Read Abun Lukas 6 Bible Online

Lukas 6 - Abun bible

Lukas 6

¹Kam Sabat dik yo, ye Yahudi bi kam sye, ete Yefun Yesus si An bi pakon muket nggwe gandum mit. An bi pakon mubot nggwe ne saresa, pakon ne do gandum gro gato kom mone. Yefun Yesus bi pakon do gandum bo, án krut, orete án git.

²Ye Farisi deyo ki nai Yefun Yesus do, “Suma ben anato nin ben suk su kam sye gato siri kadit men ye Yahudi bi sukduno-i ne?”

³Yefun Yesus ki do, “Suk gato yeraja Daud si yé gato sisu Daud ben sugato án sino on de ne te, nin baca mó bado, nde e?

⁴Daud sok mo Yefun Allah bi nu, ete an si yé gato sisu an nai roti gato yé grem kwop wa som Yefun Allah mone. Daud git roti ne, sarewo suk gato an ben ne siri kadit men ye Yahudi bi sukduno-i, we men bi sukduno ki do, yesu gato ben suk mo Yefun Allah bi nu ne sor ete git roti ne. {Sarewo Yefun Allah yo maskwa Daud mo suk gato an ben ne nde.}”

⁵Orge Yefun Yesus ki nai yé ne do, “Yetu bi Pa to Ji re gum Yekwesu wa kam Sabat, sane suk gato Ji ki ndo wa yetu ben su kam sye, kam Sabat ne, kwop mone it.”

⁶Kam Sabat dik yo o, ete Yefun Yesus sok mo ye Yahudi bi nu ari dik yo, orete An duno nje mone. Mo nu ari ne yetu ge dik yo gato syim ge út sok mone dom.

⁷Ye Yahudi bi yeguru agama si ye Farisi mone, yé ne iwa meret os wa ki Yefun Yesus gum ibit mo suk gato An ben su kam Sabat ne. Sane yé ne sokwa Yefun Yesus pe, yé ne nut mo án syidem do, “Te, Yefun Yesus ben ye yo ge su kam sye kam Sabat ne bado?” {Do Yefun Yesus be ye ne ge yo, bere ye Farisi si yeguru ne ndak Yefun Yesus do, An ben suk siri kadit sukduno subot kam Sabat.}

⁸Sarewo Yefun Yesus jam yé ne bi sukjimnut, sane An ki nai ye gato syim út ne do, “Nan ma ti more, mo yé mwa gwem re et.” Sane ye gato syim út ne ti, ete an ma ti mo yé mwa gwem.

⁹Orete Yefun Yesus ndo mo yé mwa mone do, “Te, men simo Yefun Allah bi sukduno sane yo, men ben suk sato suma su kam sye kam Sabat ne? Men ben suk gato ndo bado, men ben suk gato ibit e? Men nai nje kadit sukye bado, men gu nje kwop e?”

¹⁰Yefun Yesus sokbot yé mwa mone, orete Yefun Yesus ki nai ye gato syim út ne do, “Nan ron nan syim et!” Ye ne ron an syim sa, an syim gato út ne ndo satu.

¹¹Yeguru agama si ye Farisi me suk gato Yefun Yesus ben mone sa, án on sa ndo nde. Sane án kinai yu do, “Men meret os sa u subere men ben sukye nai Ye re ne?” Kadit kam gane, yeguru agama si ye Farisi meret os wa Yefun Yesus.

¹²Kam dik yo o, Yefun Yesus mu it mo bobuk dik yo wa An ki suk su Yefun Allah mone. An ki suk su Yefun su noru ne sor, kom mo nombrak.

¹³Nombrak ete An kendo An bi pakon ge bok yo ma mo An. Kadit yé mwa gato ma mo Yefun Yesus ne An bes yetu ge musyu dik sop we, gato An kendo gum do yerasul. {Yerasul bi sukjimnut do ye gato Yefun Yesus syogat mu wa ben An bi suk-i tepsu An mo bur re.} Yerasul ge musyu dik sop we ne gum anare:

¹⁴Simon gato Yefun Yesus syo gum dik yo do Petrus, sisu an bi nji Andreas, Yakobus sisu bi nji Yohanes, Filipus, Bartolomeus,

¹⁵Matius, Tomas, Yakobus gato Alfeus bi pa, Simon gato sok mo yekweke,

¹⁶Yudas gato Yakobus bi pa, si Yudas Iskariot gato ri ma meret os wa gwat yeko ma wa but Yefun Yesus.

¹⁷Orge Yefun Yesus si pakon ge musyu dik sop we ne is kadit bobuk mu kom mo bombras dik yo mone. Mo bombras ne, yé mwa gato simo Yefun Yesus si yé mwa kadit bur Yudea si kota Yerusalem si kota we mo sem de, tó kota Tirus si kota Sidon ne, yé mwa ne ma sum mone sino. Yé mwa yé ré sum mone.

¹⁸Yé mwa ma mone wa syaretwa Yefun Yesus bi sukdu. Án sino ma subere Yefun Yesus ben án ge kadit án bi suki dom. Ye gato semda bok nggwa mó, án ma dom, ete Yefun Yesus syun semda titi wé kadit án ré.

¹⁹Yé mwa mone werwa án rot Yefun Yesus, we án me Yefun Yesus bi suktinggi bor mone, án me Yefun Yesus ben yé mwa gato i ge kadit án bi suki ne.

²⁰Yefun Yesus sokwa An bi pakon, orete An ki do, “Nin yé gato yewa suk, nin mit at wa, we Yefun Allah anato nin bi Yekwesu gato mewa nin.

²¹Nin yé gato on de su kam re, nin mit at wa, we bere nin on ge mone tó. Nin yé gato wo su kam re, nin mit at wa, we bere Yefun Allah ben nin sa o ré.

²²Nin yé gato simo Yetu bi Pa to Ji re, bere yé bariket nin, yé misyar nin, yé kabor nin, yé kiket nin gum ibit mone yo, nin mit at wa.

²³Suga nyim tuya nin bi amui ben sukye nai yenabi saga bere nin ku ne dom. Sane yé do ben sukye sane nai nin it yo, sugane, nin wi nin ambre, we Yefun fro suk mwa gato ndo wa nin mo gu nim ré.

²⁴Sarewo nin yé gato ku suk mwa mo bur re, nin kwabom dek wa sor, we bere suk mwa ne or kadit nin ré, nin mit ndo mo suk mwa gato nin ku mo bur re sor ré.

²⁵Nin yé gato bi sugit mwa su kam re, nin kwabom dek wa sor, we bere nin on de mone tó. Nin yé gato sa su kam re, nin kwabom dek wa sor, we bere nin wo mone tó.

²⁶Nin yé gato yé mwa un ne, nin kwabom dek wa sor, we suga kam nyim tuya nin bi amui un yenabi gato kidar suk nggi dom, ete án sino ku sukye mone.”

²⁷Yefun Yesus ki o do, “Sarewo Ji ki nai nin gato syaretwa Ji bi sukdu sare do, nin ben sukndo su yeko gato ma wa gu nin, nin ben sukndo su ye gato bariket nin et.

²⁸Nin ki suk su Yefun Allah subere Yefun ben sukndo su ye gato dufo mo nin. Nin ki suk su Yefun Allah subere Yefun ós ye gato ben sukye nai nin ne.

²⁹Ye yo gwa nin kwanke yo, nin brek nin kwanke deyo o wa an gwa dom et. Ye yo nai nin bi sansun yo, nin misyar ye ne dakai nai nin bi san deyo dom et.

³⁰Ye yo ndek suk mo nin yo, nin syo nai ye ne sor. Ye yo nai nin bi suk-i kadit nin it yo, nin mu syokom an syo suk ne satu nde.

³¹Suk gato nin mit iwa ye yi ben su nin ne yo, nin ben suk sane su ye yi neya et.

³²Nin jimnotku ye gato jimnotku nin sor ré, bere Yefun Allah syo sukndo nai nin wa suma ne? Ye gato jam nde Yefun, yé ne jimnotku ye gato jimnotku án dom fe!

³³Nin ben sukndo mu nai ye gato ben sukndo ma nai nin sor ré, bere Yefun Allah syo suk gato ndo nai nin wa suma ne? Ye gato jam nde Yefun ben bi suk-i sane dom.

³⁴Nin syo nin bi suk nai ye gato bere bi nin satu sor ré, bere Yefun Allah syo suk gato ndo nai nin wa suma ne? Ye gato jam nde Yefun, yé ne syo bi sugum nai yu dom, we án jam do, bere án ku sugum me ne satu.

³⁵Nin ben sukndo su ye gato ben sukndo su nin sor nde, wo nin jimnotku yeko gato ma wa gu nin, nin ben sukndo su ye gato bariwa nin ne dom et. Nin syo suk nai ye gato ndek suk mo nin sor. Bere ye ne syo suk ne satu o bado, yo syo nde yo, nin nutbot o nde. Sane, nin do ben sukndo su ye gato ben sukibit nai nin sane it yo, bere Yefun Allah syo suk mwa gato ndo nai nin, bere suk gato nin ben ne kadum do, nin anato Yefun Allah gato gum kok sye wai ne bi pá-i. Nin ben nin bi suk-i tepsu Yefun Allah ben ne, we Yefun Allah ben sukndo su ye gato ben sukibit si ye gato misyar An dom.

³⁶Nin ben nin bi suk-i tepsu men bi Ai, Yefun Allah ben ne et! An yo ben suk su nin tepsu sukibit gato nin ben su An nde, wo An ben sukndo su nin sor. Sane dom ye yo ben sukibit su nin it yo, nin ben sukibit satu nde, wo nin ben sukndo su ye ne sor.”

³⁷“Nin ki ye yi gum ibit nde, subere Yefun Allah yo ki nin gum ibit dom nde. Nin ki nai ye yi do ‘Nan dakai bi sukibit kem pe mo nan,’ bere siri ré, nin ki sane nde, wo nin do ki sane it yo, bere Yefun Allah waii ki nai nin do, nin bi sukibit kem pe mo nin dom ré. Nin maskwa ye yi mo sukibit gato yé ne ben nai nin nde, nin nutbot o nde, subere Yefun Allah yo nutbot sukibit gato nin ben ne dom nde.

³⁸Nin syo suk nai ye yi, sane bere Yefun Allah waii syo suk nai nin dom. Yé do ndek suk mo nin yo, nin syo wokgan nde, wo nin syo suk wai kadit yé ne ndek mo nin ne. Nin do ben sane it yo, bere Yefun Allah syo suk mwa nai nin, An syo suk mwa wai kadit suk gato nin mitmo ne. Nin bariwa ós ye yi yo, bere Yefun Allah waii bariwa ós nin. Nin syo suk mwa wa ós ye yi yo, bere Yefun Allah waii syo suk mwa nai nin.”

³⁹Orge Yefun Yesus gwat sukamno sare do, “Ye gato gro ndu gwat ye yi gato gro ndu bot os sa u ne? Ye gato gro ndu gwat ye yi gato gro ndu bot os yo, bere an we ne sino ges mo bur wak fe!

⁴⁰Ye gato farkor yo jam suk wai kadit an bi yeguru nde. Yeguru duno ye ne sisu ndo yo, bere ye gato farkor ne ben an bi suk-i tepsu an bi yeguru ben an bi suk-i ne, bere ye gato farkor jam suk tepsu an bi yeguru ne.

⁴¹Suma ben anato nin ki nin bi nji mo sukkwik wokgan mo an gro-i, sarewo nin misyar kwemuk gato yawa nin gro-i ne?

⁴²Nin ki nai nin bi nji do, ‘Pa nji, ji kwa sukkwik kadit nan gro et.’ Sarewo kwemuk gato yawa nin dakai gro-i ne nin yo me nde wa suma ne? Nin tepsu ye gato ki suk su nin syokwet wik ko ré go! Nin nai kwemuk ne wé kadit nin dakai gro-i et, subere nin gro-i rer, orete nin kwa sukkwik ne wé kadit nin bi nji gro-i ne.”

⁴³“Kwe gato kom ndo, bere yo bo ibit nde. Sane dom kwe gato kom ibit, bere yo bo ndo nde.

⁴⁴Kwe mwa ne sino gato kom mo bur re, men jam kwe ne ke kadit i-bo gato kom mo kwe ne. Kwe gato jak mwa mó, bere yo bo sato ara bo nde. Es damen yo bo sato anggur bo nde.

⁴⁵Men yetu tepsu kwe mwa ne dom. Ye gato mit si onyar kwo ndo, ye ne tepsu kwe gato kom ndo. Sane kadit sukndo mwa gato an sum mo an mit ne, suk gato an ki ne ndo dom. Wo ye gato mit si onyar ibit, ye ne tepsu kwe gato kom ibit. Kadit sukibit mwa gato an sum mo an mit ne, suk gato an ki ne ibit dom ré. Suk gato men ki ne bere syesyar kadit men mit si men onyar fe!”

⁴⁶“Nin ki nai Ji do, ‘Yenggras, Nan anato men bi Yekwesu,’ sarewo nin yo benbot suk gato Ji ki ne nde wa suma ne?

⁴⁷Ye gato ma mo Ji, ete jammo Ji bi sukdu-i, orete benbot sukdu ne yo, ye ne be an bi suk-i tepsu nje mo sukamno re:

⁴⁸Ye ne anato tepsu ye gato jam suk, ete an nggo an bi nu mo jok. An rom bur wak kru mu kom mo jok mo bur, ete an syut kwedi mo jok gato krat mone. Nu ne an nggo krat mo jok, sane syur syé do ma pet mo nu ne yo, nu ne yo e nde.

⁴⁹Sarewo ye gato jam sukdu gato Ji ki re, ete an yo benbot nde yo, ye ne tepsu ye gato jam nde suk, ete an nggo an bi nu mo bur sor ré, nu ne yo krat nde. Sane syur syé do ma pet mo nu ne yo, nu ne e gwa mo bur sor, ete syur gu mu ré, nu ne ibit or ré.”