Read Abun Lukas 17 Bible Online

Lukas 17 - Abun bible

Lukas 17

¹Yefun Yesus ki nai An bi pakon do, “Suk bok yo ben men yetu ges mo os ibit. Suk gane bere mó, sarewo ye gato gwat os ibit ne ma wa men, bere ye ne ku sukye ndo nde.

²Ye yo ben pa wokgan gato onyar kem mo Ji re ges mo os ibit it yo, sa ndo sa, yé rai ye ne gubit ke ndom jok sye krat, ete yé bare an mo sem mo pe gato kru subere an rap mone. Ye ne kwop anato ndo wai kadit an ben pa ges mo os ibit.

³Sane yo nin mewa nin dakai, sawe nin ben ye yi ges mo os ibit. Nin bi nji ben sukibit ma nai nin yo, nin ki an mo sukibit gato an ben ne. Nin bi nji do kwet kadit sukibit gato an ben ne yo, nin yo maskwa an mone o nde, nin nutbot o nde.

⁴Nin bi nji ne do ben sukibit ma nai nin, ete an ma ki do, ‘Ji yo ben sukibit sane nai nan o nde, ji kwet it.’ Or o, kam dik yo nin bi nji ben sukibit ne nai nin sane sor kom mo wam mufit, ete an ma ki do, ‘Ji kwet,’ wam mufit sane yo, nin maskwa an mo sukibit gato an ben ne o nde, nin nutbot o nde.”

⁵Yefun Yesus bi pakon ge musyu dik sop we (gato yé kendo do yerasul), án ki nai Yefun Yesus do, “Yenggras, Nan ós men et! Nan syo suktinggi nai men, subere men onyar kem mo Yefun Allah nggi wai o et!”

⁶Yefun Yesus ki nai án do, “Nin onyar kem mo Yefun wokgan sor ré, saga sawi gro wokgan ne, bere nin ku suktinggi tep wa nin syogat kwe ap re do, ‘Nan tik nan ke buk kadit bur, nan mu ti, ete nan kom mo sem et!’ Sane bere kwe ap ne benbot suk gato nin ki ne.”

⁷“Men nut subot nin ge dik yo bi pakwerut dik yo gato ben suk wa nin sato ben suk mo nggwe e, mewa yenggras ne bi suksi e ne. Pakwerut satu ma mo nu yo, yenggras ne kendo pa ma git sugit kekro, bado?

⁸Sane nde, yenggras ne yo ki sane nde, wo an ki nai an bi pakwerut ne do, ‘Nan ma kon sugit et. Sugit jon or, nan gwat ma, nan wen wa ji git et. Ji do git or, nan waii git wari.’

⁹Pakwerut ne ben suk gato an bi yenggras syogat pa ben ne yo, bere an bi yenggras yo un pa mone dom nde.

¹⁰Sane, nin dom, nin do ben suk mwa gato Yefun Allah syogat nin ben it yo, nin nut mo nin dakai do, ‘Men re tepsu pakwerut sor, sane men yo mitmo yé un men nde. Men ben suk gato men bi Yenggras syogat men ben ne sor.’ ”

¹¹Yefun Yesus mu mo Yerusalem. Yefun Yesus mu mone sa, Yefun Yesus mu ketbot os gato mubot bur Samaria si Galilea miten.

¹²Yefun Yesus mu sok mo kampung dik yo saresa, yetu ge musyu dik gato suki borbuk git ne ma ku Yefun Yesus mo kampung de nden. Yé ka musyu dik ne ti ko kadit Yefun Yesus.

¹³Yé ka musyu dik ne ké nai Yefun Yesus do, “Yesus o, yenggras, Nan jimnotku men et! Nan ós men et!”

¹⁴Yefun Yesus sokme yé ka musyu dik ne sa, An ki do, “Nin mu, nin kadum nggwa nai yesu gato ben suk mo Yefun Allah bi nu subere an watbot nin kaim et.” Yé bok ne do mu saresa, suki gato git án kaim ne, or kadit án it.

¹⁵Yetu ge dik yo mone, an jam nggwa do, suki re or kadit an it anane, sane an brek satu ma mo Yefun Yesus. Ye ne satu ma saresa, an un Yefun Allah, an wi an ambre.

¹⁶Ye ne ma kom mo Yefun Yesus sa, an bare nggwa mo Yefun Yesus gwem, an un Yefun Yesus, an ki do, “Ndo mo Nan.” Ye ne ye Samaria.

¹⁷Orge Yefun Yesus ki do, “Ji ben yetu ge musyu dik ge kadit bi suki ne. Yetu ge dik sor satu ma ki ndo mo Yefun Allah, wo ge musi ne mo u ne?

¹⁸Ye re yo sok mo ye Yahudi bi wis-i nde, an yewis yi, sane ben sa u anato ye gare sor, ete satu ma un Yefun Allah ne?”

¹⁹Orge Yefun Yesus ki nai ye ne do, “Nan ti, nan mu et. Nan onyar kem mo Ji anato nan ge ré.”

²⁰Ye Farisi ge bok yo ndo mo Yefun Yesus do, “Kap ot ete Yefun Allah ma jowa men yetu mo bur re ne?” Yefun Yesus ki do, “Yefun Allah ma jowa yetu mo bur re, bere men yo jam kadit suk gato men me su men gro nde.

²¹Bere yetu ge dik yo ki do, ‘Yefun Allah jowa men more ré.’ Sane nde. Bere yetu ge dik yo o ki do, ‘Yefun Allah ma it. Yefun Allah jowa nje motu ré.’ Sane nde, wo sare, Yefun Allah jowa men mit si men onyar it, An tepsu men bi Yekwesu mo men mit si men onyar. Men yo me su men gro nde.”

²²Orge Yefun Yesus ki nai An bi pakon do, “Kam sari ne ma bere nin iwa nin ku Ji, gato Yetu bi Pa. Bere nin iwa Ji satu ma si nin kem kom mo kam dik yo sor ré, sarewo nin yo ku os wa nin ku Ji mo nde.

²³Kam sari ne ma, bere yé bok yo ki nai nin do, ‘Nin me Ye re et! Yetu bi Pa ma it!’ bado, ‘Nin me Ye net et! Yetu bi Pa anatu it!’ Yé ki sukdu sane yo, nin jambot nde. Nin mu meret Ji dom nde.

²⁴We sare, kam gato Yetu bi Pa to Ji re satu ma mo bur re it yo, bere yé mwa ne sino me Ji ma tepsu yé me nowarek rer bot gu kadit nobu nim kom mo nobu ket.

²⁵Sarewo Ji yo satu ma nde tó, yé mwa gato kem mo bur su re, bere yé ne bariwa Ji or ré, ete yé ben sukye nai Ji ket kwayo-kwayo.

²⁶Bere kam gato Yetu bi Pa ma su ne tepsu kam gato Nowak kem mo bur re.

²⁷Su kam gato Nowak kem mo bur re, yé git sugit e, yé da syur e, yé kra yu e ne. Yé ben suk gato sagana án ben ne sane sor kom mo kam gato Nowak sok mo bi kwem mit ne. Orge Yefun Allah ben syur syé ma gu yé mwa ne kwop or.

²⁸Sane dom bere kam gato Ji ma su ne tepsu kam gato Lot kem mo bur re. Yé ben suk gato sagana án ben ne sato, yé git sugit e, yé da nau e, yé so suk mo yu e, yé ben nggwe e, yé nggo nu e ne sane sor kom mo kam gato Lot mu kadit kota Sodom ne.

²⁹Wo su kam gato Lot mu kadit kota Sodom ne, yé mwa ne gensu, we su kam gane Yefun Allah syo bot si jok ges kadit gu git yé mwa mone kwop or sino.

³⁰Sane o, su kam gato Yetu bi Pa to Ji re satu ma mo bur re, bere yé mwa ben án bi suk-i sagana án ben sane sor, wade yé mwa ne sino gensu Ji, yé mwa yo fro wa Ji ma nde.

³¹Bere su kam gato Ji satu ma ne, ye gato ti mo bi nu yu, an is, ete an sok mo nu mit wa nai an bi suk nde. Sane dom, ye gato ben suk mo nggwe satu ma mo an bi nu wa nai an bi suk nde.

³²Nin napawa suk gato bor mo Lot bi nggon. {Lot bi nggon bi sukjimnut sye mo mom bi suk mwa mo Sodom ne, sane mom sok wari, ete mom kwop mone.}

³³Ye to bi sukjimnut sye wa an dakai kem ndo mo bur re yo, bergan an kwop ré. Yé to yo bi sukjimnut sye wa an dakai kem ndo mo bur re nde, ete an bi nggwa mo Ji wa an ben Ji bi suk-i yo, bere an kem ndo to kapyo mato kapyo.

³⁴Ji ki sare do, bere su noru gato Ji satu ma ne, yetu ge we sem mo kwatka dik yo, bere Ji ma nai ge dik yo, wo gedik yo kem.

³⁵Nggon ge we yo krut bi gandum mo pe yo, bere Ji ma nai ge dik yo, wo ge dik yo kem. [

³⁶Yetu ge we yo ben suk mo nggwe yo, wo ge dik yo kem.]”

³⁷Yefun Yesus ki sane, orge An bi pakon ndo mo An do, “Yefun, bere men me suk mwa ne mo u ne?” {Yefun Yesus gwat sukamno,} An ki nai An bi pakon do, “Men jam suge dik yo kwop, we ndam syap mwa sum wairi wa suge mukri ne.”