Read Abun Yohanes 13 Bible Online

Yohanes 13 - Abun bible

Yohanes 13

¹Karowa Kam Sye Waiket sa, Yefun Yesus jam do, bergan An mu kadit bur re, An satu mu mo An bi Ai. An bi sukjimnut sye kas subot yé gato sok mo An bi rus-i mo bur re. Yefun Yesus jimnotbot An bi rus-i ndo nde, An kadum An bi sukjimnut ne bor ré.

²Bi noru, ete Yefun Yesus si bi pakon git sugit sino sa, biris bi yekwesu sok an bi sukjimnut-i mo Yudas do, bere Yudas meret os wa gwat yeko ma wa but Yefun Yesus. Yudas gato Simon Iskariot bi pa anato tepsu yeketut.

³Yefun Yesus jam do, An bi Ai syo suk mwa ne sino nai An wa An jom. Sane dom, Yefun Yesus jam do, An ma kadit Yefun Allah, ete bere An satu mu mo Yefun Allah o.

⁴Sane Yefun Yesus ti ma nim. Yefun Yesus jogru An bi san gato tak An de nden ne wé, ete An far san det mo An jakuke.

⁵Orete Yefun Yesus nai syur, ete An syé syur mo bokor mit. Yefun Yesus mus An bi pakon gwes tak su syur ne, orete An singgri sa su san det gato An far mo An jakuke ne.

⁶Yefun Yesus fro wa mus Simon Petrus gwes sa, Petrus ndo mo Yefun Yesus do, “Yenggras, Nan iwa Nan mus ji gwes tak wa suma ne?”

⁷Yefun Yesus ki nai an do, “Su re nan jam suk gato Ji ben kom mo mit nde tó, wo bere nan jam mone tó.”

⁸Petrus ki do, “Nan mus ji gwes nde. Ji bariwa sangge kai.” Yefun Yesus ki nai Petrus do, “Ji yo mus nan gwes nde yo, nan si Ji yo tepsu dik nde.”

⁹Petrus ki do, “Sane yo, Yenggras, Nan mus ji gwes sor nde, wo Nan mus ji syim si ji su dom et.”

¹⁰Yefun Yesus ki nai Petrus do, “Ye gato de syur yo, an kaim yo dum o nde, wo an gwes tak sor ete dum. Sane an de syur o nde, wo an mus an gwes tak sor ré. Sane dom, nin kaim kwo ré, sarewo nin sino kaim kwo nde ré.” (

¹¹Yefun Yesus jam An bi pakon dik yo gato bere meret os wa gwat yeko ma wa but An ré. Sane anato Yefun Yesus ki do, “Nin kaim kwo ré, sarewo nin sino kaim yo kwo nde ré.”)

¹²Yefun Yesus mus An bi pakon gwes or sa, Yefun Yesus it An bi san gato tak An kaim de nden ne satu o. Yefun Yesus satu mo nat gado An kem mone o. An ndo mo An bi pakon do, “Nin jam suk gato Ji ben ne bi sukjimnut-i bado?

¹³Nin ki Ji gum do, Yeguru, nin bi Yekwesu. Suk gato nin ki ne ndo, we sangge, Ji anato nin bi Yeguru, Ji anato nin bi Yekwesu.

¹⁴Sane Ji gato gum Yeguru, Ji gato nin bi Yekwesu ne mus nin gwes tak sane yo, nin deyo waii mus nin deyo gwes tak sane o.

¹⁵Ji kadum os gato ndo nai nin wa nin muket. Sane yo suk gato Ji ben wa nin, nin waii ben tepsu Ji ben ne.

¹⁶Suk gato Ji ki re suksangge anare, pakwerut yo sye wai kadit bi yenggras gato kon an nde. Sane dom, ye gato gwat yepasye bi suktaru, an gum sye wai kadit ye gato syogat an mu ne nde.

¹⁷Nin jam suk mwa ne sino gato Ji duno nin su ne it. Nin do benbot yo, bere nin mit at wa.

¹⁸Suk gato Ji ki re, Ji ki wa nin sino nde. Yé gato Ji fro wa ben suk wa Ji, Ji jam án kom mo mit. Sarewo yetu ge dik sor ré, sukdu gato yé krom nyim mo Yefun Allah bi sukdu bere bor ré. Sukdu ne sangge. Mo Yefun bi sukdu, yé krom sare do, ‘Ye gato si Ji git sugit sino, an gro ete me Ji, wo an mit tara ré, bere an ben sukibit su Ji.’

¹⁹Suk ne yo bor nde tó, Ji ki napyo nai nin jam nyim wé ré, subere suk ne do bor it yo, nin jam do, Ji anato Ye gato gesyos, gato Ji bi Ai syogat ma mo bur re.

²⁰Suk gato Ji ki re suksangge anare, ye gato iwa Ji bi pakon gato Ji syogat mu ne ma ku an yo, tepsu ye ne iwa Ji ma ku an anane. Ye gato iwa Ji ma ku an yo, tepsu ye ne iwa Ye gato syogat Ji ma mo bur re ma ku an dom anane.”

²¹Yefun Yesus ki sukdu ne or sa, Yefun Yesus kwabom dek teker, ete Yefun Yesus ki rer nai An bi pakon jam do, “Suk gato Ji ki re suksangge anare, kadit nin re, bere nin ge dik yo meret os wa gwat yeko ma wa but Ji.”

²²Sane Yefun Yesus bi pakon sokbot yu. Án sino nalar mo suk gato Yefun Yesus ki ne.

²³Yefun Yesus bi pakon ge dik yo kem karowa Yefun Yesus de. Yefun Yesus bi sukjimnut sye kas subot pakon ne. {Pakon ne anato Yohanes gato krom sukdu re.}

²⁴Simon Petrus gwi an su nai an bi yesyim ne, ete Petrus ndo mo an do, “Nan ndo mo Yefun Yesus do, An kibot je u ne?”

²⁵Pakon ne sis o karowa Yefun Yesus de. Ete pa ne ndo mo Yefun Yesus do, “Yenggras, Nan ki sukdu ne subot je u ne?”

²⁶Yefun Yesus ki do, “Ji ras roti nap mo sukrom, ete ye gato Ji syo roti nap ne nai yo, ye gane anae it.” Sane Yefun Yesus nai roti napyo, An ras mo sukrom, ete An syo nai Yudas gato Simon Iskariot bi pa ne.

²⁷Yudas nai roti ne, sugane it biris bi yekwesu bok nggwa mo Yudas ré. Orete Yefun Yesus ki nai Yudas do, “Nan ben nan bi suk-i kekro et.”

²⁸Pakon yi gato kem sino mone jam suk gato Yefun Yesus ki nai Yudas ne bi sukjimnut-i nde.

²⁹Pakon deyo gendo, Yefun Yesus syogat Yudas so suk yo wa bere án konwa kam sye su ne, ondeyo Yudas syo suk yo nai ye gato yewa suk mo neya. Pakon jam ri nde, wo pakon nut do, Yudas mu ben suk yo su sugum, we Yudas anato jom pakon sino bi sugum.

³⁰Yudas nai roti nap gato Yefun Yesus syo nai an, sugane it, an mu mo nden. Noru it anane.

³¹Yudas mu mo nden, orete Yefun Yesus ki do, “Yé bes Yetu bi Pa gum kok sye wai it anare, sane yé bes Yefun Allah gum kok sye wai mone dom ré.

³²Yetu bi Pa do bes Yefun Allah gum kok sye wai it yo, Yefun Allah waii bes Yetu bi Pa gum kok sye wai dom. Yefun Allah do bes Yetu bi Pa gum kok yo, An yo eswa nde, wo An bes su re it.

³³Ji bi pá, Ji mu kadit nin it anare. Bere nin syeret Ji. Sarewo Ji ki sare do, tepsu gabere Ji ki nai ye Yahudi bi yepasye ne do, pe gato Ji mu mone, nin yo ku os wa nin mu mone nde.

³⁴Su re Ji duno nin su sukduno gato be sare do: Nin bi sukjimnut sye kas subot yu et. Tepsu Ji bi sukjimnut sye kas subot nin, nin waii bi nin nggwa wa yu et! Nin mewa yu et!

³⁵Nin bi sukjimnut sye kas subot yu sane it yo, bere yé mwa ne sino jam do, nin sa, nin anato Ji bi pakon ne.”

³⁶Simon Petrus ndo mo Yefun Yesus do, “Yenggras, men bi Yekwesu, Nan mu mo u ne?” Yefun Yesus ki nai Petrus do, “Pe gato Ji mu mone, su re nan si Ji mu sino nde. Kapyo tak bere nan boribot Ji.”

³⁷Simon Petrus ndo mo Yefun Yesus do, “Yenggras, men bi Yekwesu, ji si Nan mu mone su re nde wa suma ne? Ji fro wa ji bi ji nggwa kwop win Nan ré.”

³⁸Orete Yefun Yesus ki nai an do, “Sangge, nan bi nan nggwa kwop win Ji bado? Suk gato Ji ki re suksangge anare, ndam kokor yo ké nde tó, bere nan rewa Ji wam gri ré.”