Read Abun Markus 13 Bible Online

Markus 13 - Abun bible

Markus 13

¹Yefun Yesus duno nje mone, or Yefun Yesus mu kadit Yefun Allah bi nu ne. Yefun Yesus mu kadit Yefun Allah bi nu saresa, Yefun Yesus bi pakon dik yo ki nai Yefun Yesus do, “Yeguru, Nan me Yefun Allah bi nu re et! Yefun Allah bi nu re ndo wai o ré, jok gato yé nggo nu su ne sye wai o ré.”

²Yefun Yesus ki nai an do, “Nan dom sokbot nu gato sye wai ne et. Yefun Allah bi nu ne ndo wai, sarewo kapyo tak nu ne ibit or ré. Ri ma jok mwa gato yé nggo nu su ne, bere yé ma krut jok mwa ne or ré, dik yo ut mo dik yo o nde.”

³Orge Yefun Yesus mu mo bobuk Zaitun, An kem mo bobuk de gato tak Yefun Allah bi nu ne. Yefun Yesus kem mone sa, An bi pakonge at gato gum do Petrus, Yakobus, Yohanes, si Andreas, án ge at wadigan ma mo Yefun Yesus, án ki sukdu dor mone.

⁴Yefun Yesus bi pakon ge at ne ndo mo Yefun Yesus do, “Yenggras, Nan ki sukdu rer nai men et. Sukdu gato Nan ki subot Yefun Allah bi nu ne te, kam ot ete bere suk mwa gare bor ne? Suk sato suma anato bere bor nyim wa ós men jam do, bergan it, kam gato Nan ki ne ma it ne?”

⁵Yefun Yesus ki nai án ka at ne do, “Nin mewa nin nggwa sawe ye yo ma kidar nin.

⁶Bere yé mwa ma ki do, ‘Ji anato Kristus gato Yefun Allah syogat ma mo bur re,’ ete kidar yé bok ne sino jammo án ré.

⁷Bere nin jam sukdu subot yé ben sukndi karowa nin, bere nin jam sukdu subot yé gu yu mo peyo-peyo, sarewo nin nyu nde. Bur re yo kru nde tó, bere yé ben sukndi ete gu yu nyim wé et.

⁸Bere negara deyo futma gu negara deyo o, bere yewis deyo futma gu yewis deyo o mone tó. Bere sui sye juwai bur re ram mo peyo-peyo. Bere sukonde sye bor mo peyo-peyo dom. Nin me suk bok gane bor it yo, karowa bu re kru it anane, tepsu nggon gato nukwe i su pa, bere nggon ne kem su bi pa.

⁹Su kam gane ma, nin mewa nin nggwa, we bere yé but nin, ete yé gwat nin mu mo ye Yahudi bi yepasye. Yé gwat nin deyo mu mo ye Yahudi bi nu ari dom, ete ye Yahudi kwam nin su bus mone. Bere yé but nin, we nin onyar kem mo Ji, ete nin ben Ji bi suk-i. Bere yé gwat nin mu mo yepasye gato jowa bur re yo, bere nin ti mo yeraja si gubernur gwem, ete nin ki sukdu subot Ji nai yepasye ne jam.

¹⁰Sukdu subot os ndo gato Yefun Allah fro wa nin ne yo, bere yé ki frekbot yewis mwa mo bur re iwedewe orete yo, bere bur re kru it anane.

¹¹Yé gwat nin mu mo yepasye subere yepasye ne ndobot nin yo, nin jimnot teker subot suk gato nin ki ne nde. Nin nokwa teker nde, we su kam gane it yo, Yefun Allah Gen ós nin ki suk mone. Sukdu gato nin jam mo nin mit ne yo, nin ki nai nje sor, we sukdu gato nin ki ne ma kadit nin dakai nde, wo sukdu ne ma kadit Yefun Allah Gen.

¹²Nin gato onyar kem mo Ji, nin bi nji deyo bere meret os wa nin ete syo nin mo yepasye syim, ete yepasye syokom yé gu nin kwop. Nin bi ai deyo syo nin mo yepasye syim, ete yé gu nin kwop dom. Nin deyo bi pa, bere bariwa jammo nin, ete syo nin mo yepasye syim, ete yé gu nin kwop.

¹³Nin ben Ji bi suk-i, sane bere yé mwa ne sino bariket nin, wo ye gato onyar kem pe mo Ji sor kom mo pe gato or mó yo, bere ye ne kem ndo to kapyo mato kapyo.”

¹⁴Yefun Yesus ki o do, “Bere kam sari ne ma nin me yetu ge dik yo ma mo Yefun Allah bi nu, ete an sok mo Yefun Allah bi gumwak fo mo Yefun bi nu mit. Ye ne, an mise teker, ete an gwat suk yo ma mone gato ben gumwak fo ne ibit, subere Yefun Allah bariwa gumwak ne or ré. (Nin yé mwa ne sino gato baca sukdu gare, nin nutbot bi sukjimnut sisu ndo et.) Sane nin do me ye ne ben Yefun Allah bi nu mit ibit it yo, nin yé gato kem mo bur Yudea titi mu mo banbo et.

¹⁵Nin dogato ti mo bi nu yu is ete sok mo nu mit wa nai suk yo mone nde, wo nin titi sor.

¹⁶Nin dogato ben suk mo nggwe satu mu mo an bi nu wa nai an bi san syu nde. Nin titi sor!

¹⁷Su kam ne nggon gato syimfar si nggon gato pe bi pabom er tó ne, bere ku sukye ndo nde.

¹⁸Nin ki suk su Yefun subere sukye gato ben nin ye Yudea ne yo bor su aina gato nyot dek nde,

¹⁹we su kam gane yé ku sukye ndo nde. Kadit ketke, kadit kam gato Yefun Allah ut bur re sor kom mo kam gato bur re kru, yé yo ku sukye gato yé teker sato sukye re yo mo nde, sukye gato yé ku su kam ne bere yé wai o ré.

²⁰Wo bere kam gato yé ku sukye re su ne Yefun Allah tot napyo wé, ondeyo yé mwa ne kwop or. Yefun Allah jimnotbot yé gato An fro suga nyim wa An nai sok mo An bi rus-i, sane bere An tot kam gato yé ku sukye su ne napyo wé.

²¹Su kam gane ete ye yo do ma ki do, ‘Nin me ye re et! Kristus gato Yefun Allah syogat ma wa jowa men anato ma it! Nin me ye motu et! Kristus anatu it!’ yo, nin jambot nde.

²²Ye gato ben kidar do, an dakai anato Kristus gato Yefun Allah syogat ma mo bur re wa nai men yetu kadit sukye ete jowa men ne bere mó. Sane dom yenabi gato ma wa kidar nin bere mó. Yé bok ne bere kadum bi suktinggi gato ben yé yeket ndo nde. Yé bok ne ben bi suk-i, bergan án ben kidar nje gato Yefun Allah fro suga nyim wa Yefun nai sok mo Yefun bi rus-i, sarewo bere yé bok ne yo ku os mone nde.

²³Sane nin mewa nin nggwa kadit ye gato kidar nin, we sukdu bok ne, yo bor nde tó, Ji ki napyo nai nin jam nyim wé ré.”

²⁴“Sukye gato yé mwa ne ku su kam bok neya orete yo, kam su mo gu, bere Yefun Allah te ré. Aina bere ru rer o nde.

²⁵Bi mwa ne ges kadit gu or. Suk mwa mo gu nim ne yo kas ri o nde.

²⁶Su kam gane yé mwa ne sino mo bur re me Yetu bi Pa to Ji re bor mo gu. Bere Ji is ma sisu nyotem. Ji kaim rer-rik su Ji bi suktinggi gato bor mone.

²⁷Bere Ji syogat Ji bi malaikat mubot bur re iwedewe nai yé gato Yefun Allah fro suga nyim wa An nai sok mo An bi rus-i ne. Malaikat ne bere nai yé ne kadit nobu nim, kadit nobu ket, kadit nobu sem, kadit nobu nden. Malaikat nai yé mwa ne sor kadit bur ke kom mo bur naprut ne.”

²⁸“Men nutbot kwe ara, subere men jam sukduno kwa yo o et. Kwekwa ne kur ete i-nat kup be bor sim yo, men jam do, bergan no kro it anane.

²⁹Sane dom, nin me suk mwa gato Ji kibot gare bor it yo, bere nin jam do, yo nam nde ge, Ji ma tepsu yetu bi Yekwesu it anane.

³⁰Suk gato Ji ki re suksangge anare, yé gato kem mo bur su re, án sino yo kwop nde tó, suk gato Ji ki ne bor sino ré.

³¹Gu nim ne si bur re bere kru ré, wo Ji bi sukdu ne kem sor to kapyo mato kapyo.”

³²“Kam gato Yetu bi Pa to Ji re satu ma su ne, yetu ge dik yo jam kam ne nde. Malaikat mo gu dom jam nde ré. Ye yo jam bi kam-i nde, ye yo jam bi jam-i dom nde. Ji dakai, gato Yefun Allah bi Gan jam nde dom ré, wo Yefun Allah wadigan sor ete jam.

³³Sane nin frawa nin nggwa et! Nin jam nde kam gato Ji ma su ne ré. Nin mewa sor!

³⁴Kam gato Ji ma su ne tepsu sukdu subot yenggras dik yo gato mu mo os syu mo bur yi. Yenggras ne syogat an bi pakwerut mewa an bi nu ne. An fro suk wa pa gedik-gedik ben mo an bi nu ne, ete an ki nai pakwerut gato mewa nusyo ne do, ‘Nin kem su nin fra sor wade ji satu ma et.’

³⁵Sane dom nin kem su nin fra, bere Ji satu ma ré. Ji anato tepsu yenggras gato mu kadit an bi nu ne. Sane nin jam nde kam gato bere Ji satu ma mo Ji bi nu ne. Ji satu ma su kre bado, su noru mit bado, ndam kokor ba ete Ji ma bado, kam it ete Ji ma bado, nin jam nde ré.

³⁶Sane nin kem su nin fra nggwa wa kam gato Ji ma su ne et, sawe kam gato Ji satu ma ne, nin gensu, ete Ji ku nin sem mit.

³⁷Suk gato Ji ki nai nin re, Ji ki nai yé mwa re sino jam dom, ‘Nin kem su nin fra et!’ ”