Read Abun Markus 9 Bible Online

Markus 9 - Abun bible

Markus 9

¹Yefun Yesus ki nai An bi pakon o do, “Suk gato Ji ki re suksangge anare, yetu ge bok yo gato ti more yo kwop nde tó, bere án kem mo bur re kom mo kam gato án me Yefun Allah bi suktinggi tepsu Yekwesu gato nggi wai bor ré.”

²Kam mumat rek o, Yefun Yesus kendo Petrus, Yakobus si Yohanes sisu An it mo banbo sye. Yefun Yesus si an ka gri re sor ré anato it mo banbo ne. An ka gri ne sokme sa, Yefun Yesus kaim tara or ré.

³Yefun Yesus bi san gato An it ne kwo rer-rik. An bi san kwo yé ré, yetu mo bur re yo mus san kwo ndo sane mo nde.

⁴Sugane Yefun Yesus bi pakon ka gri ne me ye we gato gum do Musa si Elia si Yefun Yesus nuk subot sukdu sino.

⁵Sane Petrus ki nai Yefun Yesus do, “Yeguru o, men ka gri si Nan ma more anato ndo. Men nggo nu ti ke gri et, dik yo wa Nan, dik yo o wa Musa, dik yo o wa Elia.”

⁶Petrus ki bi sukdu-i ne daret, an yo nutbot ndo nde, we an si an bi yesyim we ne nyu ndo nde.

⁷Orge duk is ma kewa án sino, ete án jam Yefun Allah ki sukdu kadit duk mit ne do. “Ji bi Gan gato Ji jimnotku anare. Nin jammo An sor.”

⁸Pakon ka gri ne jam sukdu ne or sa, án sok meret pe ne kekro ware, án yo me ye yo mone o nde, wo án me Yefun Yesus wadigan anato ti mone sor ré.

⁹An ka gri si Yefun Yesus is kadit banbo ne saresa, Yefun Yesus dumik wa an ka gri ne do, “Nin kibot suk gato nin ka gri me ne nai ye yi jam nde, wo Yetu bu Pa sun kadit sukkwop orete yo, nin ka gri ki nai ye yi jam.”

¹⁰An ka gri jammo sukdu ne, sarewo án ndo mo yu do, “Yefun Yesus bi sukjimnut sa u anato An ki do, bere An sun kadit sukkwop ne?”

¹¹Orete an ka gri ne ndo mo Yefun Yesus do, “Suma ben anato ye Yahudi bi yeguru agama ki do, Elia ma nyim mo Yetu bi Pa gwem mo bur re ne?”

¹²Yefun Yesus ki do, “Sukdu gato yeguru ki ne sangge do, Elia ma nyim, ete an fro os wa Ji ré. Sarewo yé krom mo Yefun Allah bi sukdu do, bere yé bariwa Yetu bi Pa, ete yé ben sukye nai Ji ket kwayo-kwayo. Sukdu ne bi sukjimnut-i sa u ne?

¹³Sarewo Ji ki sare do, Elia da ma ré, ete yé ben sukye nai an ket kwayo-kwayo, yé ben tepsu pe gato yé imo, tepsu yé krom subot Elia mo Yefun bi sukdu mó ré.”

¹⁴Yefun Yesus si An bi pakon ka gri ne ma ku An bi pakon deyo o ne sa, Yefun si bi pakon ka gri ne me yé mwa sum wairi wa pakon yi ne. Ye Yahudi bi yeguru agama duwer Yefun Yesus bi pakon yi mone.

¹⁵Yé mwa mone do me Yefun Yesus ma sa, án mit iwa wai o ré, ete án kas mu gum os wa Yefun Yesus.

¹⁶Yefun Yesus ndo mo An bi pakon yi mone do, “Nin si yeguru agama duwer yu mo suma ne?”

¹⁷Yebris dik yo mo yé mwa ne mit ne ma, ete an ki nai Yefun Yesus do, “Yenggras, yeguru, ji gwat ji bi pa ma mo Nan. Semda ben ji bi pa anato pa yo du ndo nde.

¹⁸Semda do ben pa ne yo, semda et pa kaim mo bur, pa syokwet bre, pa syos ne nggo yu ete pa kaim ne jum. Ji ndek mo Nan bi pakon subere án syun semda ne wé kadit ji bi pa ware, án yo nggiwa ós ji bi pa nde.”

¹⁹Yefun Yesus ki nai yé mwa mone do, “Mban! Nin gare, nin yo onyar kem ri mo Yefun nde, nin su krat teker ware go! Ji bambrai wa Ji ben Ji bi suk-i njep si nin o it! Kam ot ete bere Yefun Allah nai Ji wé kadit nin ne? Nin gwat pa ne ma mo Ji et.”

²⁰Sane yé mu kar pa ne ma mo Yefun Yesus. Semda ne do me Yefun Yesus saresa, semda ne ben pa ges gwa mo bur it anane. Semda ne ben pa kaim kokro, pa gro kakwo kas. Pa ne ges gwa mo bur, ete pa wopbot bur, pa syokwet bre mone.

²¹Yefun Yesus ndo mo pa bi ai do, “Pa re i kom mo kam ot rek it ne?” Pa ne bi ai ki do, “Kadit pa ka pa wokgan ne it.

²²Semda ne iwa gu pa ne kwop. Semda ne bare pa mo bot. Semda me bare pa mo syur wam bok yo mó ré. Sarewo yenggras, Nan bi suktinggi tep wa ós men yo, Nan jimnotku men, Nan ós men et.”

²³Yefun Yesus ki do, “Nan ki sa u ne? Nan ki do, Ji bi suktinggi tep bado, yo tep nde e? Ye gato onyar kem mo Ji yo, ye ne jam do, sangge suk mwa ne sino gato an ndek mo Ji, Ji bi suktinggi tep wai mó ré, suk gato yé teker wa Ji ben ne yo mo nde.”

²⁴Yefun Yesus ki sukdu ne sa, sugane it, yenggras ne ki do, “Yenggras, ji da onyar kem mo Nan, sarewo ji yo onyar kem pe mo Nan nde tó. Nan ós ji subere ji onyar kem pe mo Nan o et.”

²⁵Sugane Yefun Yesus me yé mwa kas ma sum wairi wa pa gato semda ben ne, sane Yefun Yesus ndantom semda ne. An ki do, “Suksemda o, nan gato ben pa re mbut, nan gato ben pa re yo du nde, Ji syokom nan do, Nan syesyar kadit pa re tom! Nan sok satu mo pa re o nde!”

²⁶Semda ne saiye nggi, ete semda ne ben pa ne kaim kokro, pa gro kakwo kas, orge semda ne syesyar kadit pa ne. Semda syesyar kadit pa ne sa, pa yo ram o nde, ben sato pa kaim tepsu yekri mukri. Sane yé mwa ne ki do, “Pa ne kwop it anare.”

²⁷Sarewo Yefun Yesus jom pa ne syim, orge Yefun Yesus ós pa ne sun. Sane pa sun ré.

²⁸Yefun Yesus mu mo nu mit sa, ye yi mone yo mo nde, An bi pakon wadigan ma ndo mo Yefun Yesus do, “Men yo nggiwa syun semda ne wé nde wa suma ne?”

²⁹Yefun Yesus ki do, “Semda gato sane, an bi wis-i ne, men syaugat semda ne mu sor nde, wo men ki suk su Yefun Allah, men ndek mo Yefun orete yo, men ku suktinggi wa men syun semda ne wé.”

³⁰Yefun Yesus si bi pakon mu kadit pe ne, án muket os gato mubot bur Galilea ne. Yefun Yesus bariwa yé jam pe gato An mu mone,

³¹we sugane An duno An bi pakon. Yefun Yesus ki nai An bi pakon do, “Bere yeko ma wa but Yetu bi Pa to Ji re, ete yé gu Ji kwop wé. Yé gu Ji kwop, sarewo kom mo kam we rek bere Ji sun kadit sukkwop o ré.”

³²Yefun Yesus ki sukdu ne, An bi pakon jam nde bi sukjimnut ware. Sarewo pakon ne nyuwa án ndo mo Yefun Yesus subot sukdu gato An ki do, ‘Kam we, ete Ji sun kadit sukkwop o ré,’ bi sukjimnut-i.

³³Yefun Yesus si bi pakon mu kom mo Kapernaum. Yefun Yesus si An bi pakon sok mo nu mit sa, Yefun Yesus ndo mo An bi pakon do, “Gado nin duwer yu mo suk sato suma subot os ne?”

³⁴Yefun Yesus bi pakon yo du nde, we mo os mit ne án duwer yu subot ye gato gum kok wai mo án ye ka musyu dik sop we ne.

³⁵Yefun Yesus kem, orete An kendo An bi pakon ge musyu dik sop we ne ma mo An, ete An ki do, “Ye gato iwa yé mwa bes an gum kok tepsu yepasye yo, sa ndo sa an ben nggwa tepsu yé mwa neya bi pakwerut et, an ben nggwa tepsu pa wokgan et.”

³⁶Orge Yefun Yesus nai pa wokgan dik yo ma, ete An grem pa ne si án ti mone sino. Yefun Yesus kambrut pa ne, ete Yefun Yesus ki nai An bi pakon do,

³⁷“Ye to kak an mit wa pa wokgan sato re, we an bi sukjimnut kem mo Ji yo, tepsu an kak an mit wa Ji dom anane. Sane dom, ye to kak an mit wa Ji yo, ye ne yo kak an mit wa Ji sor nde, wo ye ne kak an mit wa Yefun Allah gato syogat Ji ma more dom.”

³⁸Orge Yohanes ki nai Yefun Yesus do, “Yeguru, men me yetu ge dik yo syun semda ge bok yo wé, an ki gum su Nan gum. Sane men duyawa ye ne do, ‘Nan ki gum su Yefun Yesus gum wa syun semda o nde, we nan yo sisu men nde.’ ”

³⁹Sarewo Yefun Yesus ki do, “Nin duyawa ye ne nde, we ye gato ki gum su Ji gum wa an ben suk gato ben yetu yeket, bere ye ne ki Ji gum ibit sa u ne? Yo mo nde,

⁴⁰we ye gato yo duwer men nde sok mo men bi det-i, bere an ós men mone tó.

⁴¹Suk gato Ji ki re suksangge anare, ye to syo syur dek nai nin da mo gato nin tepsu Ji bi pakon, we nin sok mo Kristus bi rus-i it yo, bere Ji syo suk gato ndo nai ye ne mo suk gato an ben ne.”

⁴²“Ye yo ben pa wokgan gato onyar kem mo Ji re ges mo os ibit it yo, sa ndo sa ye rai ye ne gubit ke ndom jok sye krat, ete ye bare an mo sem mo pe gato kru subere an rap mone. Ye ne kwop anato ndo wai kadit an ben pa ges mo os ibit.

⁴³Nin syim dik yo ben nin ges mo os ibit it yo, nin tot nin syim ne wé, ete nin bare wé kadit nin et. Nin sok mo Yefun Allah bi rus-i mo gu su nin syim dik sor ré anato ndo wai kadit Yefun Allah bare nin mo bot gesyos gato u petok ne su nin syim we mó tó. [

⁴⁴Bot ne yo te nde ré. Yé mone, bom git án ku ne pegat sor, bom yo kwop mo nde.]

⁴⁵Sane nin gwes dik yo do ben nin ges mo os ibit it yo, nin tot nin gwes ne wé. Nin sok mo Yefun Allah bi rus-i mo gu su nin gwes dik sor ré anato ndo wai kadit Yefun Allah bare nin mo bot gesyos su nin gwes we mó tó. [

⁴⁶Bot ne yo te nde ré. Yé mone, bom git án ku ne pegat sor, bom yo kwop mo nde. Sane nin werwa nin tot suk gato gwat nin sok mo os ibit ne wé kadit nin et.]

⁴⁷Sane dom, nin gro dik yo ben nin ges mo os ibit it yo, nin tik nin gro ne buk, ete nin bare wé et. Nin sok mo Yefun Allah bi rus-i mo gu su nin gro dik yo sor ré anato ndo wai kadit Yefun Allah bare nin mo bot gesyos su nin gro we mó tó.

⁴⁸Mo bot gesyos ne bot yo te nde ré. Yé mone, bom git án ku ne pegat sor, bom yo kwop mo nde.

⁴⁹{Nin ku sukye mo gato nin tot suk bo gare wé ne anato nin karowa Yefun Allah ete nin kem ndo,} tepsu nin grem bók mo sugit subere sugit ne wik.

⁵⁰Bók ne ndo, sarewo bók ne yo wik o nde, bere men ben suma subere bók ne wik satu o ne? Nin duwer yu subot kwayo-kwayo sato ye gato gum sye e ne yo, bere nin kem ndo su yu sa u ne? Sa ndo sa nin sino tepsu bók gato wik ne, nin duwer yu o nde, nin kem ndo su yu sor.”