Read Abun Yohanes 19 Bible Online

Yohanes 19 - Abun bible

Yohanes 19

¹Orete Pilatus syogat yesukmise gwat Yefun Yesus mu mo nden, ete yesukmise kwam Yefun Yesus su bus.

²Yesukmise ne nai kweran gato jak mó, ete án far kweran ne bot yu. Orete án bom mo Yefun Yesus su. Orete yesukmise nai yekwesu bi san gato te kur, ete gwom mo Yefun Yesus.

³Yesukmise ma ti mo Yefun Yesus gwem, án sa Yefun Yesus, án kabor Yefun Yesus do, “Nan sa, Nan ye Yahudi bi yeraja fe!” Án ma án kabor Yefun Yesus sane sor. Or o án bes syim mo Yefun Yesus.

⁴Wam dik yo o Pilatus syesyar mo nden, ete Pilatus ki nai ye Yahudi do, “Nin me more et. Ji gwat Ye gare syesyar ma mo nin it anare, subere nin jam do, Ji ndobot Ye re ware, ji ki do, Ye re ben suk gato ibit yo mo nde.”

⁵Sane Yefun Yesus syesyar mo nden, An bom kweran jak gato yé far bot yu ne tó, An it san te kur ne tó. Pilatus ki nai yé mwa mone do, “Ye gare anane it!”

⁶Yekwesú mo Yefun Allah bi nu ge bok yo si ye gato mewa Yefun Allah bi nu ge bok yo me Yefun Yesus syesyar mo nden sa, án sino saiye do, “Nan gu An kwop wé tom! Nan mban An mo kwesukwin tom!” Sarewo Pilatus ki nai án do, “Nin dakai nai An, nin dakai gu An kwop mo kwesukwin sor, we ji ndobot An ware, ji ki do, An ben suk gato ibit yo mo nde.”

⁷Ye Yahudi ki nai Pilatus do, “Men bi sukduno-i duno men do, ye gato ki do, an anato Yefun Allah bi Gan yo, men gu an kwop wé. Sane men syokom ye gu An kwop sor.”

⁸Pilatus jam ye Yahudi mwa ne ki sukdu ne sa, an nyu wai o ré.

⁹Pilatus sok satu o mo an bi nu sye, ete an ndo mo Yefun Yesus do, “Nan ontu mo u ne?” Sarewo Yefun Yesus yo du nde.

¹⁰Pilatus ki nai Yefun Yesus o do, “Nan bariwa Nan ki suk su ji e? Nan jam nde ji anato sye wai kadit Nan e? Ji anato nggiwa ji sombok Nan wé. Ji anato nggiwa ji syokom ye gu Nan kwop mo kwesukwin dom.”

¹¹Yefun Yesus ki nai Pilatus do, “Yefun Allah bes nan wa nan jom nat si suk mwa re ondesa, nan yo sye wai kadit Ji nde ré. Sane anato ye gato syo Ji mo nan syim ne, ye ne ben sukibit wai kadit nan ré.”

¹²Pilatus jam sukdu ne sa, an meret os wa an sombok Yefun Yesus wé. Sarewo ye Yahudi saiye gat do, “Nan sombok Ye ne wé yo, nan tepsu Kaisar bi yesyim nde. Ye gato ki mo yé mwa gwem do, an yeraja, ye ne yo jammo Kaisar o nde, ye ne tepsu yeko wa Kaisar go!”

¹³Pilatus jam sukdu ne or sa, an gwat Yefun Yesus syeyar mu mo nden, ete Pilatus kem mo kursi gato yepasye gato kibot suk kem mone. Pe ne gum do, ‘Kwat gato yé nggo su jok.’ (Su a Ibrani yé kendo pe ne do Gabata.)

¹⁴Kam gane, yé fro suk wa bi ik ye konwa Kam Sye Waiket, sugane kam ti ri. Pilatus ki nai ye Yahudi do, “Nin bi yeraja anare!”

¹⁵Wo án saiye do, “Nan gu An kwop wé se! Nan gu An kwop wé se! Nan mban An mo kwesukwin tom!” Pilatus ndo mo án do, “Nin iwa ji mban nin bi yeraja mo kwesukwin sor ré bado?” Yekwesú mo Yefun Allah bi nu ge bok yo ki nai an do, “Kaisar sor anato tepsu men bi yeraja.”

¹⁶Or sa, Pilatus syo Yefun Yesus mo an bi yesukmise syim wa án mban Yefun Yesus mo kwesukwin. Sane yesukmise ne gwat Yefun Yesus mu.

¹⁷Yefun Yesus mu mo nden saresa, An sam An bi kwesukwin mu mo pe gato gum do, “Yekri subris.” (Su a Ibrani yé kendo do Golgota.)

¹⁸Mone, yé mban Yefun Yesus mo kwesukwin. Sugane yé mban yetu ge we sisu An mone dom. Yetu ge we ne, dik yo mo Yefun Yesus de syim jam, dik yo mo Yefun Yesus de syim ge, Yefun Yesus dakai mo ye we ne miten.

¹⁹Pilatus syogat yé krom sukdu mo kwedet, ete yé mban mo Yefun Yesus bi kwesukwin napnim. Yé krom sukdu gato yé ndak Yefun Yesus su ne sare do, “Yefun Yesus ye Nazaret. Ye Yahudi bi yeraja anare.”

²⁰Yé krom sukdu ne su a gri, yé krom su a Ibrani, su a Latin ye Roma bi a, si ye krom su a Yunani dom. Nat gato yé mban Yefun Yesus mo kwesukwin ne karowa kota. Sane ye Yahudi mwa mu mone, ete án baca sukdu gato yé krom mone.

²¹Ye Yahudi bi yekwesú mo Yefun Allah bi nu ge bok yo ki nai Pilatus do, “Nan krom ye Yahudi bi yeraja anare nde. Sarewo nan krom do, ‘Ye re dakai ki do, An ye Yahudi bi yeraja.’ ”

²²Sarewo Pilatus ki nai án do, “Suk gato ji syogat yé krom ne kwop mone it.”

²³Yesukmise mban Yefun Yesus mo kwesukwin or sa, án nai Yefun Yesus bi san wa án dakai syo yu su. Án ge at wat san ne su yu, yesukmise ge dik ku dik. Án nai san gato Yefun Yesus it mo nden ne dom. San ne wak no, ye yo bit i-su yo mo nde.

²⁴Yesukmise ne, án ki nai yu do, “Men syik san re wa men syo yu su nde. Men syat bit et. Ye gato tik bit gato syu wai kadit doyi ne yo, an nai san ne sor.” Ye tik bit subere sukdu gato yé krom nyim mo Yefun Allah bi sukdu ne bor ré. Yé krom do, “Yé syo yu su Ji bi san. Yé tik bit subere ye wat yu su Ji bi sansun syu ne.” Sangge, yesukmise ne wat yu su Yefun Yesus bi san tepsu sukdu ne it.

²⁵Yefun Yesus bi im e, Yefun Yesus bi im dowok e, Maria gato Klopas bi nggon ne si Maria gato bi nat mo Magdala, án ge at ti karowa kwesukwin gato yé mban Yefun Yesus mone.

²⁶Yefun Yesus sokme An bi im si An bi pakon gato An jimnotku ti mone. Yefun Yesus sokme an we sa, Yefun Yesus ki nai an bi im do, “Im o, nan bi pa anane it.”

²⁷Orete An ki nai pakon ne do, “Nan bi im anane it.” Kadit kam gane it, pakon ne mewa Yefun Yesus bi im. Yefun Yesus bi im si pakon ne kem mo pakon ne bi nu-i.

²⁸Yefun Yesus jam do, suk mwa gato An ben ne, An ben or it, ete An ki do, “Ji sosa,” subere sukdu gato yé krom mo Yefun Allah bi sukdu subot An bor mone ré.

²⁹Mone yé grem sukbo dik yo mó. Yé rin nau anggur rom gato muk mo sukbo ne ses. Yé nai suk gato yé tik syur su tepsu san det. Sane yé ras suk ne mo nau anggur muk ete suk ne dakai tik nau ne sok. Ete yé nai kwe hisop koi, yé dú suk ne mó, ete yé jom su mu nim mo Yefun Yesus mip.

³⁰Yefun Yesus da nau rom or sa, An ki do, “Tut more it.” Orete An su e mo bur, An mas bok it.

³¹Kam gato Yefun Yesus kwop su ne, kam Jumat, kam gato ye Yahudi fro suk wa án bi kam sye kam Sabat ne. Bi ik ete kam Sabat sor nde, wo Kam Sye Waiket dom. Sane anato ye Yahudi bariwa yetu mukri gato yé mban mo kwesukwin kem kok mone. Sane ye Yahudi bi yepasye ge bok yo mu mo Pilatus. Án ndek mo Pilatus do, “Nan syogat yé syat yé bok ne gwes subere án kwop kekro, ete yé sombok án mukri wé kadit kwesukwin, ete yé gwat mu.”

³²Sane yesukmise mu, án syat ye we gato yé mban mo Yefun Yesus de ne gwes nyim, ye we ne gwes fot.

³³Sarewo yesukmise mu kom mo Yefun Yesus, án me sa, Yefun Yesus kwop ré, sane án yo syat Yefun Yesus gwes nde.

³⁴Sarewo yesukmise ge dik yo syer Yefun Yesus syak su yor. Sugane syur si An dé sino syé kadit An syak wip ne.

³⁵Suk gato yesukmise ben ne, ye gato dakai me su an gro anato ki rer nai nin jam. An ki an bi sukdu-i ne sangge, subere nin dom nai sukjimnut do, sukdu ne sangge.

³⁶Yesukmise ben suk ne nai Yefun Yesus subere sukdu gato yé krom suga nyim subot An mo Yefun Allah bi sukdu ne bor ré. Yé krom do, “Bere ye yo syat An dini dik yo fot dom nde.”

³⁷Yé krom mo Yefun bi sukdu o do, “Bere yé sokme Ye gato yé syer ré.”

³⁸Orete Yusuf gato bi nat mo Arimatea, an ndek mo Pilatus do, Pilatus syo Yefun Yesus mukri wa an gwat mu bi mo makwe et. Yusuf re, an onyar kem mo Yefun Yesus, sarewo an yo ki bor wa ye jam nde, we an nyuwa ye Yahudi. Pilatus imo suk gato an ndek ne, ete Pilatus misyar Yusuf mu nai Yefun Yesus mukri.

³⁹Nikodemus sisu Yusuf dom. Nikodemus re, wam ga nyim an anato ma ku Yefun Yesus su noru. Nikodemus gwat kwe mur nu si kwe nggonnak jos gato grik ne, ete an fros su yu. Kwe mur nu si kwe nggonnak jos ne de karowa kilo musyu gri.

⁴⁰Yusuf si Nikodemus nai Yefun Yesus mukri, ete an ka we far Yefun Yesus mukri su san det. An ka we bok kwe mur nu fros su kwe nggonnak jos mo san mit ete an ka we far kit Yefun Yesus mukri su. An ka we fro Yefun Yesus mukri tepsu sagana Ye Yahudi fro ye mukri ne.

⁴¹Mo pe gato yé mban Yefun Yesus mo kwesukwin ne, nggwe dik yo mó. Mo nggwe ne, yé fro jokwak wa yé grem yekwop mo mit ne. Jokwak ne, yé yo grem ye mukri mo nde tó.

⁴²Yusuf si Nikodemus grem Yefun Yesus mukri mo jokwak mit ne, we jokwak ne karowa nat gato yé mban Yefun Yesus mó. Kam ne dom, kam gato ye Yahudi fro suk wa bi ik, kam sye kam Sabat.