Read Abun Markus 14 Bible Online

Markus 14 - Abun bible

Markus 14

¹Yefun Yesus si An bi pakon ne mu kadit pe ne or sa, án mu mo kampung Betania. Kam we rek o, ete ye Yahudi konwa Kam sye Waiket, {kam gato suga nyim tuya malaikat waiket ye Israel bi pa futmo mo bur Mesir, malaikat yo gu ye Israel bi pa kwop nde.} Ye Yahudi bi kam sye bi kam dofutmo ne, ye Yahudi kon roti gato yo it nde. Karowa kam sye ne sa, yekwesú mo Yefun Allah bi nu si yeguru agama sino fro os wa án but Yefun Yesus wa án gu apre, subere yé mwa jam nde.

²Yé bok ne ki nai yu do, “Men but An, sarewo men but An su kam sye re nde, sawe yé mwa more maskwa e, saiye daret, ete am men su jok.”

³Yefun Yesus kem mo Simon bi nu mo kampung Betania. Simon ne, su nyim neya suki borbuk git an da. Yefun Yesus kem mo meja de mo nu mit ne saresa, nggon dik yo ma ku Yefun Yesus. Nggon ne gwat manik gato grik ndo. Manik ne grik ndo tepsu kwe nggonnak, wo ye kon kadit kwe narwastu brot. Manik ne bi sugum sye yé. Nggon ne gwat manik ne su sukbo ma, ete mom syat sukbo ne, ete nggon ne sye manik ne mo Yefun Yesus su.

⁴Yetu ge bok yo mone me nggon ne sye manik mo Yefun Yesus sa, án maskwa, án ki nai yu do, “Bei! Nggon re kamo su manik ne wa suma ne?

⁵Ndo sa, men gwat manik ne mu men win su sugum, bere men ku sugum sye wai kadit yé bi ye bi kamba kom mo tahun dik. Sa ndo sa, men syo bi sugum ne nai yé gato yewa suk et.” Yé bok ne ki sukdu ne nai yu or sa, án ndantom nggon ne mo suk gato mon ben ne.

⁶Yefun Yesus ki nai yé bok ne do, “Nin ndantom nggon ne nde! Ben sa u anato nin maskwa ket nggon re ne? Mom ben suk gato ndo wa un Ji.

⁷Yé gato yewa suk kem su nin sino mo bur re petok sor, sane kam gato nin do imo yo, nin bi os wa nin syo suk is yé ne mó. Sarewo Ji re yo kem pe su nin nde.

⁸Nggon re un Ji ete ós Ji tepsu suk gato nggon ku ne. Nggon re syé manik mo Ji kaim re subere mom fro Ji kaim nyim, subere Ji kwop yo, yé bi Ji mo makwe.

⁹Suk gato Ji ki re suksangge anare, bere yé mu mo pe mwa ne sino mo bur re, yé ki sukdu subot os ndo gato Yefun Allah fro wa yetu ne yo, bere yé ki subot suk gato nggon re ben ne dom. Bere yé napawa suk gato nggon re ben ne.”

¹⁰Orete Yefun Yesus bi pakon ge musyu dik sop we, ge dik yo gato gum do Yudas Iskariot mu ku yekwesú mo Yefun Allah bi nu ge bok yo. Yudas si yekwesú bok ne kibot os yo subere Yudas tepsu yeketut gato meret os wa gwat yeko ma but Yefun Yesus.

¹¹Yekwesú ne jam Yudas bi sukdu ne sa, yekwesú ne iwa wai o ré, sane án tom su Yudas do, bere án syo sugum nai Yudas. Sane kadit kam gane Yudas meret os tepsu yeketut gato gwat os wa yeko ma wa but Yefun Yesus.

¹²Su ye Yahudi bi Kam Sye Waiket ne, bi kam futmo, yé kon roti su bibit roti nde, yé git roti gane, roti gato yo it nde. Su kam gane, sagana yé Yahudi gu domba gan wa án git. Ye Yahudi konwa kam gato án bi amui syesyar kadit bur Mesir suga nyim tuya. Sane su kam gane Yefun Yesus bi pakon ma ku An, ete pa ndo mo An do, “Nan iwa men fro suk wa Nan git su kam sye re mo u ne?”

¹³Sane Yefun Yesus syogat pakon ge we do, “Nin ka we mu nyim mo kota et. Bere nin ka we ku yebris dik yo gato gwat syur su sukbo. Nin ka we simo ye ne

¹⁴mu kom mo nu gato ye ne sok mone. Orete nin ka we ki nai yenggras gato bi nu ne do, ‘Yeguru ndo mo nan do, Ji si Ji bi pakon bere konwa Kam Sye Waiket re, sane men git mo gumwak u ne?’

¹⁵Bere yenggras ne kadum gumwak sye dik yo mo kwatka mo nim nai nin ka we. Mo gumwak mit ne, yé fro meja si bangko pe ré. Sane nin ka we fro suk mwa wa men git mone.”

¹⁶Orge Yefun Yesus bi pakon ge we ne mu nyim mo kota. Motu an we ku suk mwa ne sagato Yefun Yesus ki su an we ne. Sane an we fro sugit wa Yefun Yesus si bi pakon git sino su Kam Sye Waiket mone.

¹⁷Kam sye ne bi noru, ete Yefun Yesus si bi pakon ge musyu dik sop we ma mo nu ne.

¹⁸Án sino kem ga wa git sugit saresa, Yefun Yesus ki nai An bi pakon do, “Suk gato Ji ki re suksangge anare, kadit nin gato git sugit su Ji re, bere nin ge dik yo meret os wa gwat yeko ma wa but Ji.”

¹⁹Yefun Yesus bi pakon jam sukdu ne or sa, án kwabom dek ku Yefun, án jimnutbot sukdu ne ndo nde or, án kadik-kadik ndo mo Yefun Yesus do, “Te, ji bado nde e?”

²⁰Yefun Yesus ki nai án do, “Yeketut ne anato nin ge musyu dik sop we re ge dik yo. Ye gato si Ji ras roti mo sukrom mo mbem re sino, ye ne anato bere meret os wa gwat yeko ma wa but Ji.

²¹Sangge, Ji gato Yetu bi Pa bere kwop sagato yenabi krom mo Yefun Allah bi sukdu ne. Sarewo ye gato meret os wa gwat yeko ma wa but Ji bere ku sukye. Ndo sa, ye ne bi im yo pe an mo nde.”

²²Yefun Yesus si An bi pakon git sugit saresa, Yefun Yesus nai roti, ete An ki do, “Ndo mo Nan, Yefun Allah wa roti gato Nan syo nai men re.” Or o An syat roti ne, An syo nai An bi Pakon. An syo nai An bi pakon saresa, An ki do, “Nin nai nin git sor. Ji ku anare.”

²³Or o An nai mok su nau anggur, ete An ki do, “Ndo mo Nan, Yefun Allah wa nau gato Nan syo nai men re.” Or o An syo nai An bi pakon ne da, ete An bi pakon sino da nau anggur kadit mok gato Yefun Yesus syobot án ne.

²⁴Yefun Yesus ki nai An bi pakon do, “Ji dé anare, bere Ji dé sye wa yé mwa subere kak os be wa Yefun Allah nai yé mwa sok mo An bi rus-i sagato An tom ne. Ji dé ne tepsu suktot gato Yefun Allah tom ne.

²⁵Suk gato Ji ki re suksangge anare, Ji yo da nau re o nde yei, kom mo kam gato Yefun Allah jowa An bi rus-i mo nat be ne tepsu Yekwesu ne yo, bere Ji da o mone.”

²⁶Án git, án da nau ne, orete án kos sukos dik yo wa un Yefun Allah, or o án mu kadit pe ne mu mo nden mo bobuk Zaitun.

²⁷Orge Yefun Yesus ki nai An bi pakon do, “Bere nin sino titi kadit Ji, bere nin misyar Ji sagato ye krom sukamno dik yo mo Yefun Allah bu sukdu do, ‘Bere Ji gu ye gato mewa suksi, ete an bi suksi ne titi kadit an.’

²⁸Sarewo Yefun Allah sun Ji kadit sukkwop satu yo, bere Ji mu nyim mo bur Galilea kem kret nin motu.”

²⁹Petrus ki nai Yefun Yesus do, “Kapre pa ge bok re misyar Nan, ji re yo misyar Nan nde, wokgan yo dom nde.”

³⁰Yefun Yesus ki nai Petrus do, “Suk gato Ji ki re suksangge anare, ber noru re, ndam kokor yo ké wam we nde tó, nan rewa Ji wam gri ré.”

³¹Sarewo Petrus ki nggi do, “Kapre ji kwop o, ji mbau o, ji yo rewa Nan nde.” Sugane pakon bok ne ki sukdu tepsu Petrus dom.

³²Orge Yefun Yesus si An bi pakon ge bok ne mu mo pe dik yo gato gum do Getsemani. Mone Yefun Yesus ki nai An bi pakon do, “Nin kem more yei, Ji mu ki suk su Yefun Allah et.”

³³Yefun Yesus ki nai Petrus, Yakobus si Yohanes subere an ka gri si Yefun Yesus mu sino. Mone Yefun Yesus nderku nggwa, An kwabom dek subot sukye gato bere An ku ne, An nutbot wade An kaim rere su.

³⁴Yefun Yesus ki nai An bi pakon ka gri ne do, “Ji nderku Ji nggwa ndo nde. Ji kaim rere bot suk gato bere bor mo Ji ne, karowa Ji kwop rok it anare. Nin ka gri kem more yei, men mewa yu et.”

³⁵Yefun Yesus mu ko gan kadit pakon ka gri ne, ete An sem ket bet mu bur wa An ki suk su Yefun Allah. Yefun Yesus ndek mo Yefun Allah do, “Ji bi Ai o, os yo mó yo, Nan nai Ji wé kadit sukye gato bere Ji ku re et.”

³⁶Yefun Yesus ki nai An bi Ai o do, “Ji bi Ai o, Ji jam do, sangge suk mwa ne sino gato Ji ndek mo Nan, Nan bi suktinggi ne wai mó ré. Suk gato yé teker wa Nan ben ne yo mo nde. Sane Nan nai Ji kadit sukye gato bere Ji ku re et. Sarewo Nan jammo suk gato Ji iwa ne nde, wo Nan dakai fro pe ne tepsu Nan dakai imo, bere Ji simo.”

³⁷Orge Yefun Yesus satu ma ku An bi pakon ka gri ne sa, pakon ne sem ré. Sane Yefun Yesus ndo mo Petrus do, “Simon, nan sem mit bado, nan jam tó e? Jam dik sor ré, nan yo nggiwa nan kem frawa nggwa kom mo jam dik nde bado?”

³⁸Orete Yefun Yesus ki nai an ka gri ne do, “Nin mewa nin nggwa, nin ndekwa Yefun Allah mewa nin subere suk yo tik nin mit ete ben nin misyar Ji nde. Nin da bi sukjimnut dik wan nin jammo Ji, sarewo nin dakai yo nggiwa benbot nde.”

³⁹Yefun Yesus mu ki suk su Yefun Allah wam dik yo o, sukdu gato An ndek mo An bi Ai ne, An ki o, An ndek wam do we o.

⁴⁰Orete Yefun Yesus satu ma o, An ku An bi pakon ka gri ne sem o ré. Pakon ne gro rup ndo nde, sane pakon ne jam nde suk gato ndo wa án ki nai Yefun Yesus ne.

⁴¹Sane Yefun Yesus satu ma ku An bi pakon ka gri ne wam do gri sa, Yefun Yesus ki nai án do, “Nin ka gri kem not mo nat ne sor ré bado, nin ka gri sem tó are, e? Tep it! Nin sem o nde, nin sun se! Nin me re, yeko ma wa bu Ji it anare. Yeketut gato meret os wa gwat yeko ma wa but Yetu bi Pa ma it anare.

⁴²Nin ka gri sun se! Men mu se! Yeketut gwat yeko ma wa but Ji it anare.”

⁴³Yefun Yesus do ki sukdu saresa, An bi pakon dik yo kadit pakon musyu dik sop we ne gato gum do Yudas bor mone. Yé mwa gato gwat nyom si kwekoi ne simo Yudas ma dom. Yekwesú mo Yefun Allah bi nu, yeguru agama si ye Yahudi bi yepasye anato syogat yeko ne ma wa but Yefun Yesus.

⁴⁴Kom mo nat ne nde tó, Yudas, yeketut ne, an ki nai yeko ne do, “Nin me ye gato ji baput mó yo, An anane it, nin but An sor. Nin mewa An sisu ndo, nin gwat An mu sor.”

⁴⁵Kom mo nat gato Yefun Yesus ti mone sa, Yudas mu ku Yefun Yesus. Sugane it, Yudas ki do, “Yeguru!” orete an baput mo Yefun Yesus.

⁴⁶Yudas baput mo Yefun Yesus or, yeko gato si Yudas ma ne but Yefun Yesus ete rai Yefun Yesus krat.

⁴⁷Sarewo pakon dik yo gato ti karowa mone nai bi nyom, ete sap pakwerut dik yo dabe toko wé ré. Pakwerut ne ben suk wa yekwesu gato gum kok wai mo Yefun Allah bi nu.

⁴⁸Orge Yefun Yesus ki nai yeko gato ma wa but An ne do, “Te nin nut do Ji re, yekwesu wa yeko gato futma wa gu nin anato nin gwat nyom si kwekoi ma wa but Ji su ne bado?

⁴⁹Kamdik-kamdik Ji si nin mo Yefun Allah bi nu de mo ros de mit ne, Ji da duno nin mone, sarewo nin yo but Ji nde. Sarewo suk mwa gare bor, subere tepsu sukdu gato yenabi krom mo Yefun Allah bi sukdu ne.”

⁵⁰Yefun Yesus ki sane, orete An bi Pakon mwa ne sino titi kadit An ré.

⁵¹Sugane pa yemsok ge dik yo boribot Yefun Yesus. Pa ne pis san pis sor ré, an yo it san yi nde. Pa ne mu boribot Yefun Yesus saresa, yeko ne werwa but pa yemsok ne ware,

⁵²pa ne titi kadit ré. Pa bis san pis ne rek kadit pa ne, ete kem kwop mone, sane pa ne kas su an kawarun.

⁵³Yeko gato but Yefun Yesus ne gwat Yefun Yesus mu mo yekwesu gato gum kok wai mo Yefun Allah bi nu ne bi nu. Yekwesú mwa mo Yefun Allah bu nu ne, ye Yahudi bi yepasye si yeguru agama sum sino mo nu ne.

⁵⁴Petrus ndar boribot Yefun Yesus ko gan sane sor kom mo yekwesu gato gum kok wai mo Yefun Allah bi nu ne bi nu de. Petrus si yesukmise deyo kem karowa bot mone, subere bot kam is an.

⁵⁵Yekwesú mo Yefun Allah bi nu ge bok yo si ye Yahudi bi yepasye si yekwesu gato sum sino wa kibot sukdu, án sino meret yé gato ma wa ndak Yefun Yesus su sukkidar, subere án ku os wa án syokom ye gu Yefun Yesus wé, sarewo án yo ku os yo mo nde.

⁵⁶Kapre ye kar yé mwa ma wa kidar ndak Yefun Yesus, sarewo án bu sukdu ne yo tepsu yu nde, sane án yo ku os yo mo nde.

⁵⁷Orge yetu ge bok yo ma ti mo yepasye ne gwem wa án ndak Yefun Yesus su sukkidar.

⁵⁸Yé ne ki do, “Men jam Ye re ki do, ‘Bere Ji tarak Yefun Allah bi nu gato yetu nggo ne, orete kam gri rek Ji nggo satu o ré. Bere nu be ne tara o ré, yetu yo nggo nde.’ ”

⁵⁹Sarewo sukdu gato yé ndak Yefun Yesus su ne, yé bi sukdu ne tara kadit yu ré.

⁶⁰Orge yekwesu gato gum kok wai mo Yefun Allah bi nu ne ti mo yé mwa gwem, ete an ndo mo Yefun Yesus do, “Nan ki suma subot suk gato yé re ndak Nan su ne? Nan yo du nde wa suma ne?”

⁶¹Sarewo Yefun Yesus not sor, An yo du wokgan dom nde. Orete yekwesu ne ki nai Yefun Yesus o do, “Te Nan anato Yekwesu gato Yefun Allah syogat ma mo bur re wa nai men yetu kadit sukye ete jowa men bado? Te Nan anato Yefun Allah gato men bes gum kok sye wai ne bi Gan bado?”

⁶²Yefun Yesus ki nai án do, “Ji ana gane it! Bere nin me Yetu bi Pa to Ji re kem tak Yefun Allah gato nggi wai ne de syim ge, ete bere Ji satu is ma mo bur re su nyotem kadit gu.”

⁶³Sugane yekwesu gato gum kok wai mo Yefun Allah bi nu ne maskwa ndo nde anato yekwesu ne syik an dakai bi san, ete an ki do, “Men yo mitwa ye yi yo ma ki sukdu subot An o nde.

⁶⁴Ye re dakai bes An nggwa kok tepsu Yefun Allah, ete An ki suk tepsu Yefun Allah ko re go! Nin sino jam it. Su re te, nin nutbot sa u ne?” Yé mwa mone bu sukdu dik do, “An ki Yefun Allah gum ibit ré, sane men syokom ye gu An kwop wé sor.”

⁶⁵Orge yekwesú mo Yefun Allah bi nu bok yo mone sukut tom Yefun Yesus gwem. Án but san det wa Yefun Yesus gro subere Yefun Yesus yo me suk nde, ete án gwa Yefun Yesus su án syim tak. Yekwesu gato gum kok wai ne ndo mo Yefun Yesus do, “Nan, ye gato tepsu yenabi sangge yo, Nan ye gato jam suk rer, sane Nan ki ye gato gwa Nan re gum et.” Orge yesukmise gwat Yefun Yesus mu kadit pe ne ete án gwa Yefun Yesus dom.

⁶⁶Petrus kem mo nu de nden sa, yekwesu gato gum kok wai mo Yefun Allah bi nu ne bi nggon kwerut dik yo ma mone.

⁶⁷Nggon ne me Petrus ti mo bot de subere bot kam is an sa, nggon ne soktok Petrus, ete mom ki nai Petrus do, “Nan dom simo Yesus, ye Nazaret ne fe!”

⁶⁸Sarewo Petrus rewa sukdu ne ré. Petrus ki nai nggon ne do, “Ji jam nde suk gato nan ki ne ré.” Orge Petrus mu mo nden, an ti mo ros syo mone. [Sugane ndam kokor ba it.]

⁶⁹Nggon kwerut ne me Petrus ti mone o sa, nggon ne ki nai yé bok yo gato ti mone do, “Ye re ye gato simo Yesus ge dik yo anare.”

⁷⁰Sarewo Petrus rewa sukdu ne o ré. Bergan yo o, yé bok yo gato ti karowa Petrus ne ki nai an do, “Sangge, nan dom simo Ye ne, we nan si Ye ne sino anato ye Galilea.”

⁷¹Orge petrus syo syim, an dufo mo yé ne gwem do, “Bur anare, gu ana nim ne, ye gato nin ki ne, ji jam nde ye ne sangge kai!”

⁷²Petrus do ki an bi sukdu-i sa, ndam kokor ba kedowe it anane. Orge Petrus napakom sukdu gato Yefun Yesus ki nai an ne do, “Ndam kokor yo ba wam we nde tó, nan rewa Ji wam gri ré.” Orete Petrus nderku an nggwa, an wo ndo nde.