Read Abun Lukas 20 Bible Online

Lukas 20 - Abun bible

Lukas 20

¹Kam dik yo Yefun Yesus duno nje mo Yefun Allah bi nu de mo ros de mit. Yefun Yesus duno nje mone, An ki sukdu subot os ndo gato Yefun Allah fro wa men yetu. Yefun Yesus duno nje saresa, yekwesú mo Yefun Allah bi nu yeguru agama si ye Yahudi bi yepasye ma mo An mone.

²Yé ne ndo mo Yefun Yesus do, “Je u anato bes Nan wa Nan ben suk mwa more ne? Je u anato syogat Nan ma more ne? Nan ki mo et!”

³Yefun Yesus ki nai yé bok ne do, “Ji waii ndo mo nin subot kwa dik yo or et.

⁴‘Je u anato bes Yohanes wa ras nje mo syur ne, Yefun Allah bado, yetu e?’ Nin ki napyo nai Ji jam et.”

⁵Orge yepasye ne ki nai yu do, “Men ki sa u nai An ne? Men do ki do, ‘Yefun Allah anato bes Yohanes’ it yo, bere An ndo mo men do, ‘Sane nin yo jammo Yohanes nde wa suma ne?’

⁶Wo men do ki do, ‘Yetu anato bes Yohanes’ it yo, bere yé mwa more maskwa men ete am men su jok, we yé mwa ne onyar kem mo Yohanes tepsu yenabi gato Yefun Allah bes ne.”

⁷Sane yé ne ki nai Yefun Yesus do, “Men jam nde ye gato bes Yohanes ne.”

⁸Orete Yefun Yesus ki nai án do, “Sane yo, Ye gato bes Ji wa Ji ma ben suk more ne, Ji yo frot An gum nai nin jam dom nde.”

⁹Yefun Yesus duno nje mone saresa, An gwat sukamno sare do, “Yetu ge dik yo ben nggwe anggur, orete yenggras ne syogat yetu ge bok yo mewa nggwe ne. Yenggras re ki nai yé ne do, ‘Anggur re do bo it yo, nin wat i-we, napyo wa ji, napyo wa nin.’ Orge yenggras ne mu mo nat yi kadit ré, an kem nam mo nat ne.

¹⁰Su kam gato anggur bo um ne, yenggras ne syogat an bi pakwerut dik yo mu mo yé bok gato mewa nggwe ne subere yé ne wat anggur bo napyo wa an. Pakwerut ne do ma sa, yé gato mewa nggwe ne kwam pakwerut ne, orete yé ne yo syo suk yo nai pa gwat mu nde. Án syogat pakwerut ne mu yi satu mo pa bi yenggras.

¹¹Orge yenggras ne syogat pakwerut dik yo o mu o, sarewo yé gato mewa nggwe ne gu pakwerut ne dom. Án kabor pakwerut ne, án ben pa ket kwayo-kwayo, ete án yo bi suk yo nai pa gwat mu nde, án syogat pakwerut ne mu yi satu.

¹²Orge yenggras ne syogat pakwerut dik yo o waii mu o. Yé gato mewa nggwe ne kwam pakwerut do gri re, orete án bare pa mo nggwe de nden.

¹³Sane, yenggras nut mo an dakai do, ‘Ji ben suma ne? Sa ndo sa, ji bi pa gato ji jimnotku ne, ji syogat ji bi pa mu mone. Ji bi pa sa, bere ye gato mewa nggwe ne jammo an.’ {Sane an bi pa mu mo nggwe ne.}

¹⁴Wo yé gato mewa nggwe ne do me pa ma sa, án ki nai yu do, ‘Yenggras gato bi bur det re bi gan anare. Men gu pa kwop wé et, subere bur det re sok mo men.’

¹⁵Sane yé ne gwat pa mu kadit nggwe, ete yé gu pa kwop wé mone.” Orge Yefun Yesus ki do, “Sane yenggras gato bi nggwe ne bere ben suma su ye gato mewa an bi nggwe ne?

¹⁶Bere an ma, an gu yé gato mewa an bi nggwe ne wé, orete an syogat ye be yo o waii mewa an bi nggwe ne.” Yé syaretwa Yefun Yesus gwat sukamno ne or sa, yé kit do, “Mban! Men bariwa sukibit sane bor mo men ré.”

¹⁷Yefun Yesus sokme yé mwa mone, orete Yefun Yesus ki do, “Sane yo, sukdu kwa re gato yé krom mo Yefun Allah bi sukdu ne bi sukjimnut sa u ne? Sukdu ne ki do, ‘Jok gato ye nggo nu su ne, su ketke yé bariwa, án nut do ibit ré, ri ma sa yé nai jok ne tepsu jok gato ndo wai wa yé nggo nu ne su o ré.’

¹⁸Yé mwa ne sino gato gwes ti mo jok gato ndo ne ges, bere án kaim mbrur ré, wo ye gato jok gato ndo ne ges gwa it yo, bere án dat de su bur.”

¹⁹Ye Yahudi bi yeguru agama si yekwesú mo Yefun Allah bi nu ne, án sino jam do Yefun Yesus gwat sukamno ne pet mo sukibit gato án ben ne. Sane án werwa án but Yefun Yesus ware, án nyuwa yé mwa gato sum mone.

²⁰Sane yeguru si yekwesú ne eswa bi kam-i tep wa án but Yefun Yesus. Yekwesú ne syo sugum nai yetu ge bok yo gato ben nggwa tepsu ye gato ben sukndo. Yé bok ne mu ndarwa Yefun Yesus, yé ne meret os wa ben kidar Yefun Yesus. Án ndobot Yefun Yesus, subere Yefun Yesus do ki suk yo siri it yo, án ku os wa án but Yefun Yesus, ete án gwat Yefun mu án syo mo yepasye gato jowa bur ne syim-i.

²¹Sane yé bok ne gato meret os wa ben kidar Yefun Yesus, yé ne ma ete ki nai Yefun Yesus do, “Yeguru, men jam do, suk mwa gato Nan duno men su ne ndo sino. Nan duno men yetu, yepasye si ye gato wok ne sino, Nan duno men su Yefun Allah bi sukdu-i ne rer sor. Nan duno yé mwa ne sino tepsu yu.

²²Sane, men iwa men jam Nan bi sukjimnut subot sukdu re et, sare do, pemerintah bi yekwesu gato gum do Kaisar syogat men bi sugum pajak nai an, sane men ye Yahudi bi sukduno-i ki suma ne? Men bi sugum pajak anato ndo tepsu sukduno ne bado, siri kadit e?”

²³Yefun Yesus jam yé ne meret os wa An subere yé maskwa An mo sukdu gato An ki satu ne. {Sato Yefun Yesus ki do, men bi pajak nde, bere Kaisar maskwa An, wo An ki do, men bi pajak yo, bere ye Yahudi mwa ne maskwa An.} Sane An ki do,

²⁴“Nin gwat ye Roma bi sugum det dik yo ma wa Ji me et. Yé krom je u ana kaim mo sugum det re ne? Yé krom je u ana gum mo sugum det re ne?” Yé ne ki do, “Yé krom Kaisar kaim mone, si yé krom Kaisar gum mone.”

²⁵Sane Yefun Yesus ki nai yé ne do, “Sane, Kaisar bi suk-i yo, men syo nai Kaisar, wo Yefun Allah bi suk-i yo, men syo nai Yefun sor.”

²⁶Yé bok gato meret os wa án ben Yefun Yesus ki suk yo siri ne, án yo ku os yo mo nde. Yefun Yesus yo ki suk gato ibit nai yé mwa mone nde. Yé bok ne not kadit, we án yeket suk gato Yefun Yesus ki ne.

²⁷Orge ye Saduki ge bok yo ma ku Yefun Yesus. Ye Saduki bi sukduno-i kwa yo do, ye gato kwop bere yo sun o nde. Ye Saduki re ma ndo mo Yefun Yesus do,

²⁸“Yeguru, Musa krom sukduno re wa men do, ye gato yo ku pa nde do kwop it yo, bere an bi jni waii kra su nggonna ne subere ku pa win an bi nji gato kwop ne.

²⁹Wam dik yo, pa yedik ge mufit kem more mó ré. Pa dofutmo kra su nggon dik yo, orete pa ne kwop, an yo ku pa nde.

³⁰Sane an bi nji gato ak mo an waii kra su nggonna ne. Sarewo pa kedowe ne kwop, an yo ku pa nde.

³¹Pa dogri sane dom, pa kedogri ne waii kra su nggonna ne o, orete pa ne kwop, yo ku pa nde ré, sane, sane sor pá bok ne sino kom mo kedomufit kra su nggonna ne ware, pá bok ne sino yo ku pa nde, wo pa ne kwop or.

³²Orge nggonna ne waii kwop wari.

³³Sane it yo, su kam gato yekwop sun kadit sukkwop it yo, nggon gato kra su pa ge mufit ne te, bere nggon ne tepsu pa u bi nggon ne?”

³⁴Yefun Yesus ki nai ye Saduki ne do, “Ye gato kem mo bur re kra su yu sagana,

³⁵wo yé gato Yefun Allah nut do yé ne sa, tep wa Yefun Allah bere sun án kadit sukkwop ne, su kam sari ne ma yé ne yo kra mo nde.

³⁶Yé ne bere tepsu malaikat, án gesyos it, án yo kwop o nde. Yé ne anato Yefun Allah bi pá, we Yefun sun án kadit sukkwop.

³⁷Sane sukdu subot ye gato sun kadit sukkwop it yo, Musa dom ki rer do, sangge, ye gato kwop bere sun. Musa krom subot suk gato an me kweke dik yo {gato bot ru mó, sarewo bot ne yo git kwe ne nde. Ete Musa jam Yefun Allah ki sukdu nai an kadit kweke mit.} Musa krom suk gato Yefun Allah ki ne sare do, ‘Ji anato Yefun Allah gato jom Abraham, Isak si Yakub.’

³⁸Yenggras ka gri ne da kwop su nyim neya, sarewo án mbau satu. Sane Yefun Allah yo jom ye gato kwop nde, wo Yefun Allah jom ye gato mbau sor. Men yetu nut do yenggras ne kwop ré, wo Yefun Allah sa, An jam do An bi pá bok ne sino mbau tó.”

³⁹Yeguru agama deyo ki do, “Yeguru, sukdu gato Nan ki ne ndo wai o ré.”

⁴⁰Sane ye yo ndobot Yefun Yesus subere yé meret os wa Yefun o nde, we yé damen teker ware.

⁴¹Orge Yefun Yesus ki nai nje gato syaretwa An bi sukdu mone do, “Suma ben anato yeguru ki do Yekwesu gato Yefun Allah syogat ma mo bur re wa nai men yetu kadit sukye ete jowa men ne anato Daud bi dat ne?

⁴²We Daud dakai krom mo buku Mazmur do, ‘Yefun Allah Ye gato gesyos ki nai ji bi Yekwesu do, Nan kem tak Ji de syim ge.

⁴³Nan si Ji tepsu Yekwesu sino mone sane sor Ji syo yeko gato iwa gu Nan mo Nan syim, subere án jammo Nan et.’

⁴⁴Sane mo Mazmur ne, Daud kendo Kristus tepsu an bi Yekwesu. Sane men kendo Kristus do, ‘Daud bi dat’ sor nde, wo An tepsu ‘Daud bi Yekwesu’ dom.”

⁴⁵Yé mwa mone syaretwa Yefun Yesus ki sukdu sa, Yefun Yesus ki nai An bi pakon do,

⁴⁶“Nin mewa nin nggwa kadit yeguru agama. Yé ne iwa it san syu gato ndo, ete án mu mo peyo-peyo su san gato ndo ne, subere yé mwa sokme án. Sato yeguru do mu mo pasar it yo, án iwa yé mwa mo pasar nut do án yepasye, án iwa yé ki do, ‘kam ndo’ mo án. Yeguru ne iwa án kem mo pe gato yé fro wa yepasye ma kem mó, sato mo nu ari e, mo pesta e ne subere yé bes yeguru gum kok mone.

⁴⁷Yeguru ne kidar nggonna subere án nai suk mo nggonna ne bi nu or sino. Sane dom yeguru ne benadi syu, subere yé mwa gato me yeguru benadi sane nut do, yeguru re sa, ben Yefun Allah bi suk-i sisu ndo, ondewo yeguru ben bi suk-i ibit ré. Sane bere Yefun Allah syo sukye gato de wai nai yeguru gane o ré.”