Read Abun Yohanes 2 Bible Online

Yohanes 2 - Abun bible

Yohanes 2

¹Kam we rek o, yé konwa sukra mo kota Kana mo Galilea. Yefun Yesus bi im si nje konwa sukra mone dom.

²Ye kendo Yefun Yesus si bi pakon mu sino dom.

³Ye konwa sukra ne sa, nau anggur rom yo tep wa yé mwa da nde. Nau ne or sa, Yefun Yesus bi im ma ki nai An do, “Nau ne or ré.”

⁴Yefun Yesus ki nai bi im do, “Im, nan ma ki napyo wa Ji jam wa suma ne? Su re yo tepsu bi kam-i wa Ji ben suk gato kadum Ji bi suktinggi nde tó.”

⁵Sarewo Yefun Yesus bi im ki nai nje gato fro suk mone do, “Suk gato An ki nai nin, nin benbot sor.”

⁶Mo pe ne ye grem sukbo mumat wa yé rin syur mó. Sagana ye Yahudi yo sok ari nde tó, yé de syur gato yé rin mo sukbo ne. Yé rin syur mo sukbo ne ses yo, bergan tepsu liter wotin dik mo sukbo dik. Sugane sukbo mumat kwop mone.

⁷Yefun Yesus ki nai ye gato fro suk mo sukra ne do, “Nin rin syur mo sukbo bok re ses et.” Sane yé ne mu gwat syur ma rin mo sukbo bok ne ses kai.

⁸Orge Yefun Yesus ki nai án do, “Nin nai syur napyo, nin gwat mu syo nai yesu mo sukra ne da et.” Án en syur wokgan, ete án gwat mu syo nai yesu mo sukra ne.

⁹Yesu ne da syur gato re ne tepsu nau anggur ne wokgan mó. (Yesu jam nde nat gato yé nai nau ne kadit, wo ye gato gwat syur ne ma sor ete jam.) Sane yesu kendo yebris gato kra ne ma karowa an,

¹⁰ete an ki nai yebris ne do, “Yé konwa suk yo it yo, sagana yé fro nau gato wik wa yé da nyim. Orete yé da nau gato wik tep mó sa, yé gwat nau gato yo ndo teker nde wa yé da wari o. Sarewo nan sa, nan grem nau gato wik wai re kwop sor kom more, ete nan syo nai men da.”

¹¹Yefun Yesus ben syur tepsu nau anggur rom ne mo kota Kana mo bur Galilea. Yefun Yesus ben suk doketke gato ben yetu yeket mone. Yefun Yesus kadum An bi Ai bi suktinggi bor wa yetu jam mone. Sane anato An bi pakon onyar kem mo An.

¹²Or o Yefun Yesus si bi im, si bi nji, si bi pakon án sino mu mo kota Kapernaum. Án kem mone kam bok yo rek.

¹³Karowa ye Yahudi bi Kam Sye Waiket sa, Yefun Yesus mu mo Yerusalem wa An simo kam sye ne.

¹⁴Kom mone sa, Yefun Yesus ku yé gato so suk mo Yefun Allah bi nu de mo ros de mit ne. Yé bok ne so sapi e, domba e, ndabu e ne. Yefun ku ye gato win sugum su sugum wok ne kem mo bi meja de.

¹⁵Sane Yefun Yesus jamji bus muk we bot yu, tepsu kwe kwam. Orete An syun suge mwa ne mu mo nden, sapi si domba ne sino titi mu mo nden kadit Yefun Allah bi nu. Sugum wok gato ye grem wa win sugum sye su ne Yefun Yesus brek bi meja wade sugum ne ges mo bur o ré.

¹⁶Yefun Yesus ki nai ye gato so ndabu do, “Nin nai ndam re mu mo nden. Nin ben Ji bi Ai bi nu re tepsu nu gato yé so suk mo ne nde.”

¹⁷Sane Yefun Yesus bi pakon napakom Yefun bi sukdu kwa dik yo sare do, “Ji jimnotbot Nan bi nu sye teker, tepsu bot git Ji mit.”

¹⁸Ye Yahudi bi yepasye syogat Yefun Yesus do, “Nan kadum Yefun Allah bi suktinggi bor. Nan ben suk gato ben men yeket wa men me bor et, subere men jam do, sangge, Yefun Allah bes Nan ete syo suktinggi nai Nan wa Nan syun suge mwa ne mu nden wé kadit nu re.”

¹⁹Yefun Yesus ki nai yepasye ne do, “Nin tarak Yefun Allah bi nu re, bere kom mo kam gri rek Ji nggo satu or ré.”

²⁰Ete yepasye ki nai An do, “Nu re men nggo nam, kom mo tahun musyu at sop mat ete or. Sarewo Nan ki do, Nan nggo nu re kom mo kam gri rek sor ré ete or, bado?”

²¹Ye Yahudi bi yepasye ne nut do, Yefun Yesus ki subot Yefun Allah bi nu, ondewo Yefun kibot An dakai kaim sor ré.

²²Sane kam gato Yefun Yesus sun kadit sukkwop or wé, ete An bi pakon napakom sukdu gato An ki ne. Sane án onyar kem mo sukdu gato yé krom mo Yefun Allah bi sukdu si sukdu gato Yefun Yesus dakai ki ne sino dom.

²³Yefun Yesus kem mo Yerusalem. An simo Kam Sye Waiket sa, yé mwa onyar kem mo An, we yé mwa ne yeket suk gato Yefun Yesus ben gato kadum An bi Ai bi suktinggi bor wa yetu jam mone.

²⁴Sarewo Yefun Yesus yo onyar kem mo yé mwa ne nde, we an jam yetu mwa ne sino it.

²⁵Yefun yo mitmo yetu ge dik yo ki rer nai Yefun Yesus jam subot yetu nde, we An jam yetu mit si onyar sino ré.