Read Abun Lukas 2 Bible Online

Lukas 2 - Abun bible

Lukas 2

¹Elisabet kem su mom bi pa Yohanes or, sugane Kaisar Agustus gum yekwesu wa ye Roma bi bur-i. {Kaisar jom ye Yahudi bi bur-i dom.} Sane Kaisar syaugat yé mubot ye Roma bi bur-i subere yé krom yé mwa gato kem mone sino gum o ré.

²Sensus gare, yé krom yé mwa gum mo pemerintah bi buku, yé krom wam doketke anare. Sugane Kirenius gum gubernur mo bur Siria.

³Sane yetu bok ne sino kadik-kadik mu mo nat gato án bi amui ontu mó. Yé mu mone wa yé krom án gum mo pemerintah bi buku ne, tepsu Kaisar syogat án ben ne.

⁴Sane Yusuf dom, Yusuf mu kadit kota Nazaret mo bur Galilea. Yusuf mu mo kota Betlehem, mo bur Yudea, mo nat gato yeraja Daud ontu mó, we Yusuf bi amui mo Daud.

⁵Yusuf si Maria mu mo Betlehem sino. Maria gato Yusuf nggorwa ne, Maria shimfar ré. An we mu mo Betlehem subere an we krom an we gum mone.

⁶An we mu kom mo Betlehem sa, Maria nukwe i.

⁷Orete Maria kem su Pa yebris, Maria bi Pa dofutmo. Maria nggwot Pa ne su san det, orete mom grem Pa ne sem mo suk gato ka sa ndurbe, gato sagana yé grem suksi bi sugit mó. Maria si Yusuf sem mo suksi bi dur, we nu mwa ne sino mo Betlehem buk wa an we ré, nu yo wa yekam gato ma ne sem mo nde, nu mwa ne ses sino.

⁸Mo Betlehem ne, ye gato mewa domba, án mewa domba mo nden karowa Betlehem. Sane noru ne sa, án sem mo nden mewa án bi domba kadit suge krok e ne.

⁹Su noru ne, án gensu malaikat dik yo ma ku án. Malaikat ne ma sa, tepsu sukru sye gato rer-rik kadit Yefun Allah rer ku bur. Sane yé bok ne sino nyu ndo nde.

¹⁰Sane, malaikat ne ki nai án do, “Nin nyu nde. Ji ma wa ji frot Yefun Allah bi suktaru is nin. Suktaru re ndo wai o ré, bere nin si yé mwa ne sino mit at wa sukdu re.

¹¹Su kam re, mo Daud bi nat-i ne, nggon dik yo kem su Pa gato bere ós men. Pa ne anato Yekwesu gato Yefun Allah syogat ma mo bur re wa nai men yetu kadit sukye ete jowa men. Yefun Allah bes Pa ne gum Kristus.

¹²Bere nin jam Pa ne sare: yé nggwot pabom ne su san det, ete yé grem Pa ne sem mo suk gato ka sa ndurbe, gato sagana yé grem suksi bi sugit mó. Nin do ku pabom ne sa, nin jam do, suk gato ji ki ne sangge.”

¹³Ye gato mewa domba ne gensu malaikat yaino ma ti su malaikat ne. Malaikat mwa ne un Yefun Allah, án ki do,

¹⁴“Men bes Yefun Allah gato kem mo pe gato kok mo gu ne gum kok sye wai o et. Yefun Allah, Nan ben nje gato Nan dakai jimnotku ne kem not mo bur re et.”

¹⁵Malaikat mwa ne un Yefun or, malaikat satu mu mo gu kadit yé gato mewa domba ne. Malaikat mu, orge yé gato mewa domba ki nai yu do, “Men mu mo Betlehem et. Men mu me suk gato Yefun Allah tarubot An bi malaikat ne et.”

¹⁶Sane yé bok gato mewa domba ne mu kamas mo Betlehem. Yé bok ne mu kom mone sa, án ku Maria si Yusuf, án me pabom mone dom. Pabom ne sem mo suk gato ka sa ndurbe.

¹⁷Yé gato mewa domba ne sokme pabom or, án mu kadit pe ne, án nukbot suk gato malaikat ki nai án subot pabom ne.

¹⁸Yé mwa gato jam án bi sukdu ne yeket sukdu ne.

¹⁹Sarewo Maria napawa sukdu ne pe, mom jimnutbot suk mwa ne pe sor.

²⁰Yé gato mewa domba ne, án mu satu mo án bi nat-i mo Bethelem de nden. Án do mu sa, án un Yefun Allah, án bes Yefun gum kok sye mo suk mwa gato malaikat ki nai án si suk mwa gato án me su án gro dom. Suk mmwa ne bor tepsu sukdu gato malaikat ki nai án ré.

²¹Maria kem su Pa ne or, kam munggwo rek eteyo, yesu mo nu ari bisunat Pa ne. Yesu ne tot Pa da naprut wé, ete Maria si Yusuf kendo Pa ne gum do, Yesus, tepsu gum gato malaikat ki nai Pa bi im sugato Pa bi im yo pe Pa nde tó.

²²Yé syak Maria kadit mom bi nu pe tepsu bi kam-i gato Musa krom mo an bi sukduno-i ne, orete Maria syesyar, ete Maria si Yusuf mu mo Yefun Allah bi nu mo Yerusalem. An we gwat Pa ne mu mo Yefun Allah bi nu subere an we kadum Pa ne nai yé mwa, subere yé mwa ne jam do, Pa ne sok mo Yefun Allah bi rus-i.

²³An we kadum Pa sane, we yé krom mo Yefun Allah bi sukdu do, “Pa yebris gato bi im kem su futmo ne, pa bi im kadum mo yé mwa gwem, subere yé mwa ne jam do, pa ne sok mo Yefun Allah bi rus-i.”

²⁴Sugane dom, an we gwat ndabu ge we yo, ndam gir ge we yo. An we gwat ndam ne wa syo nai yesu gato ben suk mo Yefun Allah bi nu, subere yesu ne gre mo bot, tepsu yé krom mo Yefun Allah bi sukdu. {An we syo ndam wa yesu gre sane subere pa bi im yo fowa sok ari o nde.}

²⁵Maria si Yusuf gwat Yesus ma kom mo Yerusalem, sugane yetu ge dik yo gato gum do Simeon kem mo kota Yerusalem ne. Simeon re, an ben sukndo, an ben suk ri tepsu Yefun Allah mit, we an jammo Yefun. An eswa kam gato bere Yefun Allah syogat Yekwesu ma mo bur Israel gato nai ye Israel wé kadit sukye. Yefun Allah Gen sisu Simeon pe.

²⁶Yefun Allah Gen ki bi sukdu-i nai Simeon do, “Nan yo kwop nde tó, bere nan me Yekwesu gato Yefun Allah tom do, An syogat ma mo bur re wa nai yetu kadit sukye ete jowa yetu ne et.”

²⁷Yefun Allah Gen gwat Simeon mu mo Yefun Allah bi nu. Kam gane Maria si Yusuf mu mo Yefun Allah bi nu dom. An we si Pa mu wa kadum Pa tepsu Yefun Allah bi sukdu-i. An we gwat Pa mu kom mo Yefun Allah bi nu de nden sa,

²⁸Simeon nai Pa ne ma kot tak de gwem, ete Simeon un Yefun Allah. Simeon ki do,

²⁹“Yefun Allah, ji bi Yekwesu, suk gato Nan tom su ji, ji me bor it anare. Sane ji, gato gum pakwerut wa Nan, ji fro wa ji kwop sisu ji mit ndo it anare.

³⁰Ji me Pa re su ji gro ré. Ji me Pa re gato Nan bes wa nai men yetu wé kadit sukye.

³¹Nan fro Pa gato ós men yetu re wa yewis mwa ne mo bur re sino.

³²Bere Pa re tepsu sukru gato rer ku os wa yewis yi gato jam nde Yefun, Pa ki rer subot Nan, Yefun Allah bi os-i, subere yewis yi ne jammo Nan. Bere Pa re ben Nan bi rus-i, gato ye Israel ne, subere án gum kas mo yé mwa neya ré.”

³³Pa ne bi im si bi ai yeket suk gato Simeon ki subot an we bi pa ne.

³⁴Orete Simeon ki suk su Yefun Allah subere Yefun ben sukndo su an we. Simeon ki suk su Yefun or, Simeon ki nai Pa bi im gato Maria ne do, “Pa re sye yo, ye Israel mwa bariwa An, sane bere yé mwa ne ku sukye mone. Wo ye Israel deyo iwa An, sane bere yé gato iwa Pa ne ku suk gato ndo, bere yé ne mbau to kapyo mone. Yefun Allah syogat Pa re ma wa kadum Yefun Allah bi suktinggi nai men yetu, wo bere yé mwa bariwa Pa re ré.

³⁵Yé gato bariwa jammo Pa re, bere Yefun Allah ben yé ne bi sukjimnut bor wa yé mwa jam. Bere nan dom, nderku nggwa subot Pa re, tepsu nyom syek nan mit, bere nan kwabom dek bot Pa ndo nde.”

³⁶{Simeon ki an bi sukdu or, sugane nggongras rok ge dik yo ma ku Maria si Yusuf mo Yefun Allah bi nu de nden ne.} Nggongras ne anato nggon nabi, gato ki Yefun Allah bi suktaru nai nje jam. Nggongras ne gum do Hana, Fanuel bi mam. Mom sok mo ye Israel bi wis dik yo gato gum do Asyer. Hana re, nggongras rok it. Mom kra kom mo tahun mufit sor, ete mom bi ya kwop ré.

³⁷Sane Hana kem nggonna sor, Hana kaim sa kom mo tahun musyu munggwo sop at, Nggonna re, noru nombrak mom yo mu kadit Yefun Allah bi nu-i nde, mom un Yefun Allah, mom benadi, mom mewa nggwa kadit sugit yei, subere mom ki suk su Yefun.

³⁸Sane Hana ma ku Maria si Yusuf mone sa, Hana ki ndo mo Yefun Allah wa an we bi Pa ne, ete mom nukbot Pa ne nai yé mwa mone gato eswa kam gato Yefun Allah syogat Yekwesu ma wa nai nje mo Yerusalem wé kadit sukye.

³⁹Yusuf si Maria benbot suk ma mwa gato yé krom mo Yefun Allah bi sukdu mo Yerusalem ne, orete an we satu mu mo an we bi kota Nazaret mo bur Galilea.

⁴⁰Mone Pa ne sye, Pa kaim nggi o, Pa jam suk mwa wai o. Yefun Allah bi sukjimnut sye kas subot Pa ne, Yefun Allah mewa An.

⁴¹Tahundik-tahundik Yefun Yesus bi yenggras mu mo Yerusalem wa an we si nje konwa Kam Sye Waiket.

⁴²Sane, Yefun Yesus kaim sa kom mo tahun musyu dik sop we sa, An si An bi im si bi ai mu mo Yerusalem wa án sino konwa kam sye ne, sagana An bi yenggras we ben ne.

⁴³Kam sye ne or, Yefun Yesus bi im si bi ai satu mu mo an we bi nat-i. An we do mu saresa, an we bi Gan, gato Yefun Yesus ne kem mo Yerusalem tó, wo Pa bi im si bi ai jam nde Pa kem mori.

⁴⁴An we gendo Pa simo yé mwa ne mu sino. Sane an we mu kam no dik, orete an we meret Pa mo an we bi nji, an we bi mben si an we bi yesyim gato si án mu sino.

⁴⁵An we meret Pa ware, an we yo ku Pa ne nde. Sane an we satu mu mo Yerusalem subere an we meret Pa mone.

⁴⁶An we meret Pa mone sor kom mo kam gri rek or. Kam gri rek, orete an we ku an bi Pa mo Yefun Allah bi nu de mo ros de mit, mo pe gato yeguru agama duno nje. Pa kem su ye Yahudi bi yeguru. Pa syaretwa yeguru ki bi sukdu-i, Pa ndo yeguru subot kwayo-kwayo dom.

⁴⁷Yé mwa mone gato syaretwa Pa ki bi sukdu-i ne yeket. Yé mwa ne yeket Pa do, Pa jam suk mwa. Suk gato yeguru ndo mo Pa ne, Pa jam or ré.

⁴⁸Pa bi im si bi ai ku an we bi Pa sa, an we yeket, we Pa si yeguru bok yo kem mone, ete Pa bi im ki nai Pa do, “Yesus, Nan ben sukye wa men ka we re wa suma ne? Ji si Nan bi ai meret Nan ware, men ka we kwabom dek bot nan ndo nde go!”

⁴⁹Yefun Yesus ki nai An bi im si bi ai do, “Nin ka we meret Ji wa suma ne? Nin ka we nutbot sisu ndo sa, bere nin ka we jam do, Ji kem mo Ji bi Ai, gato Yefun Allah ne bi nu sor.”

⁵⁰Sarewo an we jam nde Yefun Yesus bi sukjimmut ne.

⁵¹Orge Yefun Yesus simo An bi im si bi ai satu mu mo Nazaret, ete An jammo An bi im si bi ai petok sor. An bi im napawa suk mwa gato Yefun Yesus ben ne pe.

⁵²Sane Yefun Yesus sye o, An jam suk mwa wai o. Yefun Allah iwa An, yetu dom iwa An.