Read Abun Markus 3 Bible Online

Markus 3 - Abun bible

Markus 3

¹Kam Sabat dik yo o, ete Yefun Yesus sok mo ye Yahudi bi nu ari. Mo nu ari ne yetu ge dik yo gato syim út sok mone dom.

²Ye deyo mone, yé ne iwa meret os wa ki Yefun Yesus gum ibit mo suk gato An ben su kam Sabat ne. Sane yé bok ne sokwa Yefun Yesus pe, án nut mo án syidem do, “Te, Yefun Yesus ben ye yo ge su kam sye kam Sabat ne bado?” {Do Yefun Yesus ben ye ne ge yo, bere yé ne ndak Yefun Yesus do, An ben suk siri kadit sukduno subot kam Sabat.}

³Yefun Yesus ki nai ye gato syim deyo út ne do, “Nan ma ti more, mo yé mwa gwem re et.”

⁴Ye ne ma ti mo yé mwa gwem, orete Yefun Yesus ndo mo yé mwa mone do, “Te, men simo Yefun Allah bi sukduno sane yo, men ben suk sato suma su kam sye kam Sabat ne? Men ben suk gato ndo bado, men ben suk gato ibit e? Men nai nje kadit sukye bado, men gu nje kwop e?” Sarewo yé mwa mone, án yo du nde, án not sor ré.

⁵Yefun Yesu sokbot yé mwa mone sa, An maskwa. An maskwa sor nde, wo Yefun Yesus jimnotbot yé mwa ne sor wade An kaim rere su dom, we yé mwa ne su krat ware, yé bariwa jammo Yefun Yesus bi sukdu-i ne. Orge Yefun Yesus ki nai ye gato syim deyo út me do, “Nan ron nan syim et!” Ye ne ron an syim sa, an syim gato út ne ndo satu.

⁶Orge ye Farisi mone mu kadit nu ari ne, án mu ku yeraja Herodes bi nje, ete án sino meret os wa gu Yefun Yesus kwop wé.

⁷Yefun Yesus si An bi pakon mu kadit pe ne or, án sino mu mo Em Galilea, ete yé mwa ma kadit bur Galilea mu boribot án mone.

⁸Yé mwa gato ma kadit bur Yudea si kota Yerusalem ma ku Yefun Yesus mone. Yé mwa ma kadit bur Idumea e, yé mwa ma kadit bur mo Syur Yordan tak de nobu nim e, yé mwa ma kadit kota we gato Tirus si Sidon e ne dom, án sino ma ku Yefun Yesus mone. Yé mwa ne jam sukdu subot suk mwa gato Yefun Yesus ben ne sino anato yé mwa ne ma ku Yefun Yesus mone.

⁹Yé mwa ndo nde, yé mwa teker ware, sane Yefun Yesus syogat An bi pakon fro kwem dik yo wa An kem mó, sawe yé mwa ne buk yu gat An.

¹⁰Yé mwa gato ma ku Yefun Yesus mone, yé ne jam sukdu do, Yefun Yesus ben yé mwa gato i ne ge ré, sane yé mwa gato i mone, án buk mo yu, án werwa án rot Yefun Yesus subere án ge kadit án bi suki ne.

¹¹Wo ye gato semda ben ne me Yefun Yesus it yo, án nyuwa, án bare án nggwa mo Yefun Yesus gwem, ete semda ne saiye do, “Nan anato Yefun Allah bi Gan!”

¹²Sarewo Yefun Yesus duyawa semda ne subere semda ne yo ki An gum daret nde.

¹³Orge Yefun Yesus mu it mo bobuk dik yo, ete An kendo ye gato An mit kem mone ma mo An. Sane yé bok ne ma mo Yefun Yesus.

¹⁴Orete kadit yé bok gato ma ne, Yefun Yesus bes yetu ge musyu dik sop we, gato An kendo gum do, yerasul. Yefun Yesus bes bi yerasul ge musyu dik sop we ne, An ki nai do, “Ji bes nin subere nin sisu Ji. Ji syogat nin mu ki sukdu subot os ndo gato Yefun Allah fro wa nin yetu wa nje jam.

¹⁵Bere Ji ben nin nggiwa nin syun semda dom.”

¹⁶Pakon ge musyu dik sop we ne gum anare: Simon gato Yefun Yesus syo gum yo do Petrus,

¹⁷Yakobus si bi nji Yohanes, gato Zebedeus bi gan we ne. (Yefun Yesus syo gum yo o mo an we ne do Boanerges gato bi sukjimnut do, “pa gato maskwa dek, tepsu nogu pu”),

¹⁸Andreas, Filipus, Bartolomeus, Matius, Tomas, Yakobus gato Alfeus bi pa, Tadeus, Simon gato sok mo yekweke,

¹⁹si Yudas Iskariot gato ri ma tepsu yeketut gato meret os wa gwat yeko ma wa but Yefun Yesus.

²⁰Yefun Yesus is kadit bobuk ne sa, Yefun Yesus si bi pakon sok mo nu dik yo. Sarewo yé mwa ma sum mo nu ne, yé mwa ndo nde sum mone ware, Yefun Yesus si bi pakon yo ku os wa git sugit nde.

²¹Yefun Yesus bi nji si bi yenggras jam sukdu subot suk gato Yefun Yesus ben ne sa, án ma wa kar Yefun Yesus kadit pe ne, we án ki do, “Semda ben An it!”

²²Yeguru agama bok yo gato ma kadit kota Yerusalem, án waii ki do, “Beelzebul gen pet mo Ye re anato An nggiwa syun semda wé kadit nje, Beelzebul gato biris bi yekwesu ne anato syo suktinggi nai An.”

²³Sane Yefun Yesus kendo yé mwa ne ma mo An, ete Yefun Yesus gwat sukamno bo yo, An ki nai yé ne do, “Semda deyo syun semda deyo it yo, bere sa u ne?

²⁴Yetu gato kem mo bur dik yo do maskwa ket yu, ete gu yu yo, bere án yo kem ndo su yu o nde, bere án ibit or ré.

²⁵Sane dom yetu mo rus dik yo do maskwa ket yu, ete án duwer yu yo, bere rus ne yo kem ndo su yu o nde, bere án ibit or ré.

²⁶Sane dom, mo biris bi yekwesu bi rus-i, semda e, aboksye e, yerom e ne duwer yu ete deyo syun deyo, sane bere biris bi yekwesu si an bi rus-i yo kem ndo su yu o nde, wo bere án sino ibit mo koirut or ré. {Sane semda bi yekwesu ne yo syo suktinggi nai Ji wa ben an bi rus-i ibit nde.}

²⁷Sangge, ye gato iwa sok mo ye gato kaim nggi ne bi nu, ete syimsi ye ne bi suk it yo, an but ye gato nggi ne, orete an rai ye ne syim krat su jamtu nyim wé et. Sane bere an ku os wa an syimsi ye ne bi suk ré.

²⁸Suk gato Ji ki re suksangge anare, sukibit mwa gato men ben ne si sukibit gato men kiket Yefun Allah gum ne, bere Yefun Allah yo maskwa mo sukibit ne o nde, bere Yefun yo nutbot o nde.

²⁹Wo sukibit gato ye kiket Yefun Allah Gen, bere Yefun Alah yo misyar nde, wo Yefun Allah maskwa ket ye ne pe sor, sukibit ne ut mo ye ne krat sor to kapyo mato kapyo.” (

³⁰Yefun Yesus ki bi sukdu-i sane, we An jam do, yé deyo ki An do, “Semda ben An anato An nggiwa syun semda wé kadit nje.”)

³¹Orete Yefun Yesus bi im si bi nji ge bok yo ma mo nu ne, Yefun bi im si bi nji ne ti mo nu de nden, sa án syogat ye yi wa kendo Yefun Yesus ma mo nden ku án mone.

³²Yefun Yesus ki suk mo nu mit ne sa, yé mwa kem wairi wa Yefun Yesus. Yé mwa ne syaretwa An bi sukdu ne. Ye deyo ki nai Yefun Yesus do, “Nan bi im si Nan bi nji ge bok yo ti mo nden án iwa ku Nan.”

³³Yefun Yesus ki nai án do, “Je u anato tepsu Ji bi im ne? Je u anato tepsu Ji bi nji ne?”

³⁴Yefun Yesus ki sukdu ne sa, An sokbot yé mwa gato kem wairi wa An. An ki do, “Ji bi im anare. Ji bi nji anare.

³⁵Ye to ben bi suk-i tepsu Yefun Allah mit anato tepsu Ji bi nji e, Ji bi nyanggon e, Ji bi im e ne.”