Read Abun Markus 5 Bible Online

Markus 5 - Abun bible

Markus 5

¹Yefun Yesus si bi pakon mbros bi kwem mu mo bur Gerasa mo Em Galilea deta.

²Yefun Yesus do is kadit kwem mu nden saresa, yebris ge dik yo gato semda ben ne ma ku Yefun Yesus. Ye gato semda ben ne, an ma kadit jokwak mo makwe ne ma ku Yefun Yesus mone.

³Ye gato semda ben ne kem mo makwe, an kem mo jokwak gato yé grem yekri mone sor. Ye yo nggiwa rai an o nde. Kapre yé rai an su suk gato krat sato rantai ne o, bergan an sombok rantai ne wé o ré.

⁴Yé rai yesemda ne gwes si syim wam bok yo mó ré, sarewo rantai bok ne an ben toko wé. Besi gato yé rai an gwes su ne, an syat wé ré. Yesemda ne nggi teker ware, sane ye yo nggiwa but an nde.

⁵Noru nombrak an muya-muma daret bot makwe si bobuk mone. An muya-muma sa, an saiye daret, an nai jok, an sap an kaim wip su.

⁶Yesemda ne me Yefun Yesus ma kadit os syu sa, an kas mu bare nggwa mo Yefun Yesus gwem,

⁷ete an saiye nggi do, “Yesus, Yefun Allah gato gum kok sye wai ne bi Gan, Nan ma ku ji wa suma ne? Nan tom su ji, Nan syo syim ete Nan ki Yefun Allah gum su do, Nan yo ben sukye nai ji nde.” (

⁸Yesemda ne yo ki sukdu ne nde tó, Yefun Yesus ki nai ye ne do, “Semda, nan sombok kadit ye re se!” anato yesemda ne ki bi sukdu-i sane.)

⁹Orete Yefun Yesus ndo mo semda ne do, “Nan gum sa u ne?” Semda ne ki do, “Ji gum do Legiun, we men re ge mwa ndo nde.” {Legiun bi sukjimnut do yesukmise mwa yé ré, ge ribu dik wai.}

¹⁰Semda mwa ne ndek gat Yefun Yesus seubere Yefun Yesus syun án mu wé kadit nat ne nde.

¹¹Karowa pe ne jot yaino, jot mwa yé ré, git sugit mo bobuk de.

¹²Sane semda mwa ne ndek gat Yefun Yesus do, “Nan imo yo, Nan syogat men mu bok nggwa mo jot mwa ne et.”

¹³Yefun Yesus imo sukdu gato án ki ne, sane semda mwa ne sombok wé kadit yebris ne, orete semda mu bok nggwa mo jot mwa ne. Jot yaino mone, jot mwa yé ré, ge ribu we. Sane semda ben jot mwa ne kas ket kwoye mu ges ngga mo em mit, ete jot mwa ne mbon or sino.

¹⁴Yetu ge bok yo gato mewa jot ne, án me jot mwa ne mbon, orete án titi mu ki sukdu ne frekbot nje mo kota si nat bok yo gato karowa mone. Sane yé mwa ma wa me suk gato bor mone.

¹⁵Yé mwa ne ma ku Yefun Yesus sa, yé me yebris gato semda mwa ben ne, an kem not mone. An it san, an yo kawarun o nde, an bi sukjimnut ndo satu ré. Sane yé mwa ne nyu ndo nde.

¹⁶Yé mwa gato me suk gato Yefun Yesus ben su ye gato semda ben ne, án nuk subot sukdu gato án me bor mone nai yé nwa gato ma ne. Án nukbot yesemda ne si jot mwa ne dom.

¹⁷Orge yé mwa gato kem mo bur ne ndek gat Yefun Yesus subere Yefun Yesus mu kadit án bi bur-i.

¹⁸Sane Yefun Yesus it mo kwem sa, yebris gato semda sombok kadit ne an ndek gat Yefun Yesus do, “Ji si dom.”

¹⁹Sarewo Yefun Yesus yo imo sukdu gato an ki ne nde. Yefun Yesus ki nai yebris ne do, “Nan satu mu mo nan bi rus, ete nan kibot suk mwa gato Yefun Allah ben wa nan et. Nan satu mu mo nan bi nje, ete nan nukbot sukndo gato Yefun Allah dakai ben su nan anato nan ge ne.”

²⁰Sane yebris gato semda ben ne, an mu kadit pe ne. An mu, an nuk subot suk gato Yefun Yesus ben wa an ne. An mu ki sukdu ne frekbot nje gato kem mo kota musyu dik mone. Yé mwa gato syaretwa an bi sukdu ne, án yeket ndo nde.

²¹Orge Yefun Yesus mu mo em deta ne o sa, yé mwa ma sum wairi wa Yefun Yesus mo em de ne.

²²Sugane yetu ge dik yo gato gum do Yairus ma ku Yefun Yesus. Yairus re, an yesu mo ye Yahudi bi nu ari. Yairus me Yefun Yesus sa, an bare nggwa mo Yefun Yesus gwem,

²³ete an ndek gat Yefun Yesus do, “Yenggras, ji bi pa donggon i ndo nde, bergan mom kwop rok it. Sane Nan si ji mu mo ji bi nu wa Nan ak Nan syim mo ji bi mam et, subere mom ge kadit suki ne, subere mom yo kwop nde.”

²⁴Sane Yefun Yesus si bi pakon si Yairus mu sino. Yé mwa simo Yefun Yesus mu sino mone dom. Yé mwa ne kamas buk mo yu kadit os deyo-deyo.

²⁵Nggon ge dik yo gato fo sor kom mo tahun musyu dik sop we ma si yé mwa mone dom.

²⁶Nggon ne mu mo dokter ge bok yo ware, mom yo ge nde. Mom ku sukye ndo nde, Mom syo mom bi suk mwa ne or nai dokter bok ne ware, mom yo ge nde. Wo mom bi suki ne de wai o ré.

²⁷Nggon ne jam sukdu mwa subot suk gato Yefun Yesus ben ne, ete nggon ne ma ku Yefun Yesus mone. Sane kapre yé mwa buk mo yu, nggon ne mu karowa Yefun Yesus kadit Yefun Yesus de dari, ete mom rot Yefun Yesus bi san nap,

²⁸we mom nut mo mom syidem do, “Ji rot Yefun Yesus bi san nap sor ré, bere ji ge ré.”

²⁹Sane nggon ne do rot Yefun Yesus bi san nap ne sa, nggon ne fo or it anane. Nggon ne jam mo mom kaim do, suki gato ben mom ne, or kadit mom, mom jam nde ré.

³⁰Nggon ne rot Yefun Yesus bi san nap sa, sugane Yefun Yesus jam do, An bi suktinggi syesyar kadit An kaim it anane. Sane Yefun Yesus brek sokme yé mwa ne, ete An ndo mo nje mone do, “Je u anato rot Ji bu san ne?”

³¹Yefun Yesus bi pakon ki nai Yefun Yesus do, “Yenggras, Nan dakai me su Nan gro, yé mwa re buk mo yu gat Nan, sane Nan ndo mo yé mwa more do, ‘Je u anato rot Ji ne?’ wa suma ne?”

³²Sarewo Yefun Yesus sokbot yé mwa ne, An meret ye gato rot An bi san ne.

³³Nggon ne jam suk gato bor mo mom ré, sane mom ma bare nggwa mo Yefun Yesus gwem. Mom kwabom kro ndo nde, mom tetet, ete mom nukbot suk mwa gato or mo mom ne.

³⁴Sane Yefun Yesus ki nai nggon ne do, “Pa donggon, nan onyar kem mo Ji, anato nan ge ré. Nan mu, nan kem not sor. Nan bi suki ne or kadit nan it anare!”

³⁵Yefun Yesus ki suk su nggon ne saresa, yebris ge bok yo ma kadit Yairus bu nu, Yairus gato yesu mo ye Yahudi bi nu ari ne. Yebris bok ne ki nai Yairus do, “Nan bi mam kwop ré. Nan syimfar yenggras mu mo nan bi nu o nde.”

³⁶Yefun Yesus misyar yé ne bi sukdu-i, ete An ki nai Yairus, gato yesu mo nu ari ne do, “Nan nyu nde, nan onyar kem pe mo Ji sor.”

³⁷Orge Yefun Yesus mu sor, An duyawa yé mwa mone, subere ye yo si An mu nde, wo pakon ge bok yo to Petrus, Yakobus si Yakobus bi nji Yohanes sor ré ete sisu An mu mo nu ne.

³⁸An ka at mu kom mo yesu ne bi nu sa, Yefun Yesus me yé mwa sum mone. Yé mwa ne wo, ba ret nderbot pa ne ndo nde.

³⁹Yefun Yesus sok mo nu mit, ete An ki nai yé ne do, “Nin wo, nin ba ret wa suma ne? Pa yo kwop nde, wo pa sem sor ré.”

⁴⁰Sarewo yé mwa mone sa An. Sane Yefun Yesus syogat yé mwa ne mu mo nden, orete Yefun Yesus si An bi pakon ka gri ne si pa ne bi ai si bi im sor ré ete sok mo gumwak mit gato yé grem pa mukri kwop mone.

⁴¹Ete Yefun Yesus jom pa ne syim. An ki nai pa su a Ibrani do, “Talita kum,” gato bi sukjimnut do, “Pa donggon Ji ki sare do, Nan sun tom!”

⁴²Yefun Yesus ki nai pa donggon ne sa, pa donggon ne sun it anane. Pa sun ma ete mubot gumwak mit. (Pa kaim sa kom mo tahun musyu dik sop we.) Pa bi im si pa bi ai ne, án we yeket ndo nde.

⁴³Sarewo Yefun Yesus duyawa pa bi im si pa bi ai do, an we kibot suk gato bor ne nai ye yi jam nde. Orete Yefun Yesus ki nai an we do, “Nin ka we syo sugit nai pa ne git et.”