Read Abun Markus 11 Bible Online

Markus 11 - Abun bible

Markus 11

¹Yefun Yesus si bi pakon karowa ma kom kota Yerusalem sa, án ma kom mo kampung we gato gum do Betfage si Betania mo bobuk Zaitun. Mone Yefun Yesus syogat An bi pakon ge we yo mu nyim.

²Yefun Yesus ki nai an we do, “Nin ka we mu nyim mo kampung gato karo mone. Nin ka we do mu kom mone it yo, bere nin ka we ku keledai gan ge dik yo gato yé jik mone. Keledai ne ye yo it mo nde tó. Nin ka we sombok ete nin ka we gwat ma.

³Do ye yo mone ndo mo nin ka we do, ‘Nin ka we sombok keledai gan ne wa suma ne?’ yo, nin ka we ki do, ‘Men bi Yekwesu mitmo keledai re, bergan sor, ete An syo satu o ré.’ ”

⁴Pakon ge we ne mu nyim, an we mu kom motu, ete an we me keledai gan ge dik yo gato yé jik mo nusyo dik yo mo os de. An we sombok keledai ne saresa,

⁵yé bok yo gato ti mone ndo mo an we do, “Nin ka we ben suma ne? Nin ka we sombok keledai gan ne wa suma ne?”

⁶An we ki nai yé ne sagato Yefun Yesus ki nai an we ne. Sane yé ne misyar an we gwat keledai ne mu.

⁷Pakon ge we ne gwat keledai ne ma kom mo Yefun Yesus sa, an we sya an we bi sansun mo keledai yu, orete Yefun Yesus it mo keledai ne.

⁸Yefun Yesus mubot os ne sa, yé mwa mone mit iwa ku Yefun Yesus ma tepsu án bi yepasye, sane ye deyo sya án bi sansun mo os mit wa Yefun Yesus. Ye deyo tot kwebu mo nggwe ete gwat ma, án sya wa mbrau os gato Yefun Yesus muket.

⁹Yé mwa gato mu nyim si yé mwa gato boribot, án sino saiye do, “Men un Yefun Allah et! Ye gato Yefun Allah syogat me re, Yefun Allah ben sukndo su An et!

¹⁰Yefun Allah, Nan syogat Ye re ma jowa men it anare, tepsu kam nyim Nan bes men bi amui Daud jom men ne. Nan ben sukndo su Ye re et! Men yetu ete bes Yefun Allah gum kok sye wai o et!”

¹¹Yefun Yesus mu kom mo Yerusalem, orge An mu mo Yefun Allah bi nu. Yefun Yesus sokbot suk mwa mone. Sarewo karowa kam bok it, sane Yefun Yesus si An bi pakon ge musyu dik sop we ne mu kadit kota de nden, án sino mu sem mo kampung Betania.

¹²Bi ik, ete Yefun Yesus si An bi pakon mu kadit Betania saresa, Yefun Yesus on de.

¹³Yefun Yesus mo os miten sa, An ti ko ete An me kwe ara ke dik yo kom motu. Kwe ne i-nat mó, sane Yefun Yesus mu meret ara bo wa An git. Sarewo Yefun Yesus mu kom mo kwe ne sa, Yefun Yesus yo ku kwebo yo mo nde, wo kwe ne nat sor ré ana mó, we aina ne yo tep wa kwe ne bo nde tó.

¹⁴Orge Yefun Yesus dufo mo kwe ara ne do, “Kadit kam re, ye yo ma git nan bo yo o nde.” Sukdu gato Yefun Yesus ki mo kwe ara ke ne, Yefun Yesus bi pakon jam dom.

¹⁵Yefun Yesus si An bi pakon mu kom mo Yerusalem sa, Yefun Yesus sok mo ros gato yé nggo wairi wa Yefun Allah bi nu de mit. Yefun Yesus sok mone sa, An syun yé bok yo gato so suk mone titi wé kadit pe ne. An brek yé gato win sugum ne bi meja, An brek ye gato so ndabu bi bangko.

¹⁶Yefun Yesus duyawa yé gwat suk wa yé so ne mu wai ket Yefun Allah bi nu de mo ros de mit.

¹⁷Yefun Yesus duno yé mwa mone. An ki do, “Ye krom mo Yefun Allah bi sukdu do, ‘Ji bi nu re yo, yé kendo do, nu gato yé benadi wa yewis mwa mo bur re sino mó,’ wo nin gato so suk mo Yefun Allah bi nu mit re, nin ben nu re tepsu nu wa yé gato syimsi suk ne ma kem mó.”

¹⁸Yekwesú mo Yefun Allah bi nu si yeguru agama jam sukdu ne sa, án meret os wa gu Yefun Yesus kwop wé, we yé mwa ne iwa jammo sukdu gato Yefun Yesus ki ne. Yé mwa ne mit iwa Yefun Yesus, sane yekwesú mo Yefun Allah bi nu si yeguru agama nokwa yé mwa ne jammo Yefun Yesus bi sikduno-i sye wai kadit án, sane án meret os wa gu Yefun Yesus kwop wé.

¹⁹Kam bok, ete Yefun Yesus si An bi pakon mu kadit kota ne mu mo nden.

²⁰Ik nyotkwo Yefun Yesus si An bi pakon satu mu mo kota o saresa, án mu wai ket os ne, mone, án sokme kwe ara gato Yefun Yesus dufo mone. Kwe ara ne gu ré. Kwe ne gu kadit kwa but sor kom mo i-brot mo bur.

²¹Orge Petrus napakom sukdu gato Yefun Yesus ki su kamekre ne. Sane Petrus ki nai Yefun Yesus do, “Yeguru, Nan me et! Kwe ara gato Nan dufo mone te ré.”

²²Yefun Yesus ki do, “Nin onyar kem mo Yefun Allah et!

²³Suk gato Ji ki re suksangge anare, ye gato ki nai banbo mone do, ‘Nan mu am nan dakai ngga mo sem,’ ete ye ne bi sukjimnut we nde, wo an bi sukjimnut dik do, suk gato an ki ne, sangge, bere bor sor, sane it yo, bere banbo ne benbot suk gato an ki ne.

²⁴Sane Ji ki sare do, suk gato nin kiwa Yefun Allah syo nai nin yo, nin kwabom kam mo Yefun Allah do, Yefun Allah syo suk ne nai nin ré, sane bere nin ku ré.

²⁵Nin benadi, nin ki suk su Yefun Allah yo, nin grem sukmaskwa mo nin mit wa ye yi mo sukibit gato ye ne ben nde, nin nutbot sukibit ne o nde, wo nin was sukmaskwa ne or wé kadit nin, orete nin benadi. Nin was sukmaskwa ne or wé subere nin bi Ai mo gu waii maskwa nin mo sukibit gato nin ben ne o nde, subere nin bi Ai mo gu yo nutbot o nde. [

²⁶Wo nin do nutbot sukibit gato yé yi ben nai nin ne tó, ete nin jom sukaskwa ne pe tó yo, bere nin bi Ai mo gu waii nutbot sukibit gato nin ben ne tó, ete An maskwa nin mone tó.]”

²⁷Yefun Yesus si An bi pakon satu ma mo Yerusalem o, Yefun Yesus mubot Yefun Allah bi nu de mo ros de mit ne sa, yekwesú mo Yefun Allah bu nu, yeguru agama si ye Yahudi bi yepasye ma ku Yefun Yesus.

²⁸Yé bok ne ndo mo Yefun Yesus do, “Je u anato bes Nan wa Nan ben suk mwa more ne? Je u anato syogat Nan ma more ne?”

²⁹Yefun Yesus ki nai án do, “Ye gato bes Ji gum kok wa Ji ma ben suk more ne, bere Ji frot An gum nai nin jam, sarewo Ji waii ndo mo nin subot kwa dik yo or et. Nin ki sukdu ne ma yo, bere Ji waii ki sukdu satu mo suk gato nin ndobot Ji mone.

³⁰Ji ndo mo nin do, ‘Je u anato bes Yohanes wa ras nje mo syur ne, Yefun Allah bado, yetu e?’ Nin ki napyo nai Ji jam et!”

³¹Orge yekwesú si yepasye ne kibot su yu ware, án yo ku os nde, án ndo mo yu do, “Men ki sa u nai An ne? Men do ki do, ‘Yefun Allah anato bes Yohanes’ it yo, bere An ndo mo men do, ‘Sane nin yo jammo Yohanes nde wa suma ne?’

³²Sarewo men do ki do, ‘Yetu anato bes yohanes,’ it yo, bere sukye mone wa men dom.” Yekwesú si yepasye ne nyuwa yetu mwa mone, sawe yé mwa ne maskwa, we yé mwa ne onyar kem mo Yohanes tepsu yenabi gato Yefun Allah bes ne.

³³Sane yekwesú mo Yefun Allah bi nu si ye Yahudi bi padosye mu ki nai Yefun Yesus do, “Men jam nde.” Orete Yefun Yesus ki nai án do, “Sane yo, Ye gato bes Ji wa Ji ma ben suk more ne, Ji yo frot An gum nai nin ja dom nde.”