, nan ge it, sane yo nan gwat suge sato Musa ki ne ma tepsu suksom. Nan syo nai yesu ne gre mo bot subere ye jam do, nan ge it anare.”

⁵Yefun Yesus mu kom mo kota Kapernaum sa, ye Roma bi yesukmise bi yesu ge dik yo ma ku Yefun Yesus. Yesu nde ndekwa Yefun Yesus ós an,

⁶an ki do, “Yenggras, ji bi pakwerut i, an kem mo nu, an yo mu ndo nde, an ku sukye ndo nde.”

⁷Yefun Yesus ki nai yesukmise bi yesu ne do, “Bere Ji mu ben pa ne ge et.”

⁸Orete yesukmise bi yesu ki do, “Nan yo mu nde. Ji damen teker wa Nan ma mo ji bi nu. Wo Nan syogat suki ne titi wé kadit ji bi pakwerut, Nan ki kadit pe gato Nan ti more sor ré, we ji jam do, Nan ki suk more, bere ji bi pakwerut motu ge ré.

⁹Sane, ji dom, ji jammo suk gato ji bi yekwesu syogat ji ben ne. Ji bi pa yesukmise jammo ji dom. Ji syogat pa yemsok dik yo do, ‘Nan mu tom!’ yo, an mu ré. Ji syogat pa dik yo o do, ‘Nan ma se!’ yo, an ma ré. Ji syogat ji bi pakwerut ne do, ‘Nan ben suk re et!’ yo, pa ne ben ré.”

¹⁰Yefun Yesus jam yesukmise bi yesu bi sukdu ne sa, An yeket, ete An ki nai yé bok yo gato simo An mone do, “Mban! Ye gare sa. Suk gato Ji ki re suksangge anare, mo ye Israel bok ne sino, Ji yo ku ye gato onyar kem mo Ji tepsu ye gare mo nde.

¹¹Ji ki sare do, bere su kam sari ne ma yé mwa git sugit mo pesta sye mo pe gato Yefun Allah jowa nje tepsu men bi Yekwesu, sarewo yewis ye Israel gato bi yepasye mo Abraham e, Isak e, si Yakub ne bere yo mwa nde, wo yewis yi mwa kadit bur re iwedewe si yepasye ka gri ne bere git sugit sino mone.

¹²Wo yé Israel mwa gato Yefun Allah fro wa sok mo Yefun bi rus-i, bere Yefun Allah bariwa ré, bere Yefun bare án mu mo nden mo pe gato ndendu. Mone án wo ndo nde, án nderku án dakai.”

¹³Orete Yefun Yesus ki nai yesukmise bi yesu ne do, “Nan mu sor. Suk gato nan onyar kem mó, bere bor mone.” Sugane it, yesukmise bi pakwerut ne ge ré.

¹⁴Yefun Yesus mu mo Petrus bi nu. Mone, An ku Petrus bi om. Petrus bi om ne i, mom kaim kam teker. Petrus bi om sem mo bi kwatka sor.

¹⁵Yefun Yesus ma syimtok nggongras ne syim, orete nggongras kaim dek satu ré. Nggongras ne ge ré, sane mom sun, mom gwat sugit si syur wa Yefun Yesus git.

¹⁶Kam bok, ndendu, yé gwat yé mwa gato semda ben ne ma. Yefun Yesus ki suk kwa dik yo, kwa we yo sor ré, ete An syun semda mwa ne titi wé, ete An ben yé mwa gato i ne ge sino.

¹⁷Yefun Yesus ben ye gato i ne ge subere suk gato Yefun Allah tarubot yenabi Yesaya ne bor ré. Yesaya ki do, “An ma wa sombok men wé kadit sukye gato men ku ne, An syun men bi suki wé kadit men.”

¹⁸Yefun Yesus me yé mwa sum wairi wa An sa, Yefun Yesus syaugat An bi pakon mu mo em deta.

¹⁹Orete yeguru agama dik yo ma, ete ki do, “Yeguru, ji kwop o, ji mbau o, ji simo Nan mu mo pe gato Nan mu mone pe sor.”

²⁰Yefun Yesus ki do, “Ndar krok sa, bi jokwak wa kem mó, ndam sa, bi bat wa kem mó, wo Yetu bi Pa to Ji re yo ku nat wa Ji kem not yo mo nde.”

²¹Yetu ge dik yo o gato simo Yefun Yesus ki do, “Yenggras, ji mu bi ji bi ai mo makwe orete yo, ji simo Nan.”

²²Sarewo Yefun Yesus ki do, “Nan misyar ye gato jam nde Yefun gato bi sukjimnut kwop ne dakai mu bi yekwop mo makwe sor. Nan simo ji kadit.”

²³Yefun Yesus it mo kwem, orete An bi pakon it mo kwem ne dom.

²⁴Án sino bi win mo em ne sa, án gensu nofuf sye is ma ben em sok mo kwem mit, bergan kwem kru rok. Sugane Yefun Yesus sem.

²⁵Sane Yefun Yesus bi pakon sun An, ete pakon ne ki do, “Yenggras, bergan kwem kru su men it anare. Nan ós men tom!”

²⁶Yefun Yesus ki do, “Nin nyu wa suma ne? Mban! Nin yo onyar kem ri mo Ji nde tó go!” Yefun Yesus ki sane, orete An sun, An syogat nofuf ne not, An syogat em gato nap ne kro. Sugane it, em si nofuf ne kro ré.

²⁷Pakon bok ne sino yeket suk gato Yefun Yesus ben ne. Án ndobot yu do, “Mban! Je u ana re ne? An yogat nofuf si em nap, ete nofuf si em nap ne jammo An ré.”

²⁸Yefun Yesus ma kom mo bur Gadara mo em deta sa, yetu ge we gato semda ben ma ku An mone. Ye we ne kem mo jokwak gato ye bi yekwop mone. Semda ben ye we ne, anato ye we ne ben bi suk-i ne ot, sane yé yo muket os ne nde.

²⁹Semda ben ye we ne saiye ket Yefun Yesus do, “Yefun Allah bi Gan, Nan ma ku men wa suma ne? Men yo kom mo kam gato Yefun Allah ma ndobot men yetu nde tó, ete Nan ma wa ben sukye nai men su mit re bado?”

³⁰Sugane jot mwa git sugit karo mone,

³¹sane semda ne ndek Yefun Yesus do, “Nan syun men it yo, Nan syogat men sok mo jot mwa ne et.”

³²Sane Yefun Yesus ki do, “Nin mu se!” Sane semda ne sombok kadit ye we ne ete mu bok nggwa mo jot, or semda ne ben jot mwa ne sino kasbot kwoye mu ges ngga mo em mit, ete mbon ré.

³³Yé bok yo gato mewa jot ne titi mu mo kota. Án kom mo kota ne sa, án nukbot suk mwa ne nai nje mone jam. Án nukbot suk gato Yefun Yesus ben su ye we gato semda ben ne.

³⁴Sane yé mwa mo kota ne sino mu ku Yefun Yesus. Yé ku Yefun Yesus sa, yé ndek mo An do, “Nan mu kadit men bi nat re et.”