Read Abun Sukdu Subot Yerasul 14 Bible Online

Sukdu Subot Yerasul 14 - Abun bible

Sukdu Subot Yerasul 14

¹Paulus si Barnabas mu kem mo kota Ikonium. Mone an we mu mo ye Yahudi bi nu ari sagana án ben ne. Mo nu ari ne an we ki Yefun Allah bi sukdu subot Yesus Kristus ne wade sukdu ne pet mo nje mone. Sane anato yé mwa, ye Yahudi si yewis yi ne, án nai sukjimnut dik do, án jammo Yefun Yesus tepsu án bi Yekwesu, án onyar kem mo Yefun Yesus it.

²Sarewo ye Yahudi ge bok yo gato bariwa sukdu ne, án krokgat yewis yi ge bok yo subere án bariket ye gato onyar kem mo Yefun Yesus ne.

³Sane Paulus si Barnabas kem mone nam. An we yo nyu nde, an we ki subot an we bi Yekwesu Yefun Yesus bi sukdu. An we ki sukdu subot os ndo gato Yesus Kristus kak wa men yetu ne. Yefun Yesus ben an we nggiwa kadum Yefun Allah bi suktinggi ne bor, subere yé mwa ne sino yeket ete nutbot ndo nde, sane ye nut do sukdu gato an we ki ne sangge.

⁴Sane ye gato kem mo kota ne wat yu. Deyo simo ye Yahudi gato bariwa Yefun Yesus bi sukdu-i, deyo simo yerasul gato jammo Yefun Yesus.

⁵Sane ye Yahudi deyo si yewis yi deyo si an bi yekwesu, án syeret os wa Paulus si Barnabas. Án iwa ben sukye nai Paulus si Barnabas, án iwa am an we ne su jok wade an we kwop wé.

⁶Sarewo an we jam kom mo án bi sukjimnut, sane an we titi mu mo kota Listra si kota Derbe mo bur Likaonia kadit. An we mubot bur Likaonia ne.

⁷Mone an we ki sukdu subot os ndo gato Yesus Kristus kak wa men yetu subere Yefun Allah nai men gum sok mo An bi rus-i.

⁸Mo kota Listra an we ku yetu ge dik yo gato gwes út. Ye ne gwes út kadit kam gato an bi im kem su an, an yo muket an gwes mo nde.

⁹Paulus ki sukdu nai nje mone sa, ye gato gwes út ne syaretwa Paulus bi sukdu ne. Orete Paulus sokwa an, Paulus jam mo an mit do, ye ne sa, kwabom kam mo Yefun Yesus do, bere Yefun Yesus ben an gwes nggi.

¹⁰Sane, Paulus ki nggi nai ye ne do, “Nan ti su nan gwes se!” Sugane it, ye ne yak ti, ye ne muket an gwes.

¹¹Yé mwa gato mone me suk gato Paulus ben ne sa, yé mwa ne saiye su a Likaia do, “Mban! Suk gato men som ne ma ku men it anare. Men bi yefun is ma ku men it. Án ka sa yetu!”

¹²Yé kendo Barnabas gum do Zeus, {we yé nut do Barnabas gro-i anato tepsu án bi yefun gato án som ne gato gum do Zeus gro-i.} Yé kendo Paulus gum do Hermes, we Paulus anato ki sukdu mwa ne, {tepsu án bi yefun dik yo o gato án nut do tepsu yegweswai.}

¹³Yé ne som án bi yefun dik yo gato gum do Zeus mo nu gato án nggo mo kota de nden. Sane yesu ge dik yo gato ben suk mo Zeus bi nu ne ma. An gwat sapi ge ndi bok yo si bunga ma mo ros syo mo kota wa an si yé mwa mone som ye we ne su.

¹⁴Sarewo yerasul we ne, Barnabas si Paulus jam suk gato yé mwa ne iwa ben sa, an we syik an we bi san, subere yé mwa ne jam do, an we bariwa suk gato yé mwa iwa ben ne. An we ben sane, or an we kasbot yé mwa miten, an we saiye do,

¹⁵“Nin gwat suksom wa men wa suma ne? Men ka we yetu tepsu nin sor ré. Nin som men ka we nde. Men ka we ma wa ki sukdu subot os ndo gato Yesus Kristus kak wa men yetu ne, subere nin misyar yefun bok yo gato jom nin ne. Yefun bok ne yo ós nin nde, sane yefun bok gato yo mbau nde nin brek kadit, ete nin jammo Yefun Allah gato gesyos ne sor. Nin bi nin nggwa mo Yefun Allah gato ut gu nim ne, bur re si sem si suk mwa mone sino et.

¹⁶Suga nyim tuya Yefun Allah misyar yetu ben suk ket án i ne sor,

¹⁷wo Yefun Allah kadum An nggwa nai men sare do: An ben sukndo su men, An syo nogi is ma kadit gu, suk gato men jan, An ben kom sisu ndo, An syo sugit mwa nai men, ete An ben men mit iwa suk mwa ne.”

¹⁸An we duyawa yé mwa su sukdu ne, sarewo bergan yé mwa ne som an we su suk gato án gwat ma ne tó, wo kom mo rut sa, yé mwa ne misyar ré.

¹⁹Orge ye Yahudi ge bok yo ma kadit kota Antiokhia si kota Ikonium ma mo Listra. Yé bok ne ben kidar yé mwa mone subere yé mwa ne simo os ibit gato án ben ne, or án sino am Paulus su jok wa gu Paulus kwop. Án am Paulus su jok, án nut do Paulus kwop ré, or án gwat Paulus mu mo kota de nden.

²⁰Ye gato onyar kem mo Yefun Yesus sum wairi wa Paulus sa, Paulus sun or ré, Paulus satu mu mo kota mit. Bi ik, ete Paulus si Barnabas mu kadit kota ne, an we mu mo kota Derbe.

²¹Paulus si Barnabas mu kom mo Derbe. Mone, an we ki sukdu subot os ndo gato Yesus Kristus kak wa men yetu ne, ete yé mwa mone nai sukjimnut do, án onyar kem mo Yefun Yesus it. Orge Paulus si Barnabas mubot kota bok yo o wa ós ye gato onyar kem mo Yefun Yesus, Paulus si Barnabas ós yé ne onyar kem mo Yefun Yesus nggi wai o, subere yé ne jammo Yefun Yesus petok sor. An we mu mo kota Listra e, kota Ikonium sisu kota Antiokhia mo bur Pisidia. An we ki nai ye gato mone do, “Men yé gato onyar kem mo Yefun Yesus, mo bur re men ku sukye mwa, subere ri ma, men sok mo Yefun Allah bi rus-i mo nat be gato Yefun Allah fro wa men.”

²³Mo kota bok ne sino gato an we mu mone, Paulus si Barnabas bes yekwesu mo nu ari wa mewa ye gato onyar kem mo Yefun Yesus mo kota bok ne. An we mewa nggwa kadit sugit yei, an we ki suk su Yefun sor. An we ki suk su Yefun do, “Yefun Allah, yekwesu re onyar kem mo Nan it. Nan mewa án, Nan ben án nggiwa án ben suk tepsu yekwesu wa mewa ye gato onyar kem mo Yefun Yesus.”

²⁴Paulus si Barnabas mubot bur Pisidia, orge an we mu kom mo bur Pamfilia.

²⁵An we ki subot Yefun Allah bi sukdu subot Yefun Yesus mo kota Perga, orge an we mu mo kota Atalia.

²⁶An we mu kadit kota Atalia, an we simo kwem satu mu mo kota Antiokhia. Ye gato onyar kem mo Yefun Yesus suga nyim mo Antiokhia ne, án ak án syim mo Paulus si Barnabas subere Yefun Allah mewa an we mo Yefun bi suk-i gato an we ben ne. Sane suk gato Yefun Allah kiwa an we ben ne, an we ben or ré.

²⁷An we mu kom mone, or an we kendo ye gato onyar kem mo Yefun Yesus sum sino, orge an we ki subot suk mwa gato Yefun Allah ben su an we mo pe bok yo gato an we mu mone. An we ki do, “Yefun Allah ben men ka we nggiwa men ka we ki subot An bi sukdu, Yefun Allah ben men ka we nggiwa ben sukye gato ben nje yeket. Yefun Allah kak os wa men ka we ki An bi sukdu nai yewis yi, ete yewis yi mwa ne nai sukjimnut do, án onyar kem mo Yefun Yesus mone dom.”

²⁸An we si ye gato onyar kem mo Yefun Yesus mo kota ne kem mone nam dom.