Read Abun Lukas 18 Bible Online

Lukas 18 - Abun bible

Lukas 18

¹Orge Yefun Yesus gwat sukamno dik yo wa An duno An bi pakon, subere kamdik-kamdik pakon ne ki suk su Yefun petok sor, subere án bambraiwa ete misyar nde.

²Yefun Yesus ki do, “Yepasye dik yo kem mo kota dik yo, an ye gato kibot nje bi sukmaskwa mone. Yepasye ne yo nyuwa Yefun Allah nde. Yepasye ne bi sukjimnut sye mo an dakai sor ré, an yo nutbot ye yi nde.

³Nggona dik yo kem mo kota ne dom. Kamdik-kamdik nggonna ne mu ku yepasye re petok sor. Nggonna ne ndek mo yepasye re do, ‘Nan ós ji et! Nan ki os yo ndo wa ji. Nan syogat ye gato ben sukibit nai ji ne bi kit ji kekro et!’

⁴Kam bok yo, ete yepasye ne bariwa ós nggonna ne. Sarewo kom mo rut sa, yepasye ne nut mo an dakai do, ‘ji yo nyuwa Yefun Allah nde, ji yo nutbot ye yi dom nde,

⁵sarewo nggonna re ma syimfar ji gat. Sa ndo sa ji ós mom et. Ji syogat ye gato ben sukibit nai mom bi kit mom kekro subere nggonna re yo ma syimfar ji o nde.’ ”

⁶Orge Yefun Yesus ki do, “Yepasye re, an yo ben bi suk-i ri-roi nde. Sarewo nin nutbot yepasye re bi sukdu-i sisu ndo et.

⁷Tepsu yepasye ne syogat ye ben sukye nai ye gato ben sukibit nai nggonna ne, bere Yefun Allah syo sukye nai ye gato ben sukibit nai Yefun bi rus-i gato ndekwa Yefun ós án noru nombrak sor. Bere Yefun Allah ki do, ‘Ji me mo et.’ bado?

⁸Sane nde, wo Ji ki sare do, bere Yefun Allah ós An bi rus-i kekro. Sarewo kapyo tak Ji, gato Yetu bi Pa, satu ma mo bur re it yo, bere Ji ku ye gato onyar kem mo Yefun Allah mó, bado?”

⁹Yefun Yesus duno nje mone sa, ye deyo nut do án sa, yé gato ben sukndo tepsu Yefun mit wai kadit ye yi neya. Yé ne bes án nggwa kok, yé ne nut do ye yi yo ben suk-i ndo teker nde.

¹⁰Sane Yefun Yesus gwat sukamno dik yo. Yefun Yesus ki nai yé gato bes án nggwa kok ne do, “Yetu ka we mu ki suk su Yefun mo Yefun Allah bi nu. Ye we dik yo ye Farisi, ye we dik yo o ye gato nai sugum kadit nje wa pemerintah.

¹¹Ye Farisi ti mone, an ki suk su Yefun Allah, sarewo an ki subot an dakai sare do, ‘Ndo mo Yefun Allah, Nan, we ji yo ben sukibit sato ye yi nde. Ji yo gro sye wa suk nde, ji yo syimsi suk nde, ji yo kidar suk nde, ji yo ben siri su nggon yo mo nde. Yé mwa ne ben suk sane, wo ji yo ben suk sane nde. Ji ki ndo mo Yefun Allah, Nan, we ji re yo ben sukibit tepsu ye gato nai sugum kadit nje wa pemerintah gato ti reya nde.

¹²Ari dik, ji mewa ji nggwa kadit sugit yei wam we, we ji ki suk su Nan sor. Suk mwa gato ji ku ne yo, ji syo deyo is Nan, Yefun. Ji ku sugum det musyu dik yo, ji syo det dik yo nai Nan, ji ku det musi.’

¹³Sarewo ye gato nai sugum kadit nje wa pemerintah ne, an ti ko gan kadit ye Farisi ne. An yo sok mu nim mo gu nde, an nggo an tunap, we an nderku an nggwa mo sukibit mwa gato an ben ne. An ki do, ‘Yefun Allah o, ji anato ye gato ben sukibit mwa. Nan maskwa ji o nde, wo Nan jimnotku ji et.’ ”

¹⁴Sane Yefun Yesus ki do, “Ji ki sare do, ye gato nai sugum kadit nje wa pemerintah re, an satu mo an bi nu sa, Yefun Allah nut do, ye re anato ben sukndo tepsu Yefun Allah mit. Yefun Allah yo maskwa an mo sukibit gato an ben ne o nde. Wo Yefun Allah yo iwa ye Farisi ne nde. Sane, ye gato bes an nggwa kok tepsu an yepasye, bere Yefun Allah ben an damen or ré, wo ye gato ben an nggwa ga tepsu pa wokgan, bere Yefun Allah dakai bes an gum yepasye o ré.”

¹⁵Yetu ge bok yo gwat an bi pa wokgan ma mo Yefun Yesus wa Yefun Yesus ak syim mo pa ne subere ri ma Yefun Allah ben sukndo su pa ne. Yefun Yesus bi pakon me yé gwat pa wokgan ne ma mo Yefun Yesus sa, pakon ne maskwa, pakon ndantom ye gato gwat pa wokgan ma ne.

¹⁶Sarewo Yefun Yesus kendo pa wokgan ne ma, Yefun Yesus ki nai An bi pakon do, “Nin misyar pa wokgan ma mo Ji sor, nin duyawa nde, we ye gato jammo Ji tepsu pa wokgan jammo bi ai, bere Yefun Allah jowa ye ne.

¹⁷Suk gato Ji ki re suksangge anare, ye to bariwa jammo Yefun Allah tepsu pa wokgan jammo bi ai ne yo, bere ye ne yo ku os wa sok mo Yefun Allah bi rus-i nde.”

¹⁸Ye Yahudi bi yekwesu dik yo ndo mo Yefun Yesus do, “Yeguru, Nan sa, Nan ben Nan bi suk-i ndo. Ji ben suk sato suma subere ji kem ndo to kapyo mato kapyo ne?”

¹⁹Yefun Yesus ki nai ye ne do, “Suma ben to nan ki do, Ji ben Ji bi suk-i ndo ne? Yetu gato ben bi suk-i ndo yo mo nde, wo Yefun Allah ka dik sor anato ben bi suk-i ndo.

²⁰Nan jam Yefun Allah bi sukduno sato: Nin ben siri daret nde, nin gu ye yi kwop daret nde, nin syimsi suk nde, nin ndak ye yi gum su sukkidar nde, nin jammo nin bi ai si nin bi im.”

²¹Ye ne ki do, “Sukduno mwa ne sino ji benbot kadit ji ka yemsok ne it.”

²²Yefun Yesus jam ye ne bi sukdu sa, Yefun Yesus ki nai an do, “Suk dik yo anato nan yo benbot nde tó, sare do, nan mu nan so nan bi suk mwa gato nan ku ne, orete suk mwa ne bi sugum nan syo nai ye gato yo ku suk yo mo nde, sane bere nan ku suk mwa mo gu. Nan syo sugum ne nai ye gato yewa suk, orete nan ma simo Ji et.”

²³Ye ne jam sukdu gato Yefun Yesus ki ne sa, ye ne jimnutbot ndo nde, we ye ne bi sukjimnut sye mo an bi suk mwa ne.

²⁴Yefun Yesus jam ye ne jimnot teker subot an bi suk mwa. Sane Yefun Yesus sokme ye ne ete Yefun Yesus ki do, “Ye gato bi suk mwa iwa an gum sok mo Yefun Allah bi rus-i ne yo, bergan os ne yé teker wa an ré.

²⁵Te suge sye gato gum do unta sok ket sum parke wak mó bado, nde e? Yo sok mo nde, sukye teker ware. Sane dom yé gato bi suk mwa iwa án gum sok mo Yefun Allah bi rus-i yo, suk ne sukye teker wa án ré.”

²⁶Yé mwa gato jam sukdu gato Yefun Yesus ki ne, án ndo mo Yefun Yesus do, “Sane bere je u anato ku os wa sok mo Yefun Allah bi rus-i ne?”

²⁷Yefun Yesus ki do, “Yetu yo bi os mo nde, wo Yefun Allah sa, bi os mó. Yefun Allah nggi wai mó ré.”

²⁸Orge Petrus ki do, “Men gare, men misyar men bi rus si suk mwa gato men ku ne sino kem, ete men simo Nan.”

²⁹Yefun Yesus ki nai án sino do, “Suk gato Ji ki re suksangge anare, ye to misyar bi nu e, bi nji e, bi yenggras e, bi pa e, bi suk mwa e ne kem ete jammo Yefun Allah tepsu an bi Yekwesu yo,

³⁰sugato an kem mo bur re tó yo, Yefun Allah syo suk gado ne satu nai an mwa wai o ré. Bere kam sari ne ma, ye ne kem ndo to kapyo mato kapyo.”

³¹Yefun Yesus kendo An bi pakon ge musyu dik sop we ma dor kadit yé yi, orete Yefun Yesus ki nai An bi pakon ne do, “Men mu mo Yerusalem it anare. Suk mwa gato yenabi krom subot Ji gato Yetu bi Pa ne bere bor mone.

³²Bere yé syo Ji mo yewis yi syim-i. Yewis yi ne bere ki Ji ket kwayo-kwayo, yé ne kabor Ji, yé ne sukut tom Ji, yé ne kwam Ji su bus, orete yé ne gu Ji kwop.

³³Sarewo kom mo kam we rek, bere Ji sun kadit sukkwop o ré.”

³⁴Yefun Yesus bi pakon jam nde sukdu gato An ki ne ré, pakon ne jam wokgan yo dom nde. Sukdu gane bi sukjimnut ne, Yefun Allah gurik kadit pakon ne ré, sane án jam nde ré. Pakon ne nalar mo sukdu gato Yefun Yesus ki ne or ré.

³⁵Yefun Yesus mu karowa Yerikho saresa, yetu ge dik yo gato gro ndu kem mo os de, ete an ndek suk mo ye gato mu wai ket os ne.

³⁶Ye gato gro ndu ne kem mo os de sa, an jam yé mwa wai ket os mone, sane an ndo mo yé mwa ne do, “Yé ben suma sare ne?”

³⁷Yé ki nai an do, “Yesus, ye Nazaret, wai ket tore.”

³⁸Sane ye gato gro ndu ne saiye do, “Yesus o, yeraja Daud bi Dat o, Nan jimnotku ji et!”

³⁹Orge ye gato mu nyim mo Yefun Yesus gwem maskwa ye gato gro ndu ne, ete yé ndantom an do, “Nan not tom!” Yé da ndantom an, sarewo ye gato gro ndu ne saiye gat nggi wai o do, “Yeraja Daud bi Dat o, Nan jimnotku ji et!”

⁴⁰Sane Yefun Yesus ti not, An syogat yé gwat ye gato gro ndu ne ma mo An. Ye gato gro ndu ne do ma sa, Yefun Yesus ndo mo an do,

⁴¹“Nan iwa Ji ós nan su suma ne?” Ye ne ki nai Yefun Yesus do, “Yenggras, Nan ós ben ji gro ndo et.”

⁴²Yefun Yesus ki do, “Nan gro ndo satu tom! Nan onyar kem mo ji, sane nan ge it anare.”

⁴³Yefun Yesus do ki An bi sukdu or sa, ye ne gro ndo satu it anane. Orge an si Yefun Yesus mubot os ne, ete an un Yefun Allah mone. Yé mwa mone me suk gato Yefun Yesus ben ne sa, yé mwa ne un Yefun Allah dom.