Read Abun Markus 6 Bible Online

Markus 6 - Abun bible

Markus 6

¹Yefun Yesus mu kadit nat ne, ete An si An bi pakon satu mu mo Yefun Yesus dakai bi nat-i.

²Kam Sabat, ye Yahudi bi kam sye, ete Yefun Yesus mu duno yé mwa mo ye Yahudi bi nu ari mone. Yé mwa mone jam suk gato Yefun Yesus duno án su ne sa, án nutbot sukduno ne ndo nde. Án ki do, “Ye re jam sukduno mwa re kadit u ne? An jam sukduno mwa re sa u ne? An ku suktinggi sato suma anato An nggiwa ben duk gato ben men yeket ne?

³Ye re, An ye gato jam ben suk su kwe sato meja e, kursi e ne. An jam sukduno mwa ne sa u ne? Ye re, An Maria bi gan, fe! An bi nji anato Yakobus e, Yoses e, Yudas si Simon fe! Anga bi nyanggon ge bok ne si men kem more sino fe! Ye re, An nut do An bes An nggwa tepsu yepasye ete An ma more, ete An duno men bado?” Sane yé mwa mone bariket Yefun Yesus ré.

⁴Orete Yefun Yesus ki nai nje mone do, “Mo pe mwa ne sino yé bes yenabi gum kok, sarewo mo yenabi ne dakai bi nat-i yo, yenabi bi nje-i si bi rus-i ne bariwa jammo an ré.”

⁵Yefun Yesus yo ben suk yo gato ben yé yeket ne mo nde. An ak An syim mo yetu ge bok yo sor ré, ete ben yé bok ne ge ré.

⁶Yefun Yesus yeket yé mwa mone, we án onyar yo kem mo Yefun Yesus nde. Orete Yefun Yesus mubot kampung bok yo karowa Nazaret ne. An mubot pe ne sa, An duno nje gato kem mone.

⁷Yefun Yesus kendo bi pakon ge musyu dik sop we ne ma, ete An syogat An bi pakon gewe-gewe mubot nat ne. Yefun Yesus syo suktinggi nai pakon ne subere án nggiwa syun semda wé kadit ye gato semda ben ne.

⁸Yefun Yesus ki nai án do, “Nin mu it yo, nin gwat suk nde, wo nin gwat kwepu sor ré. Nin gwat sugit nde, nin gwat yu nde, nin gwat sugum dom nde.

⁹Nin mu it yo, nin it sandal, wo nin gwat san sun we nde, san sun dik sor.

¹⁰Nin mu re, nin kom mo kota dik yo, ete nin sok mo ye yo bi nu mone yo, nin kem mo nu dik ne sor wade nin mu kadit kota ne.

¹¹Sarewo nin do kom mo kota dik yo, ete mone yé yo kendo nin ma si án kem nde, ete yé mone bariwa jammo nin bi sukdu-i ne yo, nin tet nin gwes tak su bofuf ne ges wé kadit nin gwes satu, subere yé gato kem mone jam do, án ben sukibit nai nin ré.”

¹²Sane Yefun Yesus bi pakon mu, ete duno nje subere yé kwet kadit sukibit gato yé ben ne, ete yé brek ma jammo Yefun.

¹³Yefun Yesus bi pakon syun semda mwa wé kadit yé gato semda ben ne. Án nggri manik mo ye gato i, ete ben yé mwa ne ge kadit bi suki ne.

¹⁴Yé ki Yefun Yesus gum kas mo peyo-peyo anato Yeraja Herodes jam sukdu subot suk mwa gato Yefun Yesus be ne. Yé deyo kibot Yefun Yesus do, “Yohanes gato ras nje mo syur anane, an kwop wé ré, ete re ne Yohanes sun kadit sukkwop. Yohanes frus an nggwa tepsu Ye ne anato Ye ne ku suktinggi wa ben suk gato ben men yeket ne.”

¹⁵Sarewo yé deyo o ki do, “Yenabi Elia anane.” Yé deyo o ki do, “Yenabi dik yo o anane, tepsu yenabi gato kam nyim ki Yefun Allah bi sukdu-i gato Yefun tarubot án ne nai men bi amui.”

¹⁶Sarewo Herodes do jam sukdu subot Yefun Yesus sa, Herodes ki do, “Yohanes gato ras nje mo syur anane. Suga nyim ji syogat yé tot an su toko wé ré, orete su re an sun kadit sukkwop o ré.”

¹⁷Suga nyim ne Herodes dakai syogat an bi yesukmise mu but Yohanes, ete ye rai an, orete yé grem Yohanes mo sel. Herodes bi nggon, gato gum do Herodias maskwa ket Yohanes anato Herodes but Yohanes. Su ketke Herodes bi nji gato Filipus ne kra Herodias, orete Herodes waii kra Herodias kadit Filipus, an bi nji ne.

¹⁸Sane Yohanes ndantom Herodes wam bok yo mó ré, sare do, “Nan kra su Herodias, gato nan bi nji bi nggon ne nde. Nan kra su nan bi nji bi nggon anato siri kadit men ye Yahudi bi sukduno-i ré.”

¹⁹Yohanes ndantom Herodes mo suk gato an ben siri ne anato an bi nggon gato Herodias ne grem sukmaskwa ket Yohanes. Herodias iwa gu Yohanes kwop wé, sarewo mom bi ya gato Herodes duyawa ré,

²⁰we Herodes nyuwa Yohanes. Sane Herodes syogat yé mewa Yohanes mo sel ne sisu ndo. Herodes jam do, Yohanes ben sukndo tepsu Yefun Allah mit. Herodes jam do, Yefun Allah bes Yohanes wa ben Yefun Allah bi suk-i ne, sane anato Herodes nyuwa Yohanes. Herodes da iwa syaretwa Yohanes ki Yefun Allah bi sukdu-i, sarewo Herodes jam sukdu ne sa, an bi sukjimnut waiyu mone.

²¹Kom mo rut sa, Herodes bi nggon gato Herodias ne, ku os wa gu Yohanes. Kam dik yo, Herodes konwa an bi kam sye gato an bi im kem su an ne. Herodes kendo an bi yekwesu, an bi yesukmise bi yekwesu si yepasye mo bur Galilea ne sino ma mo pesta ne.

²²Yé konwa kam sye ne sa, Herodis bi mam sara mo yé mwa gato ma ne gwem. Pa nggonnak ne sara ndo wai anato Herodes si yé mwa ne iwa. Sane Herodes ki nai Herodias bi mam do, “Nan iwa ji syo suk sato suma nai nan ne? Nan ki sor ré bere ji syo nai nan ré.”

²³Orete Herodes tomfo nai nggonnak ne do, “Suk gato nan ndek mo ji ne bere ji syo nai nan ré. Suk sino gato ji jom yo, sato nan ndek ji syo napyo nai nan, bere ji syo sor ré.”

²⁴Orge Herodias bi mam syesyar mu ku mom bi im, Pa nggonnak ne ndo mo bi im gato Herodias ne do, “Im o, ji ndekwa yeraja syo suk sato suma anato ndo ne?” Herodias, gato grem suksmaskwa ket Yohanes ne ki do, “Nan ndekwa yé tot Yohanes gato ras nje mo syur ne su toko wé, ete yé gwat ma syo nai ji sor.”

²⁵Pa nggonnak ne mu ku yeraja Herodes kekro o, ete pa ne ki nai Herodes do, “Ji ndekwa nan syogat yé gu Yohanes gato ras nje mo syur ne, or yé tot an su wé, ete yé grem mo mbem, ete yé gwat ma syo nai ji su re wa ji me et!”

²⁶Yeraja Herodes jam suk gato pa kiwa ne sa, an kwabom dek ndo nde. Herodes tomfo mo yé mwa gwem do, suk gato pa ndek mo an, bere an syo nai pa ne, sane an bariwa misyar pa bi sukdu ne.

²⁷Sane sugane it, Herodes syogat an bi yesukmise ge dik yo mu gu Yohanes kwop, ete gwat Yohanes su ma mone. Sane yesukmise ne mu mo sel gato yé bok Yohanes mone, ete an tot Yohanes su toko wé mone.

²⁸Orge yesukmise ne grem Yohanes su mo mbem, ete an gwat ma syo nai pa donggon ne, ete pa ne waii gwat Yohanes su mu syo nai pa bi im.

²⁹Yohanes bi pakon jam ye gu Yohanes kwop sa, Yohanes bi pakon mu nai an mukri ete an gwat mu bi mo jokwak dik yo mo makwe.

³⁰Yefun Yesus bi pakon ge musyu dik sop we ne gato An bes gum yerasul satu ma kadit nat bok yo gato án mu mone. Pakon ne ku Yefun Yesus sa, án sum wairi wa Yefun Yesus, ete pakon ne nuk subot suk mwa gato án mu ben ne si suk gato án duno nje su ne nai Yefun Yesus jam.

³¹Yé mwa ma ku Yefun Yesus mone dom. Yé mwa ma, ki suk, deyo ma, deyo mu, deyo ma o ku Yefun Yesus mone, yé mwa, sane Yefun Yesus si bi pakon yo ku os wa git sugit dom nde. Yé mwa yé ba ku án mone, sane Yefun Yesus ki nai Yefun bi pakon ne do, “Men wadigan sor mu mo pe gato ye yo mo nde et. Men wadigan mu mone subere nin ku os wa nin kem not mone.”

³²Sane Yefun Yesus si An bi pakon it mo kwem ete án mu kadit yé mwa ne. Án mu mo nat gato ye yo mo nde.

³³Sarewo yé mwa me Yefun Yesus si Yefun bi pakon mu kadit pe ne, ete yé mwa ne jam do, Yefun Yesus si bi pakon anato mu ne. Sane yé mwa ne mu kamas, án mu kadit pe mwa mone sino. Án mu nyim ket os nden subere án sakanwa Yefun Yesus si bi pakon mone.

³⁴Yefun Yesus mu kom mone, Yefun is kadit kwem ne, ete Yefun me yé mwa yé ré sum mone sa, Yefun Yesus dakai jimnotku yé mwa ne, we yé mwa ne tepsu suksi sato domba, sarewo ye yo mewa án nde, ye yo kadum os gato ndo wa yé mwa ne nde. Sane Yefun Yesus duno án subot suk mwa.

³⁵Yefun Yesus duno nje sane sor karowa kam bok sa, Yefun Yesus bi pakon ma ki nai Yefun Yesus do, “Karowa kam bok it anare. Ye yo kem mo nat re nde.

³⁶Sane Nan syogat yé mwa re mu, subere án mu mo kampung bok neya gato karowa pe re, subere án mu ku nje gato kem mone, subere án so sugit wa án git et”

³⁷Sarewo Yefun Yesus ki do, “Nin dakai anato syo sugit nai yé mwa re git et!” Yefun Yesus bi pakon ki do, “Mban! Men so roti mwa tep wa yé mwa re git, bere men mitmo sugum tepsu yé bi sugum nai yetu ge dik yo bi kamba mo suk gato an ben ne kom mo aina munggwo ré. Te men anato mu so roti su sugum mwa sane wa yé mwa re git e?”

³⁸Sane Yefun Yesus ndo mo An bi pakon do, “Nin gwat roti koi ot ne? Nin mu me et!” Pakon ne mu me roti gato kwop mone, orete án ma ki nai Yefun Yesus do, “Men bi roti koi mumek sor ré. Men bi boge ge we mó dom.”

³⁹Orge Yefun Yesus syogat yé mwa ne kem mo bur, mo es gato kom kur mone. Yefun Yesus syogat yé mwa ne syo yu kem bokbu.

⁴⁰Sane yé mwa kem bokbu mone, án kem bokbu dik dor kadit yu. Bokbu deyo tepsu yetu ge wotin dik, bokbu deyo o tepsu yetu ge musyu mek. Yé mwa ne syo yu kem bokbu sane.

⁴¹Orete Yefun Yesus nai roti koi mumek si boge ge we ne. An nai, ete An sok mu nim mo gu, An ki do, “Ndo mo Nan, Yefun Allah wa sugit gato Nan syo nai men re.” Yefun Yesus ki sane or, Yefun Yesus syat roti ne. An syo nai An bi pakon, ete An bi pakon ne waii syo bot yé mwa mone. Boge ge we ne dom, Yefun Yesus syo nai bi pakon, ete An bi pakon waii syo bot yé mwa mone.

⁴²Yé mwa ne sino git wade án on ge,

⁴³orete pakon mu sum sugit napta ne bok mo yu. Sugit napta ne, roti si boge koi nap ne, án sum sino án bok mo yu musyu dik sop we ses.

⁴⁴Yebris gato git sugit mone tepsu yetu ge ribu mumek sino.

⁴⁵Yé mwa ne git sugit, orete Yefun Yesus syaugat An bi pakon it mo kwem mu nyim mo An gwem mu mo kota Betsaida mo em deta. Yefun Yesus bi pakon mu-i, Yefun Yesus syogat yé mwa ne mu-i ré.

⁴⁶Yefun Yesus syogat yé mwa ne mu or, An it mo bobuk wa An ki suk su Yefun Allah.

⁴⁷Noru ete Yefun Yesus bi pakon si kwem ne kom mo em mit, wo Yefun Yesus wadigan mo nden tó.

⁴⁸Yefun Yesus me bi pakon mbros kwem ne, pakon yo nggi o nde, we nofuf kas ma kadit kwem su. Bundungan ete Yefun Yesus muket gwes bot em rom deyu. Yefun Yesus ben sato An mu wai kadit An bi pakon su kwem ne ré.

⁴⁹Sarewo Yefun Yesus bi pakon me Yefun Yesus muket em rom deyu ne sa, pakon gendo yekwop gen ana muket em rom deyu ne.

⁵⁰Sane án kwabom kro án saiye, we pakon ne sino me Yefun Yesus mu mone. Sarewo Yefun Yesus ki nai án do, “Nin nyu nde. Ji re anato Yesus.”

⁵¹orge Yefun Yesus it mo kwem ne sa, nofuf gato kas nggi ne not ré. Yefun Yesus bi pakon yeket ndo nde.

⁵²Án yeket Yefun Yesus, we suktinggi gato bor mo suk gato Yefun Yesus ben su roti koi mumek ne, An bi pakon yo jam rer nde tó. Yefun Yesus bu suktinggi ne, An bi pakon nutbot ware, pakon yo jam kom mo mit nde, sukye teker ware.

⁵³Yefun Yesus si bi pakon kom mo em deta sa, án nor kwem mo em deta mo bur Genesaret, ete án sino is mone.

⁵⁴Án do is kadit kwem sa, yé mwa ne me do, Yefun Yesus anato ma ré.

⁵⁵Orete yé mwa ne kas mu mo bur ne, orete án sam ye gato i ne su bi kwatka ma mo Yefun Yesus. Yé mwa ne jam sukdu subot pe gato Yefun Yesus kem mone yo, yé sam ye gato i ne ma sakanwa Yefun Yesus mone.

⁵⁶Mo pe bok ne sino gato Yefun Yesus mu mone, mo kota e, mo kampung e, mo nden e ne, yé sam ye gato i ne ma ete grem mo pe gato yé so suk. Mone yé gato i ne ndek gat Yefun Yesus subere án rot Yefun Yesus bi san nap sor ré, subere án ge ré. Sane yé mwa ne sino gato rot Yefu Yesus bi san nap ne, án ge ré, án jam nde án bi suki ne or ré.