Read Abun Yohanes 17 Bible Online

Yohanes 17 - Abun bible

Yohanes 17

¹Yefun Yesus ki sukdu su An bi pakon subere pakon ne nyuwa suk daret nde or sa, Yefun Yesus sok mu nim mo gu, ete An ki do, “Ji bi Ai, Ji bi kam tep it are. Ji bi Ai, Ji gato Nan bi Gan, Nan bes Ji gum kok sye wai et, subere Ji waii bes Nan gum kok sye wai o ré.

²Nan bes Ji gum Yekwesu wa Ji jom yetu mwa ne sino mo bur re ré, subere yé mwa ne sino gato Nan syo nai Ji ne, Ji ós án kem gesyos.

³Án jam Nan, Yefun Allah ka dik gato sangge, ye yo nggi tepsu Nan mo nde. Án jam Ji, gato Nan bi Gan, Yesus Kristus gato Nan syogat ma more anato án kem gesyos.

⁴Ji ben suk mwa gato Nan kiwa Ji ben ne sino anato yé mwa mo bur re bes Nan gum kok sye wai o ré.

⁵Ji bi Ai, Nan yo ut bur re nde tó, Ji si Nan, ete Nan bes Ji gum kok mone ré. Sane su re, Nan bes Ji gum kok sye wai satu o et.

⁶Ji kadum Nan nai yé mwa gato Nan syo nai Ji mo bur re, yé mwa ne jam Nan ré. Yé mwa ne anato Nan bi rus-i. Nan syo án nai Ji ré. Án benbot Nan bi sukdu-i ré.

⁷Su re án jam do, suk mwa ne sino gato Nan syo nai Ji, suk mwa ne ma kadit Nan.

⁸Sukdu gato Nan ki nai Ji, Ji waii ki nai án jam ré, án iwa sukdu ne. Án jam do, sangge Ji anato ma kadit Nan, Ji bi Ai. Án jam do, sangge, Nan anato syogat Ji ma mo bur re ré.

⁹Ji ki suk su Nan wa án, yé mwa gato Nan syo nai Ji ne. Ji yo ki suk su Nan wa yetu mo bur re nde. Wo ji ki suk su Nan wa yé gato Nan syo nai Ji, we án anato sok mo Nan bi rus-i.

¹⁰Nan bi suk mwa ne sino anato Ji bi suk-i dom. Ji bi suk mwa ne sino anato Nan bi suk-i dom. Yé mwa gato Nan syo nai Ji, bere án bes Ji gum kok sye wai o ré.

¹¹Ji ma mo Nan it anare, Ji yo kem mo bur re o nde, sarewo án ye gato Nan syo nai Ji ne kem mo bur re tó. Ji bi Ai, gato gum kok tara wai kadit yetu, Nan bes Ji gum-i kok tepsu Nan gum-i gato bi suktinggi ne mó. Sane Nan yawa án kadit sukibit su Nan bi suktinggi ne et, subere án sino tepsu dik, tepsu Ji si Nan tepsu dik dom.

¹²Ji sisu án sa, Nan bes Ji gum-i kok tepsu Nan gum-i anato Ji yawa án kadit sukibit su Nan bi suktinggi gato Nan syo nai Ji ré. Ji mewa án sane, dik yo gwet mo nde, mwa ne sino mó. Wo ge dik sor anato ges mo os ibit kadit men subere sukdu gato yé krom nyim mo Yefun bi sukdu ne bor mone it.

¹³Ji bi Ai, Ji ma mo Nan it anare. Ji mo bur re tó Ji ki napyo nai án ye gato Nan syo nai Ji ne jam, subere án mit at wa, tepsu Ji dakai mit at wa wai o ré.

¹⁴Ji frot Nan bi suktaru nai án, eteyo yetu mo bur re bariket án ré, we án si yetu mo bur re yo bi sukjimnut-i tepsu dik nde. Ji dom, Ji si yetu yo bi sukjimnut-i tepsu dik nde.

¹⁵Ji yo ndek mo Nan subere Nan nai án wé kadit bur re nde. Sarewo Ji ndek mo Nan subere Nan mewa án kadit biris bi yekwesu gato jom nje mo bur re.

¹⁶Án si yetu mo bur re yo tepsu dik nde. Ji dom, Ji si yetu mo bur re yo tepsu dik nde.

¹⁷Nan bi sukdu anato sangge. Nan bi sukdu ete ben án subere án bi án nggwa wa án ben Nan bi suk-i ne sor.

¹⁸Nan syogat Ji ma mo bur re wa ben Nan bi suk-i, sane Ji waii syogat án mu mo nje mo bur re wa án ben Nan bi suk-i ne dom.

¹⁹Ji bi Ji nggwa wa Ji ben Nan bi suk-i wa án, subere án waii bi án nggwa wa án benbot Nan bi sukdu-i gato sangge petok sor.

²⁰Ji ndek mo Nan wa án sor nde, wo Ji ndek mo Nan wa yé gato bere onyar kem mo Ji mo sukdu gato Ji bi pakon re ki nai án jam ne.

²¹Ji bi Ai, Ji ndek mo Nan subere án sino tepsu dik, tepsu Nan si Ji tepsu dik. Án ete si Men tepsu dik dom et, subere yetu mo bur re jam do, sangge Nan anato syogat Ji ma mo bur re ré.

²²Yé gato onyar kem mo Ji ne, Ji bes án gum kok, tepsu Nan bes Ji gum kok, subere án sino tepsu dik, tepsu Ji si Nan tepsu dik dom.

²³Ji si án tepsu dik, ete Nan si Ji tepsu dik subere án sino tepsu dik sisu sangge it. Sane bere yé mo bur re jam do, Nan anato syogat Ji ma more. Sane dom bere yé mo bur re jam do, Nan bi sukjimnut sye kas subot Ji bi pakon ne tepsu Nan bi sukjimnut sye kas subot Ji ré.

²⁴Ji bi Ai, Nan syo Ji bi pakon nai Ji ré. Ji iwa án si Ji kem mo nat gato bere Ji kem mone, subere án me do Ji anato gum kok sye wai o ré. Nan yo ut bur re nde tó, Nan bi sukjimnut sye kas subot Ji, Nan bes Ji gum kok sye wé ré.

²⁵Ji bi Ai gato ben bi suk-i ndo petok sor, yé mo bur re yo jam Nan nde, wo Ji sa, Ji jam Nan ré. Ji bi pakon re dom jam do, Nan anato syogat Ji ma mo bur re.

²⁶Ji anato kadum Nan nai Ji bi pakon ré. Bere Ji ki sukdu subot Nan petok sor subere án bi sukjimnut sye kas subot yu petok sor, tepsu Nan bi sukjimnut sye kas subot Ji, subere Ji si án tepsu dik.”