Read Abun Yohanes 4 Bible Online

Yohanes 4 - Abun bible

Yohanes 4

¹Ye Farisi jam do, yé mwa ma mo Yefun Yesus wa Yefun Yesus ras án mo syur subere án tepsu Yefun bi pakon. Ye Farisi jam do yé mwa ma mo Yefun Yesus wai kadit Yohanes. (

²Yefun Yesus dakai yo ras nje mo syur nde, wo An bi pakon anato ras nje sor ré.).

³Yefun Yesus jam ye Farisi bi sukdu subot suk gato An ben ne sa, An mu kadit bur Yudea, An satu mu mo bir Galilea.

⁴An satu mu mo Galilea saresa, Yefun Yesus muket os gato wai ket bur Samaria.

⁵Sane mo Samaria ne, Yefun Yesus mu kom mo kota dik yo gato gum do Sikhar, karowa bur det gato kam nyim tuya Yakub syo nai an bi gan Yusuf.

⁶Mo pe ne Yakub bi syurwak mó. Yefun Yesus kaim rere, we An muket os syu teker ma kom mone. Sane An kem ga mo syurwak de. Tomgane, kam yó miten.

⁷An bi pakon mu mo kota wa so sugit ré. Orete nggon Samaria dik yo ma wa en syur. Nggon ne ma kom mo syurwak sa, Yefun Yesus ki nai mom do, “Nan syo syur nai Ji da et.”

⁸

⁹Nggon ne ki nai Yefun Yesus do, “Ben sa u anato Nan ye Yahudi ndek syur kadit ji, ye Samaria re ne?” (Nggon ne ki sane, we sugane ye Yahudi bariwa karowa ye Samaria.)

¹⁰Yefun Yesus ki do, “Nan jam suk gato Yefun Allah fro wa syo nai nan ete nan jam Ji gato ndek syur mo nan ne yo, bere nan waii ndekwa Ji syo syur gato ós nan kem ndo nai nan da, ete bere Ji syo syur ne nai nan da ré.”

¹¹Nggon ne ki nai An do, “Yenggras, Nan bi sukbo wa Nan en syur su yo mo nde. Syurwak re kru teker. Nan nai syur gato ós ji kem ndo ne kadit u ne?

¹²Men bi amui Yakub anato rom syurwak re. An syo nai men. An dakai nai syur more wa an da. An bi pa ne sino nai syur kadit syurwak re wa án si án bi suksi da. Nan nut do, Nan gum kok sye wai kadit Yakub bado?”

¹³Yefun Yesus ki do, “Ye gato da syur re, bere an sosa o ré.

¹⁴Wo ye gato da syur gato Ji syo ne yo, an yo sosa o nde to kapyo mato kapyo. Syur gato Ji syo nai an ne tepsu syur gro mo an mit. Syur gro ne syé ete ben an kem ndo, an kem ndo to kapyo mato kapyo.”

¹⁵Nggon ne ki do, “Yenggras, Nan so syur ne wa ji da et, subere ji yo sosa o nde, subere ji yo mitwa ji satu ma wa en syur more o nde.”

¹⁶Yefun Yesus ki nai nggon ne do, “Sane nan mu, nan kendo nan bi ya, ete nan si ma.”

¹⁷Nggon ne ki do, “Ji bi ya mo nde.” Yefun Yesus ki do, “Suk gato nan ki ne sangge.

¹⁸Wo nan kra yetu ge mek it, ete su re ye gato nan si kem ne, yo tepsu nan bi ya nde. Sukdu gato nan ki ne sangge, nan bi ya mo nde.”

¹⁹Nggon ne ki do, “Su re ji jam Nan it. Nan yenabi, Nan anato Yepasye gato ki Yefun bi suktaru nai men.

²⁰Ji bi amui, ye Samaria, án sum wa án som Yefun Allah mo banbo re. Sarewo nin ye Yahudi ki do, men sum wa men som Yefun Allah mo pe dik sor, mo kota Yerusalem.”

²¹Yefun Yesus ki nai mom do, “Nggon, nan jammo suk gato Ji ki re et. Kapyo tak bere yé yo som ji bi Ai Yefun Allah mo banbo re o nde. Sane dom, bere ye yo som An mo Yerusalem o nde.

²²Nin ye Samaria som suk gato nin jam nde, wo men ye Yahudi som Yefun Allah gato men jam ré, we men ye Yahudi anato yewis gato jam ete kibot os gato Yefun Allah fro wa yetu subere yetu kem gesyos.

²³Bere kapyo tak o nde, wo su ré it, men som Yefun Allah sisu men mit dik si men onyar dik sor. Pe gato men som Yefun mone Yefun yo nutbot nde, wo An mit iwa men yé gato som An. Yefun Allah Gen ben men nggiwa som An sisu men mit duk si men onyar dik sor ré.

²⁴Yefun Allah kaim tepsu yetu kaim mo nde, wo Yefun Allah ne Gen sor ete mó. Sane Yefun mitwa men sum wa men som An mo pe dik nde, wo An iwa ye som An sisu an mit dik si an onyar dik sor.”

²⁵Nggon ne ki nai Yefun Yesus do, “Ji jam do, Yekwesu gato Yefun Allah syogat ma mo bur re wa nai men yetu kadit sukye ete jowa men, bere An (gato gum do Kristus) ma. An ma yo, bere An ki rer is men jam subot suk mwa ne sino.”

²⁶Yefun Yesus ki do, “Ji gato ki suk su nan, Ji anato Kristus gane it.”

²⁷Sugane Yefun Yesus bi pakon ne satu ma. Pakon ne me Yefun Yesus ki suk su nggon ne sa, pakon yeket mone. Sarewo án yo ndo mo nggon ne do, “Nan mitmo suma ne?” nde. Án yo ndo mo Yefun Yesus do, “Nan ki suk su nggon re wa suma ne?” dom nde.

²⁸Sane nggon ne grem mom bi sukbo gato mom en syur su ne kwop, ete mom satu mu mo kota. Mom mu kom mo kota sa, mom ki nai nje mone do,

²⁹“Nin ma me Ye gare et. Nin ma me Ye gato kibot suk mwa ne sino gato ji ben re et. An anato Kristus bado?”

³⁰Sane yé mo kota ne, án mu me Yefun Yesus.

³¹Yé mwa gato ma ne yo kom nde tó, Yefun Yesus bi pakon wergat Yefun Yesus do, “Yeguru nan git sugit wokgan mó et.”

³²Sarewo Yefun Yesus ki nai pakon ne do, “Ji git sugit deyo gato nin jam nde ré.”

³³Sane An bi pakon ndo mo yu do, “Ye deyo gwat sugit syo nai An git bado?”

³⁴Yefun Yesus ki do, “Suk gato tepsu sugit wa Ji anato Ji ben suk tepsu Yefun Allah mit. Ji ben An bi suk-i gato An syogat Ji ma mo bur re wa ben ne sor kom mo pe gato or mó anato tepsu sugit wa Ji git ré.

³⁵Nin ki do, ‘Aina at o, ete men bi sukjan kri wa men nai.’ Sarewo Ji ki sare do, nin brek, nin sokme nggwe tak deyo-deyo. Sukjan ne kri it.

³⁶Ye gato nai sukjan kri ne ku suk mone tepsu án bi kamba it. Ye ne nai sukjan gato kri ne, tepsu an ós nje kem ndo to kapyo mato kapyo. Sane ye gato nai sukjan kri si ye gato jan sukjan ne sino mit iwa ré.

³⁷Sane sukdu gato yé ki re, sangge, sare do, ‘Yetu ge dik yo jan sukjan, yetu ge dik yo o nai sukjan gato kri.’

³⁸Ji syogat nin mu nai sukjan gato nin yo jan nde. Ye yi anato jan sukjan ne, ete nin anato nai an bi sukjan gato kri ne.”

³⁹Sane ye Samaria mwa, gato kem mo kota ne, án nai sukjimnut dik do, án onyar kem mo Yefun Yesus mo sukdu gato nggon ne ki sare do, “Ye gane kibot suk mwa ne sino gato ji ben ne ré.”

⁴⁰Sane ye Samaria ne ma kom mo Yefun Yesus sa, án ndek gat Yefun Yesus subere Yefun si án kem sino mone. Sane Yefun Yesus kem mone kom mo kam we rek.

⁴¹Orete ye Samaria mwa wai o nai sukjimnut dik do, án onyar kem mo Yefun Yesus, we án dakai jam sukdu gato Yefun Yesus ki ne.

⁴²Ye Samaria ne ki nai nggon ne do, “Su re men onyar kem mo Yefun Yesus mo nan bi sukdu-i sor nde, wo men onyar kem mo An, we men dakai jam An ki An bi sukdu-i ré. Men jam do, An anato Ye gato ma wa An nai men yetu sino mo bur re wé kadit sukye, subere men kem ndo to kapyo mato kapyo.”

⁴³Yefun Yesus kem mo kota Sikhar kom mo kam we rek, orete Yefun Yesus mu kadit kota ne, An mu mo bur Galilea.

⁴⁴Yefun Yesus dakai ki do, “Yenabi gato ki Yefun Allah bi suktaru satu mu mo an dakai bi nat-i yo, bere yé mone bariwa jammo an ré.”

⁴⁵Sarewo Yefun Yesus mu kom mo Galilea sa, ye Galilea kak yé mit wa An ma, we su gabere Kam Sye Waiket mo Yerusalem, ye Galilea ne simo kam sye mone, ete me suk mwa gato Yefun Yesus ben mone.

⁴⁶Orete Yefun Yesus satu mu mo kota Kana mo bur Galilea ne o. Tomga nyim An frus syur tepsu nau anggur rom mone. Yefun Yesus kom mone sa, An ku yesu ge dik yo gato ben suk wa yeraja. Yesu ne bi gan i. Yesu bi gan ne kem mo kota Kapernaum.

⁴⁷Sane yesu ne jam do Yefun Yesus ma kom mo Galilea kadit Yudea sa, an mu ku Yefun Yesus. An ndek mo Yefun Yesus do, Yefun mu mo Kapernaum wa ben an bi gan gato i ne ge. An bi gan ne karowa kwop rok.

⁴⁸Yefun Yesus ki nai yesu gato ben suk wa yeraja si nje mone do, “Nin gare yo me suk gato kadum Yefun Allah bi suktinggi bor su nin gro nde yo, bere nin yo onyar kem mo Ji mo nde.”

⁴⁹Yesu gato bi gan i ne ki do, “Yenggras, Nan ma kekro, ondeyo ji bi pa bere kwop ré.”

⁵⁰Yefun Yesus ki nai yesu ne do, “Nan mu sor, nan bi pa ge ré.” Yesu ne onyar kem mo sukdu gato Yefun Yesus ki nai an, ete an mu ré.

⁵¹An mu kom mo os mit saresa, an bi pakwerut ma ku an ete ki do, “Yenggras nan bi pa yebris mbau, an ge ré!”

⁵²Yesu ne ndo mo an bi pakwerut do, “Kam sa u anato ji bi gan ge kadit pa bi suki ne?” Pakwerut ne ki do, “Kamekre, kam ti ri sa, pa jam nde ré, an kaim yo kam o nde.”

⁵³Sane pa bi ai ne napakom suk gato Yefun Yesus ki do, “Nan bi pa ge ré,” sugane kam ti ri. Sane an si an bi rus nai sukjimnut dik do, án sino onyar kem mo Yefun Yesus kadit kam ne it.

⁵⁴Yefun Yesus ma kadit bur Yudea ma kom mo Galilea sa, An ben suk gato ben yé yeket wam kedowe it anane.