Read Abun Lukas 15 Bible Online

Lukas 15 - Abun bible

Lukas 15

¹Kam dik yo, ete yetu ge bok yo gato nai sugum kadit nje wa pemerintah si yetu ge bok yo gato yé ki án gum ibit, án sino ma wa syaretwa Yefun Yesus ki sukdu.

²Ye Farisi si yeguru agama me Yefun Yesus ki sukdu su ye gato gum ibit ne sa, ye Farisi si yeguru ne kiket Yefun Yesus, án ki do, “Bei! Ye re ma nuk sukdu si ye gato gum ibit re. Ye re kak An mit wa ye gato ben sukibit re, ete An si yé ne git sugit sino dom.”

³Sane Yefun Yesus gwat sukamno, An ki nai ye Farisi si yeguru ne do,

⁴“Nin ge dik yo bi domba ge wotin dik, ete domba ge dik yo do muri yo, sane bere ye ne ben suma ne? Bere an mu kadit ge musyu musi sop musi mo pe gato domba git sugit mone, ete an mu meret ge dik gato muri ne sane sor wade an ku et.

⁵An do ku domba ne sa, an bes an sam satu ma, an mit at wa wai o ré.

⁶An satu mo an bi nu, orge an kendo an bi yesyim si ye gato kem mo kampung ne sum sino, ete an ki do, ‘Ji ku ji bi domba gato muri, sane nin ma men mit at wa sino et.’

⁷Sane dom yetu ge dik yo kwet kadit sukibit gato an ben ne, ete an brek ma jammo Yefun it yo, bere Yefun Allah mo gu mit at wa yetu ge dik ne wai kadit yetu ge musyu musi sop musi gato ben sukndo tepsu Yefun mit, ye gato kwet suga nyim ne wé ré.”

⁸Yefun Yesus gwat sukamno dik yo o, An ki do, “Nggon ge dik yo grem sugum det musyu dik mo mom bi nu. Sugum det dik yo do ges yo, bere mom ben suma ne? Bere nggon ne ndum kak, mom fre nu ne er, mom meret mo nu ne sane sor wade mom ku et.

⁹Nggon ne do ku sugum ne sa, mom kendo mom bi yesyim si ye gato kem mo kampung ne ma sum sino, ete nggon ne ki do, ‘Ji ku ji bi sugum gato ges satu it, sane nin ma men mit at wa sino et.’

¹⁰Sane dom yetu ge dik yo do kwet kadit sukibit gato an ben ne, ete an brek ma jammo Yefun it yo, Yefun Allah bi malaikat mwa ne mit at wa wai o ré. Sangge!”

¹¹Yefun Yesus gwat sukamno dik yo o, An ki do, “Yenggras dik yo bi pa yebris ge we.

¹²Pa dowok ki nai an we bi ai do, ‘Ai o, su re yo, nan wat men bi sukrok mwa ne su men ka we et, nan syo napyo nai ji se!’ Sane yenggras ne wat bi sukrok bot an bi pa we ne.

¹³Kam bok yo, orge pa dowok re so an bi sukrok mwa ne or, an ku sugum mwa mone. Orge pa gwat sugum mu kadit pa bi nat-i ré. Pa mu mo os syu mo bur yi. Pa kem mone sa, pa kamo pa bi sugum ne daret sane sor sugum or ré.

¹⁴Pa kamo su bi sugum or kadit an sa, mo bur ne yé ku sukonde sye anato pa ne yo ku sugit wa an git yo mo nde.

¹⁵Sane pa ne mu ben suk wa yetu ge dik yo mone. Yenggras ne syogat pa mu mewa yenggras ne bi jot mo an bi nggwe.

¹⁶Pa on de ndo nde. Pa da on de wa git jot bi sugit-i, sarewo ye yo syo sugit nai pa git yo mo nde.

¹⁷Sane pa napakom satu mo pa bi ai. Pa jam nggwa sa, pa nut mo pa syidem do, ‘Ye gato ben suk mo ji bi ai bi nu, án bi sugit mwa yé ré, sarewo ji kem more, ji on de ndo nde, bergan ji kwop rok.

¹⁸Sa ndo sa, ji mu satu mo ji bi ai sor. Ji mu kom motu yo, bere ji ki nai ji bi ai sare do, “Ji bi ai, ji ben ji bi suk-i siri kadit Yefun Allah mit, si ji ben ji bi suk-i siri kadit nan mit dom.

¹⁹Sane ji gum yo tepsu nan bi pa o nde, wo nan nai ji tepsu nan bi pakwerut sor.”

²⁰Sane, pa ne mu kadit pe ne ré. Pa ne satu mu mo pa bi ai. Pa mu karowa pa bi ai bi nu sa, pa bi ai sokme pa ma it. Yenggras ne do me an bi pa ma sa, yenggras ne jimnotku pa ne ndo nde. Yenggras ne kas mu ku bi pa. Yenggras kambrut an bi pa, an i pa, an baput mo pa kwanke.

²¹Orge pa ne ki do, ‘Ai o, ji ben ji bi suk-i siri kadit Yefun Allah mit. Ji ben ji bi suk-i siri kadit nan mit dom. Ji gum yo tepsu nan bi pa o nde.’

²²Sarewo yenggras ne kendo an bi pakwerut bok ne ma, yenggras ne ki do, ‘Nin ma kekro, nin mu nai san gato ndo ma wa nin it mo pa re. Nin mu nai cincin ma wa nin it mo pa re sopkwa. Nin mu nai sepatu ma wa nin it mo pa re gwes. Nin mbrau ji bi pa et.

²³Orge nin mu nai sapi gan gato sye. Nin gu kwop, subere men git sino, men konwa ji bi pa gato ma re. Men kamowa et!

²⁴Ji nut do, ji bi pa gato mu re kwop ré, sarewo pa re mbau o ré. Ji nut do, ji bi pa re muri ré, an yo ma o nde, sarewo an satu ma ku ji o ré.’ Sane pakwerut benbot suk gato yenggras ki ne. Yé mo nu ne konwa pa gato satu ma ne.

²⁵Sugane yenggras bi pa dosye ben suk mo nggwe tó. Pa dosye satu mo nu saresa, an jam yé sara, an jam yé ne suk.

²⁶Sane pa dosye kendo pakwerut dik yo ma. Pa dosye ndo mo pakwerut ne do, ‘Yé ben suma mo nu ne?’

²⁷Pakwerut ne ki do, ‘Nan bi nji dowok satu ma mo nu ré. Nan bi nji satu ma ku nan bi ai o ré, sane nan bi ai gu sapi gan gato sye wa men konwa.’

²⁸Pa dosye ne maskwa ndo nde it anane. Sane pa dosye bariwa an sok mo nu mit. Sane an bi ai syesyar wa bidek pa ne subere pa sok mo nu mit.

²⁹Sarewo pa dosye ne ki nai an bi ai do, ‘Tahun bok yo it anare, ji ben suk wa nan, ji kamba ndo nde. Ji yo misyar suk gato nan syogat ji ben ne yo mo nde, ji ben suk mwa ne or sino ré. Sarewo nan syo suk sato suma nai ji mo ji bi kamba ne? Nan yo syo sukwokgan sato kambing wa ji si ji bi yesyim konwa ji wam dik yo dom nde.

³⁰Wo pa dowok gato kamo su men bi sukrok or mo nggon ne satu ma more sa, nan syogat ye gu sapi gan gato sye subere men konwa an ma ne!’

³¹Pa bi ai ki do, ‘Pa, nan anato kem sisu ji more pe, sane ji bi suk mwa ne sino anato nan bi suk-i ne sino dom.

³²Sarewo men konwa nan bi nji dowok, men kamowa, we men nut do, nan bi nji gato mu ne kwop ré, sarewo nan bi nji ne satu ma an mbau o ré. Nan bi nji, men nut do an muri ré, an yo ma o nde, sarewo nan bi nji satu ma ku men sisu ndo o ré. Sane men konwa an.’ ”