Read Abun Yohanes 1 Bible Online

Yohanes 1 - Abun bible

Yohanes 1

¹Ji krom sukdu subot Yefun Yesus gato ye kendo do Sukdu, An Ye gato ki Yefun Allah bi suktaru nai men yetu jam. Suga ketke bur re yo mo nde tó, Sukdu ne mó ré. Sukdu ne anato tepsu Suktaru kadit Yefun Allah. Sukdu ne sisu Yefun Allah dom. Sukdu ne anato Yefun Allah dakai.

²Kadit ketke Sukdu ne si Yefun Allah mó.

³Yefun Allah ut suk mwa ne sino, su Yefun Yesus gato ye kendo do Sukdu ne. Sukdu do yo mo nde yo, Yefun Allah yo ut suk mo gu nim si bur re mo nde.

⁴Sukdu ne ben suk mwa ne sino mbau. Yetu mbau mo An, anato rer ku nje mo bur re.

⁵Rer ku pe gato ndendu mó. Ndendu yo nggiwa ben rer yo ku ndendu nde.

⁶Yefun Allah syogat yetu ge dik yo ma ki Yefun bi suktaru. Ye ne gum do Yohanes.

⁷An ma ki sukdu frek subot rer gato ku nje mo bur re nai men yetu jam. Yefun Allah syogat Yohanes ma ki bi suktaru subere yé mwa ne sino jam ete onyar kem mó.

⁸Yohanes dakai yo tepsu rer ne nde. An ma wa an ki subot rer ne nai nje jam sor ré.

⁹Ye gato rer sangge kai ne, ma mo bur re, subere rer ne ku yé mwa mo bur re sino.

¹⁰Ye gato rer sange kai ma mo bur re, su ketke Yefun Allah ut bur re su An, sarewo nje mo bur re yo jam nde An ré.

¹¹An ma mo An dakai bi nat-i sarewo An bi yetuge-i bariwa An.

¹²Sarewo ye to kak mit wa An ma ete onyar kem mo An sa, Yefun Allah bes ye ne gum tepsu Yefun Allah bi pa-i.

¹³Ye gato gum tepsu Yefun Allah bi pa-i ne, yetu anato kra yu, ete kem su nde. Pa ne yo ma kadit yetu nde, wo pa ma kadit os gato Yefun Allah dakai fro ne.

¹⁴Sukdu ne ma mo bur re ka tepsu yetu ré. An ma si men kem mo bur re sino. An ben sukndo mwa yé su men dakai yi. An kadum Yefun Allah wa men jam sisu sangge. Men dakai me su men gro do, An gum kok sye wai o ré. Yefun Allah anato An bi Ai, Yefun Allah bi Gan ge dik ne sor ré, anato Yefun Allah bes An gum kok sye wai. {An anato Yefun Yesus.}

¹⁵Yohanes ki rer subot Yefun Yesus. Yohanes ki sye do, “Ye gato ji kibot nai nin anare it. Ye re ma nyim kadit ji ré. Sarewo An gum kok sye wai kadit ji, we ji bi im yo pe ji nde tó, An mó ré.”

¹⁶Yefun Allah bi sukjimnut sye kas subot men petok sor. Yefun Allah syo suk mwa nai men dakai yi, An ben sukndo su men mo suk mwa ne sino.

¹⁷Kam nyim tuya Yefun Allah taru An bi sukduno subot Musa, subere An kadum os wa ye Yahudi sok mo An bi rus-i. Sarewo gabere Yefun Allah syogat Yesus Kristus ma mo bur re anato me jam Yefun Allah bi os-i sisu sangge. Yefun Allah ben sukndo su men dakai yi anato men me os ne bor mo suk gato Yesus Kristus ben ne.

¹⁸Yetu yo ku Yefun Allah yo mo nde, wo Yefun Allah dakai bi Gan ge dik ne sor ete sisu Yefun Allah. Yesus Kristus si An bi Ai ben suk tepsu dik. Yesus Kristus anato kadum An bi Ai nai men yetu jam ré.

¹⁹Ye Yahudi bi yepasye mo Yerusalem syogat yesu gato ben suk mo Yefun Allah bi nu si ye Lewi mu ndo mo Yohanes do, “Je u anato nan re ne?” Sane Yohanes ki an bi sukdu-i rer is án jam.

²⁰An ki rer, an yo rewa nde, an ki ri-roi sor, sare do, “Ji anato Kristus nde, Ji anato Yekwesu gato Yefun Allah syogat ma mo bur re wa nai men yetu kadit sukye ete jowa men ne nde.”

²¹Yesu mo Yefun Allah bi nu si ye Lewi ndo mo Yohanes o do, “Je u anato nan re ne? Nan anato yenabi Elia bado?” Yohanes ki do, “Nde ré.” Ete án ndo mo Yohanes o do, “Sane Nan tepsu yenabi gato gwat Yefun Allah bi suktaru ma ós men yé Yahudi bado?” Yohanes ki do, “Nde ré.”

²²Eteyo yesu si ye Lewi ne ndo mo Yohanes o do, “Je u anato Nan re ne? Nan ki rer subot Nan dakai et, subere men ki sukdu satu nai yepasye gato syogat men ma ne. Nan ki subot nan dakai sa u ne?”

²³Yohanes ki sukdu gato yenabi Yesaya krom suga nyim sare do, “Ji anato ye gato saiye mo pe gato kwe yo kom mo nde do, ‘Men duk os wa men bi Yekwesu muket se!’ ”

²⁴Yé gato ye Farisi syogat ma wa ndo mo Yohanes ne,

²⁵án ndo mo Yohanes o do, “Nan ki do, nan anato Kristus nde, nan anato Elia nde, nan anato yenabi gato ós men ye Yahudi nde. Ben sa u anato nan ras nje mo syur ne?”

²⁶Yohanes ki nai án do, “Ji anato ras nin mo syur sor ré. Sarewo Yetu ge dik yo o ma si nin kem more sino mó ré, wo nin jam nde An ré.

²⁷Ye ne anato ma boribot ji, sarewo An gum kok sye wai kadit ji. Sane ji iwa ben suk wa An yo, bere ji yo tepsu nde, ji gum wok teker mu bur ware. Bere ji gum yo tep wa ji sombok jamtu mo An bi sepatu dom nde.”

²⁸Yohanes ki sukdu ne mo Betania, mo Syur Yordan de nim, mo pe gato an ras nje mone.

²⁹Bi ik, ete Yohanes me Yefun Yesus ma mo an. Orete Yohanes ki do, “Nin me Ye re. An anato tepsu Domba Gan gato Yefun Allah syogat ma mo bur re wa tot suktot mo sukibit gato men ben ne wé.

³⁰Ji ki sukdu subot Domba Gan ne napyo nai nin jam mó ré, sare do, ‘Yetu ge dik yo boribot ji, sarewo An gum kok sye wai kadit ji o ré, we suga ji bi im yo pe ji nde tó, An mó ré.’

³¹Ji dakai jam nde An. Sarewo ji ma wa ji ras nje mo syur subere ji kadum An nai ye Israel jam.”

³²Yohanes kibot suk gato an me su an gro sare do, “Ji me Yefun Allah Gen is kadit gu ma bur. Yefun Allah Gen is ma su kaim sato ndabu ete tom mo An.

³³Nyim ne, ji dakai jam An nde tó, sarewo Yefun Allah gato syokom ji ras nje mo syur ki nai ji suga nyim tuya wé ré do, ‘Bere nan me Yefun Allah Gen is kadit gu ma bur ete tom mo yetu ge dik it yo, Ye ne anato bere ras yetu mo Yefun Allah Gen.’

³⁴Ji dakai me suk ne bor su ji gro mó ré. Sane ji ki rer wa yé mwa ne sino jam do, Ye ne anato Yefun Allah bi Gan.”

³⁵Bi ik o, Yohanes si bi pakon ge we yo kem mo nat ne.

³⁶Orete Yohanes me Yefun Yesus mu waiket an ka gri saresa, Yohanes ki do, “Nin ka we me Ye gare et. An anato tepsu Yefun Allah bi Domba Gan.”

³⁷Yohanes bi pakon ge we ne jam sukdu ne sa, an we simo Yefun Yesus mu.

³⁸Yefun Yesus brek, sokme an we ma bori sa, Yefun Yesus ndo mo an we do, “Nin ka we syeret suma ne?” An we ki do, “Rabi, nan kem mo u ne?” (Rabi bi sukjimnut do ‘yeguru’.)

³⁹Yefun Yesus ki nai an we do, “Nin ka we ma, nin me et.” Ete an we ne sisu Yefun Yesus mu sino me nat gato Yefun Yesus kem mó. Sugane kre it, jam at bayok, ete pa we si Yefun Yesus kem mone sino sor kom mo noru, ete an we mu kadit.

⁴⁰Pa we gato jam Yohanes ki sukdu, ete simo Yefun Yesus, ge dik yo gum do Andreas, gato Simon Petrus bi nji.

⁴¹Andreas mu kamas wa meret an bi nji Simon. An ku Simon, ete an ki nai Simon do, “Men ku Mesias it.” (Mesias, a Ibrani anane, wo ye brek su a Yunani bi sukjimnut do, ‘Kristus,’ gato bi sukjimnut do, Ye gato Yefun Allah syogat ma mo bur re wa nai men yetu kadit sukye, ete jowa men.)

⁴²Andreas mu kar Simon ma mo Yefun Yesus. Yefun Yesus sokwa Simon, ete ki nai an do, “Nan gum do Simon, gato Yohanes bi pa. Bere yé kendo nan gum do Kefas.” (Kefas, a Ibrani anane, wo ye brek su a Yunani bi sukjimnut do, Petrus. Kefas si Petrus bi sukjimnut dik do, “jok.”)

⁴³Bi ik, ete Yefun Yesus bi sukjimnut do, An mu mo bur Galilea. Yefun Yesus yo mu nde tó, An ku Filipus ete Yefun Yesus ki nai Filipus do, “Nan simo Ji et!”

⁴⁴Filipus ontu mo Betsaida, kota gato Andreas si Petrus kem mó.

⁴⁵Filipus mu ku yetu ge dik yo o gato gum do Natanael, ete Filipus ki nai Natanael do, “Men ku Ye gato kam nyim tuya Musa krombot mo Yefun bi sukduno ne ré. Men ku Ye gato yenabi dom krombot ne ré. An anato Yusuf bi pa gato gum do Yesus. An ma kadit kota Nazaret.”

⁴⁶Natanael ki nai Filipus do, “Mban! Ye gato ben sukndo mo kota Nazaret ne mó e?” Filipus ki do, “Nan ma nan me et!”

⁴⁷Yefun Yesus me Natanael ma ku An sa, An kibot Natanael do, “Ye Israel gato sangge anato ma re. Ye re yo kidar suk yo mo nde.”

⁴⁸Natanael ndo mo Yefun Yesus do, “Ben sa u anato Nan jam ji ne?” Yefun Yesus ki do, “Filipus yo kendo nan mu nde tó, nan kem mo kwe ara ke ne sa, ji me nan ré.”

⁴⁹Natanael ki do, “Yeguru, Nan anato Yefun Allah bi Gan, sangge, Nan anato ye Israel bi Yekwesu.”

⁵⁰Yefun Yesus ki do, “Ji ki nai nan do, ‘Ji me nan mo kwe ara ke mó ré,’ anato nan onyar kem mo Ji bado? Bere nan me suk gato sye wai kadit suk gato Ji ki ne bor o ré.”

⁵¹Ete Yefun Yesus ki do, “Suk gato Ji ki re suksangge anare, bere nan me gu kak, ete Yefun Allah bi malaikat is ma mo Ji, gato Yetu bi Pa, ete it mu satu o.”