Read Abun Lukas 1 Bible Online

Lukas 1 - Abun bible

Lukas 1

¹Yenggras Teofilus, Yé mwa krom sukdu subot suk gato bor mo men miten subot Yesus Kristus ne mó ré.

²Yé gato me suk ne su án gro kadit ketke, yé gato mu ki subot suk mwa gato Yesus Kristus ben ne, án sino mu nuk subot suk mwa gato án me su án gro, ete án waii krombot.

³Sane yenggras, ji waii watbot suk mwa ne sino sisu ndo kadit ketke, ete ji nut do ji krom sukdu ne rer wa nan, yenggras Teofilus, nan jam rer subere ndo.

⁴Ji krom sukdu re, subere yenggras, nan jam rer do sukdu gato yé duno nan su ne, sangge it.

⁵Herodes gum yeraja mo bur Yudea. Herodes jowa nje mo bur Yudea sa, yetu ge dik yo gato gum do Zakaria kem mone. Zakaria gum yesu mo Yefun Allah bi nu. Zakaria sok mo Abia bi det-i gato ben suk mo Yefun Allah bi nu ne. Zakaria bi nggon gum do Elisabet. Elisabet bi amui mo Harun, gato su kam nyim tuya gum yekwesu wa yesu gato ben suk mo Yefun Allah bi nu.

⁶Zakaria si bi nggon ne, an we ben sukndo tepsu Yefun Allah mit. An we benbot Yefun Allah bi sukduno mwa ne sino sor, kwa dik yo gwet dom nde.

⁷Sarewo an we yo ku pa nde, we Elisabet nukwerit pe ré. An we kem, an we ka yenggras it.

⁸Kam dik yo, ete Zakaria ma ben suk mo Yefun Allah bi nu. Su kam gane yesu mo Yefun Allah bi nu kendo Abia bi det-i ma wa án ben suk mo nu ne. Sane Zakaria ma mone.

⁹Zakaria ma mone sa, yesu gato ben suk mo Yefun Allah bi nu deyo ben suk mone dom. Sagana án tik bit subere án bes yesu ge dik yo gum wa sok mo Yefun Allah bi gumwak fo ne, orete yesu ne som Yefun Allah mone. Yesu gato ye bes wa an som Yefun Allah mone, an gre suk gato i-bu basni grik ndo mo meja mo nu mit wa som Yefun su ne. Sane yesu gato ben suk mo Yefun Allah bi nu ne tik bit, ete Zakaria tik bit gato syu ne, sane yé bes an wa an sok mo nu mit.

¹⁰Zakaria do sok mu gre suk gato grik ndo ne mo Yefun Allah bi nu mit sa, yé mwa ma sum mo nu de nden wa án benadi mone.

¹¹Zakaria gre suk gato grik ndo mo meja mo Yefun Allah bi nu mit sa, Yefun Allah bi malaikat dik yo ma ti mone. Malaikat ne ti mo meja tak de syim ge, mo nat gato Zakaria gre suk gato grik wa som Yefun su ne.

¹²Zakaria do me malaikat sa, an gen mó, an nyu ndo nde.

¹³Sarewo malaikat ki nai Zakaria do, “Zakaria, nan nyu nde. Suk gato nan ndek mo Yefun Allah ne, Yefun Allah jam mó ré. Bere nan bi nggon Elisabet ku pa yebris dik yo mone tó. Bere nan kendo pa ne gum do Yohanes.

¹⁴Nan bi nggon do kem su pa ne, bere nan iwa wai o ré. Yé mwa dom, bere án iwa pa gato nan bi nggon kem su ne.

¹⁵Pa gato nan bi nggon kem su ne, bere Yefun Allah bes pa ne tepsu yepasye. Yefun Allah duyawa pa ne da nau anggur si nau krat. Kadit ketke bi im kem su pa ne yo, Yefun Allah Gen bok nggwa mo pa ré.

¹⁶Pa ne sye yo, bere pa kar ye Israel mwa satu kadit os ibit ma, ete jammo Yefun Allah, Ye gato gesyos, án bi Yekwesu ne.

¹⁷Bere pa ne fro os wa Yefun, ye Israel bi Yekwesu, gato bere ma ne. Bere Yefun Allah Gen bok nggwa mo pa subere an ki Yefun Allah bi suktaru. Bere an ben an bi suk-i tepsu Elia, gato yenabi kam nyim ne. Yefun Allah Gen bok nggwa mo pa ne, subere pa ben yenggras gato maskwa bi pa ne kem ndo satu. Ye gato bariwa jammo Yefun, bere pa ne kar yé ne satu kadit os ibit ma mo os ndo, ete án ben sukndo tepsu Yefun mit. Bere pa ne fro yé mwa subere án kak án mit wa Yefun gato bere ma mo án.”

¹⁸Zakaria ndo mo malaikat ne do, “Nan ki do, bere ji ku pa, sarewo bere ji jam nan ki nan bi sukdu-i ne sangge sa u ne? Ji si ji bi nnggon ka yenggras it. Sane bere men ku pa sa u ne?”

¹⁹Malaikat ne ki nai Zakaria do, “Ji gum do Gabriel, ji kem mo Yefun Allah gwem. Yefun Allah anato syogat ji gwat suktaru gato ndo ne wa nan.

²⁰Sarewo nan yo onyar kem mo ji bi sukdu-i nde. Nan nut do, ji bi sukdu-i yo sangge nde. Sane kadit kam re yo, ji ben nan syokwet mbut, nan yo ki suk o nde ré. Ji ben nan syokwet mbut mu kom mo kam gato suk gato ji ki ne bor ré. Suk gato ji tom ne bor eteyo, nan ki suk satu.”

²¹Malaikat si Zakaria nuk sukdu saresa, yé mwa mo nu de nden eswa Zakaria syesyar kadit nu mit. Yé mwa nut do, “Suma ben anato Zakaria ben suk nam mo nu mit ne?”

²²Zakaria syesyar kadit nu mit sa, an syokwet mbut, an yo ki suk ndo nde. An ef su an syim sor ré. Sane yé mwa mone jam do Yefun Allah kadum suk yo nai Zakaria mo nu mit, anato Zakaria ef su an syim, sarewo an yo du nde, an syokwet mbut ware.

²³Zakaria ben an bi suk mo Yefun Allah bi nu gato an bi yesu syogat an ben ne or sa, an satu mo an bi nu ré.

²⁴Zakaria satu mo an bi nu, orge an bi nggon Elisabet syimfar. Orete Elisabet kem not mo nu mit sor mu kom mo aina mumek, Elisabet yo syesar ku ye yi nde.

²⁵Sane Elisabet ki do, “Su re yo, Yefun Allah jimnotku ji it anare. Ji yo damen mo yé mwa gwem o nde, Yefun ben ji gum ndo it.”

²⁶Elisabet syimfar kom mo aina mumat, orge Yefun Allah syogat malaikat gato gum do Gabriel ma mo kota Nazaret mo bur Galilea.

²⁷Yefun Allah syogat malaikat Gabriel gwat suktaru mu ki nai nggonnak dik yo mone. Nggonnak ne gum do Maria. Nggonnak ne, Yusuf nggorwa ré. Yusuf bi amui mo yeraja Daud.

²⁸Malaikat ne ma mo Maria or, malaikat ki do, “Ndo mo nan. Yefun Allah ben sukndo su nan wai kadit ye yi neya ré. Yefun Allah sisu nan.”

²⁹Maria do jam sukdu ne sa, mom jimnutbot, mom nut subot suk gato malaikat ki ne.

³⁰Malaikat ne ki do, “Maria, nan nyu nde, we Yefu Allah dakai jimnotku nan.

³¹Bere nan syimfar, nan kem su Pa yebris, orete nan kendo Pa ne gum do Yesus.

³²Bere Pa ne gum yepasye, bere yé kendo An do, Yefun Allah gato gum kok sye wai ne bi Gan ré. Bere Yefun Allah, Ye gato gesyos, bes Pa ne gum Yekwesu wa An jowa nje mwa, tepsu yeraja jowa nje mwa, sato An bi amui, yeraja Daud ne.

³³Bere Pa ne jowa yewis ye Israel to kapyo mato kapyo, An jowa nje petok sor.”

³⁴Maria ki nai malaikat ne do, “Ji nggonnak gato ben siri yo mo nde. Ji kem yi, bere ji ku pa sa u ne?”

³⁵Malaikat ne ki do, “Bere Yefun Allah Gen ma mo nan. Bere Yefun Allah Gen bi suktinggi ben nan, subere nan ku Pa. Bere nan ku Pa gato yé kendo do Yefun Allah bi Gan. Pa ne Yefun Allah fro dor wa ben Yefun bi suk-i sor ré.

³⁶Nan napawa nan bi om gato gum do Elisabet. Elisabet syimfar kom mo aina mumat it anare. Kapre mom ka nggongras ete yé ki do, mom nukwerit pe ré, mom syimfar ré,

³⁷we suk gato yé teker wa Yefun Allah ben ne, yo mo nde.”

³⁸Maria ki do, “Ji gum kwerut wa Yefun Allah. Suk gato nan ki ne bere bor mo ji sor.” Orge malaikat mu kadit Maria ré.

³⁹Malaikat mu kadit Maria, orge Maria fro suk ete mu kamas mo kota dik yo, mo banbo mo bur Yudea.

⁴⁰Maria mu sok mo Zakaria bi nu, ete Maria ku Elisabet mone. Mom ku Elisabet sa, mom ki nai Elisabet do, “Ndo mo nan.”

⁴¹Elisabet jam Maria du sa, pabom gato kem mo Elisabeth on ne ram. Sugane Yefun Allah Gen pet mo Elisabet.

⁴²Yefun Allah Gen bok nggwa mo Elisabet sa, Elisabet saiye do, “Nan sa, Yefun Allah ben sukndo su nan wai kadit nggon mwa ne sino. Pa gato bere nan kem su, Yefun Allah ben sukndo su dom.

⁴³Bere nan kem su Pa gato gum Yekwesu wa men, sane suma ben anato nan ba ku ji re ne? Ji gum tepsu pa wokgan sor ré.

⁴⁴Ji jam nan du gado ne sa, pabom mo ji on mit ram, we pa iwa nan ba ku men.

⁴⁵Nan onyar kem mo sukdu gato Yefun Allah ki nai nan ne. Nan jam do, sangge, suk gato Yefun ki ne bere bor ré, sane anato Yefun Allah ben sukndo su nan.”

⁴⁶Maria ki do, “Ji bes Yefun Allah gum kok wai o ré.

⁴⁷Ji mit at wa Yefun Allah, An nai ji kadit sukye gato ji ku ne.

⁴⁸An napawa ji, ji anato An bi pakwerut gato gum wok mo bur. Kadit re yo, yé mwa gato mo bur re sino ki do, ji anato nggon gato Yefun ben sukndo su ne.

⁴⁹We Yefun Allah gato nggi wai o ré, An ben suk gato ndo wai su ji. Yefun Allah gum kok sye wai o ré.

⁵⁰Yefun Allah dakai jimnotku yé mwa ne sino gato jammo An. Kadit kam nyim tuya mu kom mo kam sari ne ma, Yefun Allah jimnotku ye gato jammo An petok sor.

⁵¹Yefun Allah sa, ben bi suk-i nggi wai o ré. Yefun Allah ben ye gato mit at ne wade ye ne jam nde nden.

⁵²Yekwesu gato jowa nje, Yefun Allah is we, wo ye gato gum wok mo bur, Yefun Allah bes ye ne gum kok o ré.

⁵³Ye gato on de, ye gato yéwa suk, Yefun Allah syo suk mwa gato ndo nai yé ne, sarewo ye gato ku suk mwa, Yefun Allah syun yé ne mu yi.

⁵⁴Yefun Allah ós ye Israel, An bi pakwerut, Yefun Allah jimnotku ye Israel tepsu sukdu gato An tom su men bi amui su ketke.

⁵⁵Yefun jimnotku Abraham si bi dat-i mwa ne sino pe sor, tepsu sukdu gato Yefun Allah ki nai ye Israel bi amui kadit ketke. An napawa suk gato An tom ne pe sor.”

⁵⁶Maria kem mo Elisabet bi nu-i wade aina gri, orete Maria satu mu mo mom bi nu-i.

⁵⁷Aina tepsu wa Elisabet kem su pa sa, Elisabet kem su pa yebris dik yo.

⁵⁸Elisabet bi nje si ye gato kem mo kota ne jam sukdu subot sukndo gato Yefun Allah dakai ben su mom ne sa, yé mwa si Elisabet mit iwa mone sino.

⁵⁹Elisabet kem su pa ne or, kom mo kam munggwo rek sa, yé ma mo Elisabet bi nu wa yé bisunat pabom ne. Ye gato ma ne, án mit wa án kendo pa ne gum bot bi ai, Zakaria.

⁶⁰Sarewo pa bi im Elisabet ki do, “Sane nde, men kendo pa re gum do Yohanes.”

⁶¹Yé mwa mone ki nai Elisabet do, “Mo nan bi rus-i ye yo gato gum do Yohanes yo mo nde.”

⁶²Orge yé mwa ne ef syim nai Zakaria subere yé jam kret Zakaria bi sukdu-i do, Zakaria iwa kendo pa re gum sa u ne?

⁶³Zakaria ndekwa ye syo kwedet dik yo ma nai an subere an krom suk mó. An ku kwedet sa, yé mwa mone yeket suk gato Zakaria krom mo kwedet ne. Zakaria krom do, “Pa re gum do Yohanes.”

⁶⁴Zakaria do krom pa gum or, sugane Zakaria syokwet kak, Zakaria ki suk sisu ndo satu, an un Yefun Allah.

⁶⁵Yé mwa gato kem mo kota ne án yeket, orete sukdu subot Zakaria si bi pa ne yé ki frekbot bur Yudea tak de banbo ne sino.

⁶⁶Yé mwa gato jam sukdu ne, án jam do, Yefun Allah sisu pa ne, sane án nut mo án mit subot pa ne do. “Pa re sye yo, bere pa ben suk sato suma ne?”

⁶⁷Zakaria un Yefun sa, Yefun Allah Gen bok nggwa mo Zakaria, pa ne bi ai. Orge Zakaria ki sukdu gato Yefun Allah tarubot an sare do,

⁶⁸“Men un Yefun Allah, men bi Yekwesu, An anato jom men ye Israel. An ma ós men, An bi rus-i. An tot suktot mo sukibit gato men ben ne wé.

⁶⁹An fro os wa nai men wé kadit sukye gato men ku ne, An bes Ye gato nggiwa ós men. Ye gato An bes ne bi amui mo yeraja Daud, gato Yefun Allah bi pakwerut ne.

⁷⁰Tepsu kam nyim Yefun Allah tarubot yenabi ge bok yo gato An bes wa ben An bi suk-i ne. Yefun Allah tom do,

⁷¹An nai men wé kadit sukye gato yeko iwa ben nai men. An nai men wé kadit yé mwa gato bariket men, subere yé ne ku os wa ben sukibit nai men nde.

⁷²Yefun Allah dakai jimnotku men bi amui, suk gato Yefun Allah tom dor su men bi amui ne, An napawa pe, An benbot suk gato An tom ne.

⁷³An tom kot nai men bi amui, Abraham do,

⁷⁴An nai men wé kadit sukibit gato yeko iwa ben nai men ne, subere men bi sukjimnut sye mo suk gato Yefun Allah iwa men ben ne, men yo nyuwa ye gato bariket men ne o nde ré,

⁷⁵subere men ben suk tepsu Yefun Allah mit, men bi men nggwa wa ben Yefun Allah bi suk-i, su kam mwa ne sino gao men kem mo bur re sor kom mo kam gato men kwop su.”

⁷⁶{Orge Zakaria ki nai an bi pa do,} “Nan, ji bi pa, bere yé kendo nan gum do yenabi, bere nan gwat Yefun Allah gato gum kok sye wai ne bi suktaru ma ki nai nje mo bur re ré. Yefun Allah syogat nan mu nyim mo men bi Yekwesu ne gwem, subere nan fro os wa An.

⁷⁷Bere nan ki nai men yé gato sok mo Yefun Allah bi rus-i subot os ndo gato Yefun Allah fro subere nai men wé kadit sukye, ete men kem ndo to kapyo mato kapyo. Bere nan ki rer nai men subere men jam do, Yefun Allah yo maskwa men mo sukibit gato men ben ne o nde, Yefun yo nutbot o nde, anato An ós men kem gesyos.

⁷⁸Yefun Allah gato jom men ne, An dakai jimnotku men ndo nde anato An fro os ndo wa men. An syogat Yetu ge dik yo is kadit gu ma mo bur re. Yefun Allah syogat Ye ne ma ós ete jowa men tepsu Yefun Allah syogat kam it, ete kam gat men.

⁷⁹Ye gato ma ne tepsu sukru sye, An ben pe gato rer wa yé gato kem mo ndendu. Yé gato kem mo ndendu ne ben sato kwop, we án jam nde Yefun, wo Ye gato ma ne tepsu sukru sye gato kadum os gato ndo wa men subere men si Yefun Allah kem ndo su yu.”

⁸⁰Pa gato Elisabet kem su ne sye, an bi sukjimnut nggi, an jammo Yefun Allah. An kem mo pe gato kwe yo kom mo nde, wade tepsu kam gato an ben suk, ete an syesyar an ki Yefun Allah bi suktaru nai ye Israel jam.