Read Abun Yohanes 14 Bible Online

Yohanes 14 - Abun bible

Yohanes 14

¹Yefun Yesus ki nai An bi pakon do, “Nin kwabom dek subot suk mwa neya nde, wo nin kwabom kam mo Yefun Allah et. Nin kwabom kam mo Ji dom et!

²Mo Ji bi Ai bi nu, gumwak mwa wa nin kemmone mó ré. Sukdu ne sangge, ondesor sa, Ji yo ki nai nin jam nde. Ji mu mone wa Ji fro nat wa bere nin kem mó.

³Ji mu fro nat wa nin orete yo, Ji satu ma, ete Ji kar nin mu mo Ji bi nat-i. Bere men sino kem mone subere mo nat gato Ji kem mone, nin dom si Ji kem mone sino.

⁴Nin jam os gato mu mo nat gato bere Ji mu mone ré.”

⁵Orete Tomas ki nai Yefun Yesus do, “Yenggras, men bi Yekwesu, men jam nde nat gato Nan mu mone. Sane men jam os gato mu mone sa u nde?”

⁶Yefun Yesus ki nai an do, “Ji dakai anato tepsu os gato mu mo Yefun Allah. Ji anato tepsu os gato sangge. Ji anato kak os wa yetu kem ndo mone. Yetu yo ku os wa an mu kom mo Ji bi Ai nde, wo an sibot os gato Ji kak ne sa, bere an kom mo Ji bi Ai ré.

⁷Nin do jam Ji su sangge it yo, bere nin jam Ji bi Ai dom. Saneyo, nin jam Ji bi Ai it anare. Nin me An it anare.”

⁸Filipus ki nai Yefun Yesus do, “Yenggras, Nan kadum Nan bi Ai nai men me subere men yo nutbot o nde.”

⁹Yefun Yesus ki nai Filipus do, “Ji sisu nin nam it. Filipus, nan jam Ji yo ri nde tó bado? Ye to me Ji it yo, ye ne me Ji bi Ai dom anane it. Sane suma ben anato nan ki do, Ji kadum Ji bi Ai wa nan me ne?

¹⁰Filipus, nan nut do, sangge, Ji si Ji bi Ai tepsu dik bado nde e? Sangge, Ji dakai bi sukdu-i anane nde, wo Ji bi Ai gato si Ji tepsu dik, An anato fro suk gato Ji ki e, Ji ben e ne ré.

¹¹Sane nin onyar kem mo suk gat Ji ki re et, sangge, Ji si Ji bi Ai tepsu dik. Ondeyo, nin onyar kem mo suk gato Ji ben gato ben nje yeket ne sor, we suk ne kadum do, sangge, Ji si Ji bi Ai tepsu dik.

¹²Suk gato Ji ki re suksangge anare, ye to onyar kem mo Ji yo, an waii ben suk tepsu suk gato Ji ben ne ré. Bere an ben suk mwa wai kadit suk gato Ji ben ne, we bere Ji satu mu mo Ji bi Ai, ete Ji bi An Gen ma bok nggwa mo nin.

¹³Suk to nin ndek mo Ji bi Ai yo, nin ki Ji gum mo suk ne, bere Ji syo nai nin. Ji syo suk ne nai nin subere yé bes Ji bi Ai gum kok mo suk gato Ji syo nai nin ne.

¹⁴Suk to nin ndek mo Ji bi Ai, ete nin ki Ji gum mó yo, bere Ji syo nai nin ré.”

¹⁵“Nin bi sukjimnut sye kas subot Ji it yo, bere nin benbot suk gato Ji syogat nin ben ne sor.

¹⁶Bere Ji ndek mo Ji bi Ai subere An bi an Gen ma win Ji. An Gen ne tepsu yegweswai gato ós nin, ete sisu nin pe to kapyo mato kapyo.

¹⁷Bere Yefun Allah Gen duno nin su suk gato sangge sor. Yetu mo bur re yo ku os wa Yefun Allah Gen ós án nde, we yetu mo bu re yo me Yefun Gen nde. Yetu ne yo jam Yefun Gen dom nde. Sarewo nin sane nde, nin sa, nin jam Yefun Allah Gen, we An sisu nin pe. Bere Yefun Allah Gen ne ma bok nggwa mo nin mit dom.

¹⁸Ji yo misyar nin dakai kem yi nde, Ji yo misyar nin tepsu pa ti nde. Bere Ji satu ma wa nin tó.

¹⁹Yo nam nde ge, yetu mo bur re yo ku Ji o nde. Sarewo nin sa, bere nin ku Ji mone tó, we bere Ji mbau kadit sukkwop o ré. Sane bere nin kem gesyos dom.

²⁰Su kam gato nin kem gesyos ne it yo, bere nin jam do, Ji si Ji bi Ai tepsu dik. Sane dom bere nin jam do, nin si Ji tepsu dik sino.

²¹Ye to jammo Ji bi sukdu-i, ete benbot yo, ye ne anato bi sukjimnut sye kas subot Ji. Bere Ji bi Ai bi sukjimnut sye kas subot an. Ji dom bi sukjimnut sye kas subot an, ete Ji kadum Ji nggwa nai an.”

²²Yudas, gato Yudas Iskariot nde, wo Yudas doyi, an ndo mo Yefun Yesus do, “Yenggras, men bi Yekwesu, ben sa u anato Nan kadum Nan nggwa nai men sor ré, wo Nan yo kadum Nan nggwa nai yetu sino mo bur re nde ne?”

²³Yefun Yesus ki nai an do, “Ye to bi sukjimnut sye kas subot Ji it yo, bere ye ne benbot sukduno gato Ji duno an su ne. Bere Ji bi Ai bi sukjimnut sye kas subot an. Bere Ji si Ji bi Ai ma mo an, ete si an kem sino.

²⁴Ye to bariket Ji yo, ye ne yo benbot sukduno gato Ji duno an su ne nde. Sukdu gato Ji ki nai nin jam ne yo ma kadit Ji dakai bi sukjimnut-i nde, wo sukdu ne ma kadit Ji bi Ai gato syogat Ji ma more bi sukjimnut-i ré.

²⁵Ji kem sisu nin tó, Ji ki sukdu mwa ne nai nin jam ré.

²⁶Sarewo Yefun Allah Gen gato Ji bi Ai bere syo ma win Ji ne, bere Yefun Gen duno nin su suk mwa ne sino. Bere Yefun Gen ós nin napawa suk mwa gato Ji ki nai nin ré.

²⁷Ji syo suktinggi nai nin subere nin kwabom dek nde, wo nin kem ndo tepsu Ji dakai re. Ji syo suktinggi nai nin wa nin kem ndo. Ji yo syo suktinggi ne tepsu yetu mo bur re nde. Sane nin nutbot suk mwa teker nde, nin nyu nde.

²⁸Nin jam Ji ki do, ‘Ji mu kadit nin, sarewo bere Ji satu ma o ré.’ Nin bi sukjimnut sye kas subot Ji it yo, bere nin mit iwa Ji mu mo Ji bi Ai. Ji bi Ai anato gum kok sye wai kadit Ji.

²⁹Su re Ji ki sukdu ne nyim nai nin jam subere su kam gato sukdu ne bor it yo, nin onyar kem mo Ji bi sukdu-i anane.

³⁰Ji yo ki suk mwa su nin o nde, we biris bi yekwesu gato jom bur re ma it anare. Sarewo biris bi yekwesu yo nggiwa jom Ji nde,

³¹wo suk mwa ne sino gato Ji bi Ai syogat Ji ben ne, Ji ben suk mwa ne sino subere yé mo bur re jam do, Ji bi sukjimnut sye kas subot Ji bi Ai. Tep it, men ti men mu kadit pe re et.”