Read Abun Lukas 16 Bible Online

Lukas 16 - Abun bible

Lukas 16

¹Yefun Yesus ki nai An bi pakon do, “Yepasye dik yo gato bi suk mwa, yenggras ne bi pakwerut dik yo gato jom an bi sugum si suk mwa. Sarewo ye yi ndak ye gato jom yenggras ne bi sugum si suk mwa ne do, pakwerut ne kamo su yenggras bi suk mwa anato deyo ges or ré.

²Sane yepasye ne kendo pakwerut ne ma ku an. Yepasye ne ki do, ‘Sukdu gato ye ndak nan su ne, gato ye ki nai ji jam ne sangge bado? Sane nan krom subot suk mwa gato nan ben su ji bi sugum si ji bi suk mwa ne subere ji jam et. Nan ben suk tepsu ji bi pakwerut gato jom sugum ne o nde it anare.’

³Sane pakwerut ne nut mo an syidem do, ‘Ji ben suma su re ne? Ji bi yenggras syun ji kadit an bi nu it anare. Sane bere ji ku sugum wa ji so sugit su ne sa u ne? Ji yo nggiwa ji ben nggwe nde. Ji damen wa ji ndek suk mo nje dom.

⁴Ji bi sukjimnut dik yo anare, sa ndo sa, ji bi yenggras yo syogat ji mu nde tó, ji werwa ji ben suk yo subere yé mwa kak yé mit wa ji, bere yé mwa ne tepsu ji bi yesyim subere yenggras syun ji it yo, ji mu si án kem mo án bi nu.’

⁵Sane pakwerut ne kendo yé bok yo gato bi bon mo an bi yenggras ne ma mone. An kendo kadik-kadik ma, ete an ndo mo ye gato ma su futmo ne do, ‘Nan bi bon mo ji bi yenggras ne kom mo ot ne?’

⁶Ye ne ki do, ‘Ji bi bon ne kom mo jeriken sye wotin dik ses su manik zaitun.’ Ye gato jom yepasye ne bi suk mwa ne ki do, ‘Nan me nan bi bon gato ji krom more wa ji bi yenggras jam ne. Nan ma kekro, nan rus suk gato ji krom re wé et. Nan krom do, nan bi bon kom mo jeriken sye musyu mek sor ré, musyu mek yo, men misyar sor.’

⁷Or o pakwerut gato jom yepasye bi suk mwa ne ndo mo ye kedowe o do, ‘Nan bi bon kom mo ot ne?’ Ye ne ki do, ‘Ji bi bon ne kom mo fas karung ribu duk.’ Pakwerut ne ki do, ‘Sane nan rus nan bi bon gato ji krom re wé, ete nan krom do, nan bi bon kom mo fas karung wotin munggwo sor ré, wotin we yo, men misyar sor.’

⁸Kom mo rut sa yepasye un pakwerut gato kidar an, we yenggras jam do, pakwerut ne bi sukjimnut ko anato pa ne fro os ndo wa an dakai wa kam sari ne ma. Ye gato jam nde Yefun mo bur re sato pakwerut ne sa, án owa fro bi suk-i su yu, wo ye gato jammo Yefun, gato kem mo pe gato rer ne, án yo owa fro bi suk-i sisu ndo su ye gato jam nde Yefun mo bur re nde.”

⁹Orge Yefun Yesus ki o do, “Sane Ji ki sare do, nin syo nin bi suk nai nje, subere yé ne kak án mit wa nin, ete nin ku nin bi yesyim ge bok yo mone. Sane nin bi suk mwa mo bur re do or kadit nin it yo, bere Yefun Allah syo nat gato ndo wa nin kem mó. Bere nin kem ndo mone to kapyo mato kapyo.

¹⁰Ye to ben an bi suk-i ri-roi su sukwokgan gato ye syo wa an mewa ne, bere ye ne ben an bi suk-i ri-roi su suk mwa dom. Sarewo ye to ben sukibit su sukwokgan gato ye syo wa an mewa ne, bere ye ne ben sukibit su suk mwa dom.

¹¹Sane nin yo mewa sugum si suk mwa mo bur re sisu ri-roi nde yo, bere Yefun Allah syo sukndo kadit gu wa nin mewa ne wa suma ne?

¹²Nin yo mewa ye yi bi suk-i sisu ndo nde yo, bere yé yo syo an bi suk sok mo nin tepsu nin bi suk-i dom nde.

¹³Sare, pakwerut ge dik yo, an yo nggiwa ben suk wa yenggras ge we nde. Bere ye ne bariket yenggras we ge dik yo, ete an jimnotku yenggras we ne ge dik yo sor. Bere ye ne jammo yenggras we ge dik yo ete misyar yenggras we ge dik yo o ré. Sane nin yo nggiwa nin gum pakwerut wa Yefun Allah si sugum sino nde.”

¹⁴Ye Farisi jam sukdu gato Yefun Yesus ki ne sa, án sa Yefun Yesus, we ye Farisi ne gro sye wa sugum teker.

¹⁵Yefun Yesus ki nai án do, “Nin anato ben suk subere yé mwa nut do, nin sa, ben sukndo, ondewo Yefun Allah jam nin mit-i tara ré. Suk gato yetu nut do, ndo, Yefun Allah nut do, ibit.”

¹⁶“Kadit ketke sor kom mo kam gato Yohanes, gato ras nje mo syur ma ne, yé duno nje su Musa si yenabi bi sukduno-i. Wo kadit kam gato Yohanes ma ne, Ji si Ji bi pakon duno nje subot os ndo gato Yefun Allah fro ma Yefun nai nin yetu gum sok mo An bi rus-i, ete An tepsu nin bi Yekwesu mone. Yé mwa jam sukdu ne anato yé mwa wergat nggwa wa án sok mo Yefun Allah bi rus-i.

¹⁷Yefun Allah bi sukduno ne kem pe. Kapre bur re kru e, kapre gu nim ne fres or wé e, sukdu kwa dik yo ges kadit Yefun Allah bi sukduno ne mo nde, wokgan yu dom nde.

¹⁸Ye to sombok an bi nggon wé, ete an kra su nggon yi yo o it yo, ye ne ben suk siri ses an bi nggon doketke anane. Ye to kra su nggon gato bi ya sombok ne it yo, ye ne ben suk siri dom anane.”

¹⁹Yepasye ge dik yo, an ye gato bi suk mwa yé ré. Yepasye ne kem ndo, an it san gato ndo. Kamdik-kamdik, an git sugit gato ndo yé ré, suk mwa ne ndo sino.

²⁰Yetu ge dik yo o, an gum do Lazarus. Lazarus re, an yewa suk mwa. An bi suk yo mo nde, an dek suk daret. Lazarus re, wip mwa git an kaim ne. Lazarus kem mo yepasye ne bi nusyo de nden.

²¹Lazarus on de ndo nde. Lazarus mit iwa an git sugit napta gato yepasye bare wé mo nden, sarewo sugit ne yo kom an nde. Sane dom, ndar ma rim an wip mone.

²²Kom mo rut sa, Lazarus kwop ré, ete malaikat ma kar an da gesyos mu mo pe gato Abraham kem mone, an we kem mo pe gato ndo ne. Sane yepasye ne waii kwop o, ete yé bi an mo bur.

²³Yepasye da gesyos ngga mo bot gesyos. An kem mone, ete an ku sukye ndo nde. Yepasye sok mu nim, ete an me Abraham si Lazarus kem mo pe gato ndo, sarewo os syu kadit an ré.

²⁴Sane, yepasye ne saiye do, “Yenggras Abraham, nan jimnotku ji et! Nan syogat Lazarus ras an sopkwa mo syur, or an gwat ma an ras mo ji brip, we more bot sye kam is ji ndo nde.”

²⁵Sarewo Abraham saiye o do, “Nan napawa tomgato nan kem mo bur ne, nan ku suk mwa gato ndo, sarewo Lazarus gare yewa suk mwa. Su re Lazarus kem mo pe gato ndo, wo nan anato kem mo pe gato yé, ete nan ku sukye mone.

²⁶Sane o, mo men miten kwoye ware, subere men yo ba mo nin nde, nin yo ma mo men nde.”

²⁷Orge yepasye ne ki do, “Sane yo, ji ki nai yenggras, nan wa nan syogat Lazarus mu mo ji bi ai bi nu,

²⁸we ji bi nji ge mumek mone. Sane, nan syogat Lazarus mu wa ki suknapa wa án, subere ji bi nji yo sok mo pe gato yé more nde.”

²⁹Orge Abraham ki nai yepasye ne do, “Sukduno gato Musa si yenabi bok ne krom ne wai mó ré. Nan bi nji jammo sukduno ne sor ré.”

³⁰Sarewo yepasye ki do, “Yenggras Abraham, sukduno ne yo tep nde ré. Wo yekwop dik yo do sun ete mu ki nai ji bi nji yo, bere án kwet kadit sukibit gato án ben ne sino, ete án jammo Yefun.”

³¹Sarewo Abraham ki do, “Yé ne yo jammo suk gato Musa si yenabi krom ne nde yo, kapre yekwop dik yo sun mu ki nai án o, bere yé ne yo jammo yekwop ne bi sukdu-i dom nde.”