Read Abun Markus 12 Bible Online

Markus 12 - Abun bible

Markus 12

¹Orge Yefun Yesus gwat sukamno bok yo, An ki nai yekwesú mo Yefun Allah bi nu, yeguru agama si ye Yahudi bi padosye mone. Yefun Yesus ki nai án do, “Yetu ge dik yo ben nggwe anggur, orete an gat ros wairi wa, ete an po bur wak wa yé jomuk anggur bo mó. Orete an nggo nu gwes kok wa yé ti mó subere yé mewa nggwe ne. Suk mwa ne fro, orete yenggras syogat yetu ge bok yo mewa nggwe ne. An ki nai yé bok ne do, ‘Anggur re do bo it yo, nin wat i-we, napyo wa ji, napyo wa nin.’ Orete yenggras ne mu mo nat yu kadit.

²Su kam gato anggur ne bo um, yenggras ne syogat an bi pakwerut dik yo mu mo yé bok gato mewa nggwe ne subere yé ne wat anggur bo napyo wa an.

³Sarewo pakwerut do ma sa, ye gato mewa nggwe ne but pakwerut ne ete kwam pa ne. Orete ye gato mewa nggwe ne, án yo bi suk yo nai pa gwat mu nde, án syogat pakwerut ne mu yi satu mo pa bi yenggras.

⁴Orge yenggras gato bi nggwe ne syogat pakwerut dik yo o mu o, sarewo ye gato mewa nggwe ne gwa pakwerut ne mo pa su. Án kabor pa ne, án ben pa ket kwayo-kwayo dom.

⁵Orge yenggras ne syogat pakwerut dik yo o waii mu o. Sarewo ye gato mewa nggwe ne gu pakwerut ne kwop. Sane yenggras bi pakwerut ge bok yo o mu mone. Sarewo ye gato mewa nggwe ne kwam pakwerut deyo, yé ne gu deyo kwop.

⁶Yenggras re, an bi an bi pakwerut mu or mone, yetu ge dik sor ana kem, an bi gan gato an jimnotku. Sane kom mo rut sa, yenggras re syogat an dakai bi gan mu mone, we an ki do, ‘Ye gato mewa nggwe ne bere jammo ji bi pa ré.’

⁷Sarewo ye gato mewa nggwe ne do me pa ne ma sa, án ki nai yu do, ‘Yenggras gato bi bur det re bi gan anare. Men gu pa kwop wé et, subere bur det re sok mo men.’

⁸Sane ye gato mewa nggwe ne but pa ne, ete yé gu pa ne kwop wé. Án gu pa kwop or, án bare pa mukri mo nggwe de nden.”

⁹Orete Yefun Yesus ndo mo yekwesú mo Yefun Allah bi nu si ye Yahudi bi yepasye mone do, “Sane, yenggras gato bi bur det ne ma yo, bere an ben suma su ye gato mewa an bi nggwe ne? Bere an ma, an gu ye gato mewa an bi nggwe ne kwop wé, orete an syogat ye be yo o waii mewa an bi nggwe ne.

¹⁰Nin baca sukdu kwa re mo Yefun Allah bi sukdu mó bado, nde tó e? Sukdu re ki do, ‘Jok gato yé nggo nu su ne, su ketke yé bariwa, án nut do ibit ré, ri ma sa yé nai jok ne tepsu jok gato ndo wai wa yé nggo nu ne su o ré.

¹¹Yefun Allah anato fro jok ne. Men me ete men nut do, suk gato Yefun ben ne ndo wai o ré.’ ”

¹²Yekwesú mo Yefun Allah bi nu si yeguru agama si ye Yahudi bi padosye ne, án sino jam do, sukamno gato Yefun Yesus gwat ne, Yefun ki pet mo sukibit gato án ben ne. Sane án werwa án but Yefun Yesus ware, án nyuwa yé mwa gato sum mone. Sane án mu kadit nat ne ré.

¹³Bergan yo o, yekwesú mo Yefun Allah bi nu si ye Yahudi bi padosye, án syogat ye Farisi ge bok yo si ye gato simo Herodes ge bok yo mwa meret os ma Yefun Yesus mo suk gato Yefun Yesus ki ne.

¹⁴Yé bok ne mu ku Yefun Yesus, ete án ki do, “Yeguru, men jam do, Nan sa, Nan anato ye gato ben bi suk-i ri roi. Men jam do, Nan kibot Yefun Allah bi sukdu ne yo, kapre yepasye ke, ye gato gum wok ke, Nan duno men sino su Yefun Allah bu sukdu-i ne rer sor, Nan duno yé mwa ne sino tepsu yu. Nan yo brek nden we mo sukdu gato Nan ki ne nde. Sane, men iwa men jam Nan bi sukjimnut subot sukdu re et, sare do, ‘Pemerintah bi yekwesu gato gum do Kaisar syogat men bi sugum pajak nai an, sane men ye Yahudi bi sukduno-i ki suma ne? Men bu sugum pajak anato ndo tepsu sukduno ne bado, siri kadit e? Nan nut do Yefun Allah iwa men bi sugum nai Kaisar, bado, An yo iwa nde e?’ ”

¹⁵Sarewo Yefun Yesus jam yé bok ne meret os wa An, subere ye maskwa An mo sukdu gato An ki satu ne, {Sato Yefun Yesus ki do, men bi pajak nde, bere Kaisar maskwa An, wo An ki do, men bi pajak yo, bere ye Yahudi mwa ne maskwa An.} Yefun Yesus jam do, yé ne da ben nggwa tepsu ye gato onyar kem mo Yefun Allah, sarewo án mit tara ré. Sane An ki do, “Suma ben anato nin meret os wa Ji ne? Nin gwat ye Roma bi sugum det dik yo ma wa Ji me et.”

¹⁶Sane yé gwat sugum det dik yo ma syo nai Yefun Yesus, orete An ndo mo yé ne do, “Yé krom je u ana kaim mo sugum det re ne? Yé krom je u ana gum mo sugum det re ne?” Yé ne ki do, “Yé krom Kaisar kaim mone, si yé krom Kaisar gum mone.”

¹⁷Sane Yefun Yesus ki nai án do, “Sane, Kaisar bi suk-i yo, men syo nai Kaisar, wo Yefun Allah bi suk-i yo, men syo nai Yefun sor.” Yé jam suk gato Yefun Yesus ki ne sa, yé yeket sukdu ne.

¹⁸Orge ye Saduki ge bok yo ma ku Yefun Yesus. Ye Saduki bi sukduno-i kwa yo do, ye gato kwop bere yo sun o nde. Ye Saduki re ma ndo mo Yefun Yesus do,

¹⁹“Yeguru, Musa krom sukduno re wa men do, ye gato yo ku pa nde do kwop it yo, bere an bi nji waii kra su nggonna ne subere ku pa win an bi nji gato kwop ne.

²⁰Wam dik yo, pa yedik ge mufit kem more mó ré. Pa dofutmo kra su nggon dik yo, orete an kwop, an yo ku pa nde.

²¹Sane pa kedowe waii kra su nggonna ne. Sarewo pa kedowe saga pa dofutmo ne dom, pa ne kwop, yo ku pa nde. Sane pa kedogri waii kra su nggonna ne o, orete pa ne kwop, an yo ku pa nde,

²²sane sane sor pá bok ne sino kom mo kedomufit kra su nggonna ne ware, pá bok ne sino yo ku pa nde, wo pá bok ne sino kwop or. Kom mo rut, nggonna ne waii kwop dom.

²³Sane yo, su kam gato yekwop sun kadit sukkwop it yo, nggon gato kra su pa ge mufit ne te, bere nggon re tepsu pa u bi nggon ne?”

²⁴Yefun Yesus ki nai ye Saduki ne do, “Nin jam nde Yefun Allah bi sukdu, nin jam nde Yefun Allah bi suktinggi, sane anato nin bi sukjimnut siri.

²⁵We, sare, ye gato kem mo bur re sa, án kra su yu, sarewo su kam gati yekwop sun it yo, yé mwa ne sino bere yo kra su yu o nde, wo yé mwa ne tepsu malaikat mo gu sor ré, yé yo kwop o nde.

²⁶Nin watbot sukdu gato Musa krom subot ye gato sun kadit sukkwop mó bado nde e? Musa me kweke dik yo {gato bot ru mó, sarewo bot ne yo git kwe ne nde. Ete Musa jam Yefun Allah ki sukdu nai an kadit kweke mit.} Yefun Allah ki do, ‘Ji anato Yefun Allah gato jom Abraham, Isak si Yakub.’

²⁷Yenggras ka gri ne da kwop su nyim neya, sarewo án mbau satu. Sane Yefun Allah yo jom ye gato kwop nde, wo Yefun jom ye gato mbau sor. Nin gare bi sukjimnut-i subot ye gato kwop ne siri wai o ré.” {Sane Yefun Yesus ki rer do, bere yekwop sun ré.}

²⁸Ye Yahudi bi yeguru agama dik yo ma syaretwa sukdu gato Yefun Yesus si ye Saduki duwer yu mone. Yeguru re jam do, Yefun Yesus sa, ki bi sukdu-i ndo yé. Sane yeguru agama re ndo mo Yefun Yesus do, “Kadit sukdu mwa gato Yefun Allah duno men su ne, sukduno u anato sye wai kadit sukduno yi neya ne?”

²⁹Yefun Yesus ki do, “Sukdu kwa ketke anare, ‘Nin yewis Israel ne, nin jam sukdu re et. Yenggras gato jom men ne, An anato Yefun Allah, Ye gato gesyos. Men un Yefun Allah Ye gato gesyos ka dik ne sor.

³⁰Men bi sukjimnut sye kas subot Yefun Allah Ye gato gesyos gato jom men ne et. Men bi men nggwa wa men ben An bi suk-i sisu men mit dik, men onyar dik, men bi sukjimnut dik et.’

³¹Sukduno kwa dowe anare do, ‘Men bi sukjimnut sye kas subot ye yi tepsu men bi sukjimnut sye kas subot men dakai et.’ Sukdu kwa we ne anato sye wai kadit sukduno mwa ne sino mo Yefun Allah bi sukduno-i ne.”

³²Yeguru agama ne ki nai Yefun Yesus do, “Yeguru, suk gato Nan ki ne sangge. Yenggras gato jom men ne, ka dik sor ré, Yefun Allah anane, ete ye yo gato nggi wai kadit An yo mo nde. Men som suk yi nde.

³³Sane men yetu re, men bi sukjimnut sye kas subot Yefun Allah, men bi men nggwa wa men ben An bi suk-i sisu men mit dik, men onyar dik, me bi sukjimnut dik et. Sane dom men bi sukjimnut sye kas subot yi tepsu men bi sukjimnut sye kas subot men dakai anato ndo wai kadit men gre suge tepsu suksom ete men gwat suksom bok yo o ma wa men som Yefun Allah su ne.”

³⁴Yefun Yesus nut do, sukdu gato yeguru agama ki ne ndro ré. Yeguru ki an bi sukdu-i ne tepsu ye gato bi sukjimnut ko. Sane Yefun Yesus ki nai yeguru agama ne do, “Nan sa, nan jam suk, sane karowa nan sok mo Yefun Allah bi rus-i it anare.” Sane kadit kam ne, ye yo ma ndobot Yefun Yesus wa meret os wa An o nde, yé mwa ne damen ware.

³⁵Yefun Yesus duno nje mo Yefun Allah bi nu de mo ros de mit saresa, Yefun Yesus ndo mo nje mone do, “Yeguru gato duno nin su Musa bi sukduno-i ne, yeguru ne ki do, Yekwesu gato Yefun Allahs yogat ma mo bur re anato Daud bi dat ne wa suma ne?

³⁶Suga nyim tuya, Yefun Allah Gen pet mo Daud, ete Daud dakai ki do, ‘Yefun Allah Ye gato gesyos ki nai ji bi Yekwesu do, Nan kem tak Ji de syim ge. Nan si Ji tepsu Yekwesu sino mone sane sor Ji syo yeko gato iwa gu Nan mo Nan syim, subere án jammo Nan et.’

³⁷Sane mo Mazmur ne, Daud kendo Kristus tepsu an bi Yekwesu, Sane men kendo Kristus do, ‘Daud bi dat’ sor nde, wo An tepsu Daud bi Yekwesu dom.” Yé mwa gato mo Yefun Allah bi nu ne iwa jam sukdu gato Yefun Yesus duno án su ne.

³⁸Yefun Yesus duno yé mwa mone saresa Yefun Yesus ki do, “Nin mewa nin nggwa kadit yeguru agama. Yeguru ne iwa it san syu gato ndo, ete án mu mo peyo-peyo su san gato ndo ne, subere yé mwa sokme án. Yeguru do mu mo pasar it yo, án iwa yé mwa mo pasar nut do, an yepasye, án iwa yé ki do, ‘kam ndo’ mo án.

³⁹Yeguru ne iwa án kem mo pe gato yé fro wa yepasye ma kem mó, sato mo nu ari e, mo pesta e ne subere yé bes án gum kok mone.

⁴⁰Yeguru ne kidar nggonna subere án nai suk mo nggonna ne bi nu or sino. Sane dom yeguru ne benadi syu, subere yé mwa gato me yeguru benadi sane nut do, yeguru re sa, ben Yefun Allah bi suk-i sisu ndo, ondewo yeguru ben bu suk-i ibit ré. Sane bere Yefun Allah syo sukye gato de wai nai yeguru gane o ré.”

⁴¹Yefun Yesus kem mo Yefun Allah bi nu mit ne, Yefun Yesus kem tepsu peti gato yé bok sugum mo mit ne. Mone, yé gwat sugum ma, ete yé bok mo peti mit wa yé som Yefun Allah su. Yefun Yesus kem mone, ete An sokwa yé mwa gwat bi sugum ma mo Yefun Allah bu nu. Yé mwa gato ku suk mwa, yé ne ma bok bi sugum mwa mo peti ne mit.

⁴²Orete nggona ge dik yo ma mone dom. Nggonna ne ye gato ku suk mo nde, mom yewa suk. Nggonna ne ma gwat bi sugum wokgan yi sor, mom bok sugum det wokgan we mo peti mit ne.

⁴³Orge Yefun Yesus kendo An bi pakon ma, ete Yefun Yesus ki nai An bi pakon do, “Suk gato Ji ki re suksangge anare, nggonna gato yewa suk re bok bi sugum-i mo peti ne mwa wai kadit yé mwa ne sino,

⁴⁴we yé mwa ne da bok sugum mwa, sarewo án syo sukwokgan kadit án bi suk mwa gato án ku ne. Wo nggonna re da bok sugum wokgan sor ré, sarewo mom syo suk gato mom ku ne sino, mom bok or suno mo peti ré.”