Read Abun Sukdu Subot Yerasul 10 Bible Online

Sukdu Subot Yerasul 10 - Abun bible

Sukdu Subot Yerasul 10

¹Yetu ge dik yo gato gum do Kornelius kem mo kota Kaisarea. Kornelius an ye Roma bi yesukmise bi yesu. An jowa bi yemsok yetu ka wotin dik. An si bi yemsok ne ma kadit bur Italia.

²An si an bi rus-i ne sino jammo Yefun Allah, án sino un Yefun Allah su án mit dik. Kornelius ós ye Yahudi gato yewa suk su suk mwa. An ki suk su Yefun petok sor.

³Kam dik yo, jam gri, kre, an me suk tepsu an semda, wo an yo sem nde. An me Yefun Allah bi malaikat ge dik yo rer ré. Malaikat ne ba ku an, malaikat ne ki do, “Kornelius o!”

⁴Kornelius sokwa malaikat ne, an nyu, an ki do, “Yenggras, suma ne?” Malaikat ne ki do, “Nan ki suk su Yefun Allah sa, Yefun jam suk gato nan ndekwa ne. Yefun Allah me nan ós ye Yahudi gato yewa suk. Suk gato nan ben ne, Yefun Allah jam ré, Yefun Allah mit iwa nan ré.

⁵Re yo, nan syogat yetu ge bok yo mu mo kota Yope kar yetu ge dik yo mone gato gum do Simon, gato ye kendo do Petrus.

⁶Simon Petrus kem mo bi yemuk, Simon bi nu mo sem de. Simon gato bi nu ne ben suk su suge da.”

⁷Malaikat ne ki sukdu ne, orge Kornelius kendo yetu ge we gato ós an mo an bi nu si yesukmise ge dik yo gato an onyar kem mó. Yesukmise ne un Yefun Allah su an mit dik dom.

⁸Kornelius nuk subot suk mwa gato malaikat ki ne, orge an syogat an ka gri mu mo kota Yope.

⁹Bi ik, kam ti ri, ye ka gri ne karowa kota Yope. An ka gri muket os ne tó, Petrus it mo nu yu gato ya wa an ki suk su Yefun.

¹⁰Petrus on de, an mit i wa an git sugit, sarewo sugit yo jon nde tó. Ye kon sugit saresa, an me suk tepsu an semda, wo an yo sem nde.

¹¹An me gu kak or, suk yo sato san det sye sa ma bur. Ben sato ye rai nap at ne su bus, ete ye sa san det ne is ma bur.

¹²Mo san det ne, an me suge gato gwes at wis mwa mó, an me suge yi sato kwis si ndam wis bok yo mone dom.

¹³Sugane an jam Yefun Allah ki nai an do, “Petrus, nan mu, nan gu, nan kon, nan git et.”

¹⁴Petrus ki do, “Yefun, sane nde! Ji yo git sugit gato men ye Yahudi fowa git yo mo nde, wam dik yo dom nde.”

¹⁵Sarewo Yefun Allah ki nai Petrus wam dik yo o do, “Suk gato Yefun Allah ki ndo ne yo, nan ki do, suk ne ibit o nde, nan fowa suk ne o nde.”

¹⁶Petrus me san det is ma bur wam gri, or san det ne satu mo gu o ré.

¹⁷Petrus nalar mo suk gato an me tepsu an semda, an nutbot ndo nde. An nut mo an syidem do, “Yefun Allah duno ji sa u subot suk gato ji me re ne?” Petrus nutbot suk ne saresa, ye kadum Simon bi nu nai ye ka gri gato Kornelius syogat ma ne, or an ka gri ma kom mo Simon bi nu, ete an ka gri ti mo nusyo de nden.

¹⁸Orete ye ka gri ne ké do, “Simon Petrus kem mo nu re, bado?”

¹⁹Petrus nut subot suk gato an me ne saresa, Yefun Allah Gen ki nai an do, “Petrus, yetu ka gri meret nan.

²⁰Sane nan is mu mo bur ku an ka gri et. Nan simo an ka gri, nan bi sukjimnut we nde, we Ji anato syogat an ka gri ma kar nan.”

²¹Sane Petrus is, an ki nai ye ka gri ne do, “Ji anato Petrus gato nin ka gri meret ne. Nin ka gri ma wa suma ne?”

²²Ye ka gri ne ki do, “Ye Roma bi yesukmise bi yesu gato gum do Kornelius syogat men ka gri ma more. An ben sukndo tepsu Yefun Allah mit, an jammo Yefun Allah. Ye Yahudi mwa ne sino un an. An ku Yefun Allah dakai bi malaikat ge dik yo. Malaikat ne syogat Kornelius ndekwa nan mu ku Kornelius mo bi nu, subere Kornelius jam nan bi sukdu et.”

²³Sane Petrus ki do, “Nin ka gri sok mo nu mit et. Nin ka gri sem more.” Bi ik, ete Petrus sun. An si ye ka gri ne mu. Yé gato onyar kem mo Yefun Yesus mo kota Yope ne, yé deyo si án mu sino.

²⁴Án sem mo os noru dik, or bi ik, ete án sino mu kom mo kota Kaisarea. Kornelius si bi rus si bi yesyim bok yo gato Kornelius kendo ma ne, án sino eswa Petrus si nje ba mone.

²⁵Petrus kom mo nu sa, Kornelius ku an, ete Kornelius bare nggwa mo bur tepsu an som Petrus.

²⁶Sarewo Petrus bes Kornelius ti. Petrus ki do, “Nan ti sor! Ji yetu tepsu nan, sane nan som ji nde.”

²⁷Petrus si Kornelius nuk sukdu saresa, an we sok mo nu mit. Mo nu mit ne, Petrus ku yé mwa gato sum mone.

²⁸Petrus ki nai yé mwa ne do, “Nin dakai jam men ye Yahudi bi agama duno men do, men fowa mu ku yewis yi. Men nuk sukdu su dom nde. Nin jamwa ré. Sarewo kam nggwete Yefun Allah kadum nai ji do, sugit mwa ne ndo sino, sane dom, Yefun Allah kadum nai ji do, yetu mwa ne ndo sino, ye gato men fowa ku ne yo mo nde.

²⁹Sane nin kendo ji ma sa, ji ma sor, ji yo bariwa nde. Ji iwa ji jam suma ben anato nin ndekwa ji ba ku nin ne?”

³⁰Sane Kornelius ki do, “Kam atte, jam sare, jam gri kre, ji ki suk su Yefun mo ji bi nu saresa, ji gensu yetu ge dik yo gato it san rup-rek ti mo ji gwem.

³¹An ti mone, an ki do, ‘Kornelius, Yefun Allah jam suk gato nan ndekwa ne it. Yefun Allah me nan ós ye Yahudi gato yewa suk. Yefun Allah mit iwa nan.

³²Re yo, nan syogat yetu ge bok yo mu kar Simon gato gum do Petrus kadit kota Yope ma. Petrus ne kem mo bi yemuk bi nu mo sem de. Simon gato bi nu ne ben suk su suge da.’

³³Sane, sugane it, ji syogat yé bok yo mu kar nan ma. Ji ki ndo mo nan, we nan ba ku men it are. Re yo, men sino sum mo Yefun Allah gwem more wa men jam suk gato Yefun syogat nan ki nai men ne.”

³⁴Sane Petrus ki do, “Re ne, ji jam it. Yefun Allah ben An bi suk-i su yewis mwa ne sino tepsu yu ré. An yo bes yewis dik yo kok wai kadit yewis deyo dom nde.

³⁵Yefun Allah nai nje sok mo An bi rus-i kadit yetu yewis mwa ne sino mo bur re gato jammo An, ete ben suk ri tepsu Yefun Allah mit.

³⁶Yefun Allah taru sukdu subot men ye Israel ne do, An syogat Yesus Kristus ma mo bur re wa kak os ndo wa men yetu subere Yefun Allah nai men gum sok mo An bi rus-i. Sane Yesus Kristus gato gum Yekwesu wa men sino ne kak os wa men si Yefun Allah kem ndo su yu ré. Nin dakai jam sukdu ne mó ré.

³⁷Sane dom, nin jam suk mwa gato Yefun Yesus ben mo bur Yudea. Ketke mo bur Galilea, Yohanes ki bi sukdu-i subot an ras nje mo syur, orete Yefun Yesus ben bi suk mwa ne kas.

³⁸Nin dakai jam do, Yefun Allah bes Yesus, ye Nazaret ne, orete Yefun Allah Gen bok nggwa mo Yefun Yesus, syo suktinggi nai Yefun Yesus. Nin jam do, Yefun Yesus mubot peyo-peyo, An ben sukndo, An ben ye gato i ne ge. Yé mwa gato biris bi yekwesu jom ne, An nai wé kadit biris bi yekwesu, ete ben yé mwa ne ge ré. Yefun Allah sisu An anato An nggiwa ben suk ne.

³⁹Men dakai me suk mwa ne sino gato Yefun Yesus ben mo kota Yerusalem si ye Yahudi bi bur ne sino, men me su men gro ré. Ye mban An mo kwesukwin, ye gu an kwop wé sane,

⁴⁰sarewo kam we rek, ete Yefun Allah sun An kadit sukkwop o ré. Yefun Allah kadum An nai nje me ré.

⁴¹Yefun Allah yo kadum An nai yé mwa ne sino me nde, wo yetu ge bok yo sor gato Yefun Allah bes wa ki sukdu subot suk gato án me su án gro ne. Yefun Yesus sun, orete Yefun Allah kadum An nai men dakai. Men ge bok yo ku An, men si An git sugit ete da syur sino.

⁴²Yefun Yesus syaugat men do, ‘Nin mu ki sukdu subot os ndo gato Ji kak ne nai yé mwa jam et. Nin ki do, Yefun Allah bes Ji tepsu Yepasye gato ndobot yé mwa ne sino, ye gato mbau tó, sisu ye gato kwop nyim ré.’

⁴³Yenabi mwa ne sino ku sukdu subot Yefun Yesus nai nje jam. Án ki do, ye gato onyar kem mo Yefun Yesus, bere ku os mone subere Yefun Allah yo maskwa ye ne mo sukibit gato an ben ne o nde, Yefun Allah yo nutbot sukibit ne o nde.”

⁴⁴Petrus nuk sukdu saresa, Yefun Allah Gen bok nggwa mo yé mwa gato jam sukdu ne.

⁴⁵Ye Yahudi gato onyar kem mo Yefun Yesus gato si Petrus ma mone, án yeket, we án me Yefun Allah Gen bok nggwa mo yewis yi gato ye Yahudi nde.

⁴⁶Án jam Yefun Allah Gen bok nggwa mo yé mwa ne, we yé ki suk su a yi neya, yé bes Yefun Allah gum kok. Orge Petrus ki nai ye Yahudi gato si an ma kadit kota Yope ne do,

⁴⁷“Yewis yi re, Yefun Allah Gen bok nggwa mó án tepsu men ye Yahudi, sane ndo sa, men ras án mo syur dom et.”

⁴⁸Sane Petrus syaugat ye ras yé mwa mo syur sisu Yesus Kristus gum. Orge yé ne ndekwa Petrus kem mone su án kam bok yo o et.