Read Abun Yohanes 21 Bible Online

Yohanes 21 - Abun bible

Yohanes 21

¹Orete Yefun Yesus kadum An nggwa o nai An bi pakon mo Em Tiberias de, sare do:

²Simon Petrus si Tomas gato yé kendo do, pakwa ne, si Natanael gato bi nat-i mo Kana mo Galilea, si Zebedeus bi gan ge we si Yefun Yesus bi Pakon ge we yo o, án ge mufit sum mo em de ne.

³Simon Petrus ki nai án do, “Ji mu sok boge it anare.” An ki nai Petrus do, “Men si nan dom et.” Sane án ge mufit mu it mo kwem. Sarewo kadit noru sor kom mo nombrak án yo ku boge yo mo nde.

⁴Bi ik sidu rer sim, Yefun Yesus ti mo em de, sarewo An bi pakon nut do, Yefun Yesus anane nde, án nut do ye yi kaii.

⁵Yefun Yesus ké nai án do, “Pa o, nin gu boge yo mó e?” Án ki do, “Mo nde.”

⁶Yefun Yesus ki nai án do, “Nin bare nin bi mwi tak kwem de syim ge et, sane bere nin ku boge mone.” Sane án bare mwi ne sa, án but boge mwa teker anato án yo nggiwa tik mwi su boge ne ma nim mo kwem mit ndo nde.

⁷Pakon ge dik yo gato Yefun Yesus jimnotku ne, an ki nai Petrus do, “Men bi Yekwesu anane.” Petrus jam do, pakon ne ki do, “Men bi Yekwesu anane” sa, Petrus it an bi sansun satu, (we an ben suk, sane an jogru sansun ne wé). Orete Petrus yak kadit kwem ngga mo sem.

⁸Pakon deyo mu su kwem boribot an mu nden. Pakon mbros kwem saresa, án tik mwi su boge mwa ne boribot kwem ne. Kwem ne karowa em de, tepsu meter wotin dik sor ré.

⁹Pakon is kadit kwem ne mo nden sa, án me bot nggom gato ru, án me ye kwas boge mo bot ne, án me roti kwop mone dom.

¹⁰Yefun Yesus ki nai án do, “Nin gwat boge gato nin but diksim ne deyo ma et.”

¹¹Simon Petrus it mo kwem, ete an ós pakon mone tik mwi su boge ne mu mo nden. Mwi ne ses su boge sye, boge ne ge wotin dik musyu mek sop gri. Boge da mwa, sarewo mwi ne yo syik nde ré.

¹²Yefun Yesus ki nai án do, “Nin ma nin git et!” Yefun bi pakon ne da iwa án ndo mo Yefun Yesus do, “Je u ana Nan ne?” Sarewo án sino damen ware, we án jam do, án bi Yekwesu Yefun Yesus anane it.

¹³Orete Yefun Yesus ma karowa An bi pakon ne, Yefun Yesus nai roti ne, ete An syobot An bi pakon. Yefun Yesus nai boge dom, An syobot An bi pakon dom.

¹⁴Yefun Yesus sun kadit sukkwop, orete An kadum An nggwa nai An bi pakon wam do gri it anane.

¹⁵Yefun Yesus si An bi pakon git sugit or sa, Yefun Yesus ndo mo Simon Petrus do, “Simon, gato Yohanes bi pa, nan bi sukjimnut sye kas subot Ji wai kadit yé bok re bado?” Petrus ki nai an do, “Ji bi Yekwesu, sangge, Nan jam do, ji jimnotku Nan.” Yefun Yesus ki nai an do, “Sane yo, nan mewa Ji bi pakon ne tepsu ye mewa suksi sato domba gan sisu ndo et.”

¹⁶Yefun Yesus ndo mo an wam do we o do, “Simon, gato Yohanes bi pa, nan bi sukjimnut sye kas subot Ji bado?” Petrus ki do, “Ji bi Yekwesu, sangge, Nan jam do, ji jimnotku Nan.” Yefun Yesus ki nai an do, “Sane yo, nan mewa Ji bi pakon ne tepsu ye mewa suksi sato domba gan sisu ndo et.”

¹⁷Yefun Yesus ndo mo Petrus wam do gri o do, “Simon, gato Yohanes bi pa, Nan jimnotku Ji bado?” Petrus kwabom dek, we Yefun Yesus ndo mo an ne sor kom mo wam gri it. Sane Petrus ki nai Yefun Yesus do, “Yenggras, men bi Yekwesu, Nan sa jam suk mwa ne sino kom mo mit, Nan rer mo Nan dakai. Nan jam do, ji jimnotku Nan ré.” Orete Yefun Yesus ki nai an do, “Sane yo, nan mewa Ji bi pakon ne tepsu ye mewa suksi sato domba gan sisu ndo et.

¹⁸Suk gato Ji ki re suksangge anare, tomgato nan ka yemsok yo, nan dakai it nan bi san, nan mu mo nat gato nan dakai í mó. Sarewo bere nan ka yenggras it yo, nan syo nan syim ma wa ye yi it san mo nan, ete gwat nan mu mo pe gato nan yo í mo nde.”

¹⁹(Yefun Yesus ki sukdu ne subot suk gato bere bor mo Petrus su kam sari ne ma. Yefun Yesus ki rer subot os gato bere ye gu Petrus kwop su ne, ete ri ma yé bes Yefun Allah gum kok mone.) Yefun Yesus ki sukdu ne or sa, An ki nai Petrus o do, “Nan ma simo Ji et!”

²⁰Petrus brek sa, an sokme pakon gato Yefun Yesus jimnotku boribot an we. Pakon re, tomgato Yefun Yesus si bi pakon sino git sugit si noru, an anato kem karowa Yefun Yesus de, ete an ndo mo Yefun Yesus do, “Je u ana meret os wa gwat yeko ma wa but Nan ne?”

²¹Petrus me pakon ne sa, Petrus ndo mo Yefun Yesus do, “Yenggras, ji bi Yekwesu, suma anato bere bor su ye gare ne?”

²²Yefun Yesus ki nai Petrus do, “Ji do mit iwa an kem mo bur re wade Ji satu ma yo, nan bi sukjimnut kas kom mone nde. Wo nan simo Ji kadit sor.”

²³Sane yé ki bi sukdu-i frekbot ye gato onyar kem mo Yefun Yesus ne sino jam do, bere pakon ne yo kwop nde. Sarewo Yefun Yesus yo ki sukdu sane nai Petrus nde, wo Yefun Yesus ki do, “Ji do mitmo an kem mo bur re wade Ji satu ma yo, nan bi sukjimnut kas kom mone nde.”

²⁴Pakon gato yé nut do bere an yo kwop nde, an anato ki rer subot sukdu mwa ne. An anato krombot sukdu ne dom. Men jam do, sukdu gato an ki ne sangge.

²⁵Yefun Yesus da ben suk mwa deyo o, sarewo ji yo krombot sino nde. Ji do krombot suk mwa ne sino gato Yefun Yesus ben ne yo, ji nut do, bere nat yo tep wa yé grem buku mwa ne kwop mone nde, buku mwa teker, bur re bere buk ware.