Read Abun Markus 7 Bible Online

Markus 7 - Abun bible

Markus 7

¹Ye Farisi ge bok yo gato duno nje su Musa bi sukduno-i si yeguru agama ge bok yo gato ma kadit Yerusalem, án ma, án sum wairi wa Yefun Yesus.

²Ye Farisi si yeguru ne me Yefun Yesus bi pakon ge bok yo git sugit mone. Pakon ne git sugit ne sa, pakon ne yo mus án syim tepsu ye Yahudi bi sukduno-i nde. Sane ye Farisi si yeguru nut do, Yefun Allah bariket Yefun Yesus bi pakon mo gato pakon ne yo mus án syim tepsu ye Yahudi bi sukduno-i nde.

³Ye Farisi si ye Yahudi mwa ne sino jom án bi amui bi sukduno-i ne krat tó. Sagana án yo git sugit nde tó, án mus án syim nyim wé tepsu án bi amui bi sukduno-i ne.

⁴Sane dom, ye Yahudi satu ma mo án bi nu kadit pasar ne yo, án yo git nde tó, án mus án syim, án de syur, án mus pe mwa ne or. Sane dom, án mus mok e, án mus súk gato yé kon sugit su ne, án mus pe gato yé kem mó dom, we sukduno mwa gato án bi yenggras duno án su ne án jom krat.

⁵Ye Farisi si yeguru agama jom sukdu ne krat anato án ndo mo Yefun Yesus do, “Nan bi pakon yo benbot men bi amui bi sukduno-i nde wa suma ne? Nan bi pakon git sugit, sarewo án yo mus án syim tepsu men bi sukduno-i nde wa suma ne?”

⁶Yefun Yesus ki do, “Nin gare, nin ki suk su nin syokwet sor ré, wo nin mit tara ré. Sukdu gato Yefun Allah tarubot Yesaya wa nin ne sangge, sare do, ‘Yefun Allah ki do, Yé re un Ji su án syokwet sor ré, wo án mit si án onyar tara kadit Ji ré.

⁷Án un Ji ware, án yo un Ji su án mit dik nde, we án duno nje su yetu bi sukduno-i, kadit Ji bi sukduno-i ré.’

⁸Yefun Allah bi sukduno-i ne, nin misyar ré, wo nin bi amui bi sukduno-i ne anato nin jom krat.”

⁹Orete Yefun Yesus ki nai ye Farisi si yeguru ne o do, “Nin sa, nin bi os mwa wa nin misyar Yefun Allah bi sukduno-i ne, subere nin jom nin dakai bi sukduno-i ne kadit.”

¹⁰Sato Yefun Allah bi sukduno-i gato Musa krom ne, nin jam sare do, ‘Men jammo men bi ai si men bi im.’ Musa ki o do, ‘Ye to dufo mo bi ai yo, bi im yo, bere men gu ye ne kwop wé sor.’

¹¹Sarewo nin duno nje sare do, ‘Ye to ki nai an bi ai si an bi im do, “Bere ji gwat ji bi suk mu, ji syo nai Yefun Allah tepsu suksom, sane ji yo ós nin ka we su suk ne nde.” Nin yeguru agama duno nje do, ye ne gwat suk mwa ne tepsu suksom wa Yefun ete misyar an bi yenggras anato ndo.’

¹²Sane nin duno nje su nin bi sukduno-i anato yé ne misyar án bi yenggras ne ré. Yé ne yo ben suk yo wa an bi im si bi ai o nde.

¹³Sane nin duno nje su nin bi sukduno-i ne subere án jom nin bi amui bi sukduno-i ne krat wai anato án misyar Yefun Allah bi sukduno-i. Nin duno nje su nin bi sukduno-i mwa yo o subere yé misyar Yefun Allah bi sukduno-i, ete yé win su nin bi yenggras bi sukduno-i ne o ré.”

¹⁴Orete Yefun Yesus kendo ye Farisi si yeguru mwa ne ma o, ete An ki nai yé mwa ne do, “Nin syaretwa suk gato Ji ki re sisu ndo subere nin jam et!

¹⁵Yefun Allah yo bariket men mo suk gato men nai kadit nden ma, ete ges ngga mo men mit nde, wo Yefun Allah bariket men mo suk gato syesyar kadit men mit ne. [

¹⁶Sane nin brek nin dabe muya-muma kadit nde, wo nin jammo Ji bi sukdu ne sor!]”

¹⁷Yefun Yesus mu kadit yé mwa ne, ete An satu mu mo nu mit sa, Yefun bi pakon ndek mo Yefun Yesus subere Yefun ki rer subot sukamno ne bi sukjimnut nai án jam et.

¹⁸Yefun Yesus ki nai An bi pakon do, “Te, nin yo jam sukamno ne bi sukjimnut ri nde tó bado? Yefun Allah yo bariket men mo gato men nai suk kadit nden ete suk ne ges mo men mit nde ré, nin jam nde bado?

¹⁹We suk gato men nai kadit men kaim de nden, gato ges mo men mit anato sugit gato men git ne. Yefun Allah yo bariket men mo sugit gato men git ne nde. Sugit gane yo sok mo men bi sukjimnut nde, sarewo sugit gato men git ne ges ete sok mo mit si men ondim, orge syesyar mu nden ré.” Sane Yefun Yesus ki bi sukdu-i mone anato men jam do, sugit mwa ne sino ndo wa men git.

²⁰Orete Yefun Yesus ki o do, “Yefun Allah bariket men yetu mo suk gato ma kadit men mit si men onyar,

²¹we suk mwa gato ma kadit men mit ne, ma kadit men yetu bi sukjimnut ibit ne. Sukjimnut ibit anato ben men ben sukibit sato re: men iwa men ben siri su nggon daret e, men syimsi suk e, men gu ye yi kwop e,

²²men gro sye wa men ku suk mwa e, men iwa ben sukibit nai ye yi e, men iwa kidar suk e, men gro sye wa ku ye yi bi suk e, men iwa men kiket ye yi, men iwa bes men nggwa kok e, men iwa ben sukdaret mwa.

²³Sukibit mwa gare syesyar kadit men mit, ete suk bok gare anato ben Yefun Allah bariket men. {Sugit gato men git ne yo ben Yefun Allah bariket men nde.}”

²⁴Orge Yefun Yesus mu kadit pe ne mu mo pe dik yo karowa kota Tirus. An sok mo nu dik yo, we Yefun Yesus bariwa yé mwa jam An ma mone. Sarewo Yefun Yesus yo ku os wa gurik An nggwa mone nde.

²⁵Nggon ge dik yo jam Yefun Yesus ma mone sa, nggong ne ma kekro, mom bare nggwa mo Yefun Yesus gwem. Semda ben nggon ne bi mam.

²⁶Sane nggon ne ndek mo Yefun Yesus subere An syun semda ne wé kadit mom bi mam. Nggon ne, yewis ye Yahudi nde. Nggon ne yewis ye Yunani, mom ontu mo bur Siria mo kota Fenisia.

²⁷Yefun Yesus ma wa ós yewis ye Israel, sane An duyawa nggon ne, we nggon ne yewis yi, sane An ki nai nggon ne do, “Ketke men syo sugit nai men bi pa wokgan git wade pa on don or et. Wo men nai pa wokgan bi sugit ete men am nai ndar git, bere siri ré.”

²⁸Nggon ne werwa Yefun Yesus ós mom, sane mom ki do, “Sangge, Yenggras, men syo pa wokgan bi sugit nai ndar nde, wo ndar gato mo meja desnak bere git sugit mwir gato pa ben ges mo bur ne fe!”

²⁹Sane Yefun Yesus ki nai nggon ne do, “Nan bi sukdu-i ne ndo wai o ré, sane anato Ji ós nan it anare. Nan satu mu mo nu, bere nan me do, semda yo ben nan bi mam o nde, semda ne titi kadit ré.”

³⁰Nggon ne satu mo nu sa, nggon ne me bi mam sem mo kwatka mo nu mit, semda gato ben pa ne titi wé kadit pa ne ré.

³¹Orge Yefun Yesus mu kadit kota Tirus. An mubot os gato mu mo Em Galilea. Sane An muket os gato mu mo kota Sidon, orete An mu kom mo nat gato gum do Kota Musyu Dik.

³²Mone yé deyo gwat yetu ge dik yo gato dabe mbut ma. Ye ne yo ki suk sisu ndo nde. Yé gwat yebris ne ma mo Yefun Yesus, ete yé ndekwa Yefun Yesus ak syim mo yebris ne.

³³Yefun Yesus si yebris ne mu ko gan kadit yé mwa, ete Yefun Yesus bok An sopkwa mo ye ne dabe wak we. Or o Yefun Yesus sukut mo An sopkwa, ete Yefun Yesus syimbot ye ne brip.

³⁴Orge Yefun Yesus sok mu nim mo gu, An jimnotbot yebris ne teker, sane Yefun Yesus fuf An mas nggi syu mu nden, ete An ki nai yebris ne do, “Efata!” Efata bi sukjimnut su Yefun Yesus bi a ne do, “Nan dabe si nan syokwet kak se!”

³⁵Sugane ye ne dabe we ne rer it anane. Ye ne syokwet kak, an brip ram, ete an ki suk sisu ndo it anane.

³⁶Yefun Yesus duyawa nje mone do, “Nin ki subot suk gato nin me ne nai ye yi jam daret nde.” Yefun Yesus duyawa ye kibot suk gato bor mone nggi wai o, sarewo yé mu kibot sukdu ne frekbot peyo-peyo mwa wai o ré.

³⁷Yé mwa gato jam sukdu ne án yeket ndo nde. Yé ne ki do, “Suk mwa gato An ben ne, An ben sisu ndo sino fe! An ben ye gato dabe mbut, dabe ndo satu. Ye gato syokwet mbut, An ben ye ne wa ki suk sisu ndo. Mban! Ye re sa, ben bi suk-i ndo wai o ré.”