Read Abun Yohanes 7 Bible Online

Yohanes 7 - Abun bible

Yohanes 7

¹Orete Yefun Yesus mubot peyo-peyo mo bur Galilea. An yo mu mo bur Yudea nde, we An jam do, ye Yahudi mone meret os wa gu Yefun Yesus kwop wé.

²Sugane karowa ye Yahudi bi Kam Sye Nu Ti Kwenat, gato ye Yahudi napawa nu ti gato án bi amui nggo su kwenat ne.

³Karowa kam sye ne, sane Yefun Yesus bi nji ki nai An do, “Nan mu kadit pe re, ete Nan mu mo bur Yudea subere Nan bi pakon me Nan ben Nan bi suk-i gato ben nje yeket et.

⁴Nan iwa yé mwa bes Nan gum yepasye, saneyo Nan mu ben Nan bi suk-i ne bor wa yé mwa me et, Nan gurik wa nde. Nan ben Nan bi suk-i gato ben nje yeket bor more, sane Nan mu Nan waii ben wa yetu mwa ne sino me o et.”

⁵(An bi nji yo onyar kem mo Yefun Yesus dom nde anato An bi nji ki bi sukdu-i sane.)

⁶Sane Yefun Yesus ki nai An bi nji do, “Yefun Allah ki nai Ji do, kam ne tep wa Ji ben suk yo bor nde tó yo, Ji yo ben suk nde tó. Wo nin sa, nin ben nin bi suk-i su kam daret sor, kam mwa ne sino ndo wa nin.

⁷Yetu mo bur re bere án yo bariket nin nde. Sarewo Ji ki yetu mo bur re mo sukibit gato yé ben ne bu anato án bariket Ji.

⁸Nin dakai mu simo kam sye ne sor. Ji yo mu mone nde tó, we kam yo tep wa Ji mu nde tó.”

⁹An ki An bi sukdu-i nai An bi nji ne or sa, An kem mo Galilea yei.

¹⁰Yefun Yesus bi nji mu simo kam sye mo Yerusalem, or Yefun Yesus dakai waii mu mone. Sarewo An yo kadum nggwa nai Yé mwa jam nde, wo An gurik An dik kadit nje.

¹¹Mo kam sye ne ye Yahudi bi yepasye meret Yefun Yesus mone. Yepasye ne ndobot yu do, “Ye gane mo u ne?”

¹²Yé mwa gato sum wa simo kam sye ne, án tom apre nai yu subot Yefun Yesus. Deyo ki do, “An Ye gato ben sukndo.” Deyo o ki do, “Nde ré! An gwat os ibit ben kidar yé mwa.”

¹³Sarewo yé yo ki sukdu subot An mo yé mwa gwem nde, we yé nyuwa ye Yahudi bi yepasye ware.

¹⁴Ye Yahudi konwa kam sye ne mu kom mo kam gri, or kam do at sa, Yefun Yesus mu mo Yefun Allah bi nu de mo ros de mit ne, An sok mo mit, ete An duno nje mone.

¹⁵Ye Yahudi bi yepasye yeket An bi sukduno-i. Yepasye ne ki do, “Bei, Ye re yo farkor mo nde, sane ben sa u anato An jam suk mwa re ne?”

¹⁶Yefun Yesus ki nai yepasye ne do, “Ji ki Ji bi sukduno-i are nde, wo Ye gato syogat Ji ma mo bur re bi sukduno-i anato Ji ki re.

¹⁷Ye gato iwa ben suk tepsu Yefun Allah mit ne yo, bere ye ne jam rer do, sukduno ne ma kadit Ji dakai, ondeyo sukduno ne ma kadit Yefun Allah, bere ye ne jam.

¹⁸Ye gato ki an dakai bi sukduno-i yo, an werwa an dakai bes an nggwa kok mone. Sarewo an werwa an bes Ye gato syogat an ma ne yo, an sa, ye gato ki bi sukdu-i ri roi anane, an yo kidar nje yo mo nde.

¹⁹Musa krom Yefun Allah bi sukduno wa nin benbot mó ré. Sarewo nin yé bok ne sino yo benbot Musa bi sukduno-i nde, nin ge dik yo dom nde. Nin ben suk wai mo Musa bi sukduno-i ne. Sane dom, nin meret os wa nin gu ji kwop wé.”

²⁰Yé mwa ne ki do, “Bei! Je u gei anato meret os wa gu Nan kwop ne? Semda ben Nan ko ré go!”

²¹Yefun Yesus ki nai án do, “Ji ben yetu ge dik gato i ne ge su kam Sabat sor, ete nin yeket.

²²Sarewo Musa duno nin wa nin bisunat pa yebris, sane su re nin bisunat nin bi pa su kam sye kam Sabat ne dom. (Musa yo duno nin subot sunat kadit ketke nde, wo nin bi amui anato duno nin subot sunat su ketke.)

²³Sane nin bisunat nin bi pa su kam sye subere nin ben suk yo siri kadit Musa bi sukduno-i nde yo, suma ben anato nin maskwa Ji mo gato Ji ben ye gato i ne ge satu su kam sye ne?

²⁴Nin ki nje gum ibit mo suk gato nin dakai me su nin gro daret nde, wo nin nutbot sisu ndo, nin watbot kom mo mit, orete nin nai sukjimnut gato sangge et.”

²⁵Sugane ye Yerusalem deyo ndo mo yu do, “Ye gare anato Ye gato men bi yepasye syeret wa gu wé bado?

²⁶Sarewo An dakai ki suk mo yé mwa gwem, yepasye yo ma duwer An mo nde, yepasye yo ki suk yo mo nde. Su re men bi yepasye nut do, sangge, Ye re anato Yekwesu gato Yefun Allah syogat ma mo bur re wa nai men yetu kadit sukye ete jowa men bado?

²⁷Sarewo Yekwesu gato Kristus ne ma it yo, bere men yo jam nat gato An ontu mó nde. Wo Ye re sa, men jam nat gato An ontu mó ré.”

²⁸Orete Yefun Yesus duno nje mo Yefun Allah bi nu de mo ros de mit saresa, An ki bi sukdu-i ne sye yé, An saiye do, “Sane, nir nut do nin jam Ji e? Nin nut do nin jam nat gato Ji ontu kwop mone bado? Ji dakai ma tepsu Ji dakai bi sukjimnut-i nde, wo Ye gato syogat Ji ma more, An sa, An ben An bi suk-i ri roi. Nin jam nde An ré,

²⁹wo Ji sa, Ji jam An, we Ji ma kadit An. An anato syogat Ji ma more.”

³⁰Sugane ye Yahudi bi yepasye iwa but Yefun Yesus ware, ye yo syimtok An mo nde, we An Gen syu tó. Kam gato Yefun Allah fro wa ye but An yo bor nde tó.

³¹Kapre yepasye iwa but An, yé mwa mone napyo sye nai sukjimnut dik do, yé onyar kem mo Yefun Yesus. Sane yé ne ki do, “Kristus do ma it yo, An kadum Yefun Allah bi suktinggi su suk gato ben yé yeket mwa wai kadit Ye re bado? Mo nde, Kristus ana gare it!”

³²Ye Farisi bok yo mone jam yé mwa ki suk apre nai yu subot Yefun Yesus. Sane ye Farisi si yekwesú mo Yefun Allah bi nu syogat ye gato mewa Yefun Allah bi nu ne mu wa but Yefun Yesus.

³³Yefun Yesus ki nai yé mwa gato mo Yefun Allah bi nu ne do, “Ji si nin kem more nam gan yo o sor ré, orete Ji satu mu mo Ye gato syogat Ji ma mo bur re ré.

³⁴Bere nin syeret Ji ware, nin yo ku Ji nde. Nin yo ku os wa ma mo pe gato Ji mu mone nde.”

³⁵Ye Yahudi bi yepasye ndo mo yu do, “Ye gare ki do An mu mo u anato men yo ku os wa men mu ku An nde ne? Bere An mu ku men bi nje-i mo ye Yunani bi nat-i ko kadit men, ete duno ye Yunani mone bado?

³⁶Ye re ki do, bere men syeret An, sarewo men yo ku An nde ré. Men mu mo pe gato. An bi sukjimnut-i sa u ne?”

³⁷Ye konwa kam sye kam bok ne kom mo kam gato ye bes gum kok gato kam wari ne sa, Yefun Yesus ti mo yé mwa gwem mo Yefun Allah bi nu, ete An saiye do, “Nin sosa mó yo, nin ma mo Ji, ete Ji syo syur nai nin da.

³⁸Ye gato onyar kem mo Ji ne anato tepsu sukdu gato yé krom mo Yefun bi sukdu sare do, ‘Kadit an mit syur it tepsu syur nggrup ete syesyar mu nden. Syur ne ben yetu mbau.’ ” (

³⁹Yefun Yesus bi sukjimnut do, syur ne anato Yefun Allah Gen. Bere Yefun Allah Gen bok nggwa mo ye gato onyar kem mo Yefun Yesus. Tomgane Yefun Allah Gen yo ma nde tó, we Yefun Yesus kwop, ete An it satu mu mo An bi Ai nde tó.)

⁴⁰Yé mwa gato jam suk gato Yefun Yesus ki ne, deyo ki do, “Ye gare sangge, An anato yenabi gato ma wa ós men ye Yahudi.”

⁴¹Ye deyo o ki do, “Ye gare anato Kristus gato Yefun Allah syogat ma wa nai men yetu kadit sukye ete jowa men.” Sarewo ye deyo o ki do, “Nde re, Kristus anare nde. Yekwesu gato Yefun Allah syogat ma wa jowa men yo ma kadit bur Galilea nde.

⁴²Mo Yefun Allah bi sukdu yé krom do, Kristus bi amui mo yeraja Daud. Sane bere Kristus si Daud ne sino ontu mo Betlehem, gato Daud bi nat-i ne.”

⁴³Sane yé mwa duwer yu subot Yefun Yesus.

⁴⁴Ye deyo werwa but An, sarewo ye yo syimtok An yo mo nde.

⁴⁵Sane ye gato mewa Yefun Allah bi nu satu ma sa, yekwesú mo Yefun Allah bi nu si ye Farisi ndo mo án do, “Nin yo gwat An ma nde wa suma ne?”

⁴⁶Ye gato mewa Yefun Allah bi nu ne ki do, “Ye ne ki bi suk-i ndo yé. An bi sukdu ne tik men mit ware, men yo but An nde.”

⁴⁷Ye Farisi ki nai án do, “Ye ne ben kidar nin dom bado?

⁴⁸Te men bi yepasye si men ye Ferisi deyo onyar kem mo Ye ne mó it bado? Yo mo nde.

⁴⁹Sarewo yé mwa gato onyar kem mo Ye ne, án jam nde Musa bi sukduno-i ré. Yefun Allah dufo mo yé mwa ne or ré, bere Yefun Allah gu án kwop wé sor.”

⁵⁰Ye Farisi dik yo mone, an gum do Nikodemus, tom gabere an mu ku Yefun Yesus mó ré. An ndo mo ye Farisi mone do,

⁵¹“Men bi sukduno-i duno men do, men yo gu ye yo kwop mo nde tó yei, men ndobot an, men kibot suk gato an ben ne, men jam sisu ri-roi et. Men jam kom mo mit nde tó, men yo gu an kwop nde tó yei.”

⁵²Ye Farisi ki nai Nikodemus do, “Sane nan dom si ye Galilea sino onyar kem mo Ye ne bado? Nan watbot Yefun Allah bi sukdu sisu ndo et! Bere nan jam mone do, yenabi yo ma kadit bur Galilea nde.” [

⁵³Orete yé mwa ne satu mo bi nu.