Read Abun Lukas 12 Bible Online

Lukas 12 - Abun bible

Lukas 12

¹Ye Farisi si yeguru agama ben bi suk-i sa, yé mwa ye ré sum mone wa án me Yefun Yesus. Yetu ge ribu bok yo, yé mwa ne ti buk mo yu. Sane Yefun Yesus yo ki sukdu nai yé mwa ne nde tó, Yefun Yesus ki nai An bi pakon do, “Nin mewa nin nggwa kadit ye Farisi bi bibit roti-i. Nin mewa nin nggwa subere nin ben suk tepsu ye Farisi ne nde. Ye Farisi duno suk su án syokwet sor, wo án yo benbot án bi sukduno nde.

²Yefun Allah jam suk mwa ne sino, sane suk gato yé gurik su re, ri ma bere bor wa yé mwa jam. Suk gato ye dumik wa yu waré, bere yé mwa jam or ré.

³Sane suk gato yé ki nai yu mo pe gato ndendu bere bor wa yé mwa jam su nombrak. Sane dom, suk gato ye yo tom mo ye deyo dabe mo gumwak mit, bere yé ki sye wa yé mwa ne sino jam.”

⁴“Ji bi yesyim, Ji ki sare do, nin nyuwa ye gato nggiwa gu nin da kridek kwop ne nde. Ye ne gu nin da kridek kwop sor, wo an yo nggiwa ben suk yo o nde.

⁵Wo Ji ki rer subere nin jam ye gato nin nyuwa. Nin nyuwa Yefun Allah et. Yefun Allah sa, nggiwa gu nin da kridek kwop, orete Yefun Allah nggiwa bare nin da gesyos mo bot gesyos dom, wo yetu nggiwa gu men da kridek sor ré. Sane, Ji ki sare do, nin nyuwa Yefun Allah sor ré.

⁶Yé gwat ndam syik ge mek wa yé so, bere ye ku sugum det we sor ré. Sarewo ndam syik ne, Yefun Allah yo misyar nde, wo Yefun Allah mewa ndam ne sor.

⁷Sane, mo nin dakai dom, nin sugo mwa ne sino, Yefun Allah newa ré. Sane nin nyuwa suk daret nde. Yefun Allah bi sukjimnut sye kas subot men yetu ne ndeo nde, sane Yefun mewa nin wai kadit ndam mwa ne o ré.”

⁸Yefun Yesus ki do, “Ji ki sare do, ye gato ki mo yé mwa gwem do, an tepsu dik su Ji, gato Yetu bi Pa, bere Ji waii ki sane nai Yefun Allah bi malaikat mwa ne.

⁹Wo ye gato rewa Ji mo yé mwa gwem, bere Ji waii rewa ye ne mo Yefun Allah bi malaikat gwem dom. Sarewo ye to da jam Ji gum sarewo an bambrai wa ki Ji gum mo yé mwa gwem, sane bere Yetu bi Pa waii rewa ye ne gum mo Yefun Allah bi malaikat gwem.

¹⁰Ye gato ki sukdu kwa yo ibit ket Yetu bi Pa yo, bere Yefun Allah misyar sukibit ne, An yo nutbot o nde. Wo sukibit gato ye kiket Yefun Allah Gen, bere Yefun Allah yo misyar nde, wo Yefun Allah maskwa ket ye ne pe sor.

¹¹Yé gwat nin mu mo ye Yahudi bi nu ari e, mo yesukmise, mo yepasye gwem wa yé ndobot nin mone yo, nin jimnot teker subot suk gato nin ki nai nje mone nde. Nin nokwa teker nde,

¹²we bere su kam gane it yo, Yefun Allah Gen duno nin su suk gato nin ki nai nje mone.”

¹³Yetu ge dik yo mo yé mwa ne ki nai Yefun Yesus do, “Yeguru, Nan syogat ji bi nji syo men bi ai bi sukrok napyo is ji et.”

¹⁴Yefun Yesus ki nai ye ne do, “Je u anato bes Ji tepsu yepasye wa kibot nin ka we bi suk-i ne? Je u anato bes Ji tepsu yegweswai wa Ji syo nin ka we bi sukrok is yu ne?”

¹⁵Orge Yefun Yesus ki nai yé mwa gato mone do, “Nin frawa nin nggwa et! Nin mewa nin nggwa subere nin gro sye wa suk mwa neya mo bur re nde, we men do ku suk mwa ne yo, suk mwa ne yo ós men kem ndo nde.”

¹⁶Orge Yefun Yesus gwat sukamno sare do, “Yekaya dik yo, an jan sukjan mo an bi bur det. Sukjan ne do kri sa, yekaya ne nai sugit mwa yé ré.

¹⁷Sane, yekaya ne nut mo an syidem do, ‘Ji bi nu wa ji grem suk mwa re yo tep nde, sane ji ben suma ne?’

¹⁸Orge an bi sukjimnut mó do, ‘Ndo sa, ji tarak ji bi nu wokgan re wé, ete ji nggo nu sye wai o, subere ji grem ji bi sugit mwa re si ji bi suk mwa kwop mone.’

¹⁹Yekaya dakai du mo an dakai do, ‘Bere ji kem ndo it. Ji ku suk mwa yé ré. Tahun bok yo o ete sugit re yo or nde. Sane ji kem not it are. Ji yo ben suk o nde. Ji git, ji kamo, ji sem sor ré.’

²⁰Sarewo Yefun Allah ki nai ye ne do, ‘Nan jimgon, su noru re it yo, nan kwop it are. Sane bere je u anato ku nan bi suk mwa gato nan sum re ne? Bere nan bi suk mwa ne sok mo ye yi.’ ”

²¹Sane Yefun Yesus ki do, “Ye gato sum suk mwa mo bur re wa an dakai, wo an yo ben Yefun Allah bi suk-i nde, bere Yefun Allah waii ki do, ye ne jimgon dom.”

²²Orete Yefun Yesus ki nai An bi pakon o do, “Sane, Ji ki sare do, sugit wa nin git ne, suk gato nin mitmo wa nin kem mo bur re, nin nutbot teker eta nde. Sane dom, san wa nin it mo nin kaim, nin nutbot teker eta nde.

²³We sare, men kem mo bur re anato ndo wai kadit sugit. Sane dom, men kaim anato ndo wai kadit san.

²⁴Men me mo ndaok. Ndam ne yo jan suk nde, ndam yo sum sugit mo bi bat nde, ndam bi nu sye wa án grem sugit yo mo nde, wo Yefun Allah mewa ndam ne ré. Yefun bi sukjimnut sye wai subot men yetu, sane bere An mewa nin wai kadit ndam ne o ré.

²⁵Sane nin nutbot suk mwa teker eta, bere ós nin kem wikgan yo o mo bur re bado?

²⁶Nin nutbot suk mwa teker sane, suk ne yo ós nin kem wikgan yo o mo bur re nde. Saneyo, nin nokwa suk yi neya teker wa suma ne? Suk ne yo ós nin nde.

²⁷Nin me es u gato dakai kom. Es ne yo werwa fro án bi san nde. Yeraja Salomo da it san gato ndo yé, sarewo Ji ki sare do, Salomo yo it san gato ndo wai kadit es u ne nde.

²⁸Yefun Allah syo es u tepsu san wa es gato dakai kom ne. Es ne kom su kam re, sarewo bere ik ete es ne te, orete yé syo bot git wé ré. Yefun bi sukjimnut sye wai subot men yetu, sane bere An mewa nin su san gato ndo wai kadit ne o ré. Sane nin onyar yo kem ri mo Yefun nde wa suma ne? Bere Yefun Allah syok suk gato nin mitmo ne.

²⁹Sane nin bi sukjimnut sye mo suk gato nin git si suk gato nin da ne nde. Nin nutbot suk ne teker eta nde.

³⁰Yé mwa ne sino gato jam nde Yefun mo bur re bi sukjimnut sye mo suk mwa re petok sor, wo nin bi Ai Yefun Allah jam do nin mitmo suk ne.

³¹Sane nin bi sukjimnut sye mo suk mwa ne nde, wo nin bi sukjimnut sye wa nin jammo Yefun Allah tepsu nin bi Yekwesu, ete nin ben sukndo tepsu Yefun mit sor. Sane bere Yefun syo suk mwa gato nin mitmo ne nai nin dom ré.”

³²“Nin yé gato yo mwa nde, nin nyu nde, nin anato Ji bi suksi. Bere nin bi Ai mo gu bes nin tepsu yekwesu gato ós An wa jowa An bi suk mwa ne sino.

³³Sane nin mu nin so nin bi suk mwa gato nin ku ne, orete sugum gato nin ku mone nin syo nai ye gato yo ku suk yo mo nde, sane bere nin ku suk mwa mo gu. Nin do ben sane, bere tepsu nin grem nin bi suk mwa ne mo gu, tepsu nin bok mbre mo sun bafar gato kem to kapyo. Nin ku suk mwa mo gu ne, suk mwa ne kem pe, yo or nde. Sane dom ye yo ku os wa sok mo gu ete gitsi nin bi suk nde. Kundun yo ku os wa ben suk ne ibit dom nde.

³⁴Nin ben Yefun bi suk-i, nin grem suk mwa mo gu sane, we pe gato nin bi suk mwa kem mone yo, bere nin bi sukjimnut sye mone dom.”

³⁵“Nin fro nin nggwa wa nin ben Yefun bi suk-i et. Nin it nin bi san, nin mewa nin bi kak sawe kak ne te.

³⁶Sato yenggras dik yo bi pakwerut ge bok yo eswa án bi yenggras satu kadit yé konwa ye we kra yu. Pakwerut ge bok ne kem su án fra ete eswa án bi yenggras satu ma. Yenggras ne do satu ma yo, an do nggo nusyo yo, pakwerut ne ma kekro ete kak nusyo wa án bi yenggras.

³⁷Pakwerut ne bi yenggras do ma ku pá ne yo, pá gato mewa an bi nu tepsu yenggras syogat pá ben ne bere ku sukndo mone. Suk gato Ji ki re suksangge anare, bere yenggras ne win an bi san, yenggras syogat an bi pakwerut ne kem, orete yenggras gwat sugit ma wa pakwerut ne git.

³⁸Kapre yenggras ne ma su noru miten, yenggras do ku pá gato mewa nu ne eswa pá bi yenggras satu ma yo, bere pá ne ku sukndo mone.

³⁹Sane nin napawa suk re et. Ye gato bi nu jam do, ye gato syimsi suk ma su noru ne yo, bere an eswa yesyimsi ne, ete yesyimsi ne yo ku os wa sok mo nu ne nde.

⁴⁰Sane dom, nin fro nin nggwa petok sor, we bere Yetu bi Pa ma su jam gato nin jam ri nde.”

⁴¹Petrus ki do, “Yenggras, Nan ki gado subot ye gato fro an nggwa wa an bi yenggras satu ma ne te, Nan gwat sukamno ne wa men bado, Nan gwat sukamno ne wa yé mwa ne sino, e?”

⁴²Yefun Yesus ki do, “Pakwerut gato jam suk mwa, ete ben bi suk-i ri-roi tepsu bi yenggras mit ne te, men jam pa ne sa u ne? Pa ne ben bu suk-i sa u ne? Pa ne anato tepsu pa gato yenggras bes tepsu yesu wa yenggras bi pakwerut ne sino. Pa ne mewa pakwerut bok neya sis undo, pa syo sugit tep wa pakwerut mwa ne git sino.

⁴³Pakwerut ne bi yenggras do ma ku pa ne yo, pa gato benbot suk gato bi yenggras syogat pa ben ne, bere pa ku sukndo mone.

⁴⁴Suk gato Ji ki re suksangge anare, bere yenggras ne bes pa ne mwa mewa yenggras ne bi suk mwa ne sino.

⁴⁵Wo sato pakwerut ne nut mo pa dakai do, ‘Ji bi yenggras, nam ete bere ma,’ ete pa ne kwam pakwerut yi ne daret e, pa ne kwam nggon kwerut mo nu ne dom, ete pa git sugit sor, pa da mau, an yenau bu e ne.

⁴⁶Orete pa bi yenggras satu ma su mit, sisu kam gato pa jam ri nde, si jam gato pa jam ri nde. Sane yo, bere pa bi yenggras sap pa kaim wip ndo nde, orete yenggras syun pa ne mu ngga mo pe gato ibit, mo pe gato ye gato jam nde Yefun ku sukye mone.

⁴⁷Pakwerut gato jam suk gato an bi yenggras mitwa an ben ne, sarewo pa ne yo fro nggwa wa pa benbot nde yo, bere pa ne ku sukye ndo nde. Pa gato yo benbot suk gato an bi yenggras syogat an ben ne nde yo, bere an bi yenggras syogat yé gu pa ndo nde.

⁴⁸Wo pakwerut gato jam nde suk gato an bi yenggras mitwa an ben ne, ete pa ne yo ben suk tepsu nde, bere yé kwam pa tep yi. Pa gato jam suk mwa, bere pa bi yenggras syogat pa ne ben suk mwa. Sane dom, pa gato jam suk mwa teker, bere pa bi yenggras syogat pa ben suk mwa teker.”

⁴⁹“Ji ma mo bur re wa Ji gwat bot gato git suk mwa. Bere yé wat yu, yé maskwa yu mo Ji. Ji iwa bot ne rut it.

⁵⁰Bere Ji ku sukye ndo nde, bere yé gu Ji kwop. Ji kwabom dek subot sukye ne kom mo pe gato or mó.

⁵¹Te, nin nut do Ji ma mo bur re wa Ji ben yetu kem ndo su yu bado? Sane nde, Ji ki sare do, Ji ma wa Ji ben yetu kem ndo su yu nde, wo Ji ben yé maskwa yu sor ré.

⁵²Kadit kam re yo, sato yetu ge mek gato kem mo nu dik, bere ge mek ne maskwa yu mo Ji, ge gri maskwa ket ge we, ge we maskwa ket ge gri.

⁵³Ye gato kem mo nu dik ne, bere pa bi ai maskwa ket bi gan, pa yebris maskwa ket bi ai, pa bi im maskwa ket bi mam, pa donggon maskwa ket bi im, nggon maskwa ket bi nyam, nggonkra maskwa ket bi om. Bere yé maskwa yu ete yé wat yu mo suk gato Ji ben ne.”

⁵⁴Yefun Yesus ki nai yé mwa mone do, “Nin me nyotem it tak de ket, orge nin ki do, nogi it are. Sangge, sugane nogi dom.

⁵⁵Sane dom, nin me nobu nyot kas kadit nden ma ti, nin ki do, re ne, nokro it anare. Sangge bere nokro dom.

⁵⁶Nin ki nin bi sukdu nin syokwet wik sor ré. Nin watbot bur re si gu nim ne, nin me nyotem e, nin me nobu ete nin jam suk gato bere bor. Sarewo suma ben anato nin watbot suk gato Ji ben re, ete nin jam nde suk gato bere bor ne?”

⁵⁷“Nin nai sukjimnut gato sangge nde wa suma ne? Nin nutbot suk sisu ndo et.

⁵⁸Ye yi do maskwa nan, ete werwa nan bi denda kit an, orete an gwat nan mu mo pe gato yepasye kibot suksmaskwa ne yo, sa ndo sa nin ka we yo mu kom mo pe ne nde tó, nan si an kibot sukmaskwa ne or wé mo os miten. Wo nan yo ben sane nde yo, bere ye ne gwat nan kom mo yepasye gato kibot sukmaskwa ne. Bere yepasye ne syo nan mo yesukmise syim, ete yesukmise gwat nan mu sok mo sel.

⁵⁹Ji ki sare do, bere nan kem mo sel mit sane sor, nan bi denda kit ye ne orete nan syesyar.”