Read Abun Lukas 23 Bible Online

Lukas 23 - Abun bible

Lukas 23

¹Sane yepasye mwa ne ti sino, ete án gwat Yefun Yesus mu ku Pilatus, {Pilatus gato ye Roma bes gum yekwesu mo pe ne.}

²Yepasye ne gwat Yefun Yesus mu kom mo Pilatus sa, án ndak Yefun Yesus, án ki do, “Ye re ben kidar men bi nje. An ben kidar men anato men simo os ibit, ete men yo jammo men bi yekwesu mo bur re o nde. Ye gato iwa bi sugum pajak nai nin ye Roma bi yekwesu, Kaisar ne, An duwer yé ne. Ye re ki do, An anato Kristus, Yekwesu gato Yefun Allah syogat ma wa jowa men ye Yahudi, tepsu men ye Yahudi bi Yekwesu.”

³Orge Pilatus ndo mo Yefun Yesus do, “Nan anato ye Yahudi bi yekwesu, bado?” Yefun Yesus ki do, “Suk gato nan ki ne, sangge.”

⁴Orge Pilatus ki nai yekwesú mo Yefun Allah bi nu bok ne si yé mwa mone do, “Ji ndobot Ye re ware, ji ki do, Ye re ben suk gato ibit yo mo nde.”

⁵Sarewo yepasye gato gwat Yefun Yesus ma mone, án ndak Yefun Yesus gat sor, án ki o do, “Ye re duno men yé mwa mo bur Yudea sino su os ibit. Ye re duno men subere men yo jammo men bi yekwesu mo bur re nde. Su ketke Ye re duno nje mo bur Galilea, orete An ma kom more, An duno men dom.”

⁶Pilatus jam yé ki do, Yefun Yesus duno nje mo Galilea sa, Pilatus ndo mo yé ne do, “Ye re te, ye Galilea, bado?”

⁷Pilatus jam do, Yefun Yesus ma kadit mo bur gato Herodes jowa ne sa, Pilatus syogat yé gwat Yefun mu mo Herodes. Sugane Herodes ma mo Yerusalem.

⁸Herodes ku Yefun Yesus sa, an mit iwa wai o ré, we nam it, Herodes jam yé nuk sukdu subot Yefun Yesus, ete Herodes mit iwa an ku Yefun Yesus. Herodes iwa an me Yefun Yesus ben suk gato ben nje yeket, an iwa an me su an gro dom.

⁹Herodes ndo mo Yefun Yesus subot suk bok yo ware, Yefun Yesus yo du nde.

¹⁰Yekwesú mo Yefun Allah bi nu si yeguru agama ma ti mone dom, ete án ndak Yefun Yesus ket kwayo-kwayo daret.

¹¹Orete Herodes si an bi yesukmise siker Yefun Yesus ete kamo su An dom. Yesukmise ne it yepasye bi san mo Yefun Yesus, orge Herodes syogat yé gwat Yefun Yesus satu mu mo Pilatus.

¹²Nam it Herodes si Pilatus, an we ne maskwa yu. Sarewo su kam gane, an we tepsu yesyim satu o ré.

¹³Pilatus kendo yekwesú mo Yefun Allah bi nu si ye Yahudi bi yepasye si yé mwa ma ete sum mo an gwem. {Yefun Yesus ti mo yé mwa ne gwem dom.}

¹⁴Yé mwa ne ma sum mo Pilatus gwem sa, Pilatus ki nai yé mwa ne do, “Nin gwat Ye re ma mo ji wa ji ndobot An. Nin ndak An do, ‘Ye re ben kidar men bi nje subere án syun yekwesu mo bur re wé.’ Sane Ji ndobot An mo nin gwem it, ete ji ki do, An yo ben sukibit gato nin ki ne nde.

¹⁵Herodes ki sane dom anato an syogat yé gwat Ye gare satu ma mo men. Sane, Ye re yo ben sukibit tepsu men gu An kwop nde.

¹⁶[Saneyo, ji syogat yé kwam An su bus sor, ete ji sombok An wé.”

¹⁷[Su Kam Sye Waiket ne, sagana Pilatus sombok yetu ge dik yo gato yé mwa ne imo wé kadit sel.]

¹⁸Yé mwa gato sum mone, án sino saiye do, “Nan gu ye gare kwop wé se! Nan sombok Barabas wa men et!” (

¹⁹Barabas re, yesukmise sok Barabas mo sel, we Barabas re simo yekweke gato werwa syun ye Roma wé kadit ye Yahudi bi bur det-i. Barabas simo yekweke deyo ben sukndi mo Yerusalem mit ete an gu ye yo kwop mone.)

²⁰Pilatus iwa sombok Yefun Yesus wé, sane an ki nai yé mwa ne o, sarewo

²¹yé mwa ne saiye gat. Yé mwa saiye do, “Nan mban Ye ne mo kwesukwin se! Nan mban Ye ne mo kwesukwin se!”

²²Pilatus ki nai yé mwa mone wam do gri o. Pilatus ki do, “Ji gu An kwop wa suma ne? An ben sukibit sato suma ne? Ye re yo ben sukibit tepsu ji syokom yé gu An kwop nde. Sane yo, ji syogat yé kwam An su bus, ete ji sombok An wé sor ré.”

²³Sarewo yé mwa ne bariwa jammo Pilatus bi sukdu-i ne. Yé mwa ne saiye nggi wai o ré. Án saiye gat do, “Nan mban Ye ne mo kwesukwin sor dei!” Yé mwa saiye gat sane sor, wade Pilatus jammo sukdu gato yé mwa ki ne.

²⁴Sane Pilatus nai sukjimnut dik do, an benbot suk gato yé mwa wergat an ben ne.

²⁵Sane Pilatus sombok Barabas wé. Barabas anato ye gato yé sok mo sel mo gato Barabas ben sukndi ete gu ye yo kwop mone. Pilatus sombok Barabas tepsu yé mwa kiwa ne. Orete Pilatus syokom yé gu Yefun Yesus kwop mo kwesukwin, tepsu yé mwa imo ne.

²⁶Yesukmise bok yo gwat Yefun Yesus mu sa, kom mo os mit án ku yetu ge dik yo gato gum do Simon. Simon re, an ye Kirene. An ma kadit nden mu mo kota. An ma saresa, yesukmise but an, ete yé bes kwe gato bere yé mban Yefun Yesus mone mo Simon kwake. Orge yesukmise syaugat Simon sam kwesukwin mu boribot Yefun Yesus.

²⁷Yé mwa yé re mu boribot Yefun Yesus. Nggon ge bok yo si nje mu boribot An dom. Nggon ne nderku nggwa, nggon ne wo wa Yefun Yesus.

²⁸Yefun Yesus brek ma ki nai nggon ne do, “Nggon ye Yerusalem, nin wo wa Ji sor nde, nin wo wa nin dakai si nin bi pa dom et.

²⁹Bere kam sari ne ma nin ku sukye ndo nde. Su kam gane yé ki do, ‘Nggon gato pe pa nde, bere nggon ne mit at wa ré. Nggon gato yo ku pa nde si nggon gato yo bi sus nai pa da nde, bere nggon ne mit at wa ré.’

³⁰Su kam gane yé ku sukye ndo nde, sane bere yé ki nai banbo do, ‘Nin krut ma gu men kwop et!’ Bere yé ki nai bobuk do, ‘Nin krut kit men et!’

³¹Bere suk mwa ne bor, we yé gu Ji re gato ben sukibit yo mo nde yo, bere Yefun Allah ben suma nai ye gato ben sukibit mwa ne? Bere Yefun Allah syo sukye mwa wai nai yé ne o ré.”

³²Yesukmise ne gwat yetu ka we yo o gato ben sukibit mu mone. Bere yesukmise mban an we si Yefun Yesus mo bi kwesukwin ne sino.

³³Án mu kom mo nat gato gum do, “Yekri subris” sa, yesukmise mban Yefun Yesus mo kwesukwin mone. Yé mban yetu ka we gato ben sukibit mo bi kwesukwin ne dom, dik yo mo Yefun Yesus de syim ge, dik yo mo Yefun Yesus de syim jam.

³⁴Orge Yefun Yesus ki nai Yefun Allah do, “Ji bi Ai, yesukmise re jam nde suk gato án ben ne, sane Nan maskwa án mo sukibit ne nde, Nan misyar sor.” Orete yesukmise ne tik bit wa án wat Yefun Yesus bi san su yu.

³⁵Yé mwa ti mone, yé sokwa suk mwa ne saresa, ye Yahudi bi yekwesu siker Yefun Yesus, yé ki do, “An sombok ye yi kadit sukye gato ye ne ku ne, An sombok An dakai dom et! Ye re Yekwesu gato Yefun Allah bes gum Kristus su sangge it yo, An is kadit kwesukwin ne et!”

³⁶Yesukmise mone, án kamo su Yefun Yesus dom. Yesukmise ne gwat nau anggur gato muk ma, án syo nai Yefun Yesus,

³⁷ete án ki do, “Nan, ye Yahudi bi Yekwesu su sangge it yo, Nan dakai sombok Nan nggwa et!”

³⁸Mo Yefun Yesus bi kwesukwin napnim ne, yé mban kwedet dik yo. Mo kwedet ne, yé krom do, “Ye re anato ye Yahudi bi Yekwesu.”

³⁹Ye ka we gato ben sukibit gato yé mban mo kwesukwin mo Yefun Yesus de ne, dik yo kabor Yefun Yesus ket kwayo-kwayo. An ki do, “Te, Nan anato Yekwesu gato Yefun Allah syogat ma mo bur re wa nai men yetu wé kadit sukye bado nde e? Sane Yefun Allah bes Nan gum Kristus su sangge it yo, Nan sombok Nan dakai et. Nan nai men ka we kadit sukye re dom et!”

⁴⁰Sarewo ye gato ben sukibit ge dik yo ndantom dik yo o. An ki do, “Te, nan yo nyuwa Yefun Allah nde, bado? Nan dom ku sukye mo kwesukwin ré. Yé gu men ka gri kwop sino.

⁴¹Yé syo sukye nai men ka we tepsu sukibit gato men ka we ben ne, sarewo Yefun Yesus re, An yo ben sukibit tepsu ye gu An kwop yo mo nde.”

⁴²Orge an ki nai Yefun Yesus do, “Yesus, bere Yefun Allah bes Nan gum Yekwesu, ete Nan ma wa Nan jowa yetu mwa ne sino yo, Nan napawa ji et.”

⁴³Yefun Yesus ki nai an do, “Suk gato Ji ki re suksangge anare, su kam re, nan si Ji kem mo Yefun Allah bi nat-i gato ndo wai o ré.”

⁴⁴Yé mban Yefun Yesus mo kwesukwin mone sa, ndendu kewa pe ne sino kadit kam ti ri sor kom mo kam dek.

⁴⁵Sugane kam yo gat rer nde. San det gato yé kok mo Yefun Allah bi nu mit gato kewa Yefun Allah bi gumwak fo ne, san det ne brer mo miten. {Sane yé mwa ku os wa sok mo gumwak fo ne wa ku Yefun Allah it, ye yo mitmo ye gato ben suk mo Yefun Allah bi nu tepsu yegweswai o nde.}

⁴⁶Orge Yefun Yesus saiye nggi do, “Ji bi Ai, Nan nai Ji gen, Nan mewa.” Yefun Yesus do ki suk ne or sa, An mas bok it.

⁴⁷Ye Roma bi yesukmise bi yesu dik yo me suk mwa gato bor mone sa, an un Yefun Allah, an ki do, “Sangge, Ye re ben suk gato ibit yo mo nde, An ye gato ben suk tepsu Yefun Allah mit sor.”

⁴⁸Yé mwa gato sum wa me Yefun Yesus kwop su án gro mone, án me suk mwa gato bo mone sa, án sino nderku án nggwa anato án nggo án tunap. Orete án mu kadit ré.

⁴⁹Yefun Yesus bi yesyim bok ne sino, si nggon ge bok gato simo Yefun Yesus kadit bur Galilea ne dom, án sino ti ko kadit, án ndarwa suk mwa gato bor mone.

⁵⁰Yetu ge dik yo, an gum do Yusuf, an ontu mo kota Arimatea, mo bur Yudea. Yusuf re, an gum sok mo ye Yahudi bi nu ari bi yekwesu. An ben sukndo, an ben an bi suk-i ri-roi. An eswa kam gato Yefun Allah ma jowa men tepsu men bi Yekwesu. An gum da sok mo ye Yahudi bi yekwesu, sarewo an yo simo yekwesu gato nai sukjimnut dik do, án gu Yefun Yesus kwop ne nde.

⁵¹

⁵²Sane Yusuf ma ku Pilatus sa, an ndekwa Yefun Yesus mukri wa an gwat mu mo makwe. {Pilatus imo, sane Yusuf mu nai Yefun Yesus mukri ne.}

⁵³Sane Yusuf mu sombok Yefun Yesus mukri kadit kwesukwin ne, ete Yusuf nggwot su san det gato kwo, ete Yusuf gwat mu mo makwe. Mone an grem Yefun Yesus mukri mo jokwak dik yo gato yé fro wa yé grem yekwop mo mit ne. Jokwak ne, ye yo grem ye mukri mo nde tó.

⁵⁴Kam gato yé mban Yefun Yesus mo kwesukwin su ne, anato kam Jumat gato ye Yahudi fro suk wa bi ik, kam Sabat, ye Yahudi bi kam sye ne. Sane bergan ye Yahudi bi kam sye it anane.

⁵⁵Nggon gato simo Yefun Yesus ma kom mo Yerusalem kadit bur Galilea, nggon ge bok ne sisu Yusuf gwat Yefun Yesus mukri mu grem mo jokwak mit. Nggon ne sokwa jokwak ne, ete nggon sokwa Yefun Yesus mukri gato yé grem mone dom.

⁵⁶Orge nggon ne satu mo nat gato án sem mo. Nggon ne fro suk gato grik ndo fros su manik subere án mu án es mo Yefun Yesus mukri. Wo kam Sabat ne, nggon ne yo mu nde. Nggon ne kem not, we kam Sabat anato kam sye. Nggon ne jammo Musa bi sukduno-i anato án kem not.