Read Abun Sukdu Subot Yerasul 1 Bible Online

Sukdu Subot Yerasul 1 - Abun bible

Sukdu Subot Yerasul 1

¹Yenggras Teofilus, ji krom sukdu re wa nan watbot. Ji krom buku dik yo nyim wé ré. Mo buku ne, ji krombot suk mwa gato Yefun Yesus ben ne sino. Ji krombot sukduno gato Yefun Yesus duno nje su. Ji krombot suk mwa gato Yefun Yesus ben kadit ketke,

²sor kom mo kam gato An it mu mo gu. An yo it mu mo gu nde tó, Yefun Allah Gen bok nggwa mo An, ete An ki nai ye gato An bes gum yerasul subot suk gato bere An mitwa yerasul ben ne.

³Yefun Yesus kwop or, An kadum dik wam bok yo nai yerasul ne kom mo kam musyu at rek. An kadum dik sane, yerasul ne jam do, sangge Yefun Yesus mbau satu it. Yerasul ne me Yefun Yesus su án gro. Yefun Yesus ku yerasul, An kibot sukdu su yerasul ne kom mo kam musyu at rek. Yefun Yesus duno yerasul subot suk gato Yefun Allah ben su An bi rus-i gato An jowa tepsu Yekwesu.

⁴Kam dik yo, Yefun Yesus si yerasul ne sum wa git sugit sino sa, Yefun Yesus syaugat yerasul ne do, “Nin mu kadit Yerusalem nde tó, nin eswa suk gato Ji bi Ai tom do, bere An syo suk yo nai nin mone. Ji ki subot suk ne nai nin mó ré.

⁵Yohanes ras nin mo syur, sarewo kam we yo, kam gri yo, Yefun Allah bere syogat Yefun Allah Gen bok nggwa mo nin, ben sato Yefun Allah ras nin mo Yefun Allah Gen anane.”

⁶Sane, tomgato yerasul si Yefun Yesus sum sino, yerasul ndo mo Yefun Yesus do, “Yefun, men bi Yekwesu, re yo, Nan bes men ye Israel jowa men bi bur-i satu kadit ye Roma or ré, bado?”

⁷Yefun Yesus ki do, “Nde ré. Ji bi Ai sor ete fro bi kam-i gato An bes nin ye Israel jowa nin bi bur-i satu. Nin yo jam kom mone nde,

⁸wo su kam gato Yefun Gen bok nggwa mo nin, bere nin ku suktinggi wa nin mu ki sukdu subot os be gato Ji kak wa yetu sok mo Yefun Allah bi rus-i. Bere nin mu ki sukdu ne nai nje mo Yerusalem, mo bur Yudea, mo bur Samaria sane sor, kom mo bur re iwedewe or sino.”

⁹Yefun Yesus ki sukdu kom mone, orge Yefun Allah kar An it mu mo gu ré. Yerasul sokwa An it mu mo gu saresa, yé sokwa, yé sokwa sane sor, nyotem kewa An ré.

¹⁰Yerasul sok mu nim mo gu sane tó, saresa, yerasul gensu yetu ge we gato it san kwo ma ti mo án de.

¹¹Ye we ne ndo do, “Nin, ye Galilea, nin ti nin sok mu nim mo gu re wa suma ne? Yefun Yesus gato Yefun Allah kar it mu mo gu kadit nin, bere kapyo tak Yefun Allah bi An is satu ma mo bur re tepsu nin me Yefun Allah kar An it mu ré.”

¹²Yefun Yesus it mu mo gu, orge yerasul bok ne mu kadit banbo gato gum do Zaitun, án satu mu mo Yerusalem. Kadit banbo Zaitun mu mo kota Yerusalem, os ne syu bergan tepsu kilometer dik.

¹³Án mu kom mo Yerusalem, án mu mo nu gato án kem mone. Án it mo gumwak mo nim. Yerasul gato kem mone gum do, Petrus, Yohanes, Yakobus, Andreas, Filipus, Tomas, Bartolomeus, Matius, Yakobus (gato Alfeus bi pa), Simon (gato sok mo yekweke), si Yudas (gato Yakobus bi pa).

¹⁴Án sino tepsu dik wa ki suk su Yefun petok sor. Nggon ge bok yo dom mone, sisu Maria gato Yefun Yesus bi im, sisu Yefun Yesus bi nji, án sino ki suk su Yefun petok sor.

¹⁵Kamdik-kamdik yé mwa gato onyar kem mo Yefun Yesus sum mo nu ne. Kam dik yo, ye gato sum mone karowa yetu ge wotin dik musyu we. Su kam ne Petrus ti mo yé mwa ne gwem, ete

¹⁶an ki do, “Ji bi nji, ji bi nyanggon, sukdu gato ye krom mo Yefun bi sukdu bere bor mone tó. Su re, kwa dik yo bor it anare, suktaru gato Yefun Allah Gen tarubot Daud subot Yudas bor wa men jam ré. Yudas gwat os wa yeko but Yefun Yesus.

¹⁷Yudas gato Yefun Yesus bes gum yerasul ne, an si men ben suk sino.”

¹⁸(Sugum gato Yudas ku mo sukibit gato an ben ne anato ye so bur det su ne. Bur det gato an kwop mone anato ye so ne. Mo bur det ne an ges gwa mo bur, an onyar buk kadit an kaim syesyar mo nden o sino ré.

¹⁹Yé mwa ne sino mo Yerusalem jam sukdu subot Yudas, sane yé kendo bur det ne gum su án bi a-i do, ‘Akeldama,’ gato bi sukjimnut do, ‘Bur gato yetu dé sye mó.’)

²⁰Daud krom sukdu subot Yudas, sane Petrus ki do, “Daud krom mo buku Mazmur do, ‘Sa ndo sa, an bi nat-i ne, nje yo kem mo nde. Yetu ge dik yo kem mone dom nde.’ Or o Daud krom o do, ‘Sa ndo sa, ye bes yetu ge dik yo win an tepsu yesu.’

²¹Saneyo men bes yetu ge dik yo gum yerasul win Yudas wa an si men sino mu ki sukdu do, men bi Yekwesu Yefun Yesus sun kadit sukkwop it, subere yé mwa ne jam. Ye gato men bes ne, men me kadit ye gato si men sisu men bi Yekwesu Yefun Yesus ne petok sor, kadit kam gato Yohanes ras nje mo syur sor kom mo kam gato Yefun Allah kar Yefun Yesus it mu mo gu kadit men.”

²³Sane yé kibot yetu ge we gato gum do, Yusup gato ye kendo do Barsabas (ye kendo an gum do Yustus dom) si Matias.

²⁴Yé kibot Yusup si Matias, orge yé ki suk su Yefun do, “Yefun, Nan sa, jam men yetu mit si men onyar ne sino, sane kadit ye we re, Nan kadum ye gato Nan iwa men bes win Yudas,

²⁵subere ye ne ben Nan bi suk-i tepsu yerasul win Yudas gato misyar Nan bi suk-i, ete ku sukye ré.”

²⁶Yé ki suk su Yefun Allah, orge yé krom ye we ne gum mo jok we or, ye gwi jok we ne, sane sor, Matias bi jok-i ges mo bur. Sane, yé bes Matias gum yerasul tó yerasul ge musyu dik sop dik ne.