Read Abun Lukas 8 Bible Online

Lukas 8 - Abun bible

Lukas 8

¹Orge Yefun Yesus mu kadit pe ne sa, Yefun Yesus mubot kampung si kota bok yo mone, Yefun Yesus ki sukdu subot os ndo gato Yefun Allah fro wa nai men yetu gum sok mo An bi rus-i, ete An tepsu men bi Yekwesu mone. Yefun Yesus mu saresa, An bi pakon ge musyu dik sop we si An mu sino.

²Nggon ge bok yo si Yefun Yesus mu sino dom. Nggon ge bok ne Yefun Yesus ben ge kadit bi suki, Yefun Yesus syun semda wé kadit ré. Nggon ge bok ne, dik yo gum do Maria gato bi nat mo Magdala. Yefun Yesus syun semda ge mufit wé kadit Maria ne.

³Nggon dik yo o gum do Yohana. Yohana bi ya gato Khuza, an gum yekwesu wa ye gato ben suk mo Herodes bi nu. Nggon dik yo o gum do Susana si nggon bok yo o dom, án sino sisu Yefun Yesus. Nggon ge bok ne gwat bi sugum wa ós Yefun Yesus si bi pakon mo suk gato án yémo. Nggon ne dakai ós sor.

⁴Yé mwa mu kadit peyo-peyo ma mo Yefun Yesus. Yé mwa ne sum wairi wa An sa, Yefun Yesus gwat sukamno dik yo sare do:

⁵“Wam dik yo, yetu ge dik yo mu am mbet gro mo bi nggwe. An do am mbet gro mo nggwe sa, deyo ges mo os. Mbet gro ges mo os ne sa, yé muket os ne, yé yakos mbet gro ne, ete ndam ma git or ré.

⁶An do am mbet gro sa, mbet gro deyo o ges mo bur ka gato jok mwa. Mbet nggwar kom mo bur ka ne sa, bergan mbet nggwar te ré, we bur ka ne sá teker.

⁷An am mbet gro deyo ges mo jak miten sa, jak si mbet ne kom sino, orge jak ne ben mbet yo kom ndo nde.

⁸Sarewo an am mbet gro ne o sa, mbet gro deyo ges mo bur ka gato ndo, sane mbet ne kom sisu ndo ete ri ma mbet bo mwa wai o ré, sato ye ne jan mbet gro dik, i-bo kom mo bo wotin dik.” Yefun Yesus gwat sukamno ne or sa, Yefun Yesus ki nai nje mone do, “Sane nin brek nin dabe muya-muma kadit nde, wo nin jammo sukdu ne et!”

⁹Yefun Yesus bi pakon ndo mo Yefun Yesus do, “Nan ki rer subot sukamno ne et, men yo jam ri nde tó.”

¹⁰Sane Yefun Yesus ki nai An bi pakon do, “Sukdu gato Yefun Allah gurik suga nyim subot os gato bere Yefun Allah fro wa yetu sok mo An bi rus-i ne, Yefun Allah tarubot Ji, subere Ji ki rer wa nin dakai jam kom mo mit. Sarewo ye yi neya yo jam sukdu ne rer kom mo mit nde tó. Ji duno án su sukamno sor, subere án da me sare, án yo me rer kom mo koirut nde; án da jam sare, án yo jam sukdu ne rer kom mo mit nde.”

¹¹“Sukamno subot ye gato am mbet gro ne bi sukjimnut mó, sare do: mbet gro anato tepsu Yefun Allah bi sukdu.

¹²Mbet gro gato ges mo os mit ne anato tepsu yé gato jam Yefun Allah bi sukdu ne, sarewo biris bi yekwesu ma nai sukdu ne wé kadit án mit or ré, subere án yo jammo Yefun bi sukdu ne nde. Sane án yo ku os wa án kem ndo to kapyo mato kapyo nde.

¹³Mbet gro gato ges mo bur ka gato jok mwa ne anato tepsu yé gato jam Yefun bi sukdu ne ete án nai Yefun bi sukdu ne mo án mit. Diksim án iwa, sarewo sukdu ne yo kem pe mo án mit nde, tepsu mbet gro ne i-brot yo kom mo jok nde. Diksim án jammo sukdu ne, sarewo bergan sor suk yo do tik án mit wa án ges mo os ibit yo, án misyar sukdu ne or ré.

¹⁴Mbet gro gato ges mo jak miten anato tepsu yé gato but sukdu ne, sarewo án bi sukjimnut sye mo suk mwa mo bur re, án jimnotbot suk mwa gato men yetu yémo sato sugit e san e su gum e ne. Án iwa ku suk mwa, án meret suk gato ben án mit iwa sor ré, Sukdu ne yo kom ndo mo án mit o nde, án yo ben suk tepsu sukdu ne nde. Sane án tepsu mbet gro mo jak mit ne, i-bo yo mo nde.

¹⁵Mbet gro gato ges mo bur ka gato ndo anato tepsu yé gato but sukdu ne, ete án jom pe mo án mit. Yé ne onyar kwo, án bi sukjimnut ndo. Án jamwa sukdu ne pe sane wade án bek suk gato ndo. Sane sukndo gato án ben ne tepsu mbet gro gato kom wade i-bo mwa wai o ré.”

¹⁶“Men ndum kak it yo, men grem suk yo wa nde, men grem mo bokor desnak nde, men grem mo kwatka desnak dom nde. Wo men grem sukru ne mo pe gato kok, subere ye gato sok mo nu mit yo, sukru rer ku án mone.

¹⁷Yefun Allah jam suk mwa ne sino, sane suk gato yé gurik su re, ri ma bere bor wa yé mwa jam rer, suk gato ye dumik wa yu waré, bere yé mwa jam or ré.

¹⁸Sane, Yefun Allah bi sukdu gato nin syaretwa ne, nin nutbot sisu ndo et. Ye to bi sukjimnut kak, bere jam Yefun Allah bi sukdu mwa wai o ré, sane bere an jam sukdu ne kom mo mit ré. Sarewo ye to da jam sukwokgan, ete an misyar, sukwokgan gato an jam ne, bere suk ne ges or wé kadit an ré.”

¹⁹Or o Yefun Yesus bi im si An bi nji ma wa ku An, sarewo án yo bi os wa án ma karowa Yefun Yesus nde, we yé mwa mone buk mo yu teker ware.

²⁰Sane yetu ge dik yo ki nai Yefun Yesus do, “Nan bi im si Nan bi nji ti mo nden, án iwa ku Nan.”

²¹Sarewo Yefun Yesus ki nai yé mwa mone do, “Ye to jammo Yefun Allah bi sukdu ete benbot sukdu ne yo, ye ne anato tepsu Ji bi im e, Ji bi nji si Ji bi nyanggon e ne.”

²²Kam dik yo Yefun Yesus si An bi pakon mo em de, ete Yefun Yesus ki nai An bi pakon do, “Men it mo kwem, men mu mo em deta et.” Sane, Yefun Yesus si An bi pakon it mo kwem gato nor mone, ete án mu sino.

²³Án bi win saresa, Yefun Yesus sem ré. Sugane nofuf sye is ma ben em nap sok mo kwem mit, bergan kwem mit ne ses su em rom, karowa kwem kru it.

²⁴Sane Yefun Yesus bi pakon sun An, ete pakon ne ki do, “Yeguru, bergan kwem kru su men it anare.” Yefun Yesus sun, ete An syogat nofuf gato kas nggi ne not, An syogat em nap gato sye ne kro. Yefun Yesus do ndantom nofuf si em nap ne sa, nofuf yo kas o nde, em nap ne dom kro ré, em ne kro or ré.

²⁵Orge Yefun Yesus ki nai An bi pakon do, “Nin yo onyar kem ri mo Ji nde tó wa suma ne?” Pakon bok ne sino yeket suk gato Yefun Yesus ben ne. Pakon ne kwabom kro, ete án ki nai yu do, “Mban! Je u ana re ne? An syogat nofuf si em nap, ete nofuf si em nap ne jammo An ré.”

²⁶Yefun Yesus si An bi pakon bi win saresa, án mu kom mo bur Gerasa mo em Galilea deta.

²⁷Án nor mone, Yefun Yesus is kadit kwem mu nden sa, yebris dik yo gato semda ben ne, an ma mo Yefun Yesus. Ye ne bi nat-i mo kota mo bur ne. Nam it, semda ben an, sane an yo it san yo mo nde. An bariwa an kem mo nu, wo an kem mo jokwak mo makwe sor.

²⁸Yesemda re me Yefun Yesus sa, an saiye, an bare nggwa mo Yefun Yesus gwem, ete an saiye nggi do, “Yesus, Yefun Allah gato gum kok sye wai ne bi Gan, Nan ma ku ji wa suma ne? Ji ndek mo nan do, Nan ben sukye nai ji nde.”

²⁹Yesemda ne ki sukdu ne, we Yefun Yesus ki nai ye ne nyim wé do, “Semda, nan sombok kadit ye re se!” Sagana semda ben yebris ne, yé da rai yesemda ne gwes si syim su rantai wam bok yo mó ré, yé da mewa an dom ré, sarewo rantai bok ne an toko wé, orete semda ben an mu mo pe gato nje yo kem mo nde.

³⁰Orete Yefun Yesus ndo mo semda ne do, “Nan gum sa u ne?” Semda ne ki do, “Ji gum do Legiun,” we semda mwa bok nggwa mo ye ne it. {Legiun bi sukjimnut do yesukmise mwa yé ré, ge ribu dik wai.}

³¹Semda mwa ne ndek gat Yefun Yesus subere Yefun Yesus syun án mu ngga mo kwoye sye gato mo bur desnak ne nde.

³²Karowa pe ne jot yaino, jot mwa yé ré git sugit mo bobuk de. Sane semda mwa ne dek gat Yefun Yesus do, “Nan imo yo, Nan syogat men mu bok nggwa mo jot yaino ne et.” Yefun Yesus imo sukdu gato semda ki ne.

³³Sane semda mwa ne sombok wé kadit yebris ne, orete semda mu bok nggwa mo jot mwa ne. Semda ben jot mwa ne sa, jot mwa ne sino kas ket kwoye mu ges ngga mo em mit, ete jot mwa ne mbon or sino.

³⁴Yetu ge bok yo gato mewa jot ne, án me jot mwa ne mbon sa, án titi mu ki sukdu ne frekbot nje mo kota si nat bok yo gato karowa mone.

³⁵Sane yé mwa ma wa me suk gato bor mone. Yé mwa do mu kom mone sa, án me yebris gato semda mwa sombok wé kadit ré. Yebris ne kem mo Yefun Yesus gwem. Ye ne it san, an yo kawarun o nde, an bi sukjimnut dom ndo satu ré. Sane yé mwa ne nyu ndo nde.

³⁶Yé bok yo gato me suk gato Yefun Yesus ben nai ye gato semda ben ne anato semda sombok wé kadit ye ne, yé bok ne nuk subot suk gato án me bor mone nai yé mwa gato ma ne.

³⁷Orge yé mwa ne sino gato kem mo bur Gerasa ne ndek mo Yefun Yesus do, Yefun Yesus mu kadit án bi bur-i et, we yé mwa ne nyu ndo nde. Sane Yefun Yesus it mo kwem, subere An si An bi pakon mu kadit nat ne.

³⁸Yefun Yesus yo mu nde tó, yebris gato semda sombok wé kadit ne, an ndek gat Yefun Yesus do, “Ji si dom.” Sarewo Yefun Yesus syogat an mu. Yefun Yesus ki nai an do,

³⁹“Nan satu mu mo nan bi nu, ete nan kibot suk mwa gato Yefun Allah ben wa nan ne.” Sane yebris gato semda ben ne, an mu kadit pe ne ré. An satu mu mo an bi kota sa, an nukbot suk gato Yefun Yesus ben wa an ne. An ki sukdu ne frekbot nje mwa gato kem mone sino.

⁴⁰Orge yedun Yesu satu ma mo em de ne o sa, yé mwa iwa ma ku Yefun Yesus, we yé mwa ne eswa Yefun Yesus satu ma mone.

⁴¹Sugane yetu ge dik yo gato gum do Yairus ma mo Yefun Yesus. Yairus re an yesu ge dik yo mo ye Yahudi bi nu ari, Yairus ma mone sa, an bare nggwa mo Yefun Yesus gwem, ete an ndek gat Yefun Yesus do, “Yenggras, Nan si ji mu mo ji bi nu et.”

⁴²Yairus ndekwa Yefun Yesus ma mo an bi nu, we Yairus bi mam i, bergan mom kwop rok. Yairus bi mam ne ge dik sor, mom kaim sa kom mo tahun musyu dik sop we. Sane Yefun Yesus mubot os mu mo Jairus bi nu saresa, yé mwa ne kamas buk mo yu kadit os deyo-deyo, yé mwa ne buk mo yu gat Yefun Yesus mone.

⁴³Nggon ge dik yo gato fo sor kom mo tahun musyu dik sop we ma si yé mwa mone dom. Nggon ne syo mom bi suk mwa ne or nai dokter bok yo ware, nggon ne yo ge mo nde.

⁴⁴Nggon ne mu karowa Yefun Yesus kadit Yefun Yesus de dari, ete mom rot Yefun Yesus bi san nap. Nggon ne do rot Yefun Yesus bi san nap ne sa, nggon ne fo or it anane.

⁴⁵Yefun Yesus ndo mo yé mwa mone do, “Je u anato rot Ji ne?” Yé mwa mone rewa ré, án ki do, “Asyi, ji jam nde.” Orete Petrus ki nai Yefun Yesus do, “Yenggras, yé mwa re buk mo yu gat Nan, sane men jam nde.”

⁴⁶Sarewo Yefun Yesus ki do, “Yetu ge dik yo rot Ji, we Ji jam do, Ji bi suktinggi syesyar kadit Ji kaim it.”

⁴⁷Nggon ne jam do, Yefun Yesus jamwa ré. Sane, nggon ne kwabom kro, mom ma mo Yefun Yesus, mom tetet, mom bare nggwa mo Yefun Yesus gwem. Mo yé mwa miten, nggon ne nukbot suk gato ben mom anato mom rot Yefun Yesus bi san nap ne. Nggon ne ki do, mom do rot Yefun Yesus bi san nap sa, sugane it mom jam nde suki gato ben mom ne or ré, mom ge satu ré.

⁴⁸Orete Yefun Yesus ki nai nggon ne do, “Pa donggon, nan onyar kem mo Ji, anato nan ge ré. Nan mu, nan kem not sor.”

⁴⁹Yefun Yesus ki suk su nggon ne saresa, yetu ge dik yo ma kadit Yairus bi nu, Yairus gato yesu mo ye Yahudi bi nu ari mone. Ye ne ki nai Yairus do, “Nan bi mam kwop ré. Nan syimfar yenggras mu mo nan bi nu o nde.”

⁵⁰Yefun Yesus jam sukdu gato ye ne ki ne sa, Yefun Yesus ki nai Yairus do, “Nan nyu nde, nan onyar kem mo Ji sor, bere nan bi mam ge ré.”

⁵¹Yefun Yesus mu kom mo Yairus bi nu sa, Yefun Yesus ki nai yé mwa mone do, “Nin kem mo nden, nin sok mo nu mit su men nde.” Yefun Yesus si bi pakon ka gri gato Petrus, Yohanes si Yakobus, si pa gato kwop ne bi im si bi si anato sok mo nu mit sor ré.

⁵²Yé mwa mone wo, án nderbot pa ne. Yefun Yesus ki nai yé ne do, “Nin wo nde, pa yo kwop nde ré, wo pa sem sor ré.”

⁵³Sarewo yé mwa mone sa Yefun Yesus, we yé nwa ne jam do pa donggon ne kwop ré.

⁵⁴Yefun Yesus sok mo nu mit, orete Yefun Yesus jom pa ne syim, ete Yefun Yesus ki do, “Pa dongon nan sun tom!”

⁵⁵Yefun Yesus do ki nai pa donggon, ne sa, pa donggon ne gen satu ma, ete pa donggon ne mbau satu it anane. Sugane it pa ne sun. Yefun Yesus syogat pa bi im si pa bi ai syo sugit nai pa ne git.

⁵⁶Pa bi im si pa bi ai yeket ndo nde, sarewo Yefun Yesus duyawa pa bi im si pa bi ai do, án we kibot suk gato bor ne nai ye yi jam nde.