Read Abun Lukas 13 Bible Online

Lukas 13 - Abun bible

Lukas 13

¹Sugane yé bok yo mone nuk sukdu subot ye Galilea ge bok yo gato gre suge mo bot wa un Yefun Allah. Ye Galilea gre suge saresa, Pilatus syogat yesukmise gu án bok ne wé.

²Yefun Yesus jam ye ne bi sukdu, orete Yefun Yesus ki do, “Nin nut do ye Galilea bok gato yé gu ne, ye Galilea ne ben sukibit mwa wai kadit yé mwa gato kem mo Galilea anato yesukmisa gu án wé ne bado?

³Sane nde ré. Ji ki sare do, nin yo kwet kadit sukibit gato nin ben ne nde, bere nin waii kwop sato yé ne dom.

⁴Sane dom, men nut subot yetu ge musyu dik sop munggwo gato nu syu é ma gwa kwop mo Siloam ne. Nin nut do yé ne ben sukibit mwa wai kadit ye yi neya gato kem mo Yerusalem ne bado?

⁵Sane nde ré. Ji ki sare do, nin yo kwet kadit sukibit gato nin ben ne nde, bere nin waii kwop sato yé ne dom.”

⁶Orge Yefun Yesus gwat sukamno dik yo sare do, “Yetu ge dik yo jan nak ke dik mo nggwe gur mit. Kam dik yo ete ye ne ma meret nak bo mone. An do ma sa, an yo ku nak bo yo mo nde.

⁷Sane ye ne ki nai ye gato mewa nggwe ne do, ‘Tahun bok yo ji ma meret nak bo ware, ji yo ku nak bo yo mo nde. Men jan nak re kom wa suma ne? Sa ndo sa, men gwa wé sor.’

⁸Sarewo ye gato mewa nggwe ne ki do, ‘Yenggras, men misyar nak re kom tahun dik yo o et. Bere ji gut es kadit i-ke, ete ji bare bur gato ndo mo i-ke.

⁹Men me do tahun dik ne ma, bo it yo, ndo it, men misyar dakai kom sor. Wo men me do yo bo nde yo, men gwa nak ne wé sor.’ ”

¹⁰Kam Sabat, ye Yahudi bi kam sye, ete Yefun Yesus duno nje mo ye Yahudi bi nu ari dik yo.

¹¹Mo yé mwa ne, nggon dik yo gato yenggwak ben, nggon ne i sor kom mo tahun musyu dik sop munggwo. Nggon ne, yenggwak syat an nyoran kwek. Nggon ne yo ti ri ndo nde.

¹²Yefun Yesus sokme nggon ne sa, Yefun Yesus kendo nggon ne ma mo yé mwa gwem, ete An ki nai nggon ne do, “Im o, Ji ben nan ge kadit nan bi suki re, nan nyoran ri satu it anare.”

¹³Orete Yefun Yesus ak An syim mo nggon ne. Yefun Yesus do ak An syim mo nggon ne sa, nggon ne nyoran ri satu it anane, orete mom un Yefun Allah.

¹⁴Yefun Yesus ben nggon ne ge su ye Yahudi bi kam sye, kam Sabat, sane yekwesu mo ye Yahudi bi nu ari ne, yekwesu ne maskwa Yefun Yesus. An ki do, “Ari dik bi kam mumat rek wa men ben suk, men ben su kam Sabat nde. Sane nin iwa nin ge kadit nin bi suk-i ne yo, kam mumat ne tep wai mo ré, wo nin ma su kam sye sare nde.”

¹⁵Orge Yefun Yesus ki do, “Nin ki su nin syokwet sor ré, nin yo benbot nin bi sukduno-i nde. Nin dom, ben suk su kam sye. Nin kadik-kadik sombok nin bi suksi, nin gwat mu meret syur su kam sye, fe?

¹⁶Nggon re, Abraham bi dat, yenggwak ben mom i sor kom mo tahun musyu dik sop munggwo. Ndo sa, Ji sombok mom wé kadit yenggwak gato rai mom su kam sye re.”

¹⁷Yefun Yesus ki An bi sukdu ne sa, ye gato maskwa Yefun Yesus ne damen ndo nde, sarewo yé mwa nut do suk gato Yefun Yesus ben ne, suk mwa ne ndo wai o ré.

¹⁸Or o Yefun Yesus ki do, “Yefun Allah jowa men yetu tepsu men bi yekwesu sa u ne? Ji ki rer subot Yefun Allah bi rus-i sa u ne?

¹⁹Yefun Allah bi rus-i tepsu sawi gro mo sukamno re. Ye yo nai sawi gro dik yo ete jan mo bi nggwe. Sawi gro ne kom sor tepsu kweke. Kweke ne sye wade ndam ma tom mo i-guk.” {Sane dom Yefun Allah jom men yetu tepsu men bi Yekwesu, diksim yetu gato sok mo An yo mwa nde ré, kom mo rut yetu gato sok mo An yé mwa wai o ré.}

²⁰Yefun Yesus ki o do, “Ji ki rer subot Yefun Allah jowa men yetu tepsu men bi Yekwesu sa u ne?

²¹Sare, Yefun Allah bi rus-i tepsu bibit roti mo sukamno re: Nggon ge dik yo nai bibit roti wokgan ete nggon ne karwet su tepung sak dik, sane sor, tepung mwa ne it sino.”

²²Yefun Yesus mu mo Yerusalem saresa, Yefun Yesus mubot kampung si kota mwa mo os, Yefun Yesus duno nje gato kem mone.

²³Yefun Yesus duno nje mone sa, yetu ge dik yo ndo mo Yefun Yesus do, “Yenggras, bere yetu ge bok yo sor ete sok mo Yefun Allah bi rus-i wé kadit bot gesyos bado?” Sane Yefun Yesus ki nai yé mwa mone do,

²⁴“Nin werwa nin sok mo Yefun Allah bi rus-i tepsu nin werwa nin sokbot nusyo gato buk wa nin. Ji ki sare do, bere yé mwa werwa sok mo Yefun Allah bi rus-i ware, ye ne yo ku nusyo gato nggwot ne nde ré.

²⁵Nusyo ne kak tó, sarewo yenggras gato bi nu ne ti ete syimwa nusyo krat yo, yenggras do ben sane yo, bere nin ma ti mo nusyo de nden, nin ki do, ‘Yenggras, nan kak nusyo wa men sok et.’ Orge bere yenggras ne ki nai nin do, ‘Ji jam nde nin, nin mu kadit u ne?’

²⁶Bere ini waii ki o do, ‘Men si nan git sugit sino mó ré. Yenggras nan ma nan duno men mo men bi kota mó ré.’

²⁷Yenggras ne ki o do, ‘Ji jam nde nin ré, nin yé gato ben sukibit, nin mu kadit Ji tom!’

²⁸Bere nin me Abraham e, Isak e, Yakub sisu yenabi mwa ne sino mo pe gato Yefun Allah jowa men tepsu men bi Yekwesu. Sarewo nin dakai, bere Yefun bare nin mu mo nden kadit ré. Sane bere nin wo ndo nde, nin nderku nin dakai mone.

²⁹Bere yetu mwa mo bur re iwedewe, ye wis mwa ne sino ma git sugit mo pesta sye mo pe gato Yefun Allah jowa men tepsu men bi Yekwesu.

³⁰Sane yé mwa gato yé bes gum kok su re yo, bere kam sari ne ma Yefun Allah is yé ne gum wé, án gum yo mo nde ré. Sane dom yé mwa gato su re án gum yo mo nde yo, bere Yefun Allah bes yé ne gum kok mone tó.”

³¹Sugane ye Farisi bok yo ma ku Yefun Yesus, ete ye Farisi ne ki nai Yefun Yesus do, “Nan kem more nde, Nan mu mo pe yi kadit re, we Herodes mitwa gu Nan kwop wé.”

³²Yefun Yesus ki nai ye Farisi ne do, “Nan mu ki nai ye gato meret os mwa tepsu ndar krok ne do, ‘Su re it yo, Ji ben ye gato i ne ge, Ji syun semda wé kadit ye gato semda ben ne, Ji ben suk ne tó, wo kam we rek o ete suk gato Ji ben re tut mone.’

³³Ji kwop o Ji mbau o, Ji mu su, Ji mu mo Yerusalem sor. Ji ben Ji bi suk-i su kam ré, ik o sor kam we rek ete or mone. Ji mu mo Yerusalem it anare, we mo Yerusalem ne pe gato yé gu yenabi mó. Sane Ji mu mone dom, pe yi yo tepsu wa yé gu yenabi mo nde.”

³⁴Yefun Yesus ki do, “Kamapa! Nin yé gato kem mo kota Yerusalem, nin gu yenabi kwop, nin am ye gato gwat Yefun Allah bi suktaru ma ne su jok. Kapre nin gu yenabi kwop sane o, Ji iwa Ji mewa nin tepsu ndam kokor mewa bi gan mo i desnak, sarewo nin bariwa ré.

³⁵Sane bere Yefun Allah misyar nin ré. Bere Yefun Allah yo kem mo bi nu sisu nin mone o nde. Sane kadit kam re, Ji ki sare do, bere nin yo ku Ji o nde, sane wade, tepsu kam gato nin ki do, ‘Ye gato Yefun Allah syogat ma re, Yefun Allah ben sukndo su An et!’ ”